//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉེར་གསུམ་པ། མི་ན་བ་གནས་པར་བྱ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 14:40:52 ཀློག་གྲངས། 5 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ནད་མེད་ཐ་མལ་གནས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག རྣམ་པར་མ་གྱུར་ཐ་མལ་ལུས་པོ་ལ།། མི་ན་གནས་དང་རིང་དུ་འཚོ་བར་བྱ།། དང་པོར་མི་ན་གནས་པར་བྱ་བ་ནི།། ནད་ཀུན་རྒྱུ་ལས་རྐྱེན་གྱིས་བསླང་ལས་འབྱུང་།། རྐྱེན་མེད་རྒྱུ་ལས་འབྲས་བུ་འབྱུང་མི་སྲིད།། དེ་ཕྱིར་ནད་རྣམས་ཀུན་གྱི་རྐྱེན་སྤང་བྱ།། དུས་དང་དབང་པོ་སྤྱོད་ལམ་རོ་ནུས་རྣམས།། སྨན་དམནདང་ལོག་པ་ལྷག་པས་ནད་སྐྱེད་ལ།། ཡང་དག་སྦྱོར་བ་ནད་མེད་གནས་པའི་རྒྱུ།། དེ་ཕྱིར་སྤྱོད་ལམ་ཟས་སྨན་རྣམ་གསུམ་པོ།། ཡང་དག་བསྟེན་པས་ནད་མེད་བདེར་གནས་འགྱུར།། ལོ་ཟླ་འདས་ཏེ་ལུས་ཟུངས་སྟོབས་འགྲིབ་པ།། ཚེ་ཟད་རྒས་པའི་ནད་ལས་བསྲིང་བ་ནི།། བཅུད་ལེན་ཕན་ཡོན་གནས་རྟེན་བྱ་ཐབས་བཞི།། ཕན་ཡོན་ཚེ་རིང་ན་ཚོད་དར་ལ་འཇོག། ལུས་མདངས་སྟོབས་སྐྱེད་དབང་པོ་གསལ་བར་བྱེད།། གནས་གཙང་དབེན་དགའ་བར་ཆད་མེད་པ་དེར།། རྟེན་ནི་ཧ་ཅང་རྒས་པ་མ་ཡིན་པས།། ཆགས་སྤང་བརྩོན་པས་གཟའ་སྐར་བཟང་དུས་འཇུག། བྱ་ཐབས་གཙོར་བླང་ཞོར་སྤྱད་རྣམ་པ་གཉིས།། གཙོ་བོར་སྤྱད་པ་སྔོན་འགྲོ་དངོས་གཞི་གཉིས།། སྔོན་འགྲོ་སྣུམ་འཆོས་རྗེས་ལ་ཁྲུས་བྱས་ལ།། འབྲས་བུ་གསུམ་དང་རྒྱམ་ཚ་པི་པི་ལིང་།། བཅའ་སྒ་ཤུ་དག་ཡུང་བ་བྱི་ཏང་ག། བུ་རམ་བ་ཆུ་སྦྱར་བས་ཁོང་བ་སྦྱང་།། མ་སྦྱངས་དྲི་བཅས་ཚོས་ལྟར་དོན་མེད་འགྱུར།། དངོས་གཞི་སྒོག་སྐྱ་ཞུན་མར་སྦྱར་བྱས་ལ།། ནས་སྣོད་བདུན་གསུམ་བཞག་ལ་ཞག་གྲངས་བསྟེན།། རླུང་གི་ནད་སེལ་ཚེ་འཕེལ་བྱེད་པ་ཡིན།། བྲག་ཞུན་ལེགས་བཏུལ་གསེར་དངུལ་ཟངས་ལྕགས་རྣམས།། ལྕགས་སྣོད་འཕྲོད་སྨན་སྦྱར་བ་རིམས་བསྐྱེད་བཟའ།། ནད་འཇོམས་ཚེ་འཕེལ་མོན་སྣེ་རྒྱ་སྲན་སྤང་།། ཙི་ཏྲ་ཀ་དང་མར་སྦྲང་སྦྱར་བ་བསྟེན།། ཚེ་རིང་ལུས་རྒྱས་མེ་དྲོད་འབར་བར་བྱེད།། བ་གཅིན་སྦྱར་བསྟེན་ཤ་བཀྲ་མཛེ་ནད་སེལ།། ཨ་རུ་བར་སྐྱུར་འབྲས་བུའི་སྨན་མར་གྱིས།། དབང་པོ་གསལ་ཞིང་སྟོབས་སྐྱེད་རྒས་ཀ་སྲ།། ཀུན་ལ་ནད་དང་གང་འཕྲོད་ཟས་སྤྱོད་བསྟེན།། རུལ་སྐྱུར་སྔོ་ངད་མི་འཕྲོད་སྤང་བར་བྱ།། ཟླ་བ་གསུམ་དྲུག་ལོ་གཅིག་འབྲས་བུ་འགྲུབ།། དེ་མ་ལྕོགས་ན་ཞར་ལ་སྤྱད་བྱས་པས།། གནས་སྐབས་འབྲས་བུ་འབྱུང་བར་ནུས་པ་ཡིན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མི་ན་བ་གནས་པར་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།

X