//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་གསུམ་པ། ལུས་ཀྱི་འདྲ་དཔེ་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:32:35 ཀློག་གྲངས། 36 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། འདྲ་དཔེ་ཕུང་པོའི་གནས་ལུགས་བསྟན་པ་ནི།། དཔྱི་རུས་གཉིས་ནི་རྩིག་པའི་འགྲམ་གཞི་འདྲ།། རྒལ་ཚིགས་གསེར་གྱི་དོང་ཙེ་བརྩེགས་པ་འདྲ།། སྲོག་པ་རྩ་ནི་མཆོང་གི་ཀ་བ་འདྲ།། བྲང་རུས་གྲུ་བཞི་གདུང་མ་བཀལ་བ་འདྲ།། རྩིབ་མ་ཉེར་བཞི་ཕྱམ་འགྲེམས་ལེགས་པ་འདྲ།། ལྷ་རུ་རྩེ་ནི་ཕྱམ་གྱི་རྟེན་མ་འདྲ།། རྩ་དང་ཆུ་རྒྱུས་དྲལ་ཕྱམ་བཀོད་པ་འདྲ།། ཤ་དང་པགས་པ་འདག་ཞལ་བྱས་པ་འདྲ།། སྒྲོག་རུས་གཉིས་ནི་མཁར་བད་བཏགས་པ་འདྲ།། སོགས་པ་གཉིས་ནི་གྲུ་ཕུབས་ཕིབསབྱས་པ་འདྲ།། མགོ་བོ་དབུ་རྩེ་བ་གམ་བྱས་པ་འདྲ།། དབང་པོ་སྒོ་ལྔ་སྐར་ཁུང་གཏོད་པ་འདྲ།། ཐོད་པའི་རུས་པ་རྒྱ་ཕུབས་བཀལ་བ་འདྲ།། ཚངས་པའི་བུ་ག་དུད་ཁུང་ཕྱེ་བ་འདྲ།། རྣ་བ་གཡས་གཡོན་ཁྱུང་མགོ་འགྱིང་བ་འདྲ།། སྣ་བུག་མཛེས་པའི་རྒྱན་ཏེ་ཏོག་དང་འདྲ།། སྐྲ་ལོ་ཕོ་གྱོ་མོ་གྱོའི་རྫ་དང་འདྲ།། ལག་པ་གཉིས་ནི་དར་དཔྱངས་བཏགས་པ་འདྲ།། བྱང་ཁོག་སྟོད་སྨད་ཁྱམས་སྟོད་ཁྱམས་སྨད་འདྲ།། མཆིན་དྲི་དར་གྱི་ཡོལ་བ་བཀྲམ་པ་འདྲ།། སྙིང་ནི་རྒྱལ་པོ་གདན་ལ་བཞུགས་པ་འདྲ།། གློ་བ་མ་ལྔ་ནང་གི་བློན་པོ་འདྲ།། གློ་བ་བུ་ལྔ་རྒྱལ་པོའི་སྲས་དང་འདྲ།། མཆིན་མཆེར་གཉིས་ནི་བཙུན་མོ་ཆེ་ཆུང་འདྲ།། མཁལ་མ་ཕྱི་བློན་གྱད་པ་གདུང་འདེགས་འདྲ།། བསམ་སེའུ་ནི་ནོར་གྱི་བང་མཛོད་འདྲ།། ཕོ་བ་གཡོས་བཅུ་བྱེད་པའི་ཁོག་མ་འདྲ།། རྒྱུ་མ་ལོང་ཁ་བཙུན་མོའི་གཡོག་དང་འདྲ།། མཁྲིས་པ་སྡོར་གྱི་རྐྱལ་པ་བཀལ་བ་འདྲ།། ལྒང་ཕུག་ཆུ་ཡིས་རྫ་མ་བཀང་བ་འདྲ།། འོག་སྒོ་གཉིས་ནི་ཆུ་ཁུང་བཞག་པ་འདྲ།། རྐང་པ་གཉིས་ནི་སྒོ་ཡི་རྟ་བབས་འདྲ།། གཉན་པའི་གནད་ནི་རྒྱལ་པོས་མངའ་བསྐུར་འདྲ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་འདྲ་དཔེ་བསྟན་པའི་ལེའུ་སྟེ་གསུམ་པའོ།། །།

X