//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་དང་པོ། སྡོམས་ཚིག་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:20:14 ཀློག་གྲངས། 47 

དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻ་ཌཱིཪྻ་འོད་ཀྱི་རྒྱལ་པོ་དེས་ཏིང་ངེ་འཛིན་དེ་ལས་བཞེངས་ཏེ། སྨྲ་བའི་སེང་གེ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་སོ།། སྙོམས་པར་ཞུགས་མ་ཐག་ཏུ་དབུའི་གཙུག་ནས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་ལུས་ཀྱི་ཉེས་པའི་སྐྱོན་བསལ། རླུང་མཁྲིས་བད་ཀན་གྱི་ནད་ཐམས་ཅད་ཞི་བར་བྱས་ནས་སླར་དབུའི་གཙུག་ཏུ་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་སྐུ་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། གསུང་ལས་སྤྲུལ་པའི་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། བསྡུས་དོན་རྩ་རྒྱུད་དེ་ལྟར་གསུངས་ལགས་ན།། བཤད་པའི་རྒྱུད་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཀའ་སྩོལ་ཞིག། དེ་སྐད་ཅེས་ཞུས་པ་དང་། སྐུ་ལས་སྤྲུལ་པའི་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། གཉིས་པ་བཤད་པའི་རྒྱུད་ལ་བསླབ་པ་ནི།། འགྲོ་དྲུག་གཙོ་བོར་གྱུར་པ་མི་ལུས་ལ།། མི་ན་གནས་དང་ན་བ་གསོ་བ་དང་།། ཚེ་རིང་ཆོས་ནོར་བདེ་བ་སྒྲུབ་པའི་ཕྱིར།། གསོ་བ་རིག་པའི་དོན་རྣམས་མདོར་བསྡུ་ན།། གསོ་བྱ་གསོ་བྱེད་ཇི་ལྟར་གསོ་བ་དང་།། གསོ་བ་པོ་དང་རྣམ་པ་བཞི་རུ་བཤད།། དང་པོ་གསོ་བར་བྱ་བའི་ཡུལ་བསྟན་པ།། གང་གི་དོན་དུ་གསོ་བ་ལུས་དང་ནི།། གང་གསོ་དེ་ལས་བྱུང་བའི་ནད་དུ་བསྟན།། ནད་ལ་གསོ་བར་བྱེད་པའི་གཉེན་པོ་ནི།། སྤྱོད་ལམ་ཟས་དང་སྨན་དང་དཔྱད་རྣམས་སོ།། ནད་དེ་གཉེན་པོས་ཇི་ལྟར་གསོ་བ་ལ།། ནད་མེད་གནས་ཤིང་རིང་དུ་འཚོ་བ་དང་། རྣམ་གྱུར་ན་བ་གསོ་བར་བྱ་བའོ།། དེ་ལ་ངོས་བཟུང་བརྟག་པའི་ཐབས་དང་ནི།། རྟོགས་ནས་ཇི་ལྟར་གསོ་བའི་གསོ་ཚུལ་དང་།། གང་གིས་གསོ་བའི་གསོ་ཐབས་གསུམ་དུ་བཤད།། དེ་ལྟར་གསོ་བར་བྱེད་པའི་གསོ་བ་པོ།། རྩ་བ་བཞི་ལ་ཡན་ལག་བཅུ་གཅིག་སྟེ།། འདི་དག་བཤད་པའི་རྒྱུད་ཀྱི་སྡོམས་ཚིག་ཡིན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཀྱི་སྡོམས་ཚིག་བསྟན་པའི་ལེའུ་སྟེ་དང་པོའོ།། །།

གོང་ངོས། ཡིག་ཆ་མི་འདུག
X