//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གཉིས་པ། རླུང་གི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 9:51:10 ཀློག་གྲངས། 20 

      དེ་ནས་སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།དང་པོ་ཉེས་གསུམ་གསོ་བའི་སྐབས་བསྟན་པ།། རླུང་དང་མཁྲིས་པ་བད་ཀན་གསུམ་དུ་བཤད།། དེ་ལ་རླུང་ནི་ནད་ཀུན་འཁྲུག་པའི་རྒྱུ།། སྣ་འདྲེན་མཇུག་སྡུད་འཐོར་དང་ཁྱབ་པར་བྱེད།། རང་རྒྱུད་གདུག་ཅིང་ནད་མང་རྩུབ་པའི་ཕྱིར།། ཐོག་མར་རླུང་གི་བཅོས་ཐབས་བཤད་པར་བྱ།། ཀྱེ་དྲང་སྲོང་ཆེན་པོ་མ་ཡེངས་གུས་པས་ཉོན།། རླུང་གི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་ལྔ་ཡིས་བསྟན།། རྒྱུ་ནི་མ་རིག་ལས་བྱུང་འདོད་ཆགས་ཀྱིས།། བསྐྱེད་རླུང་མཚན་ཉིད་དྲུག་ལྡན་ཐ་མལ་གནས།། དེ་རྐྱེན་ཁ་དང་ཡང་རྩུབ་བསྟེན་དྲགས་དང་།། ཆགས་པས་དུབ་དང་ལྟོ་དང་གཉིད་ཆགས་དང་།། ལྟོ་སྟོང་ལུས་ངག་བྱ་བ་དྲག་ཤུལ་དང་།། ཁྲག་མང་ཟགས་དང་འཁྲུ་སྐྱུགས་དྲག་པོས་བཏབ།། བསེར་བུས་བུས་དང་ག་ཆད་ངུས་པ་དང་།། མྱ་ངན་སེམས་ལས་ཁ་ཡི་ལས་ཆེས་དང་།། བཅུད་མེད་ཁ་ཟས་ཡེན་ལ་གཏད་པ་དང་།། ཤུགས་བཀག་པ་དང་ནན་གྱིས་བཙིར་བ་ཡི།། རྐྱེན་དེས་དང་པོར་རང་གནས་འཕེལ་ཞིང་གསོག། རང་གི་ནུས་སྟོབས་རྒྱས་ནས་རྐྱེན་ཕྲད་སློང་།། རྐྱེན་དྲག་གསོག་ལྡང་དུས་གཅིག་བྱེད་པའང་ཡོད།། ལངས་ནས་འཇུག་སྒོ་དྲུག་ཞུགས་རང་རྟགས་སྟོན།། བདེ་མེད་རླུང་ནད་དྲུག་ཅུ་རྩ་གསུམ་འབྱུང་།། དེ་ལ་དབྱེ་ན་སྤྱི་དང་བྱེ་བྲག་གཉིས།། སྤྱི་ལ་དབྱེ་ན་རིགས་དང་གནས་སུ་སྦྱར།། རིགས་ནི་གཞན་རྒྱུད་ལོག་པའི་ལམ་ཞུགས་པ།། རླུང་ནད་ཨ་ཝརྟ་དང་ད་རྒན་གཉིས།། འགྲམ་པ་ཉམས་དང་ལྕེ་ལྡིབ་ཕྱོགས་གཅིག་གུག རྩ་འཛིན་གཞོགས་ཕྱེད་སྐམས་དང་ལུས་ཀུན་སྐམས།། ཤིང་རེངས་དཔུང་འཇའ་བི་ཤ་ཙེ་དང་ནི།། སྲ་འཐེང་དང་ནི་བརླ་རེངས་ཅེ་སྤྱང་མགོ། ཚེར་མ་གཟུགས་འཁུམས་ཁ་ལི་རྐང་བརྩེ་དང་།། རྐང་པ་ཚ་བ་ཞེས་བྱ་ཉི་ཤུར་བཤད།། མདོར་བསྡུས་རེངས་འཁུམས་སྐམས་དང་སྦོས་པ་དང་།། འཕྱེས་གཟེར་འཕྱོས་དང་བོག་པ་བརྒྱད་དུ་བསྡུ།། གནས་ནི་རང་རྒྱུད་གནོད་བྱ་ལ་ཞུགས་པ།། ལྤགས་གྲམ་ཤར་རྒྱས་རྩ་རུ་རྒྱུ་བ་དང་།། རུས་ལ་ཞེན་དང་དོན་བབས་སྣོད་དུ་ལྷུང་།། དབང་པོ་ལྔ་ལ་མེ་ཏོག་ཤར་བ་འོ།། དེ་ལ་དང་པོ་ལྤགས་ལ་གྲམ་པ་གཅིག། གཉིས་པ་ཤ་དང་ཚིལ་ལ་ཞུགས་པ་གཉིས།། གསུམ་པ་རྩ་ཆུ་ཁྲག་ལ་ཞུགས་པ་གསུམ།། བཞི་པ་རུས་ཚིགས་རྐང་དང་བཅུད་ཞུགས་བཞི།། ལྔ་པ་གློ་སྙིང་མཆིན་མཆེར་མཁལ་ཞུགས་ལྔ།། དྲུག་པ་ཟས་དང་མ་ཞུ་ཞུ་བའི་གནས།། མཁྲིས་པ་བཤང་གཅི་མངལ་དུ་ཞུགས་པ་བདུན།། དབང་པོ་མགོ་མིག་རྣ་བ་སྣ་སོ་དང་།། ཀུན་ལ་ཞུགས་དང་ཉི་ཤུ་བརྒྱད་དུ་བཤད།། མདོར་བསྡུས་མགོ་རླུང་སྙིང་རླུང་གློ་རླུང་དང་།། མཆིན་རླུང་ཕོ་རླུང་ལོང་རླུང་མཁལ་རླུང་བདུན།། བྱེ་བྲག་དབྱེ་བ་སྲོག་འཛིན་གྱེན་རྒྱུ་དང་།། ཁྱབ་བྱེད་མེ་མཉམ་ཐུར་སེལ་རྐྱང་པ་ལྔ།། བད་ཀན་མཁྲིས་པར་འདྲེས་པས་བཅུ་རུ་བཤད།། བརྟག་པའི་ཐབས་ལ་རྣམ་པ་གསུམ་ཡིན་ཏེ།། སློང་བ་རྒྱུ་ཡི་སྒོ་ནས་བརྟག་པ་དང་།། མཚན་ཉིད་རྟགས་ཀྱི་སྒོ་ནས་བརྟག་པ་དང་།། ཕན་གནོད་གོམས་པའི་སྒོ་ནས་བརྟག་པ་འོ།། དང་པོ་སློང་བ་རྒྱུ་ལ་བརྟག་པ་ནི།། གོང་གི་ཟས་དང་སྤྱོད་ལམ་རྐྱེན་རྣམས་ཀྱིས།། བསླང་ནས་ན་ན་རླུང་ལས་གཞན་མི་སྲིད།། དེ་ཕྱིར་དང་པོ་རྒྱུ་བརྟག་གཅེས་པ་ཡིན།། མཚན་ཉིད་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་རྩ་ནི་སྟོང་ལ་རྐྱལ་བ་དང་།། ཆུ་ནི་ཆུ་འདྲ་དངས་ལ་ལོག་རྗེས་སླ།། འགྲོ་འདོད་ཤུས་འདེབས་ཤེས་པ་ཡང་ལ་འཕྱོ།། མགོ་བོ་ཟི་འཁོར་རྣ་བ་འུར་ལ་འཁྲོག། ལྕེ་སྐམ་དམར་རྩུབ་ཁ་རོ་བསྐ་བ་བྲོ།། གཟེར་འཕོ་གྲང་འདར་འགུལ་ཁྱབ་ཟུག་དང་སྙོམ།། རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད།། འགུལ་ན་ཟུག་ཆེ་སྤུ་བརྩེ་ཕྲུམ་བསེར་ཁྱེར།། གཉིད་མེད་གཡལ་འདར་རྨྱང་འདོད་ཚིག་པ་ཟ།། དཔྱི་རྐེད་རུས་ཚིགས་མ་ལུས་བརྡུངས་སྙམ་བྱེད།། ལྟག་པ་བྲང་དང་མུར་འགྲམ་ཟུག་ཅིང་གཟེར།། རླུང་གསང་རྣམས་ནི་ཁ་བྱེ་མནན་ན་ན།། སྟོང་སྐྱུགས་བྱེད་ཅིང་ཐོ་རངས་ལྦུ་གསོབ་ལུ།། སྦོ་འཁྲོག་དགོངས་དང་ཐོ་རངས་ཞུ་རྗེས་ན།། བྱེ་བྲག་བརྟག་པ་རླུང་གིས་སྒུར་པོར་བསྡུས།། འཁུན་ཞིང་དྲན་མེད་མིག་ཧར་དབུགས་འབྱིན་དཀའ།། དེ་མིན་རླུང་ནད་ཨ་ཝརྟ་ནར་བཤད།། ད་རྒན་ཕྱིར་དགྱེ་བྲང་འབུར་གཉའ་བ་བསྟུངས།། ལྟག་པ་དགྱེ་ལ་སོ་འཆའ་ལྦུ་བར་སྐྱུག། མགོ་དང་འགྲམ་པ་རྒྱབ་ན་སྐད་མི་ཕྱིན།། མིག་ཧར་གཡལ་འབྱུང་རྩིབ་ལོགས་གཉིས་སུ་ཟུག། ད་རྒན་ནང་གུག་ན་ཚུལ་དེ་འདྲ་ལ།། སྐེ་བསྟུངས་བྲང་དུ་བསྡུས་ཏེ་རོ་སྟོད་འབུར།། འགྲམ་པ་ཉམས་པ་འཐམས་འཕྱང་འབྱེད་འཛུམ་ཉམས།། ལྕེ་ལྡིབ་བཟའ་བཏུང་སྨྲ་དཀའ་ལྐུགས་ལྡིབ་ཐེན།། གཞོགས་གཅིག་གུག་པ་ཁ་ཡོ་མགོ་བོ་འདར།། ཚིགས་ཐོགས་མིག་རེངས་དྲན་ཉམས་གཉིད་ལོག་དངངས།། རྩ་འཛིན་རླུང་ཁྲག་སྤྱི་བོའི་རྩར་ཞུགས་ཏེ།། ནད་ཚབས་དྲག་ལ་སྤྱི་གཙུག་ཤ་མདོག་ནག། གཞོགས་ཕྱེད་སྐམས་པ་ཚོར་མེད་བྱ་བ་ཉམས།། ལུས་ཀུན་སྐམས་པ་ཐམས་ཅད་དེ་དང་འདྲ།། ཤིང་རེངས་དགྱེ་དགུ་མི་ཤེས་ཤིང་ལྟར་རེངས།། དཔུང་འཇའ་ཕྲག་ཞུགས་འདེགས་སོགས་བྱ་ཉམས་ན།། བི་ཤ་ཙེ་ནི་ལག་སོར་བྱ་བ་ཉམས།། སྲ་འཐེང་བརླ་ནང་ཆུ་བ་ལ་ཞུགས་པས།། འགྲོ་འདར་ཚིགས་ལྷོད་འཐེང་ཞིང་རྐང་པ་འཕྱེས།། བརླ་རེངས་བད་ཀན་ཚིལ་འཕེལ་བརླ་རུས་ཞེན།། གྲང་ཞིང་ཚོར་མེད་འདེགས་དཀའ་ལྕི་བ་འོ།། རླུང་ཁྲག་པུས་མོར་སྐྲངས་པ་ཅེ་སྤྱང་མགོ། ལོང་མོར་ཞུགས་པ་རླུང་ནད་ཚེར་མ་སྟེ།། རྟིང་ཆུར་ཞུགས་ན་བྱིན་རེངས་གཟུགས་འཁུམས་ཡིན།། གཟུགས་འཁུམས་བི་ཤ་ཙེ་འདོམ་ཁ་ལིར་བཤད།། རྐང་པ་བརྩེ་བ་རྐང་བརྩེ་ཞེས་བྱ་སྟེ།། རྐང་པ་ཚ་བ་དྲོད་བཅས་འགྲོ་ཚེ་ཚ།། མདོར་བསྡུས་རེངས་འཁུམས་དགྱེ་དགུ་བརྐྱང་བསྐུམ་ཉམས།། སྐམས་པ་ཚོར་མེད་བྱ་ཉམས་ཤ་ལྤགས་འབྱར།། སྦོས་པ་གཡོ་ཞིང་སྐྲངས་ལ་འཕེལ་འབྲི་བྱེད།། འཕྱེས་པ་སྨད་བཤལ་རྐང་པ་ལྕི་ལ་བེམ།། གཟེར་བ་ཀར་ཟུག་ནད་དྲག་ངེས་མེད་འཕོ།། འཕྱོས་པ་གཉིད་མེད་མང་སྨྲ་ངུ་བྲོ་དགོད།། ལྐུགས་པ་སྟོབས་དང་དྲན་ཉམས་སྨྲ་མི་ཤེས།། གནས་དང་སྦྱར་ན་ལྤགས་ལ་རླུང་གྲམ་པ།། གས་སྙམ་རེག་པ་རྩུབ་ལ་བརྩེ་བ་ཡིན།། ཤར་ཞུགས་སྐྲངས་རྩུབ་མདོག་འགྱུར་འབྲུམ་པ་འབྱུང་།། ཚིལ་ཞུགས་ཡིད་འཆུས་ལུས་སྐྲངས་རྨེན་བུ་སྐྱེད།། རྩར་ཞུགས་རྩ་དེ་སྟོང་ལ་སྦོམ་པོར་སྐྲངས།། ཁྲག་ཞུགས་གཉིད་ཆེ་རྩ་དམར་མདོག་མི་སྡུག། ཆུ་བར་ཞུགས་པ་ཞ་རེངས་འཐེང་པར་བྱེད།། རུས་ཞུགས་ཟུག་ཆེ་ཤ་སྐམས་ཉམ་སྟོབས་འཛད།། ཚིགས་ཞུགས་སྟོང་སྦོབ་སྐྲངས་ནས་ད་རྒན་འགྱུར།། རྐང་ཞུགས་གཉིད་མེད་དཀྲིས་སེམ་བཙིར་ན་ཕན།། ཁུ་བར་ཞུགས་པ་སྐམ་མམ་མདོག་འགྱུར་ལུག། སྙིང་ཞུགས་སྟོད་གང་ཤུས་འདེབས་ཤེས་པ་འཕྱོ།། གློར་ཞུགས་བྱད་སྐྲངས་མི་ཁོགས་ལྦུ་གསོབ་ལུ།། མཆིན་ཞུགས་བཀྲེས་དུས་གཡལ་མང་འཕྱོངས་ནས་ན།། མཆེར་ཞུགས་ལུས་སྐྲངས་སྦོ་འཁྲོག་སྟེང་དུ་གཟེར།། མཁལ་ཞུགས་མཁལ་རྐེད་ན་ཞིང་རྣ་བ་འོན།། ཟས་ལ་རླུང་ཞུགས་ཁ་ཟས་ཟོས་རྗེས་ན།། མ་ཞུའི་གནས་ཞུགས་སྒྲེག་སྐྱུག་ཡི་ག་འགག། སྦོ་འཁྲོག་སྐོམ་དད་ཆེ་ལ་དབུགས་མི་བདེ།། ཞུ་བའི་གནས་ཞུགས་གཟེར་ཞིང་སྦོ་འཁྲོག་བྱེད།། བཤང་འགག་ཆུ་སྲི་རྐེད་པ་མཇུག་ཏོ་ན།། མཁྲིས་ཞུགས་སྦོ་གཟེར་འཇུ་དཀའ་མིག་སྤྲིན་སེར།། བཤང་ཞུགས་རླུང་འཁྱིལ་རྟུག་སྐམ་སྒྲ་བཅས་འཁྲུ།། གཅིན་ཞུགས་ལྒང་པ་བསིལ་སྦོ་སྲི་འམ་སྙི།། མངལ་ཞུགས་འབུར་འདྲིལ་མངལ་ཁྲག་སྡོམ་མམ་འཛག། མགོར་ཞུགས་མགོ་འཁོར་ཟི་འཁྱོམ་བརྟད་མི་ཚུགས།། མིག་ཞུགས་རྩ་དམར་ལུག་སྙམ་བསེར་བུ་གནོད།། རྣ་བར་ཞུགས་པ་འུར་འཁྲོག་སྟོང་སྙམ་གཟེར།། སྣར་ཞུགས་སྣ་འགག་ཆུ་འཛག་དྲི་མི་ཚོར།། སོར་ཞུགས་བེར་བ་ལངས་ནས་ན་ཞིང་སྐྲངས།། ལུས་ཀུན་ཞུགས་པ་ཀུན་ཁྱབ་སྤྱི་རྟགས་འདྲ།། མདོར་བསྡུས་མགོ་རླུང་མགོ་འཁོར་རྣ་བ་འུར།། སྐྱུག་ཅིང་ལངས་ན་འགྱེལ་བུབ་ཕྱི་ཡུལ་འཁྱོམ།། སྙིང་རླུང་ལུས་འདར་སྟོད་རྒྱངས་ཤེས་པ་འཁྲུལ།། སྨྲ་འཆལ་མགོ་འཁོར་གཉིད་ཆུང་ཤུ་ཡིས་འདེབས།། གློ་རླུང་གཉིད་ཆུང་ཁོགས་དཀའ་ལྦུ་གསོབ་ལུ།། ལུས་རྒྱངས་སྐྱུག་དང་མིག་སྐྲངས་ནུབ་གློ་མང་།། མཆིན་རླུང་སྒྲེག་ཅིང་སྟོད་གཟེར་བཤུལ་ཤ་ན།། ཁ་ཟས་ཡི་གར་མི་འོང་མིག་མི་གསལ།། དགོངས་དང་ཐོ་རངས་མཆིན་པ་འཕྱོང་ཐག་ཆད།། ཕོ་རླུང་དབུགས་རྒོད་སྦོ་ལ་སྟོང་སྒྲེག་བྱེད།། ཕོ་བ་འབྲབ་སྙམ་ཟོས་རྗེས་བདེ་བར་མངོན།། ལོང་རླུང་སྦོ་འཁྲོག་འཁྲུ་དང་འོག་རླུང་མང་།། མཁལ་རླུང་མཁལ་རྐེད་ན་ཞིང་རྣ་བ་འུར།། ནང་ཚེགས་རླུང་ནད་རྣམ་ལྔ་ནད་གྱུར་རྟགས།། སྲོག་རླུང་ཟས་རྩུབ་སྨྱུང་དང་དྲག་ཤུལ་ལས།། ཤུགས་བཀག་བཙིར་བས་འཁྲུགས་ཏེ་མགོ་བོ་འཁོར།། སྙིང་འཕྱོས་དབུགས་སྡུད་དཀའ་ཞིང་མིད་མི་ཐུབ།། སྟོང་རྒྱུ་སྒྲེག་སྐྱུག་བཀག་དང་ངུ་དགོད་དྲགས།། ཁུར་ལྕི་བཏེག་པས་འཁྲུགས་ཏེ་དིག་ཅིང་ལྐུགས།། སྨྲ་དཀའ་སྟོབས་ཆུང་ཁ་ཡོ་དྲན་པ་ཉམས།། ཁྱབ་བྱེད་འགྲོ་འདུག་རྩེད་མོ་དྲགས་པ་དང་།། འཇིགས་དང་ཡི་མུག་ཁ་ཟས་རྩུབ་པས་འཁྲུགས།། སྙིང་སྤྱུགས་བརྒྱལ་འབོག་མང་དུ་སྨྲ་བ་དང་།། འགྲོ་འདོད་འཇིགས་སྐྲག་མི་སྙན་ཚིག་གིས་སློང་།། མཉམ་གནས་འཇུ་དཀའི་ཟས་དང་ཉིན་གཉིད་ཀྱིས།། འཁྲུགས་པས་ཕོ་བ་གྲང་ཞིང་ཟས་མི་ལེན།། སྐྱུག་ཅིང་ཁ་ཟས་མི་འཇུ་གསུས་ཁྲག་འདྲེས།། ཐུར་སེལ་བཤང་གཅི་ཕྱེན་དང་ཁུ་བ་ཡི།། ཤུགས་བཀག་བཙིར་བས་འཁྲུགས་ཏེ་རུས་མིག་ཁོལ།། ཡན་ལག་འཁྲུལ་འཕྱེས་དབུགས་ངན་དྲི་ཆུ་སྡོམ།། དེ་དག་གང་ཡང་མཁྲིས་པར་འདྲེས་པ་ཡིས།། ཚ་བ་སྐྱེ་ཞིང་མིག་ཆུ་སེར་བར་བྱེད།། བད་ཀན་འདྲེས་པས་ལྕི་བསིལ་རྨོངས་པར་འགྱུར།། ཕན་གནོད་བསྟེན་པའི་སྒོ་ནས་བརྟག་པ་ནི།། ཤ་ཆང་བུར་མར་དྲོད་བཅུད་བསྟེན་པ་དང་།། བསྐུ་མཉེ་མེ་ཉིས་དྲོས་ཤིང་འགྲངས་ན་བདེ།། ཆུ་གྲང་བ་དར་ལོ་ཤུར་གཡེར་མ་ཇ།། བཀྲེས་སྐོམ་གྲངས་དང་སྨྲ་རྗོད་ཉལ་པོ་དང་།། གཉིད་ཆག་སེམས་ལས་གནོད་པས་རླུང་དུ་ཤེས།། མདོར་བསྡུས་དང་པོ་ཟས་སྤྱོད་གནོད་པས་བསླང་།། བར་དུ་རྩ་སྟོང་ཆུ་དངས་གཡལ་འདར་རྨྱང་།། སྤུ་བརྩེ་དགོངས་དང་ཐོ་རངས་ཞུ་རྗེས་ན།། ཐ་མ་བསིལ་གནོད་དྲོད་བཅུད་ཕན་འགྱུར་བ།། ནད་གང་ཡིན་ཡང་རླུང་གི་མི་འགྱུར་རྟགས།།བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་ཐབས་ཟས་སྤྱོད་སྨན་དཔྱད་བཞི།། དང་པོ་ཟས་ཀྱི་སྒོ་ནས་བཅོས་པ་ནི།། ཟྭ་དང་བཙོང་སྒོག་ཟན་སྐམ་རུས་ཚོད་དང་།། ལུག་ཤ་རྟ་བོང་འཕྱི་བ་མི་ཡི་ཤ། ལོ་ཡིབ་བུ་རམ་མར་རྙིང་འབྲུ་མར་དང་།། ཟན་དྲོན་འོ་མ་ཆང་དང་བུར་ཆང་སོགས།། དྲོ་ཞིང་སྣུམ་བཅུད་ཟས་ཀྱིས་བཅོས་པར་བྱ།། གཡེང་བ་མེད་པའི་མུན་ཁུང་དྲོ་བའི་གནས།། གོས་མཐུག་གཉིད་ལོག་སྙན་ཚིག་སྨྲ་བ་དང་།། ཡིད་དུ་འོང་བའི་གྲོགས་ཀྱིས་བཅོས་པར་བྱ།། གནོད་ཅིང་སྐྱེད་པའི་ཟས་སྤྱོད་དུས་ཀུན་སྤང་།། སྨན་ནི་ཁུ་བ་ཆང་དང་འདོན་སྦྱོར་དང་།། ཕྱེ་མ་སྨན་མར་ལྔ་ལས་དང་པོ་ནི།། སྲེ་ལོང་སོགས་ཡུ་གཞུག་ཆུང་བསྡུས་ཁུ་འམ།། རུས་པ་སྣ་ཚོགས་བསྡུས་ཁུར་སྤོད་བཏབ་བཏང་།། རླུང་ནད་མ་ལུས་ཀུན་ལ་ཕན་པ་ཡིན།། ཤ་མར་བུར་རྙིང་ཆང་དུ་བསྡུས་པའི་ཐང་།། རླུང་ནད་ཀུན་སེལ་མཆོག་ཏུ་སོ་ལ་ཕན།། ཛཱ་ཏི་ཁ་རུ་ཚ་དང་ཤིང་ཀུན་བཏབ།། སྙིང་དང་སྲོག་རྩར་ཞུགས་པའི་རླུང་རྣམས་སེལ།། ལུག་མགོ་ལོ་གསུམ་ལོན་པའི་བསྡུས་ཁུ་

X