//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉེར་ལྔ་པ། ངན་གཡོ་སྐྱོན་གྱི་སྒོ་ནས་བརྟག་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 15:06:41 ཀློག་གྲངས། 5 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགངན་གཡོ་སྐྱོན་གྱི་སྒོ་ནས་བརྟག་པ་ནི།། མཚན་ཉིད་ཤེས་བྱ་མཚང་འབྲུ་དེ་དུས་བསྲིང་།། སྔར་རྗེས་བཅད་དང་བཅུད་ལ་བོར་བ་དང་།། ཁ་བཅིང་སྤོ་ལ་གདོན་དང་ཐབས་འོག་གཞུག། དང་པོ་མཚན་ཉིད་ཤེས་པར་བྱ་བ་ནི།། ནད་ཀུན་སྤྱི་དང་ཁྱད་པར་རྟགས་ཤེས་པས།། འདི་ན་ཙམ་ལས་འདི་འོང་རྟོགས་པར་འགྱུར།། དེ་ཕྱིར་འདི་ལ་གོམས་ཤིང་འདྲིས་པ་གཅེས།། རིན་ཆེན་ལ་སོགས་བཟང་ངན་ཤེས་པ་ཡང་།། བསྟན་བཅོས་མ་ཡིན་དེ་མེད་པར་ཡང་མིན།།མཚང་འབྲུ་ཕོ་ཉ་འབྲེལ་པ་ཐབས་ཀྱི་ཕྱིར།། ཅི་ན་ཇི་ལྟར་གང་བཏང་སུ་ཡིན་དང་།། ཞག་གྲངས་དཔྱད་པས་མི་སྨྲ་མངོན་པར་ཤེས།། དུས་བསྲིང་རིངས་སྟབས་མ་ཡིན་ཐང་ཅིག་གནས།། དེ་བར་ལུས་ངག་མ་ཡེངས་གཏམ་ལ་དཔྱད།། རྗེས་བཅད་གཏར་བསྲེག་སྨན་སྦྱོར་ཅི་བྱས་བཙལ།། བརྙེད་པ་ཙམ་གྱིས་ཚ་གྲང་ཕྱོགས་མཐུན་རྟོགས།། བཅུད་ལ་བོར་བ་མི་སྨྲ་མ་རྟོགས་ན།། སྒྲོག་ཕྱིར་ངན་པ་མི་བྱ་གདོན་བཅོས་དགོས།། སྨན་ཅིག་སྦྱར་ན་ཕན་ཞེས་བྱིང་པོར་སྨྲ།། ངང་གིས་མི་ཐུབ་འདི་ན་ཅི་བྱ་འབྱིན།། ཁ་བཅིང་ཞེས་པ་ཁ་ཅིག་ཕྲད་པའི་ཚེ།། སྨྲ་བར་བྱེད་པ་སྨོས་པས་ཚུད་བྱས་ཏེ།། ཅི་ན་སྨན་པས་ཤེས་ཀྱི་བཤད་མི་དགོས།། གསལ་བར་བརྗོད་པས་སྐྱེ་བོ་ངོ་མཚར་ཟེར།། སྤོ་ལ་གདོན་པ་ཐབས་ཀྱིས་རྟོགས་གྱུར་ན།། གཞན་དག་རྩ་ཆུ་ན་ལུགས་མང་བརྟག་དགོས།། ང་ལ་མ་ཡིན་གཅིག་ལ་ཁ་དམར་གདགས།། མིག་བལྟས་ཙམ་གྱིས་ཆོག་ཅེས་གྲགས་པ་འབྱུང་།། ཡང་ན་ཞིབ་ཏུ་དཔྱད་པས་བརྟག་མཁས་ཟེར།། ཐབས་འོག་གཞུག་པ་ཀུན་གྱིས་སྐད་མི་སྟེར།། རྣམ་པའི་ཁ་དམར་བཏགས་ལ་རྫོང་ལ་བྲོས།། དང་པོ་ཟས་སྤྱོད་མི་འཕྲོད་གདོན་གྱིས་རྐྱེན།། རུལ་སྐྱུར་དྲག་ཤུལ་རྗེན་ཟས་གནོད་ཅེས་བྱ།། གཉེན་པོ་ཕན་གནོད་མེད་པའི་སྙོམས་པ་དབོག། རྫོང་ལ་འབྲོས་པ་ནད་དང་སྨན་གྱི་མིང་།། སྔ་ན་མ་གྲགས་མི་ཤེས་ངོ་མཚར་བརྗོད།། དེ་ཡིས་མ་རྟོགས་གྱུར་ཀྱང་མཁས་ཁྱད་འབྱིན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།

X