//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཞི་པ། ལུས་ཀྱི་གནས་ལུགས་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:33:38 ཀློག་གྲངས། 37 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།ལུས་ཀྱི་གནས་ལུགས་བསྟན་པ་རྣམ་བཞི་སྟེ།། ལྡང་ཚད་ལུས་ཟུངས་གནས་ལུགས་བསྟན་པ་དང་།། འབྲེལ་པ་རྩ་ཡི་གནས་ལུགས་བསྟན་པ་དང་།། གཉན་པ་གནད་ཀྱི་གནས་ལུགས་བསྟན་པ་དང་།། རྒྱུ་ལམ་བུ་གའི་གནས་ལུགས་བསྟན་པའོ།། དང་པོ་རླུང་གི་ལྡང་ཚད་ལྒང་ཕུག་གང་།། མཁྲིས་པའི་ལྡང་ཚད་རང་གི་གསང་སྒྲོ་གང་།། བད་ཀན་ལྡང་ཚད་རང་གི་སྙིམ་པ་གསུམ།། ཁྲག་དང་ཕྱི་སའི་ལྡང་ཚད་སྙིམ་པ་བདུན།། གཅིན་དང་ཆུ་སེར་ལྡང་ཚད་སྙིམ་པ་བཞི།། ཞག་དང་ཚིལ་བུའི་ལྡང་ཚད་སྙིམ་པ་དོ།། མདངས་དང་ཁུ་བའི་ལྡང་ཚད་ཁྱོར་བ་རེ།། ཀླད་པའི་ལྡང་ཚད་རང་གི་སྙིམ་པ་གང་།། ཤ་ཡི་ལྡང་ཚད་སྤར་ཚད་ལྔ་བརྒྱ་སྟེ།། བུད་མེད་བླ་བརླདང་ནུ་མ་ཉི་ཤུས་ལྷག། རུས་པའི་ལྡང་ཚད་རུས་རིགས་ཉི་ཤུ་གསུམ།། དེ་ལས་རྒལ་ཚིགས་འཕང་ལོ་ཉི་ཤུ་བརྒྱད།། རྩིབ་མའི་གྲངས་ནི་ཉི་ཤུ་རྩ་བཞི་སྟེ།། སོ་ཡི་གྲངས་ནི་སུམ་ཅུ་རྩ་གཉིས་མཆིས།། རུས་པའི་དུམ་བུ་སུམ་བརྒྱ་དྲུག་ཅུ་སྟེ།། ཡན་ལག་ཚིགས་ཆེན་རྣམ་པ་བཅུ་གཉིས་ཡོད།། ཚིགས་ཕྲན་ཉིས་བརྒྱ་དང་ནི་ལྔ་བཅུའོ།། ཆུ་བ་བཅུ་དྲུག་རྒྱུས་པ་དགུ་བརྒྱ་མཆིས།། སྐྲ་ཡི་ཉག་མ་ཉི་ཁྲི་ཆིག་སྟོང་སྟེ།། བ་སྤུའི་བུ་ག་བྱེ་བ་ས་ཡ་མཆིས།། དོན་ལྔ་སྣོད་དྲུག་བུ་ག་སྒོ་དགུ་ཡོད།། འཛམ་གླིང་རང་ལུས་འདོམ་གང་གྲུ་བཞི་སྟེ། གཟུགས་ངན་རྣམས་ལ་རང་ཁྲུ་ཕྱེད་དང་བཞི།། འབྲེལ་པ་རྩ་ཡི་གནས་ལུགས་བསྟན་པ་ནི།། ཆགས་སྲིད་འབྲེལ་པ་ཚེ་ཡི་རྩ་དང་བཞི།། ཆགས་པའི་རྩ་ནི་ལྟེ་བ་ལས་གསུམ་གྱེས།། རྩ་གཅིག་གྱེན་ལ་སོང་བས་ཀླད་པ་ཆགས།། གཏི་མུག་ཀླད་པར་བརྟེན་ནས་གནས་པ་སྟེ།། དེ་ལས་བད་ཀན་སྐྱེད་པས་སྟོད་ན་གནས།། རྩ་གཅིག་བར་དུ་ཟུག་པས་སྲོག་རྩ་ཆགས།། ཞེ་སྡང་སྲོག་རྩ་ཁྲག་ལ་བརྟེན་ནས་གནས།། དེ་ལས་མཁྲིས་པ་སྐྱེད་པས་བར་ན་གནས།། རྩ་གཅིག་ཐུར་དུ་ཟུག་པས་གསང་བ་ཆགས།། འདོད་ཆགས་ཕོ་མོའི་གསང་བར་གནས་པ་སྟེ།། དེ་ལས་རླུང་སྐྱེད་སྨད་ན་གནས་པ་ཡིན།། སྲིད་པའི་རྩ་བོ་ཆེ་ནི་རྣམ་བཞི་སྟེ།། དབང་པོ་ཡུལ་ལ་འཆར་བར་བྱེད་པའི་རྩ།། ཀླད་པ་ལ་སྲིད་རྩ་ཕྲན་ལྔ་བརྒྱས་བསྐོར།། དྲན་པའི་དབང་པོ་གསལ་བར་བྱེད་པའི་རྩ།། སྙིང་ལ་སྲིད་ཅིང་རྩ་ཕྲན་ལྔ་བརྒྱས་བསྐོར།། ལུས་ཀྱི་ཕུང་པོ་ཆགས་པར་བྱེད་པའི་རྩ།། ལྟེ་བ་ལ་སྲིད་རྩ་ཕྲན་ལྔ་བརྒྱས་བསྐོར།། བུ་ཚ་རིགས་རྒྱུད་འཕེལ་བར་བྱེད་པའི་རྩ།། མཚན་མ་ལ་སྲིད་རྩ་ཕྲན་ལྔ་བརྒྱས་བསྐོར།། སྟེང་འོག་ཐད་ཀར་ལུས་ཀུན་རྗེས་སུ་འཛིན།། འབྲེལ་པའི་རྩ་ལ་དཀར་ནག་གཉིས་ཡོད་དེ།། སྲོག་པ་རྩ་ནི་རྩ་ཡི་སྡོང་པོ་ལ།། ཡལ་གའི་ཚུལ་དུ་གྱེན་ལ་གྱེས་པ་ཡི།། ཤ་ཁྲག་འཕེལ་བྱེད་རྩ་ཆེན་ཉི་ཤུ་བཞི།། དོན་སྣོད་ནང་འབྲེལ་སྦས་པའི་རྩ་ཆེན་བརྒྱད།། ཡན་ལག་ཕྱིར་འབྲེལ་མངོན་པའི་རྩ་བཅུ་དྲུག། དེ་ལས་གྱེས་པའི་གཏར་རྩ་བདུན་ཅུ་བདུན།། གཉན་པའི་རྩ་གནད་བརྒྱ་དང་བཅུ་གཉིས་ཏེ།། འདྲེས་པའི་རྩ་ཕྲན་བརྒྱ་དང་བརྒྱད་ཅུ་དགུ།། དེ་ལས་ཕྱི་ནང་བར་གསུམ་བརྒྱ་ཉི་ཤུ།། རྩ་ཕྲན་སུམ་བརྒྱ་དྲུག་ཅུར་གྱེས་པ་ཡིན།། དེ་ལས་རྩ་ཕྲན་བདུན་བརྒྱ་དག་ཏུ་གྱེས།། དེ་ལས་ཡང་ཕྲན་ལུས་ལ་དྲ་བར་འབྲེལ།། ཀླད་པ་རྩ་ཡི་རྒྱ་མཚོ་ཆེན་པོ་ལས།། རྩ་བ་ལྟ་བུར་ཐུར་དུ་ཟུག་པ་ཡི།། བྱ་བ་བྱེད་པའི་ཆུ་རྩ་བཅུ་དགུ་ཡོད།། དེ་ཡང་དོན་སྣོད་ནང་དུ་འབྲེལ་པ་ཡི།། དར་གྱི་དཔྱངས་ཐག་བཅུ་གསུམ་སྦས་པའི་རྩ།། ཡན་ལག་ཕྱིར་འབྲེལ་མངོན་པའི་རྩ་དྲུག་སྟེ།། དེ་ལས་ཆུ་རྩ་ཕྲན་བུ་བཅུ་དྲུག་གྱེས།། མི་ལ་ཚེ་ཡི་རྩ་ནི་གསུམ་ཡོད་དེ།། གཅིག་ནི་མགོ་ལུས་ཐམས་ཅད་ཁྱབ་པར་གནས།། གཅིག་ནི་དབུགས་དང་འགྲོགས་ནས་རྒྱུ་བ་སྟེ།། གཅིག་ནི་བླ་དང་འདྲ་སྟེ་འཁྱམ་པ་ཡིན།། རླུང་ཁྲག་རྒྱུ་བའི་བུ་ག་ཕྱི་ནང་ཀུན།། འབྲེལ་བྱས་ལུས་ནི་སྐྱེད་ཅིང་གནས་པ་དང་།། སྲོག་གི་རྩ་བ་ཡིན་ཕྱིར་རྩ་ཞེས་བྱ།། གཉན་པའི་གནད་ལ་ཤ་ཚིལ་རུས་པ་དང་།། ཆུ་རྒྱུས་དོན་སྣོད་རྩ་ཡི་གནད་དང་བདུན།། ཤ་གནད་སྐྲངས་ཤིང་རུས་གནད་ན་ཟུག་ཆེ།། ཆུ་རྒྱུས་གནད་རྣམས་འཇའ་བར་བྱེད་པ་སྟེ།། རྩ་ཚིལ་དོན་སྣོད་གནད་ཀྱིས་སྲོག་འདོར་བྱེད།། འཆི་སྦྱོང་གསོ་བ་དཀའ་ཕྱིར་གནད་ཅེས་བྱ།། ཤ་གནད་བཞི་བཅུ་རྩ་ལྔ་ཚིལ་གནད་བརྒྱད།། རུས་པའི་གནད་ནི་སུམ་ཅུ་རྩ་གཉིས་ཏེ།། རྒྱུས་གནད་བཅུ་བཞི་དོན་གནད་བཅུ་གསུམ་དང་།། རྩ་གནད་བརྒྱ་དང་དགུ་བཅུ་ཐམ་པ་ཡོད།། མགོ་ལ་རེ་གཉིས་སྐེ་ལ་སོ་གསུམ་དང་། དགུ་བཅུ་གོ་ལྔ་བྱང་ཁོག་སྟོད་སྨད་གནས།། བརྒྱ་དང་བཅུ་གཉིས་ཡན་ལག་བཞི་ལ་གནས།། གནད་ཀྱི་རྣམ་གྲངས་སུམ་བརྒྱ་རྩ་གཉིས་བཤད།། དེ་ལས་རབ་ཏུ་གཉན་པ་དགུ་བཅུ་དྲུག། ཆོད་ཟིན་སྲོག་འདོར་མཁས་ཀྱང་བཅོས་སུ་མེད།། འབྲིང་དུ་གཉན་པ་བཞི་བཅུ་རྩ་དགུར་བཤད།། མཁས་པ་རྣམས་ཀྱིས་བཅོས་སུ་བཏུབ་པ་ཡིན།། དེ་ལས་ལྷག་པ་གནད་དུ་བསྟན་ན་ཡང་།། གཉན་པར་མ་བཤད་ཀུན་གྱིས་གསོ་བར་ནུས།། རྒྱུ་ལམ་བུ་གའི་གནས་ལུགས་ཕྱི་ནང་གཉིས།། ནང་གི་བུ་ག་སྲོག་ཟུངས་དྲི་མ་གསུམ།། ཆུ་དང་ཟས་རྒྱུ་བཅུ་གསུམ་གནས་པ་ཡིན།། ཕྱི་ཡི་བུ་ག་མགོར་བདུན་གསང་བར་གཉིས།། བུད་མེད་མངལ་སྒོ་ནུ་མ་གཉིས་ཀྱིས་ལྷག། དབྱིབས་ཟླུམ་སྦོམ་དང་ཕྲ་ལ་རིང་འབྲེལ་གྱེས།། ལོ་མའི་རྒྱབ་ཀྱི་རྩ་ལྟར་གནས་པ་འོ།། དངས་མ་ཉེར་འཕེལ་སྒོ་ནི་བུ་ག་སྟེ།། ཟས་དང་སྤྱོད་ལམ་མི་མཐུན་བསྟེན་པ་ཡིས།། བུ་གའི་རྒྱུ་ལམ་གནོད་པས་ནད་སྐྱེད་ལ།། མང་འབྱུང་འགགས་དང་གཞན་འགྲོ་འཁྲུག་པར་བྱེད།། གནོད་མེད་བུ་ག་དག་པས་བདེ་བར་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་གནས་ལུགས་བསྟན་པའི་ལེའུ་སྟེ་བཞི་པའོ།། །།

X