//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་ཉེར་བདུན་པ། གསོ་ཚུལ་སྤྱིར་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 15:10:51 ཀློག་གྲངས། 7 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། གསོ་བྱེད་ཐབས་ཀྱི་གནས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིགནད་དེ་རྟོགས་ནས་ཇི་ལྟར་གསོ་བའི་ཕྱིར།། གསོ་བར་བྱེད་པའི་ཐབས་ཀྱི་གནས་བསྟན་པ།། དེ་ལ་གསོ་བའི་ཚུལ་དང་གསོ་ཐབས་གཉིས།། དང་པོ་ནད་ཀྱི་གསོ་ཚུལ་བསྟན་པ་ནི།། ནད་ལ་གསོ་ཐབས་དཔག་ཏུ་མེད་མོད་ཀྱང་།། གསོ་ཚུལ་མེད་ན་མུན་པར་མདའ་འཕེན་འདྲ།། དེ་ལ་གསུམ་སྟེ་སྤྱི་ཡི་གསོ་ཚུལ་དང་།། བྱེ་བྲག་པ་དང་ཁྱད་པར་གསོ་ཚུལ་ལོ།། དང་པོ་ཇི་ལྟར་གསོ་དང་གང་གིས་གསོ།། སོས་པའི་ཚད་དང་རྣམ་པ་གསུམ་གྱིས་བསྟན།། དང་པོ་རླུང་ལ་སོགས་པ་ཇི་སྙེད་ནད།། རང་གནས་གསོག་པའི་དུས་སུ་བསལ་བར་བྱ།། ལངས་ཤིང་རྒྱས་ནས་ནད་གཞན་འཁྲུག་བྱེད་ཕྱིར།། གཞན་ལ་གནོད་པ་མེད་པའི་སྦྱོར་བས་གསོ།། ནད་གཞན་སྐྱེས་ན་ནད་སྟོབས་གང་ཆེ་བཅོས།། གསོ་བའི་གཉེན་པོ་ཞི་དང་སྦྱང་བ་གཉིས།། གསོག་དུས་ཞི་ལ་ལངས་ནས་སྦྱང་བས་བཅོས།། ཞི་དུས་ཟས་སྤྱོད་གཟབ་ཅིང་མི་འཁྲུགས་བྱ།། འོན་ཀྱང་འཕྲལ་རྐྱེན་དུས་མིན་གསོག་ལྡང་ནད།། དུས་འདས་གསོ་དཀའ་འགྱུར་ཕྱིར་འཕྲལ་དུ་བསལ།། སྨན་ཡང་ཉིན་ཞག་ཟས་དུས་རིགས་པ་ཡིས།། ནད་དང་སྦྱར་ཏེ་བཏང་ཚུལ་བཅུ་རུ་བཤད།། ཟས་མ་ཟོས་དང་ཟས་སྔོན་དབུས་དང་མཐར།། ཟས་ཁམ་ཟས་མཚམས་དུས་མེད་ཙེ་གུར་དང་།། ཟས་བཅས་ཟས་མནན་མཚན་མོ་བཏང་བའོ།། ནད་དང་མི་སྦྱོར་ཀུན་ལ་ཞུ་དུས་གཏོང་།། རྨོངས་པའི་ལུགས་ཏེ་ནད་ཐོག་འབབ་པ་དཀའ།། དུས་ལས་མ་འདས་རྡེའུ་ངོས་འཛིན་འདྲ།། ནད་གང་གསོ་དཔྱད་སྦྱར་ཡང་མཆིལ་སྣབས་མང་།། ལུས་ལྕི་དང་ག་མི་བདེ་ཟས་མི་འཇུ།། རྒྱུན་སྐམ་ཁོང་འདུལ་འདྲུལབཤང་གཅི་དུས་མིན་འབྱུང་།། ཤེད་ཆུང་སྐད་དམའ་ནད་རྩེ་མ་ཞིལ་རྟགས།། ནད་གང་ཞི་དུས་གོང་ལས་ལྡོག་རྟགས་འབྱུང་།། མ་ཞི་བཅོས་ཤིང་ཞི་ནས་ལྷག་མི་སྦྱར།། བྱེ་བྲག་གསོ་བའི་ཚུལ་ལ་རྣམ་པ་གསུམ།། མ་ཞུར་བཅས་དང་རང་རྒྱུད་གཞན་དབང་ངོ་།། དང་པོ་དྲོད་ཆུང་ཟས་སྐོམ་མ་ཞུ་བ།། དེ་ཉིད་རླུང་སོགས་གནོད་བྱར་འདྲེས་པ་རྣམས།། སྨིན་དང་དྲོད་སྐྱེད་སྨན་གྱིས་རྩེ་བཅིལ་ལ།། རྟགས་ཐོབ་གང་དང་ཉེ་བའི་གནས་ནས་སྦྱང་།། སྟེང་འོག་རང་བྱུང་སྨན་གྱིས་དགག་མི་བྱ།། མ་སྨིན་མི་སྦྱང་ཞེན་ཕྱིར་ལུས་ཟུངས་འཇོམས།། དཔེར་ན་མ་ལངས་ཆན་ལ་ཆུ་བསིངས་བཞིན།། མ་ཞུ་མེད་པའི་རང་རྒྱུད་ནད་རྐྱང་དེ།། ནད་ཀུན་སྐྱེད་པར་བྱེད་པའི་རྒྱུ་བསྟེན་པས།། ཐོག་མར་རླུང་འཇུག་དེ་ནས་གཞན་འཇུག་སྟེ།། དེ་དག་ཟས་སྤྱོད་སློང་བའི་དུས་མ་འཛོམ།། རང་གནས་གསོག་ཅིང་རིང་སྡོད་ཤུགས་མི་ཕྱིན།། དཔེར་ན་འཁྲུག་པ་བྱེད་པའི་ཤི་བོ་བཞིན།། བཙིར་ཡང་མི་ལྡོག་བར་དུ་མི་ལྡང་ཞིང་།། རྐྱེན་ཕྲད་ནུས་པ་རྙེད་དེ་གནས་ལས་ལྡང་།། དེ་དག་ཐོག་མར་རླུང་ཞུགས་ནད་འཁྲུགས་ཕྱིར།། འཇིག་ཅིང་འཇུ་བྱེད་ཟས་ཀྱིས་སྨིན་བྱས་པས།། ནད་འཐོར་རླུང་དེ་ཚར་གཅོད་ཁོང་བར་བསྡུ།། དཔེར་ན་ཆར་པ་འབེབས་པའི་རླུང་གནོན་འདྲ།། དེ་ནས་གང་དང་ཉེ་བའི་ལམ་ནས་སྦྱང་།། ཡན་ལག་ཕྱིར་གནས་ཁོང་དུ་མ་འདུས་ན།། རྩ་སྒོ་ཕྱི་དང་ནང་ནས་སྦྱངས་ལ་དབྱུང་།། གཞན་དབང་བླ་གཉན་བཅས་པའི་ནད་ཡིན་ཏེ།། རང་གི་གནས་ནས་ལངས་ནས་གནས་གཞན་ཕྱིན།། ཕྱིན་ནས་རང་གནས་སྔ་མ་ལ་གནོད་འཁྲུག། དེ་སྟོབས་ཆུང་ན་རང་གནས་སྔ་མ་གསོ།། ཕྱི་མ་སྟོབས་ཆེ་བླ་གཉན་དེ་བཅོས་པས།། རང་གནས་གནས་པ་བཅོས་མི་དགོས་པར་འཚོ།། དཔེར་ན་རྐུན་མོ་བསྟེན་པའི་རྗེ་བོ་བཞིན།། ཁྱད་པར་གསོ་བའི་ཚུལ་ལ་རྣམ་པ་དགུ།། མ་རྟོགས་དོགས་བཅས་གདེངས་མ་ཐོབ་པའི་ནད།། བྱི་ལ་འཇབ་པ་ལྟ་བུའི་སད་མདས་བཅོས།། ངོས་ཟིན་ངེས་པ་རྙེད་ཅིང་གདེངས་ཐོབ་ན།། སྤོ་ལ་དར་འཕྱར་ལྟ་བུར་དངོས་སུ་བཅོས།། གཉེན་པོ་ཐོག་ཏུ་མི་འབབ་ནད་ལམ་གཟུང་།། རྟ་རྒོད་དཀྱུས་སུ་འཛུད་པ་ལྟ་བུར་བཅོས།། སྔར་བཅོས་ནད་ལ་དམན་ལྷག་ལོག་པ་གསུམ།། བརྟགས་ལ་སྐྱར་མོ་ཉ་ལེན་བཞིན་དུ་བཅོས།། སྟོབས་ཆེན་ནད་ལ་སྨན་དཔྱད་ཟས་སྤྱོད་བཞི།། ལག་གཏོད་མི་ཤ་འཕྲང་ཕྲད་ལྟ་བུར་བཅོས།། སྟོབས་ཆུང་ནད་ལ་སྤྱོད་ལམ་ཟས་སྨན་དཔྱད།། སྐས་གདང་ལྟ་བུར་མས་འཛེག་རིམ་པས་བཅོས།། རྐྱང་པའི་ནད་ལ་དཔའ་བོས་དགྲ་འདུལ་བཞིན།། དེ་གཞིལ་གཞན་ལ་གནོད་མེད་སྦྱོར་བས་བཅོས།། ལྡན་འདུས་ནད་ལ་འདུ་བ་ཆ་སྙོམས་གཅེས།། གཙོ་བོས་དམེ་ཤོར་འཁྲུགས་ཟླུམས་ལྟ་བུར་བཅོས།། ཀུན་ལ་གནོད་བྱ་ལ་སོགས་ཆོས་བཅུར་སྦྱར།། མཛོ་ཁལ་ལུག་ཁལ་ལྟ་བུར་འཚམ་པས་བཅོས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཚུལ་གྱི་ལེའུ་སྟེ་ཉི་ཤུ་རྩ་བདུན་པའོ།། །།

X