//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཞི་པ། བད་ཀན་གྱི་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 9:59:30 ཀློག་གྲངས། 13 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།བད་ཀན་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་ལྔ་ཡིས་བསྟན།། རྒྱུ་ནི་མ་རིག་གཏི་མུག་ལས་བྱུང་བའི།། བད་ཀན་ཐ་མལ་མཚན་ཉིད་བདུན་ལྡན་དེ།། སློང་རྐྱེན་ཁ་མངར་ལྕི་བསིལ་སྣུམ་བསྟེན་དྲགས།། འགྲངས་རྗེས་དལ་བར་བསྡད་དང་ཉིན་གཉིད་ལོག། རླན་སྟེང་ཉལ་དང་ཆུར་ཞུགས་གོས་སྲབ་འཁྱགས།།གྲོ་སྲན་གསར་ཐོག་སེར་ཅན་སུངས་པ་དང་།། ར་སྐོམ་ཤ་རིད་ཚིལ་བུ་འབྲུ་མར་དང་།། རྩི་མར་རུལ་བ་ལོ་ཤུར་ལ་ཕུག་རས།། རི་སྒོག་ལ་སོགས་རྗེན་ཟས་མཐའ་དག་དང་།། མ་ཚོས་པ་དང་ཚིག་པོ་ཁེངས་པོའི་ཟས།། བ་རའི་འོ་མ་ཞོ་དར་ཆུ་གྲང་ཇ།། བཟའ་བཏུང་ཆེས་ཏེ་ཚད་ལས་འདས་པ་འམ།། སྔ་མ་མ་ཞུ་ཕྱི་མ་ཟོས་པ་ཡི།། རྐྱེན་དེ་རྣམས་ཀྱིས་བད་ཀན་གྲང་ནད་སློང་།། དབྱེ་བ་རང་རྒྱུད་ཅན་དང་གཞན་རྒྱུད་ཅན།། རང་རྒྱུད་ཅན་ལ་སྤྱི་དང་བྱེ་བྲག་གཉིས།། སྤྱི་ལ་རིགས་དང་གནས་ཀྱི་དབྱེ་བ་གཉིས།། རིགས་ཀྱི་སྒོ་ནས་དབྱེ་ན་བད་ཀན་ལྷེན།། བད་ཀན་ལྕགས་དྲེག་མེ་དྲོད་ཉམས་པ་དང་།། བད་ཀན་མགུལ་འགགས་གྲུམ་བུ་དཀར་པོ་དང་།། བད་ཀན་འཇུ་སྐེམ་ནད་དང་རྣམ་པ་དྲུག། གནས་ཀྱི་ཀྱིསདབྱེ་ན་ལྤགས་གྲམ་ཤ་ལ་རྒྱས།། རྩར་རྒྱུ་རུས་ཞེན་དོན་བབས་སྣོད་དུ་ལྷུང་།། དབང་པོ་ལྔ་ལ་མེ་ཏོག་ཤར་བ་འོ།། དོན་ནི་གློ་སྙིང་མཆིན་མཆེར་མཁལ་མ་ལྔ།། སྣོད་ནི་ཕོ་ལོང་རྒྱུ་མ་མཁྲིས་པ་དང་།། ལྒང་པ་མངལ་དུ་ཞུགས་དང་རྣམ་པ་དྲུག། དབང་པོ་མགོ་མིག་རྣ་བ་སྣ་ལྕེ་འོ།། བྱེ་བྲག་ནང་ཚེགས་རྟེན་བྱེད་མྱག་བྱེད་དང་།། མྱོང་བྱེད་ཚིམ་བྱེད་འབྱོར་བྱེད་རྣམ་པ་ལྔ།། རླུང་དང་མཁྲིས་པར་འདྲེས་པས་བཅུ་རུ་འགྱུར།། བཞི་བཅུ་རྩ་གཅིག་རང་རྒྱུད་དབྱེ་བར་འདོད།། གཞན་རྒྱུད་ཅན་ལ་སེར་པོ་སྨུག་པོ་གཉིས།། དེ་ཡི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་སློང་བ་རྒྱུ་ལ་བརྟག་པ་དང་།། མཚན་ཉིད་རྟགས་ཀྱི་སྒོ་ནས་བརྟག་པ་དང་།། ཕན་གནོད་གོམས་པའི་སྒོ་ནས་བརྟག་པ་གསུམ།། དང་པོ་སློང་བྱེད་རྒྱུ་ལས་བརྟག་བྱ་ན།། གོང་གི་བད་ཀན་སྐྱེད་པའི་ཟས་སྤྱོད་རྣམས།། བསྟེན་རྗེས་ན་ན་བད་ཀན་ཡིན་པར་བཤད།། ནད་རྟགས་རྩ་ནི་བྱིང་གུད་ཞར་བ་དང་།། ཆུ་ཡི་མདོག་དཀར་དྲི་དང་རླངས་པ་ཆུང་།། ཁ་མངལ་ལྕེ་རྙིལ་སྐྱ་ལ་མིག་དཀར་སྐྲངས།། སྣབས་ལུད་མང་ཞིང་མགོ་འཐོམ་ལུས་སེམས་ལྕི།། དང་ག་མི་བདེ་དྲོད་མེད་འཇུ་སྟོབས་ཆུང་།། མཁལ་རྐེད་མི་བདེ་ལུས་སྦོ་ལྦ་བ་སྐྱེ།། རྩམ་པ་བད་ཀན་སྐྱུག་ཅིང་འཁྲུ་བ་དང་།། གཏར་ན་ཁྲག་མདོག་དམར་སྐྱ་འབྱར་བག་དང་།། དྲན་པ་མི་གསལ་གཉིད་ཆེ་སྒྱིད་པ་སྐྱུར།། གཡའ་མཁྲང་ཚིགས་དམ་ཤ་རྒྱས་ལས་མཐའ་རིང་།། ནམ་ཞོད་སྲོད་དང་སྔ་དྲོ་ཟོས་ཐོག་ལྡང་།། ཕན་གནོད་ཟས་སྤྱོད་རྩུབ་ཡང་དྲོ་བ་འཕྲོད།། ལྕི་བསིལ་བསྟེན་པས་ཁྱད་པར་ན་ལས་གསལ།། བྱེ་བྲག་རིགས་ཀྱི་སྒོ་ནས་བརྟག་པ་ལ།། དང་པོ་བད་ཀན་ལྷེན་ཞེས་བྱ་བ་ནི།། རྟེན་དང་མ་གོམས་མི་འཕྲོད་ངོ་བོ་བཞིའི།། རྐྱེན་གྱིས་མ་ཞུ་བད་ཀན་བེ་སྣབས་འཕེལ།། བེ་སྣབས་ལྷེན་སྣའི་འོག་ཏུ་ཚོགས་པ་ལ།། ལྷེན་ཞེས་བྱ་སྟེ་ཉམས་ལ་འདྲིལ་སྙམ་བྱེད།། ལྟོང་ངེ་ན་ལ་མནན་ན་འདྲིལ་བ་མེད།། དང་ག་མི་བདེ་ཁ་ཟས་འཇུ་བ་དཀའ།། ཟོས་དུས་ན་ཞིང་ལྟོགས་ན་བདེ་བར་མངོན།། ལྕགས་དྲེག་ཅེས་བྱ་གོང་ལྟར་མ་ཞུ་བས།། བེ་སྣབས་འཕེལ་ཏེ་ཕོ་བའི་ནང་སུལ་ལ།། ལྕགས་དྲེག་ཆགས་པས་ཕོ་བའི་མེ་དྲོད་ཉམས།། སྒྲེག་འཚིང་ཕོ་བ་ཐམས་ཅད་ཧྲེམ་མེ་ན།། དང་ག་མི་བདེ་ཤ་སྐམ་སྡོད་སྙིང་འདོད།། བེ་སྣབས་བད་ཀན་ཁ་ཟས་ཟོས་ཚད་སྐྱུག། བད་ཀན་མེ་ཉམས་གྲང་རླུང་ཤས་ཆེ་ལ།། ཁ་ཟས་འཇུ་དཀའ་བསིལ་ཕྱོགས་ཚད་ལས་ཐལ།། གོས་སྲབ་ལུས་གྲངས་ཆུ་ཡི་ལས་མང་བྱས།། ཚད་གཞུག་བསིལ་ཐལ་སྦྱོངས་གཏར་དྲགས་པ་ཡིས།། མཁྲིས་པ་འཇུ་བྱེད་མེ་མཉམ་རླུང་མཐུ་ཉམས།། ལུས་ཀྱི་དྲོད་ཆུང་ཁ་ཟས་འཇུར་མི་འདོད།། སྦོ་འཁྲོག་འཚིང་སྒྲེག་ཁ་ཟས་མ་སྨིན་འཁྲུ།། སྟོབས་ཆུང་ཤ་སྐམ་མཇུག་ཏུ་དམུ་སྐྲན་འགྱུར།། བད་ཀན་མགུལ་འགགས་ཞེས་པ་ཕོ་བ་དང་།། བྲང་དང་གློ་བར་བད་ཀན་རྒྱས་པ་ཡིས།། བད་ཀན་རླངས་པ་གློ་ཡུ་མིད་པར་ཆགས།། དཔེར་ན་དོང་པའི་ལོགས་ལ་ཟོ་ཆགས་འདྲ།། དེས་རྐྱེན་མིད་པ་འཆུས་ནས་ཟས་མིད་དཀའ།། དབུགས་རྔུབ་མི་བདེ་ཤ་སྐམས་ལུས་སྟོབས་འཆོར།། ཟས་སྐོམ་མེད་པས་ཕོ་བ་ཆ་ནས་རུབ།། མཇུག་ཏུ་མིད་པ་འགགས་ནས་འཆི་བ་ཡིན།། བད་ཀན་གྲུམ་བུ་དཀར་པོ་ཞེས་བྱ་བ།། མ་ཞུ་རང་གནས་བད་ཀན་འཕེལ་བ་ཡིས།། ཕོ་བ་མཆིན་པ་གང་ཡིན་ཆ་མེད་ན།། ཁ་ཟས་ཅི་ཟོས་མི་ཞིམ་འཁྲུ་སྐྱུག་བྱེད།། ཉྭ་གཞི་མིག་རུས་ན་ཞིང་ཆུ་ཚན་འབྱུང་།། མཇུག་ཏུ་ཡན་ལག་ལ་བྱེར་གྲུམ་བུར་འགྱུར།། བད་ཀན་འཇུ་སྐེམས་ཞེས་བྱ་འགྲངས་པ་མེད།། སྟོབས་ཆུང་ཤ་སྐམ་གསུས་པ་ཤིན་ཏུ་ཆེ།། བྱིན་པ་འདར་ལ་སྒྱིད་པ་སྐྱུར་བ་ཡིན།། བད་ཀན་ལྤགས་གྲམ་དྲོད་བྲལ་བས་ལྡགས་གཡའ།། ཤ་རྒྱས་དྲོད་མེད་སྦོ་གསོབ་དྲེག་པ་ཆགས།། གཉིད་ཆེ་ལུས་ལྕི་སྒྱིད་སྐྱུར་རྨེན་བུ་འང་འོང་།། རྩར་ཞུགས་རྩ་རྒྱུད་གྲང་བསིལ་གྱོང་ལ་ལྕི།། རུས་ལ་ཞེན་ན་རུས་པ་གྲང་ཞིང་ན།། ཚིགས་ཁ་གཡོ་ཞིང་བརྐྱང་བསྐུམ་འགྲོ་འདུག་གྱོང་།། སྙིང་ལ་བབས་ན་དྲན་པ་རྨོངས་པར་བྱེད།། དང་ག་མི་བདེ་སྟོད་རྒྱངས་ལུས་སེམས་ལྕི།། གློར་བབས་སྟོད་རྒྱངས་མགོ་འཁོར་ཟས་མི་འདོད།། བེ་སྣབས་སྔོ་ལྗོབ་མང་དུ་ལུ་བར་བྱེད།། མཆིན་པར་བབས་ན་ཟོས་རྗེས་མཆིན་པ་ན།། སྲིན་བུ་ལྡོག་ཅིང་ཁ་ནས་ཆུ་སྔོན་འཛག། མཆེར་བབས་གཉིད་ཆེ་དབུགས་རྒོད་ཁོང་པ་སྦོ།། རྨྱ་ཞིང་སྒྱིད་པ་སྐྱུར་ལ་ཟས་མདོག་འཁྲུ།། མཁལ་བབས་མཁལ་རྐེད་ན་ཞིང་དྲི་ཆུ་སྲི།། རྣ་བ་འཐིབ་ཅིང་རླན་གྲང་ཁྱད་པར་གནོད།། ཕོ་བར་ལྷུང་ན་ཕོ་བ་མི་བདེ་ལྕི།། བྲང་ཚ་ཆུ་ཚན་འབྱུང་ཞིང་ཟས་མི་འཇུ།། ལོང་ལྷུང་སྦོ་འཁྲོག་བྱེད་ཅིང་ཟོས་ཚེ་ན།། རྒྱུ་མར་ལྷུང་ན་བེ་སྣབས་འཁྲུ་ཞིང་ལྕི།། མཁྲིས་པར་ལྷུང་ན་མིག་སེར་འཇུ་བ་དཀའ།། ལུས་ལྕི་སྒྱིད་པ་སྐྱུར་ལ་གཉིད་དུ་འབྱིང་།། ལྒང་པར་ལྷུང་བས་བད་ཀན་ཟ་ཁུར་འགྱུར།། མངལ་ལྷུང་སྨད་གྲང་ཟླ་མཚན་གཅིན་བག་འཛག། བད་ཀན་མགོ་ལ་ཞུགས་ན་མགོ་བོ་ལྕི།། གཉིད་ཆེ་དང་ག་མི་བདེ་ཡི་ག་འགག། མིག་ལ་ཞུགས་ན་སྐྲངས་ཤིང་མཆི་མ་འཛག། རྣ་བར་ཞུགས་ན་གྲང་ཞིང་ལྕི་ལ་འཐིབ།། སྣ་ལ་ཞུགས་ན་སྣ་འགག་མཚུལ་པ་ལྕི།། ལྕེ་ལ་ཞུགས་ན་ལྕེ་གྱོང་རོ་མི་ཚོར།།

X