//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གསུམ་པ། མཁྲིས་པའི་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 9:57:32 ཀློག་གྲངས། 14 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། མཁྲིས་པའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྗེས་བཅད་དྲུག་གིས་བསྟན།། རྒྱུ་ནི་ནད་གཞི་སྣོད་ཀྱི་མཁྲིས་པ་ལ།། སློང་རྐྱེན་གནད་དུ་མཚོན་བསྣུན་འགྲམས་པ་དང་།། ཟས་སྐོམ་ཚ་སྐྱུར་མི་འཕྲོད་མ་ཞུ་དང་།། ཞེ་སྡང་མི་གཙང་ལྷ་བསྣོལ་འདྲེ་གཡོས་པས།། གསོ་དཀའ་མཁྲིས་ནད་བཞི་བཅུ་བདུན་དུ་འགྱུར།། དེ་ལ་དབྱེ་བ་སྤྱི་དང་བྱེ་བྲག་གཉིས།། སྤྱི་ལ་རིགས་དང་གནས་ཀྱིས་དབྱེ་བ་གཉིས།། རིགས་ཀྱི་སྒོ་ནས་དབྱེ་ན་རྣམ་བཞི་སྟེ།། ནད་གཞིའི་མཁྲིས་པ་ཐང་ལ་ལྷགས་པ་དང་།། མེ་དྲོད་མཁྲིས་པ་གཞན་གྱི་གནས་གྱུར་དང་།། སྣོད་ཀྱི་མཁྲིས་པ་ཁ་ལུད་ཁ་ཤོར་དང་།། ཐུན་མོང་མཁྲིས་པ་རྩ་རུ་རྒྱུ་བ་འོ།། དང་པོ་རྐྱེན་བཞིས་མཁྲིས་པ་འཕེལ་བ་སྟེ།། ཚད་པ་གསོ་བའི་སྐབས་སུ་རྒྱས་པར་སྟོན།། གཉིས་པ་རླུང་དང་མ་ཞུ་བད་ཀན་ཁྲག། འཇུ་བྱེད་མཁྲིས་པའི་ཡུལ་དུ་ཞུགས་པ་ཡིས།། མཁྲིས་པའི་གོ་ཕྲོགས་ཕྱི་རུ་བྱེར་བ་འོ།། གསུམ་པ་ཕོ་མཆིན་སྐྲན་གྱིས་མཁྲིས་པ་བཅར།། ཡང་ན་མཁྲིས་པ་རང་ལ་སྐྲན་ཞུགས་པས།། མཁྲིས་པ་དབང་མེད་ཕྱི་རུ་ཁ་ལུད་དམ།། འགྲམས་སམ་རླུང་གིས་མཁྲིས་ཁ་ཤོར་བ་འོ།། བཞི་པ་སྣོད་མཁྲིས་འཇུ་བྱེད་གང་ཡང་རུང་།། འགྲམས་འཁྲུགས་རིམས་རྐྱེན་མཁྲིས་པ་འཕེལ་བ་འམ།། ཟས་སྤྱོད་རྐྱེན་གྱིས་འཕེལ་ཏེ་རྩར་ལུད་པས།། ཤ་སེར་མིག་སེར་རྣམ་པ་གཉིས་སུ་འགྱུར།། མཁྲིས་ནད་བཅུ་གསུམ་རིགས་ཀྱི་དབྱེ་བར་འདོད།། མདོར་བསྡུས་ཐོག་མཐའ་རང་རྒྱུད་ཚ་བའི་ནད།། བར་པ་གཉིས་པོ་གཞན་དབང་ལྡན་པ་ཡིན།། གནས་ཀྱིས་དབྱེ་ན་ལྤགས་ལ་གྲམ་པ་དང་།། ཤ་ལ་རྒྱས་དང་རྩ་རུ་རྒྱུ་བ་དང་།། རུས་ལ་ཞེན་དང་དོན་བབས་སྣོད་དུ་ལྷུང་།། དབང་པོ་ལྔ་ལ་མེ་ཏོག་ཤར་བ་འོ།། དོན་ནི་གློ་སྙིང་མཆིན་མཆེར་མཁལ་མ་ལྔ།། སྣོད་ནི་ཕོ་ལོང་རྒྱུ་མ་ལྒང་པ་མངལ།། དབང་པོ་མགོ་མིག་རྣ་བ་སྣ་ལྕེ་འོ།། དེ་ལྟར་བཅུ་དགུ་གནས་ཀྱི་དབྱེ་བར་འདོད།། བྱེ་བྲག་འཇུ་བྱེད་སྒྲུབ་བྱེད་མདངས་སྒྱུར་དང་།། མཐོང་བྱེད་མདོག་གསལ་རྣམ་ལྔར་གྱུར་པ་འོ།། རླུང་དང་བད་ཀན་འདྲེས་པས་བཅུ་རུ་འགྱུར།། ཀུན་ཀྱང་མདོར་བསྡུས་ཚ་གྲང་གཉིས་སུ་འདུས།། ཁྲག་དང་མཁྲིས་པ་འཕེལ་བ་ཚ་བ་སྟེ།། མ་ཞུ་བད་རླུང་ཡུལ་ཕྲོགས་གྲང་བ་འོ།། དེ་ཡི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་མིག་སྤྲིན་བཞིན་ལྤགས་ཆུ་མདོག་སེར།། ལྟོ་ཆེ་མཁྲིས་པ་འཁྲུ་སྐྱུག་ཟ་འཕྲུག་བྱེད།། དེ་ཡང་མཁྲིས་པ་ཚ་བ་སྐོམ་དད་ཆེ།། རྩ་གྲིམས་ཆུ་ཡི་རླངས་ཆེ་ཀུ་ཡ་མཐུག། ཁ་ཁ་ལུས་ཚ་གཉིད་ཆུང་བཤང་བ་སེར།། ཤ་ཆང་མར་རྙིང་བུ་རམ་དྲོད་བག་གནོད།། མཁྲིས་པ་གྲང་བ་དེ་ལས་གོ་ལོག་སྟེ།། མེ་དྲོད་འཇུ་སྟོབས་ཆུང་ལ་བཤང་བ་དཀར།། བྱེ་བྲག་ཚ་བ་རྒྱུ་བརྟག་གོམས་པས་བརྟག། རླུང་གི་གནས་གྱུར་སྦོ་འཁྲོག་རྟུག་པ་སྐམ།། གཡལ་མང་དྲོད་བཅུད་ཟོས་རྗེས་བདེ་བར་མངོན།། མ་ཞུ་བད་ཀན་གང་གི་གནས་གྱུར་ཀྱང་།། ལུས་ལྕི་གཉིད་ཆེ་སྒྱིད་སྐྱུར་འདུག་སྙིང་འདོད།། ཟས་སྐོམ་སྤྱོད་ལམ་བསིལ་གནོད་དྲོ་ན་བདེ།། ཁྱད་པར་དྲི་མ་སྐྱ་ལ་གསོབ་པ་ཡིན།། ཁྲག་གི་གནས་གྱུར་སྨུག་པོའི་རྒྱུ་བྱས་ཏེ།། དྲི་མ་ནག་སྨུག་སྐམ་ལ་ཤ་རིལ་འདྲ།། མཆིན་པའི་སྐྲན་ནམ་མཆིན་པ་རྒྱས་པ་ཡིས།། མཁྲིས་ཡུལ་ཕྲོགས་ན་མྱངས་པས་དངོས་སུ་གསལ།། ཕོ་བའི་སྐྲན་གྱིས་ཡུལ་ཕྲོགས་ཟས་སྐོམ་འཁྲེན།། མཁྲིས་པའི་སྟེང་དུ་སྲ་ཞིང་མནན་མི་བཟོད།། མཁྲིས་པ་རང་ལ་སྐྲན་ཞུགས་ལུས་ཤེད་ཆུང་།། ལུས་ཀྱི་མདོག་སེར་ཟ་འཕྲུག་དང་ག་འགག། བཤལ་དང་གཏར་ལ་ནད་ཐོན་བཅོས་སྐྱེད་མེད།། ནད་དེ་འཆི་བདག་ཁ་རུ་ཚུད་དང་འདྲ།། ཁ་ཤོར་ཤེད་མེད་མཁྲིས་པ་འཁྲུ་སྐྱུག་བྱེད།། མཁྲིས་པ་འགྲམས་སམ་འཁྲུགས་ཚད་མཁྲིས་པར་བབས།། རིམས་ནད་མཁྲིས་པར་བབས་པའི་རྩར་རྒྱུག་གསུམ།། དེ་རྟགས་བཅོས་ཐབས་རང་རང་ལེ་འུར་བལྟ།། རང་བཞིན་ཟས་སྤྱོད་རྐྱེན་གྱིས་མཁྲིས་འཕེལ་བའི།། རྩར་རྒྱུག་དག་ལ་ཤ་སེར་མིག་སེར་གཉིས།། མཁྲིས་པ་ཤ་སེར་ཤེད་ཆུང་གཉིད་མི་ཐུབ།། ལུས་ལྕི་ཞོ་དར་ཆུ་སོགས་གང་ཡང་ཁ།། ཤ་མདོག་གསེར་འདྲ་རྫས་དཀར་སེར་པོར་མཐོང་།། སྔ་དྲོ་བསིལ་ཕེབས་བདེ་ལ་ཉིན་དགུང་ན།། མཁྲིས་པ་མིག་སེར་མིན་སྤྲིན་སེན་མོ་སེར།། ལུས་རྔུལ་ཉམས་ཆུང་ཁོང་ཚ་མིག་རུས་ན།། ཁ་ཟས་ཡི་གར་མི་འོང་སྐོམ་དད་ཆེ།། སྐྱུག་པ་སྙམ་བྱེད་མིག་སྔར་སྔོ་དམར་མཐོང་།། ཀུན་ཀྱང་ཡུན་རིང་རྒྱས་ནས་སྨིན་པའི་དུས།། ཀྵ་ཡ་ནག་པོར་གྱུར་ནས་ཟ་འཕྲུག་བྱེད།། ལྤགས་མདོག་སྔོ་ནག་སྐྲ་དང་སྨིན་མ་འབྱི།། ཤེད་མེད་ཤ་སྐམ་སེན་མོ་ནག་ཐིག་ཆགས།། འདི་དུས་མཁྲིས་པས་ཤ་རུས་ཐམས་ཅད་ཁྱབ།། གཤིན་རྗེའི་ཞགས་པས་ཟིན་པས་འཚོ་མི་འགྱུར།། འདི་ལ་བཅོས་ཐབས་མི་བརྩམ་ཚོགས་གསོག་བསྐུལ།། མཁྲིས་པ་ལྤགས་ལ་གྲམ་པ་ཟ་འཕྲུག་བྱེད།། ཤ་ལ་རྒྱས་པ་ཤུ་བ་ཐོར་པ་འབྱུང་།། ཕྲུགས་ན་ཆུ་སེར་ཁྲག་དང་མཁྲིས་པ་འཛག། རྩ་རུ་རྒྱུ་བ་ཚིགས་གཞི་ཉྭ་གཞི་དང་།། དྲོ་སར་ཟ་ཞིང་རྒྱས་ནས་ལུས་ཀུན་ཟ།། རྩ་མིག་མཁྲིས་པས་གང་ཕྱིར་ལྤགས་མིག་སེར།། གཏར་ན་ཁྲག་མེད་མཁྲིས་པ་ཟད་མར་འོང་།། རུས་ལ་ཞེན་པ་ཚིགས་པ་ཐམས་ཅད་ན།། ཁོལ་བུར་ན་ཞིང་ཤ་སྐམ་ཚིགས་ཐོག་སྐྲངས།། སྙིང་ལ་ཞུགས་ན་གློ་སྙིང་སྟོད་མི་བདེ།། ལྕེ་སེར་གཉིད་ཆུང་སྙིང་ལ་གྲང་མོ་འདོད།། གློ་ལ་ཞུགས་ན་སྣབས་ལུད་སེར་པོར་འོང་།། མཆིན་པར་ཞུགས་ན་ཤ་སྔོ་མཆིན་སྟེང་ན།། མགོ་ན་མིག་ཚ་མཆིལ་མ་སྐ་ལ་འདྲིལ།། མཆེར་པར་ཞུགས་ན་ལྕེ་ཁྲ་ཁྲག་རླན་འཁྲུ།། སྦོ་རྫིང་རྐང་པ་གཡོན་སྐྲངས་ལྷུ་ཚིགས་ན།། མཁལ་མར་ཞུགས་ན་རྐང་པ་ལྕི་ལ་སྦྲིད།། མཁལ་རྐེད་ན་ཞིང་རྣ་རྒྱབ་སེར་པོར་འགྲོ།། ཕོ་བར་ཞུགས་ན་མཁྲིས་པ་འཁྲུ་སྐྱུག་བྱེད།། ལོང་དང་རྒྱུ་མར་ཞུགས་ན་མཁྲིས་པ་འཁྲུ།། ལྒང་པར་ཞུགས་ན་ཆུ་ཁ་སྲིའམ་སྙི།། མངལ་དུ་ཞུགས་ན་མཁྲིས་པ་འཛག་གམ་འདྲིལ།། མགོ་ལ་ཞུགས་ན་མཚོགས་མ་ཀླད་པ་ན།། ཉི་མ་ཕོག་དང་ཞོ་འཐུངས་སྟོན་དུས་ལྡང་།། མིག་ཞུགས་མདོག་སེར་ཚ་ཞིང་མཆི་མ་མང་།། རྣར་ཞུགས་ཟུག་ཆེ་ཚ་ལ་ཆུ་སེར་འཛག། སྣར་ཞུགས་སྣབས་ཀྱི་མདོག་སེར་མཚུལ་པ་འགག། ལྕེ་ལ་ཞུགས་ན་ལྕེ་སེར་རོ་ཀུན་ཁ།། ཀུན་ལ་མིག་ཆུ་སེར་ན་མཁྲིས་པར་བརྟག། བྱེ་བྲག་མཁྲིས་པ་ལྔ་ལས་འཇུ་བྱེད་ནི།། ནད་དུ་གྱུར་ན་ལྕེ་སེར་སྐོམ་དད་ཆེ།། ཁ་ཟས་མི་འཇུ་དང་ག་འགག་པར་འགྱུར།། མདངས་སྒྱུར་ནད་གྱུར་ཆུ་སེར་ཕོ་བ་ལྟེམ།། ལུས་པོ་ལྕི་ལ་

X