//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་བཅོ་བརྒྱད་པ། ཁ་ཟས་བསྲུང་བ་དང་ཟས་ཚོད་རན་པར་བཟའ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 11:50:15 ཀློག་གྲངས། 25 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགདུས་ཀུན་ཏུ་ནི་ཟས་ཚོད་རན་པར་བཟའ།། ཟས་རྣམས་ལྕི་ཡང་ཚད་ལས་དཔགས་བྱ་སྟེ།། ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ།། བདེ་བླག་འཇུ་སླ་ཚོད་ཟིན་ཞེས་སུ་བཤད།། དེ་ནི་ལུས་འཚོ་མེ་དྲོད་སྐྱེད་བྱེད་ཡིན།། གལ་ཏེ་ཟས་ཚོད་མ་ཟིན་ཆུངས་གྱུར་ན།། སྟོབས་མདངས་མི་འཕེལ་རླུང་ནད་མ་ལུས་འབྱུང་།། ཚད་ལས་ཐལ་ན་མ་ཞུ་བེ་སྣབས་སྐྱེད།། དེ་ཡིས་མེ་མཉམ་རླུང་རྒྱུའི་རྩ་སྦུབས་བཀག། ཕོ་བའི་དྲོད་ཉམས་ཉེས་པ་མ་ལུས་སྐྱེད།། དེ་ཕྱིར་ཟས་དང་ཕོ་བའི་མེ་དྲོད་སྦྱར།། ལྟོ་བའི་ཆ་གཉིས་ཟས་ལ་ཆ་གཅིག་སྐོམ།། ཆ་བཞི་པ་ནི་རླུང་གི་གནས་སུ་བཞག། ཟས་ཟོས་རྗེས་སུ་སྐོམ་འཐུངས་ངོམས་དང་ཁྱབ།། ཟས་འདྲུལ་འཇུ་ཞིང་ལུས་བརྟས་སྟོབས་འཕེལ་བྱེད།། སྐད་འགགས་གློ་རྡོལ་ལུད་པ་ཆམ་པ་སོགས།། ནམ་ཚོང་ཡན་ཆད་ནད་ལ་གནོད་པ་ཡིན།། མེ་དྲོད་ཆུང་ལ་ཤ་ཟོས་ཆང་འཐུང་བྱ།། མི་འཇུ་སྦོས་ན་ཟོས་རྗེས་ཆུ་སྐོལ་བཏུང་།། སྐེམ་པོ་རྒྱས་པར་བྱེད་ན་ཆང་བཏུང་བྱ།། སྦོམ་པོ་དབྲི་ལ་སྦྲང་རྩིའི་ཆུ་བཏུང་ངོ་།། ཞོ་ཆང་དུག་སྦགས་སྦྲང་རྩི་ཟོས་པ་ལ།། རྗེས་སུ་ཆུ་བསིལ་འཐུངས་ན་ཕན་པ་ཡིན།། ཟས་ཟོས་བར་མཐའ་ཐོག་མར་སྐོམ་འཐུངས་ན།། ཉམ་འཚག་ཉམས་ཚགསརན་ཞིང་སྦོམ་དང་སྐེམ་པོར་འགྱུར།། ཉེས་པ་ལམ་མིན་མི་འགྲོ་མེ་དྲོད་འབར།། ལུས་ཡང་དང་ག་བདེ་ལ་དབང་པོ་གསལ།། སྟོབས་ཆེ་བཤང་གཅི་འོག་རླུང་བདེ་བར་རྒྱུ།། ཟས་ཚོད་ལེགས་པར་ཟིན་ལས་འབྱུང་བར་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་བའི་ལེའུ་སྟེ་བཅོ་བརྒྱད་པའོ།། །།

X