//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > བཤད་རྒྱུད། > ནང་དོན།

ལེའུ་སུམ་ཅུ་པ། གསོ་ཐབས་དངོས་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-25 15:13:22 ཀློག་གྲངས། 12 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག ཁྱད་པར་ཉེས་གསུམ་སོ་སོར་བཅོས་པ་ནི།། ཟུང་འཇུག་རླུང་ལ་ཏིལ་མར་མཆོག་ཡིན་ཏེ།། བུ་རམ་ཆང་དང་མར་རྙིང་ལུག་ཤ་ཡིབ།། འཕྱི་བ་རྟ་བོང་མི་ཤ་སྒོག་བཙོང་སོགས།། ལྕི་སྣུམ་འཇམ་དྲོའི་ཟས་ཀྱིས་བཅོས་པར་བྱ།། སྤྱོད་ལམ་མུན་ཁུང་དྲོ་བའི་གནས་སུ་བསྡད།། ཡིད་འོང་ཚིག་སྙན་གཉིད་ལོག་གོས་དྲོན་བགོ།། སྨན་དུ་རུས་བཅུད་གསུམ་གྱི་ཁུ་བ་དང་།། ལུག་མགོ་རྙིང་པའི་མགོ་འཁྲོལ་སྦྱོར་བ་བྱ།། བཅུད་བཞིའི་ཐང་དང་ཤིང་ཀུན་གསུམ་ཐང་བཏང་།། ཕྱེ་མ་ཛཱ་ཏི་ཤིང་ཀུན་ཅུར་ནིས་བསྟེན།། དཀར་འདོན་ཤ་འདོན་སྒོག་འདོན་སྐྱུར་འདོན་དང་།། ཛཱ་ཏི་སྒོག་སྐྱ་བཙན་དུག་རུས་ཆེན་དང་།། འབྲས་བུ་གསུམ་དང་རྩ་བའི་སྨན་མར་སྦྱར།། མདོར་ན་མངར་སྐྱུར་ལན་ཚ་ཚྭསྣུམ་དྲོས་བཅོས།། ཁྱད་པར་མར་རྙིང་དྲོད་ཀྱི་འཇམ་རྩི་བསྔགས།། དཔྱད་དུ་ལོ་མར་རྙིང་པའི་བསྐུ་མཉེ་བྱ།། སྣུམ་ལྡན་དུགས་ཀྱིས་གཟེར་བའི་གནས་སུ་བདུག། སྤྱི་གཙུག་ལ་སོགས་རླུང་གསང་མེ་ཡིས་མནན།། མཁྲིས་པའི་ནད་ལ་མར་གསར་མཆོག་ཡིན་ཏེ།། བ་ལང་རི་དྭགས་ཤ་གསར་ཆུ་བསིལ་ཇ།། བ་རའི་ཞོ་དར་སྐྱབས་དང་ཁུར་ཚོད་དང་།། ཆག་ཚེ་ཕྱེ་ཐུག་བསིལ་བའི་ཟས་ཀྱིས་བཅོས།། སྤྱོད་ལམ་བསེར་བུ་ཤིང་གྲིབ་ནིའུ་གསིང་བསྟེན།། ཆུ་འགྲམ་བསིལ་གནས་མ་འཁྲུགས་དལ་བར་བསྡད།། དྲི་བཟང་བསིལ་ཞིང་ཡིད་དུ་འོང་བས་བྱུག། སྨན་དུ་སྔོ་ཐང་རྩི་སྨན་ཐུན་མོང་གསུམ།། ག་བུར་ཙན་དན་གི་ཝཾ་ཚ་སྟོབས་སྦྱར།། མདོར་ན་མངར་ཁ་བསྐ་བསིལ་སྨན་གྱིས་བཅོས།། ཁྱད་པར་མངར་བའི་བཤལ་གྱིས་སྦྱང་བ་བསྔགས།། དཔྱད་དུ་རྔུལ་དབྱུང་ཆུ་ཡི་འཕྲུལ་འཁོར་བསྐོར།། གང་རྒྱས་རྩ་ལ་གཏར་ཞིང་བསིལ་གྱིས་བདུག། བད་ཀན་ནད་ལ་སྦྲང་རྩི་མཆོག་ཡིན་ཏེ།། ཉ་ལུག་གཡག་རྒོད་གཡི་དང་བྱ་རྒོད་ཤ། འབྲུ་རྙིང་ཟན་དྲོན་ཆང་ནར་ཕྱིན་པ་དང་།། ཆུ་སྐོལ་སྒ་ཆུ་ལ་སོགས་ཡང་ཞིང་རྩུབ།། དྲོ་ལ་ཆུང་བའི་ཟས་ཀྱིས་བཅོས་པར་བྱ།། སྤྱོད་ལམ་མེ་ཉིས་སྲོ་ཞིང་གོས་དྲོར་གཡོག། སྐམ་སར་ལུས་སེམས་རྩོལ་སྤྱད་གཉིད་མི་ལོག། སྨན་ལ་ལན་ཚ་ཚྭཚ་བའི་བསྡུས་ཐང་བཏང་།། ཕྱེ་མ་སེ་འབྲུ་ད་ལིས་ཐལ་སྨན་སྦྱར།། མདོར་ན་ཚ་སྐྱུར་ཡང་རྩུབ་རྣོ་བ་བསྟེན།། ཁྱད་པར་རྣོ་ལ་རྩུབ་པའི་སྐྱུགས་སྨན་བསྔགས།། དཔྱད་དུ་ཚྭ་དང་བོང་བ་སྤུ་དུགས་བསྟེན།། ཤིན་ཏུ་རྒྱས་ལ་མེ་བཙའ་ཐུར་མ་བྱ།། མདོར་ན་རླུང་ནད་འཇམ་རྩི་བཅུད་ཀྱིས་བཅོས།། མཁྲིས་པའི་ནད་ལ་བཤལ་དང་བསིལ་གྱིས་བཅོས།། བད་ཀན་ནད་ལ་སྐྱུགས་དང་དྲོད་ཀྱིས་བཅོས།། རླུང་དང་མཁྲིས་པར་ལྡན་ལ་བསིལ་བཅུད་བསྟེན།། བད་མཁྲིས་ལྡན་ལ་བསིལ་ལ་ཡང་བས་བཅོས།། བད་རླུང་ལྡན་ལ་དྲོ་ལ་བཅུད་པས་བཅོས།། འདུས་པའི་ནད་ལ་བསིལ་བཅུད་ཡང་བས་བཅོས།། མདོར་བསྡུས་ཚ་བ་ཐམས་ཅད་བསིལ་གྱིས་བཅོས།། གྲང་བའི་ནད་གཞི་ཐམས་ཅད་བད་ཀན་ལྟར།། རླུང་ནི་ཚ་གྲང་གང་འབྲེལ་སྣུམ་དྲོས་བཅོས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཐབས་དངོས་བསྟན་པའི་སྟེ་སུམ་ཅུ་པའོ།། །།

X