>
ཁྱེད་ཀྱི་གནས་ཡུལ། > གཙོ་ངོས། > སྨན་རྫས། > སྔོ་ཡི་སྨན། > > ནང་དོན།

སྲོ་ལོ་སུག་འདྲ།

ཇུས་འགོད་པ། སྒྲོལ་མ་མཚོ། རྩོམ་སྒྲིག་པ། བོད་གཞུག་སྐྱིད། དུས་ཚོད། 2015-05-21 11:57:42 ཀློག་གྲངས། 28

    བདུད་རྩི་སྨན་གྱི་རྣམ་དབྱེ་ངོ་བོ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང་ལས། སྲོ་ལོ་སུག་འདྲས་གློ་བའི་ཚད་པ་སེལ།། ཞེས་པར། དཔག་བསམ་ལྗོན་ཤིང་ལས། གངས་ཀྱི་སྲོལ་དཀར་ཞེས་བྱ་བ།། གངས་འདབ་ལོགས་དང་ནགས་ལས་སྐྱེ།། མེ་ཏོག་སྐར་ཆེན་རྒྱས་པ་འདྲ།། རིགས་སུ་ཕྱེ་ན་མང་བཤད་ཀྱང་།། འདི་ཡི་རང་བཞིན་ཁ་བ་ཡིན།། སྟོད་དུ་ཚ་བ་རྒྱས་ན་གཏོང་།། ཁྱད་པར་གློ་བའི་ཚ་བ་སེལ།། ཞེས་དང་། རང་བྱུང་པས། སྲོ་ལོ་དཀར་པོས་གློ་ཚད་འཇོམས།། དམར་པོས་ཚད་སེལ་ཁ་དྲི་སྦྱོངས།། ཞེས་པ་ལ་རིགས་གསུམ། དཀར་སྨུག་དམར་གསུམ་མོ། དཀར་པོ་ལ་མིང་། གངས་ཀྱི་སེང་ཆུང་། གངས་སྦྲུལ་དཀར་པོ། སྟག་སྨན་ཟིལ་པ་ཅན། སེང་སྐྱ་རལ་བ་ཅན། བྱ་རྒོད་བུ་གསོ། ཡུ་མོ་གློ་སྨན། སྲོལ་ཆུང་བ་རྣམས་ཟེར། འདྲ་དཔེ་ལས། སྲོ་ལོ་དཀར་པོ་ཞེས་བྱ་བ།། གཡའ་རི་གངས་རི་རྫ་ལས་སྐྱེ།། རྩ་བ་ཕྲ་དཀར་གཏིང་པ་རིང་།། ལོ་མ་མེ་ཏོག་གཉིས་ཀ་དཀར།། མེ་ཏོག་དཀར་དམར་མདངས་དྲི་ཆེ།། ཙནྡན་དཀར་པོའི་དྲི་བས་ཞིམ།། གང་བུ་ལེབ་མོ་འབྲས་བུ་ཞིབ།། ཅེས་དང་། ལྗོན་ཤིང་འཁྲུངས་དཔེར། གངས་ཀྱི་སེང་ཆུང་བྱ་བ་ནི།། གངས་དཀར་རྩེ་ལས་སྐྱེ་བ་ཡིན།། མེ་ཏོག་དཀར་དམར་འོད་དང་ལྡན།། ཚ་བའི་ནད་ཀུན་སེལ་བ་ཡིན།། རྨ་ཡི་རྩ་ཁ་སྡོམ་པར་བྱེད།། ཡན་ལག་ཆུ་འཐུད་བྱ་བ་ཡིན།། ཁྱད་པར་རྙོག་པའི་ཚ་བ་སེལ།། ཞེས་པས་ལོ་མ་དཀར་པོ་ཅན་ཆུང་ལ་རྩ་བ་ཕྲ་ཞིང་རིང་བ་ཅན་ཏེ། འདི་བསིལ་བའི་ཚད་ནི་སྣོད་གཉིས་སུ་ཆུ་མང་ཉུང་འདྲ་བ་རེ་སྐོལ་ནས་གཅིག་ལ་འདི་བཏབ་པས། གཞན་དེ་ངར་མ་ཆགས་དུས་ནས། སྲོ་ལོ་བཏབ་པ་འཁྱགས་པར་འགྱུར་ཞེས་བཤད། སྲོ་ལོ་སྨུག་པོ་ནི། འདྲ་དཔེ་ལས། སྲོ་ལོ་སྨུག་པོ་སུག་འདྲ་ནི།། ལོ་མ་དཀར་སྨུག་མདངས་ཅན་གྱོང་།། མེ་ཏོག་དམར་ལ་གང་བུ་ནི།། གཞུ་ཤུབས་འདྲ་བ་འབྲས་བུ་ལེབ།། རྩ་བ་ཅུང་སྦོམ་སུག་པ་འདྲ།། ཞེས་པ་དེའོ།། སྲོ་ལོ་དམར་པོ་ནི། ལྕགས་ཀྱི་ཕྲེང་བ་ལས། ཚན་གྱི་ནུས་པ་བསིལ་ལ་འཇམ།། ཞེས་པས། ལར་སྲོ་ལོའི་རིགས་ཐམས་ཅད་ཚན་ཡིན་ལ། ཁྱད་པར་དམར་པོ་ཚན་དམར་འདི་ལ་ཚན་རང་ཟེར་བར། དབྱེ་བ་ལྷ་ཚན་འདྲེ་ཚན་ཕོ་མོ་མ་ནིང་ལྔ་དང་། དེ་ལའང་གངས་ཚན།གཡའ། སྤང་། ཆུ་སོགས་དབྱེ་ཡང་། སྐྱེ་ས་དང་ཤེད་ཆེ་ཆུང་ཕྲ་སྦོམ་གྱི་དབྱེ་བ་ལྟ་བུ་ལས་ཆེར་མེད། མངོན་རྟོགས་ལས། སྲོ་ལོ་དམར་པོ་ཚན་དམར་ཏེ།། རྫ་བྲག་གཡའ་སྤང་ཆུ་ལ་སོགས།། གར་ཡང་སྐྱེ་ལ་སྤྲུལ་པ་མང་།། སྡོང་པོ་དམར་གྱོང་རབ་ཏུ་མང་།། ལོ་མ་མཐུག་སྤུན་དངུལ་ཟིལ་ཅན།། སྡོང་བུ་ཡོངས་ལ་ལོ་མས་ཁྱབ།། སྟོན་དུས་དམར་བས་བན་བཙུན་འདྲ།། མེ་ཏོག་གང་འབྲས་དམར་ལ་རྩུབ།། རྩེ་མོ་རྦད་ཀྱིས་བཅད་པ་འདྲ།། རྩ་བ་མི་ཡི་གློ་བ་འདྲ།། པགས་པ་ནག་མཐུག་དྲི་ངད་ཆེ།། མངར་ཁ་བསྐ་ལ་ནུས་པ་བསིལ།། ནུས་པས་གློ་གསོ་ཚད་པ་འཇོམས།། བཅུད་དུ་བླངས་ན་ལུས་ཟུངས་སྤེལ།། མཁུར་བ་བཀང་ན་ཁ་དྲི་སྦྱོང་།། མཆོད་པ་བྱས་ན་ལྷ་རྣམས་མཉེས།། ཆུར་སྦྱངས་བཀྲུས་ན་ཉེས་ཀུན་འདག། ཅེས་གསུངས་པ་ཡིན།གངས་འདབ་ཏུ་སྐྱེ་བའི་ཚན་ཆུང་སྔ་མ་འདྲ་བ་ལས་རྩ་བ་དཀར་ཤས་ཆེ་བ་ཆུང་ངུ་གེར་སྐྱེས་ལ་བདུད་རྩི་གངས་ཤམ་པ་ཡང་ཟེར། གངས་ཤམ་པར་ངོས་འཛིན་ཡང་དངོས་འདི་མ་ཡིན། བཅུད་དུ་ལེན་ཚུལ་དང་དབྱེ་བ་ཞིབ་པ་ནི་བདག་གི་སྙན་བརྒྱུད་ཟིན་བྲིས་ལྷན་ཐབས་བཅུད་ལེན་སྐབས་རྒྱས་པར་བྲིས་ཡོད།
   གསོ་དཔྱད་སྔོ་སྣ་ཚོགས་ཀྱི་མན་ངག་རིན་པོ་ཆེའི་འཁྲུངས་དཔེ་བསྟན་པ་ལས། སྲོ་ལོ་སུག་འདྲ་ནི་གཡའ་སྤང་སྐྱེ་བ་སྲོ་ལོའི་རིགས་སྡོང་སུག་པ་འདྲ་བ།

X