//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་དགུ་པ། ནད་ཀྱི་རྐྱེན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:39:28 ཀློག་གྲངས། 30 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགརྒྱུ་ལ་སྐྱེད་པར་བྱེད་པའི་རྐྱེན་གསུམ་སྟེ།། སྐྱེ་མཆེད་གསོག་ལྡང་སློང་རྐྱེན་རྣམ་པ་གསུམ།། སྐྱེ་ཞིང་མཆེད་པར་བྱེད་པ་སྐྱེ་མཆེད་དང་།། གསོག་ཅིང་ལྡང་བར་བྱེད་པས་གསོག་ལྡང་ཞེས།། བསགས་པ་སློང་བར་བྱེད་པ་སློང་རྐྱེན་ཡིན།། སྐྱེ་མཆེད་དུས་དང་དབང་པོ་སྤྱོད་ལམ་རྣམས།། དམན་ལྷག་ལོག་པས་ནད་རྣམས་སྐྱེད་པར་བྱེད།། དུས་ནི་ཚ་དུས་གྲང་དུས་ཆར་དུས་གསུམ།། དམན་པ་ཚ་གྲང་ཆར་པ་ཆུང་བ་སྟེ།། ལྷག་པ་ཆེ་དྲགས་ལོག་པ་མེད་པའོ།། དབང་པོ་ལྔ་དང་དེ་ཡི་ཡུལ་ལྔ་པོ།། ཆུང་ངམ་དེ་ལ་མི་སྦྱོར་དམན་པ་སྟེ།། ཤས་ཆེར་གཏད་པ་ལྷག་པའི་སྦྱོར་བ་ཡིན།། ཤིན་ཏུ་ཉེ་དང་རིང་བ་ཆེའམ་ཆུང་།། འཇིགས་དང་མི་སྡུག་ལོག་པའི་སྦྱོར་བར་བཤད།། སྤྱོད་ལམ་ལུས་ངག་ཡིད་དང་གསུམ་ཡིན་ཏེ།། ཆུང་ངམ་མི་སྦྱོར་འཇུག་པ་དམན་པས་དམན།། རྟུན་ངས་འཇུག་པ་ལྷག་པའི་སྦྱོར་བ་སྟེ།། ཤུགས་བཀག་བཙིར་གཅུས་མི་དགེ་ལོག་སྦྱོར་རོ།། གསོག་ལྡང་ཞི་གསུམ་རྒྱུ་དང་ངོ་བོ་དུས།། རྒྱུ་ནི་རྩུབ་སོགས་དྲོ་ལྡན་རླུང་གསོག་ལ།། གྲང་བས་ལྡང་ཞིང་སྣུམ་དྲོས་ཞི་བར་འགྱུར།། དེ་བཞིན་རྣོ་སོགས་བསིལ་ལྡན་མཁྲིས་པ་གསོག། ཚ་བས་ལྡང་ཞིང་རྟུལ་སོགས་བསིལ་ལྡན་ཞི།། ལྕི་སྣུམ་བསིལ་ལྡན་བད་ཀན་གསོག་འགྱུར་གྱི།། དྲོ་བས་ལྡང་ཞིང་རྩུབ་སོགས་ཀྱིས་ཞི་འགྱུར།། ངོ་བོ་རང་གནས་འཕེལ་བ་གསོག་པ་ཡིན།། རྒྱུ་ལས་འཁྲུག་བྱེད་མི་མཐུན་ཡོན་ཏན་འདོད།། ལྡང་བ་ལོག་པའི་ལམ་ཞུགས་རང་རྟགས་སྟོན།། རང་གནས་མཉམ་གནས་ནད་མེད་ཞི་བ་ཡིན།། དུས་ནི་སོ་ག་སོགས་གསུམ་རླུང་གི་སྟེ།། མཁྲིས་པ་དབྱར་དང་བད་ཀན་དགུན་སྨད་དོ།། སོ་གའི་དུས་སུ་ཡང་ལ་རྩུབ་པ་ཡི།། ཡུལ་དང་ལུས་དང་ཟས་སྤྱོད་ཀུན་མཚུངས་པས།། རླུང་གསོག་བྱེད་ཀྱི་དྲོ་བས་ལྡང་མི་འགྱུར།། དབྱར་དུས་ཆར་རླུང་གྲང་བ་སྐྱེས་པས་ལྡང་།། སྟོན་དུས་སྣུམ་ལ་དྲོ་བས་ཞི་བར་འགྱུར།། དབྱར་དུས་སྣུམ་བསིལ་མཁྲིས་གསོག་ལྡང་མི་འགྱུར།། སྣུམ་དྲོས་སྟོན་ལྡང་དགུན་སྟོད་བསིལ་བས་ཞི།། དགུན་སྨད་བསིལ་སྣུམ་ལྕི་བས་བད་ཀན་གསོག། བསྒོངས་པས་ལྡང་མིན་དཔྱིད་དུས་ཉི་མའི་འོད།། དྲོ་བས་ལྡང་ཞིང་སོ་ག་ཡང་རྩུབ་ཞི།། འོན་ཀྱང་འབྱུང་བའི་དུས་ལ་མ་བབ་ཀྱང་།། ཟས་སྤྱོད་དབང་གིས་འཕྲལ་ལ་འབྱུང་བ་ཡོད།།ཁྱད་པར་སློང་རྐྱེན་ཐུན་མོང་ཁྱད་པར་གཉིས།། ནད་ཀུན་སློང་བར་བྱེད་པའི་ཐུན་མོང་རྐྱེན།། འབྱུང་བའི་དུས་དང་གདོན་དུག་མི་འཕྲོད་ཟས།། གསོ་བ་ལོག་དང་ལས་ངན་སད་ལས་འབྱུང་།། ཁྱད་པར་ཁ་དང་ཡང་རྩུབ་བསྟེན་དྲགས་དང་།། ཆགས་པས་དུབ་དང་ལྟོ་ཆག་གཉིད་ཆག་དང་།། ལྟོ་སྟོང་ལུས་ངག་བྱ་བ་དྲག་ཤུལ་དང་།། ཁྲག་མང་ཟགས་དང་འཁྲུ་སྐྱུག་དྲག་པོས་བཏབ།། བསེར་བུས་བུས་དང་ག་ཆད་ངུས་པ་དང་།། མྱ་ངན་སེམས་ལས་ཁ་ལས་ཆེས་པ་དང་།། བཅུད་མེད་ཁ་ཟས་ཡན་ལ་གཏད་པ་དང་།། ཤུགས་བཀག་པ་དང་ནན་གྱིས་བཙིར་བ་ཡི།། རྐྱེན་དེ་རྣམས་ཀྱིས་རླུང་ནད་ལྡང་བར་བྱེད།། ཚ་བའི་རོ་དང་རྣོ་ཚ་སྣུམ་བསྟེན་དྲགས།། རྒྱུད་ལ་ཞེ་སྡང་དྲག་པོ་སྐྱེས་པ་དང་།། ཚད་དགུང་གཉིད་ལོག་འདུག་རྗེས་དྲག་ཤུལ་བྱས།། མི་ཐེག་ཁུར་དང་ས་སྲན་བརྐོས་པ་དང་།། གཞུ་སྲན་བཀང་དང་འཛིང་ག་བཀྱེ་པ་དང་།། བང་དང་འགྲོ་ལས་དག་གིས་ཉེན་པ་དང་།། རྟ་ཡིས་བརྡབས་དང་གཡང་ལ་ལྷུང་བ་དང་།། འཐིབས་འོག་ཚུད་དང་རྡོ་དབྱུག་བརྡུངས་པ་དང་།། ཤ་མར་བུ་རམ་ཆང་སོགས་བཟའ་བཏུང་དྲགས།། རྐྱེན་དེ་རྣམས་ཀྱིས་མཁྲིས་ཚད་སློང་བར་བྱེད།། ཁ་མངར་ལྕི་བསིལ་སྣུམ་བསྟེན་དྲགས་པ་དང་།། འགྲངས་རྗེས་དལ་བར་འདུག་དང་ཉིན་གཉིད་ལོག། རླན་སྟེང་ཉལ་དང་ཆུར་ཞུགས་གོས་སྲབ་འཁྱགས།། གྲོ་སྲན་གསར་ཐོག་སེར་ཅན་སུམས་པ་དང་།། ར་སྐོམ་ཤ་རིད་ཚིལ་བུ་འབྲུ་མར་དང་།། རྩི་མར་རུལ་པ་ལོ་བཤུར་ལ་ཕུག་རས།། རི་སྒོག་ལ་སོགས་རྗེན་ཟས་མཐའ་དག་དང་།། མ་འཚོས་འཚིག་དང་ཁེངས་པོའི་ཟས་རྣམས་དང་།། ར་ཡི་འོ་རློན་ཞོ་དར་ཆུ་གྲང་ཇ།། བཟའ་བཏུང་ཆེས་ཏེ་ཚད་ལས་འདས་པའམ།། སྔ་མ་མ་ཞུ་ཕྱི་མ་ཟོས་པ་ཡི།། རྐྱེན་དེ་རྣམས་ཀྱིས་བད་ཀན་གྲང་ནད་སློང་།། དེ་དག་འདྲེས་ལས་ལྡན་འདུས་ནད་དུ་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་རྐྱེན་བསྟན་པའི་ལེའུ་སྟེ་དགུ་པའོ།། །།

X