//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉེར་དྲུག་པ། སྤང་བླང་མུ་བཞིར་བརྟག་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 15:10:00 ཀློག་གྲངས། 11 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག སྤང་བླང་མུ་བཞིའི་སྒོ་ནས་བརྟག་པ་ནི།། གསོ་སླ་གསོ་དཀའ་གསོ་ཙམ་སྤང་བ་བཞི།། གསོ་སླ་བ་ནི་ཡན་ལག་ལྡན་པ་དང་།། གང་ཟག་ནད་ཀྱི་སྒོ་ནས་གསོ་སླ་བ།། ཡན་ལག་སྒོ་ནས་གསོ་བར་སླ་བ་ནི།། སྨན་པ་སྨན་དང་ནད་གཡོག་རྣམ་པ་གསུམ།། སྨན་པ་མཁས་པའི་སྟེགས་ལ་འཛེགས་པ་དང་།། གཞུང་གི་དོན་ཤེས་ལས་རྣམས་མཐོང་ཞིང་གཙང་།། སྨན་ནི་ཆོ་ག་ཡོན་ཏན་མང་དུ་ལྡན།། ཕུན་སུམ་ཚོགས་ཤིང་འཕྲོད་པར་སྦྱར་བའོ།། ནད་གཡོག་སྒྲིན་བརྩེ་གཙང་སྦྲ་བློ་དང་ལྡན།། ཡན་ལག་བཅུ་གཉིས་ལྡན་ན་གསོ་བ་སླ།། གང་ཟག་ནད་པ་སྐྱེས་བུ་གཞོན་ཞིང་དུལ།། སྙིང་སྟོབས་ལྡན་ཞིང་སྨན་ཀུན་བཟོད་པའི་ལུས།། རྫས་ཕྱུག་བསྒོ་བ་ཉན་ལ་ཤེས་པར་ནུས།། དྲིས་པའི་ནད་རྟགས་ཟློས་མཁས་གསོ་སླའི་ཡུལ།། ནད་ཀྱི་སྒོ་ནས་གསོ་སླ་བ་ནི།། རྒྱུ་དང་སྔར་ཚུལ་མཚན་ཉིད་ཆུང་བ་དང་།། གནོད་བྱ་ཡུལ་དུས་རང་བཞིན་མི་མཚུངས་དང་།། གནོད་མེད་ལན་ཅིག་རྐྱང་པ་གསར་གསོ་སླ།། འོན་ཀྱང་རིམས་ལ་ཡུལ་དུས་མཚུངས་པ་དང་།། ཆུ་འགགས་ནད་ལ་གནོད་བྱ་མཉམ་པ་དང་།། ཁྲག་སྐྲན་རྙིང་པ་གསོ་བ་སླ་ཞེས་བྱ།།གསོ་དཀའ་བ་ནི་སླ་བ་དེ་དག་འདྲེས།། ཐབས་མང་ཡུན་རིང་གསོ་བ་དགོས་པའོ།། དེ་ལས་གོ་ལྡོག་གྱུར་ལ་གོམས་ཕན་ཉིད།། ཚེ་ཡི་ལྷག་མ་ལུས་སྲིད་གསོ་བ་ཙམ།། སྤང་བར་བྱ་ལ་གསོ་ཐབས་ཡོད་མེད་གཉིས།། རྒྱལ་པོ་དགེ་བའི་བཤེས་དང་འགྲོ་ལ་སྡང་།། སྨན་པས་བྱས་པ་མི་གཟོ་བརྙས་པ་བྱེད།། བྲེལ་དང་འབྱོར་པ་མི་ལྡན་ཉན་མི་བཏུབ།། ཚེ་ཟད་མྱ་ངན་གྱིས་མནན་བསྟན་པ་བཤིག། སྐྱེ་བོའི་ཡ་ག་ངན་པ་འབྱུང་བའི་ཕྱིར།། གསོ་ཐབས་ཡོད་ཀྱང་སྤང་བར་བཤད་པ་ཡིན།། གསོ་ཐབས་མེད་པས་སྤང་བར་བྱ་བ་ནི།། ཤིན་ཏུ་ཕྱིན་ཅི་ལོག་དང་འཆི་ལྟས་སྣང་།། སྲོག་གཅོད་ནད་དགུས་དེ་ལུས་བཟུང་བ་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྤང་བླང་མུ་བཞིར་བརྟག་པའི་ལེའུ་སྟེ་ཉི་ཤུ་རྩ་དྲུག་པའོ།། །།

X