//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅུ་གཉིས་པ། ནད་ཀྱི་དབྱེ་བ་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:43:54 ཀློག་གྲངས། 50 
སྡོམས་པས་ནད་རིགས་བཅུ་དགུའོ།། སྨད་ནད་གཞང་འབྲུམ་མཚན་བར་རྡོལ་བ་དང་།། རྟུག་འགགས་གཅིན་འགགས་གཅིན་སྙི་རྣམ་པ་ལྔ།། ཕྱིར་གནས་པགས་པ་ཤ་དང་རྩ་རུས་ཏེ།། པགས་པའི་ནད་ལ་ཤ་བཀྲ་བས་ལྡོགས་དང་།། གཡན་པ་གླང་ཤུ་ཟ་ཀོང་ཤུ་བ་དང་།། རེག་པའི་དུག་དང་མཛེར་པ་ངོ་ཁབ་དང་།། ནད་གཞན་ལྤགས་ལ་གྲམ་དང་བཅུ་རུ་བཤད།། ཤ་ཡི་ནད་ལ་ལྦ་བ་རྨེན་བུ་གཉིས།། ནད་གཞན་ཤ་ལ་རྒྱས་དང་རྣམ་པ་གསུམ།། རྩ་ཡི་ནད་ལ་རྩ་དཀར་རྩ་ནག་གཉིས།། ནད་གཞན་རྩ་རུ་རྒྱུག་དང་རྣམ་པ་གསུམ།། རུས་པའི་ནད་ལ་དྲེག་དང་རྐང་བམ་གཉིས།། ནད་གཞན་རུས་ལ་ཞེན་དང་རྣམ་པ་གསུམ།། ཤ་རུས་ཀུན་ལ་གནས་པ་གྲུམ་བུའི་ནད།། སྤྱི་རུ་སྡོམས་པས་ཉི་ཤུ་ཐམ་པའོ།། ཕྱི་ནང་ཀུན་ཏུ་ཁྱབ་པའི་ནད་རིགས་ལ།། མཁྲིས་པ་སྨུག་པོ་དམུ་འོར་སྐྱ་རྦབ་གཅོང་།། ཚ་བ་སྡེ་དྲུག་འགྲམས་འཁྲུགས་རིམས་ནད་དང་།། འབྲུམ་བུ་ལྷོག་པ་སྦྱར་དུག་རྫི་ཟེར་དུག། རླངས་དུག་ཤ་དུག་མི་འཕྲོད་པ་ཡི་དུག། བཙན་དུག་ཁྱི་དུག་སྲིན་བུ་སྦྲུལ་གྱི་དུག། འབྱུང་པོ་གཟའ་དང་མཛེ་འབྲས་མེ་དབལ་སྲིན།། མགོ་དང་བྱང་ཁོག་ཡན་ལག་སྐེ་ཡི་རྨ།། སྤྱི་རུ་སྡོམས་པས་སུམ་ཅུ་རྩ་བདུན་ཏེ།། བརྒྱ་དང་རྩ་གཅིག་གནས་ཀྱི་དབྱེ་བར་འདོད།། རིགས་ཀྱི་སྒོ་ནས་དབྱེ་ན་ཁོང་ནད་དང་།། རྨ་དང་ཚད་པ་ཐོར་བུའི་ནད་རིགས་བཞི།། དང་པོ་ཁོང་ནད་སྒོ་ནས་དབྱེ་བ་ལ།། མ་ཞུ་རྒྱུ་དང་འབྲས་བུ་གཅོང་ནད་གཉིས།། མ་ཞུ་ངོ་བོ་རིགས་གྲོགས་དུས་ཀྱིས་བཞི།། འབྲས་བུ་གཅོང་ནད་དབྱེ་བ་གསར་རྙིང་གཉིས།། གསར་པ་བད་ཀན་སྐྱ་པོ་སྨུག་པོ་དང་།། མཁྲིས་པའི་ནད་དང་དུག་གཅོང་རྣམ་པ་བཞི།། སྐྱ་བོ་ལྷེན་དང་ལྕགས་དྲེག་མེ་ཉམས་དང་།། མགུལ་འགགས་གྲུམ་བུ་དཀར་པོ་འཇུ་སྐེམས་དྲུག། སྨུག་པོ་བྱེར་རྒྱས་རྡོལ་རལ་འགྱིངས་དང་འདྲིལ།། གབ་འཐབ་འོར་ལྷུང་གྲང་བ་ལྷིང་ཆད་བཅུ།། མཁྲིས་པ་ཁ་ལུད་རྩ་རྒྱུག་གནས་གྱུར་གསུམ།། དུག་གི་གཅོང་ལ་ཚ་སྦྱོར་གྲང་སྦྱོར་གཉིས།། རྙིང་པ་སྐྲན་དང་དམུ་འོར་སྐྱ་རྦབ་བཞི།། གཅོང་ཆེན་ཟད་བྱེད་ནད་དང་རྣམ་པ་ལྔ།། སྐྲན་ལ་ཁྲག་མཁྲིས་ལྷེན་དང་རྡོ་ཡི་སྐྲན།། རླུང་སྲིན་རྩ་ཆུའི་སྐྲན་དང་བརྒྱད་དུ་བཤད།། དམུ་ཆུ་བྱེར་ཟགས་འཁྱིམས་ཆུ་རྡོལ་ཆུ་བཞི།། འོར་ལ་ཚ་འོར་གྲང་འོར་རྣམ་པ་གཉིས།། སྐྱ་རྦབ་གློ་སྙིང་མཆིན་མཆེར་ཆུ་སེར་ལྔ།། ཟད་བྱེད་རླུང་མཁྲིས་བད་ཀན་བླ་གཉན་བཞི།། ཁོང་ནད་སྤྱིར་སྡོམས་བཞི་བཅུ་རྩ་བརྒྱད་དོ།། རྨ་ལ་ལྷན་ཅིག་སྐྱེས་དང་གློ་བུར་བ།། ལྷན་སྐྱེས་འབྲས་དང་རྨེན་བུ་སུར་ཡ་དང་།། མེ་དབལ་གཞང་འབྲུམ་རྐང་བམ་མཚན་བར་རྡོལ།། གློ་བུར་རྨ་ལ་གནས་དང་རིགས་ཀྱིས་དབྱེ།། གནས་ནི་མགོ་སྐེ་བྱང་ཁོག་ཡན་ལག་ལ།། རྨ་རིགས་བཤུས་བཅད་རྣམ་པར་བཅད་པ་དང་།། འཕྱང་ལྷུང་ཕུག་གཤགས་གྲུགས་པ་རྣམ་པ་བརྒྱད།། སྤྱི་རུ་སྡོམས་པས་དབྱེ་བ་བཅོ་ལྔ་འོ།། ཚ་བ་མ་སྨིན་རྒྱས་སྟོངས་གབ་རྙིངས་རྙོགས།། འགྲམས་འཁྲུགས་རིམས་ནད་དུག་ཚད་རྣམ་པ་བཞི།། འགྲམས་ལ་ཕྱི་འགྲམས་ནང་འགྲམས་རྣམ་པ་གཉིས།། འཁྲུགས་ལ་རྒྱས་འཁྲུགས་སྟོང་འཁྲུགས་འཇམ་འཁྲུགས་གསུམ།། རིམས་ལ་བལ་ནད་རྒྱུ་གཟེར་འབྲུམ་པ་དང་།། གག་ལྷོག་ཆམ་པའི་ནད་དང་རྣམ་པ་ལྔ།། དུག་ལ་སྦྱར་དུག་གྱུར་པ་དངོས་དང་གསུམ།། ཐོར་བུ་སྐད་འགགས་སྐྱིགས་བུ་ཡི་ག་འཆུས།། སྐོམ་དད་དབུགས་མི་བདེ་དང་གླང་ཐབས་སྲིན།། འཁྲུ་སྐྱུག་དྲི་མ་གཅིན་འགགས་གཅིན་སྙི་དང་།། ཚད་འཁྲུ་དྲེག་གྲུམ་ཆུ་སེར་རྩ་དཀར་དང་།། ལྤགས་ནད་ཕྲན་བུ་ཐོར་བུ་བཅུ་དགུའོ།། བརྒྱ་དང་རྩ་གཅིག་རིགས་ཀྱི་དབྱེ་བར་འདོད།། དེ་ལྟར་ཉེས་པ་གཙོ་བོ་རིགས་གནས་བཞིའི།། དབྱེ་བ་བཞི་བརྒྱ་རྩ་བཞིའི་ནད་ཡོད་དེ།། དེ་ལ་གཞན་དབང་བཅོས་ཀྱང་འཆི་བ་དང་།། ཀུན་བརྟགས་བཏགསགདོན་ནད་རིམ་གྲོས་གྲོལ་བ་དང་།། ཡོངས་གྲུབ་མ་བཅོས་འཆི་ལ་བཅོས་ན་འཚོ།། ལྟར་སྣང་མ་བཅོས་རང་བཞིན་འཚོ་བ་བཞི།། གཅིག་ལའང་བཞི་སྦྱར་བཞི་བརྒྱ་རྩ་བཞི་སྟེ།། སྡོམས་པས་སྟོང་དང་དྲུག་བརྒྱ་བཅུ་དྲུག་འགྱུར།། རྣམ་པའི་སྒོ་ནས་དཔག་ཏུ་མེད་པར་དབྱེ།། ཉེས་པ་གནོད་བྱ་ཉི་ཤུ་རྩ་ལྔ་ལ།། རྐྱང་པ་ལྡན་འདུས་དུ་མའི་རིགས་འབྱུང་བས།། གྲངས་དང་མིང་གི་ངེས་བསྟན་ཡོད་མ་ཡིན།། འོན་ཀྱང་ཉེས་པ་གསུམ་ལས་ནད་མི་འདའ།། གནོད་བྱ་བཅུ་ལས་ནད་ཀྱི་གནས་མི་འདའ།། དཔེར་ན་འདབ་ཆགས་བྱ་ཡིས་གར་འཕུར་ཡང་།། ནམ་མཁའི་མཐོངས་ལས་འཕུར་ས་མེད་པ་བཞིན།། བད་རླུང་གྲང་ལ་ཁྲག་མཁྲིས་ཚ་བས་ན།། དུ་མར་ཕྱེ་ཡང་ཚ་གྲང་གཉིས་སུ་འདུས།། སོ་སོའི་དོན་ལ་རྒྱུ་དང་སྔར་ཚུལ་དང་།། ཚུལ་ཕྱེད་པ་དང་དཀྱེལ་དུ་གྱུར་པ་བཞི།། རྒྱུ་ནི་རང་རང་སྐྱེད་པའི་རྐྱེན་ཡིན་ཏེ།། སྔར་ཚུལ་ཞེས་བྱ་བྱེ་བྲག་གསལ་མིན་པ།། ནད་རྟགས་གསལ་བར་གྱུར་པ་ཚུལ་ཕྱེད་ཡིན།། རང་གནས་མཐར་ཕྱིན་ཤུགས་རྫོགས་དཀྱེལ་གྱུར་ཏོ།། དེ་ལ་རྣམ་གྲངས་བརྟག་པ་གཙོ་བོ་སྟོབས།། རྣམ་གྲངས་ནད་རིགས་ནང་ཚེགས་དབྱེ་བ་སྟེ།། བརྟག་པ་དེ་རྣམས་མ་འདྲེས་ཕྱེད་པ་ཡིན།། གཙོ་བོ་རང་རྒྱུད་ཅན་དང་གཞན་རྒྱུད་ཅན།། དེ་ལ་སྔར་སྐྱེས་བླ་གཉན་བཅས་པའོ།། ནད་སྟོབས་ཡུལ་དུས་རང་བཞིན་ན་ཚོད་དང་།། ནད་ཁམས་ཟས་སྤྱོད་དབང་གིས་གཉིས་སུ་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་དབྱེ་བ་བསྟན་པའི་ལེའུ་སྟེ་བཅུ་གཉིས་པའོ།། །།

X