//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉེར་བཞི་པ། ཉེས་པ་དངོས་སུ་སྟོན་པ་བརྟག་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 15:05:27 ཀློག་གྲངས། 13 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ངོས་བཟུང་རྟགས་ཀྱི་གནས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག ངོས་བཟུང་རྟགས་ལ་བསླབ་པ་ནི།། མེ་དང་དུ་བ་ཇི་བཞིན་དུ།། ནད་ཀྱི་ངོས་ནི་རྟགས་ལ་བཟུང་།། བརྟག་ཐབས་མེད་པའི་སྨན་པ་ཡིས།། རྟགས་ཉིད་རྟགས་སུ་མི་ཤེས་ཏེ།། དུ་བ་རླངས་པར་འཁྲུལ་དང་འདྲ།། སྤྲིན་འདུས་ཆར་འབྱུང་ཟེར་བ་ལྟར།། མ་ངེས་རྟགས་སུ་བྱེད་པ་ཡོད།། དེ་ཕྱིར་ངོས་འཛིན་བརྟག་ཐབས་མན་ངག་གཅེས།། ཁ་དམར་བཅོས་ལ་དགོས་པའི་ཕྱིར།། ཉེས་པ་དངོས་སྟོན་བརྟག་པ་དང་།། སྐྱེ་བོ་མཁས་ཟེར་མགུ་བྱའི་ཕྱིར།། ངན་གཡོ་སྐྱོན་གྱིས་བརྟག་པ་དང་།། གསོ་ཚེ་བླང་དོར་བྱ་བའི་ཕྱིར།། སྤང་བླང་མུ་བཞིར་བརྟག་པའོ།། ཉེས་པ་དངོས་སུ་སྟོན་པའི་བརྟག་པ་ལ།། སློང་བ་རྒྱུ་ཡི་སྒོ་ནས་བརྟག་པ་དང་།། མཚན་ཉིད་རྟགས་ཀྱི་སྒོ་ནས་བརྟགས་པ་དང་།། ཕན་གནོད་བསྟེན་པའི་སྒོ་ནས་བརྟག་པའོ།། སློང་བ་རྒྱུ་རྐྱེན་ཟས་དང་སྤྱོད་ལམ་རྣམས།། གང་ཟོས་གང་བྱས་ནད་ཀུན་རྟོགས་པར་ནུས།། ཁྱད་པར་སློང་བའི་རྐྱེན་གྱིས་ཤེས་པར་བྱ།། ཅི་ཕྱིར་རྒྱུ་ལས་འབྲས་བུ་འགལ་མི་སྲིད།། མཚན་ཉིད་རྟགས་ལ་བརྟག་གཞི་བརྟག་ཡུལ་དང་།། བརྟག་སྒོ་བརྟག་པའི་ཚུལ་དང་རྣམ་པ་བཞི།། གཞི་ནི་རླུང་དང་མཁྲིས་པ་བད་ཀན་གསུམ།། མཚན་ཉིད་འཕེལ་ཟད་གསོག་ལྡང་འཁྲུགས་པའི་རྟགས།། ཚ་གྲང་གཉིས་སུ་དྲིལ་ལ་བརྟག་པར་བྱ།། བརྟག་ཡུལ་དབང་པོ་ཡུལ་ལྔ་དྲི་མ་ལྔ།། དབང་པོ་མིག་དང་རྣ་བ་སྣ་ལྕེ་ལུས།། ཡུལ་ནི་གཟུགས་སྒྲ་དྲི་རོ་རེག་བྱ་ལྔ།། དྲི་མ་ལུད་པ་འཁྲུ་སྐྱུགས་ཆུ་ཁྲག་བརྟག། བརྟག་སྒོ་ཡུལ་དུས་རང་བཞིན་ན་ཚོད་དང་།། ཉིན་ཞག་ཟས་ཟོས་གནས་ལས་མ་འཁྲུལ་རྟོགས།། བརྟག་ཚུལ་བལྟ་དང་རེག་པ་དྲི་བས་བརྟག། བལྟ་བ་མིག་ཡུལ་བོངས་དབྱིབས་ཁ་དོག་བརྟག། ཁྱད་པར་ལྕེ་དང་ཆུ་ལ་བརྟག་པར་བྱ།། འདི་ནི་མཐོང་བ་ཡུལ་རིག་བརྟག་པ་ཡིན།། རེག་པ་ལུས་ཡུལ་ཚ་གྲང་འབུར་འཇམ་བརྟག། ཁྱད་པར་བརྡ་སྦྱོར་འཕྲིན་པ་རྩ་ལ་བརྟག། འདི་ནི་དཔྱོད་པ་དོན་རིག་བརྟག་པ་ཡིན།།དྲི་བས་བརྟག་པ་རྣ་བའི་ཡུལ་ཀུན་ཏེ།། གང་གིས་གང་ལྟར་གང་ན་གང་དུ་གང་།། ཁྱད་པར་རྒྱུ་གནས་མཚན་ཉིད་དྲིས་ལ་བརྟག། རྒྱུ་ལ་ཉེས་པ་གནས་ལ་འཇུག་པའི་སྒོ།། མཚན་ཉིད་ནད་རིགས་བྱེ་བྲག་ཕྱེད་པར་འགྱུར།། དེ་ཕྱིར་བརྟག་པ་ཀུན་ལ་དྲི་བ་གཅེས།། འདི་ནི་ཐོས་པ་སྒྲ་རིག་ཅེས་སུ་བཤད།། ཕན་གནོད་བསྟེན་པ་ཟས་སྤྱོད་སྨན་དཔྱད་བཞི།། རྒྱུ་དང་ནད་ཀྱི་ངོ་བོ་མཐུན་མི་མཐུན།། འཕྲོད་མི་འཕྲོད་ལས་ནད་ཀུན་ཤེས་པར་འགྱུར།། ལྟར་སྣང་མ་ཡིན་བསྲིངས་པས་རྟོགས་འགྱུར་ཏེ།། སྨན་པས་ཉམས་རྙེད་ནད་པའི་གསོ་དོན་ཤེས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཉེས་པ་དངོས་སུ་སྟོན་པ་བརྟག་པའི་ལེའུ་སྟེ་ཉི་ཤུ་རྩ་བཞི་པའོ།། །།

X