//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ལྔ་པ། འདུས་ནད་བད་ཀན་སྨུག་པོ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:01:27 ཀློག་གྲངས། 12 

     དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། རླུང་མཁྲིས་བད་ཀན་བཅོས་ཐབས་དེ་ལྟར་ན།། འདུས་པའི་ནད་ལ་གསོ་ཐབས་ཇི་ལྟར་བགྱི།། མཚོན་བྱེད་མིང་དང་དབྱེ་བ་ཇི་ལྟར་ལགས།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ།ཀྱེ་དྲང་སྲོང་ཆེན་པོ་ཡིད་ལས་སྐྱེས།། འདུས་པའི་ནད་ལ་གསུམ་གས་བཅོས་པ་སྟེ།། འོན་ཀྱང་རང་བཞིན་རྒྱུ་ཡིས་འདུས་པ་དང་།། བྱུང་ཚུལ་དུས་ཀྱི་སྒོ་ནས་འདུས་པ་དང་།། འདུ་བ་འཁྲུགས་པའི་སྒོ་ནས་འདུས་པ་གསུམ།། ཕྱི་མ་མ་སྨིན་ཚ་བ་དུག་ནད་དེ།། དང་པོ་མཚོན་བྱེད་བད་ཀན་སྨུག་པོར་བཏགས།། དེ་ལ་རྒྱུ་རྐྱེན་གནས་དུས་རིགས་དང་རྟགས།། བཅོས་པའི་ཐབས་དང་རྗེས་བཅད་བརྒྱད་དུ་བཤད།། རྒྱུ་ནི་བད་ཀན་ཁྲག་མཁྲིས་རླུང་དང་བཞི།། ནད་ཀུན་འདུས་ཕྱིར་འདུས་ནད་རྟགས་བཅོས་དཀའ།། དེ་ལ་སྐྱེད་པའི་རྐྱེན་ནི་ཚ་གྲང་གཉིས།། ཚ་རྐྱེན་འགྲམས་ཁྲག་ལྷག་དང་མཚོན་ཁྲག་ལུས།། དེ་ཉིད་མཆིན་པའི་སྟེང་དུ་ལྷུང་བའམ།། ཚ་སྐྱུར་ཟས་ཀྱིས་ཁྲག་འཕེལ་མཆིན་པ་རྒྱས།། དེ་དག་ཟུངས་སུ་འགྱུར་དུ་མ་འདོད་པར།། མཆིན་གནས་ཕོ་བར་བབས་པས་བད་ཀན་འདྲེས།། ཁྲག་དང་བད་ཀན་རུལ་ནས་རྒྱུ་མར་ལྷུང་།། མཁྲིས་པར་འདྲེས་པས་ཁ་དོག་དུད་ཁུར་འགྱུར།། དེ་ཉིད་ལོང་དུ་འཕྱུགས་པས་རླུང་དང་བསྡོངས།། དེ་ལ་སྨུག་པོ་ཡས་བབས་ཞེས་སུ་འདོད།། གྲང་རྐྱེན་འཇུ་དཀའ་མི་འཕྲོད་ཟས་བསྟེན་པས།། ཕོ་བར་མ་ཞུ་དེ་ཡིས་བེ་སྣབས་འཕེལ།། མེ་མཉམ་རླུང་དང་འཇུ་བྱེད་མཐུ་ཉམས་པས།། དངས་སྙིགས་མ་ཕྱེད་མཆིན་པའི་གནས་སུ་ཤོར།། ཟུངས་སུ་མ་གྱུར་ཁྲག་ངན་མཆིན་པར་རྒྱས།། ཁ་ལུད་གོང་བཞིན་ཕོ་བར་ལྷུང་བ་དེ།། མ་ཞུས་རྒྱུ་བྱས་བད་ཀན་གྲང་ཤས་ཆེ།། སྨུག་པོ་གབ་པས་ཝ་ལྟར་གཞའ་བར་བྱེད།། དེ་ལ་སྨུག་པོ་མས་ཆགས་ཞེས་བྱར་འདོད།། སྨུག་པོའི་གནས་ལ་རང་གནས་གཞན་གནས་གཉིས།། རང་གནས་ཕོ་མཆིན་རྒྱུ་ལོང་རྣམ་པ་བཞི།། ཕོ་བར་གནས་པས་བད་ཀན་ནད་དང་འདྲ།། མཆིན་པར་གནས་པས་ཁྲག་གི་ནད་དང་འདྲ།། རྒྱུ་མར་གནས་པས་མཁྲིས་པའི་ནད་དང་འདྲ།། ལོང་དུ་ལྷུང་བས་རླུང་གི་ནད་དང་འདྲ།། གནས་གཞན་བྱེར་ལ་ཕྱི་ནང་རྣམ་པ་གཉིས།། ཕྱི་གནས་ཤར་རྒྱས་ལྤགས་གྲམ་ས་བདག་འདྲ།། རྩར་བྱེར་དུག་འདྲ་ཚིགས་ལ་གྲུམ་བུར་བྱེད།། ནང་གནས་སྲོག་རྩ་མཆིན་ལམ་ཁྲག་ལ་ཞོན།། སྲོག་རྩ་རྫོང་ལ་ཚིགས་པ་མཁར་དུ་འདོད།། ཡར་ལ་མགོ་ལ་འཕྱུར་བས་མགོ་ནད་བྱེད།། གློ་ལ་གློ་ནད་སྙིང་ལ་སྙིང་རླུང་བྱེད།། མཆེར་པར་མཆེར་ནད་མཁལ་མར་མཁལ་ནད་བྱེད།། སྨུག་པོའི་དུས་གསུམ་དང་པོ་ཚ་བའི་དུས།། བར་དུ་ཚ་གྲང་འཐབ་པའི་དུས་ཡིན་ཏེ།། ཐ་མ་གྲང་བ་ལྷིང་ཆད་པ་དང་གསུམ།། དང་པོ་སྨུག་པོ་ཚ་བ་སྐྱེས་པ་ལས།། ཁྲག་མཁྲིས་འཕེལ་བས་རྒྱས་ཏེ་ཚ་བའི་དུས།། གྲང་བ་སྐྱེས་ན་དང་པོར་རང་གནས་གབ།། བར་དུ་ཁྲག་མཁྲིས་ཚ་ལ་བད་རླུང་གྲང་།། དེ་དག་ཤེད་སྙོམས་ཚ་གྲང་འཐབ་པར་བྱེད།། ཐ་མར་ཁྲག་མཁྲིས་ཚ་བའི་སྟོབས་ཟད་ནས།། བད་རླུང་རྒྱས་པས་གྲང་བར་འགྱུར་བ་ཡིན།། སྨུག་པོའི་རིགས་ལ་བྱེར་རྒྱས་འགྱིངས་འདྲིལ་བཞི།། བྱེར་ལ་ཕྱིར་བྱེར་བ་དང་ནང་བྱེར་གཉིས།། སྨུག་པོ་རྒྱས་ལ་རྡོལ་དང་མ་རྡོལ་གཉིས།། སྨུག་པོ་འགྱིངས་ལ་གབ་དང་མ་གབ་གཉིས།། སྨུག་པོ་འདྲིལ་ལ་གསར་དང་རྙིང་པ་གཉིས།། དེ་རྣམས་བརྟག་ཐབས་སྤྱི་དང་བྱེ་བྲག་གཉིས།། སྤྱི་ལ་རྩ་ཆུ་ནད་རྟགས་ལོ་མ་དང་།། ཕན་གནོད་བསྟེན་པའི་སྒོ་ནས་བརྟག་པ་བཞི།། རྩ་ལ་ངོས་བཟུང་སྦོམ་ཁེངས་ཀན་རྩ་ཞར།། གྲང་བས་བསྐྱེད་ན་ཕལ་ཆེར་ཕྲ་ལ་གུད།། ཆུ་མདོག་སྨུག་དུགས་སྐ་ལ་རྙོག་མ་ཅན།། ཡང་ན་དམར་སྨུག་ལྗང་ཡང་སྲིད་པ་ཡིན།། ན་ལུགས་ཕོ་མཆིན་ཁ་འཁོར་རོ་རྒྱབ་སྦྲག། ལུས་ལྕི་བྱིན་པ་མི་ཐེག་སྒལ་ཚིགས་ན།།དང་ག་མི་བདེ་ཁ་མངལ་ཉ་དྲི་བྲོ།། བྲང་ཚ་སྐྱུག་སྙམ་བྱེད་ཅིང་སྐྱུག་པ་དཀའ།། སྐབས་སུ་ཁོང་ཚ་མགོ་དང་མིག་རུས་ན།། རྔུལ་གྲངས་རྗེས་ལ་གླང་ཐབས་ལྡང་བ་དང་།། དྲི་མ་སྨུག་ལ་སྐམ་ཞིང་ཤ་རིལ་འདྲ།། འགྲངས་ཀྱང་ན་ལ་ལྟོགས་ཀྱང་ན་བ་དང་།། གྲངས་ཀྱང་ན་ལ་དྲོས་ཀྱང་ན་སྙམ་བྱེད།། དོན་མེད་ན་ལ་བྱས་པ་མེད་པར་དྲག། ཕལ་ཆེར་སྟོན་དཔྱིད་དུས་ན་ལྡང་བ་ཡིན།། འདི་ལ་དུས་ཀྱི་ལོ་མ་རྣམ་གསུམ་འབྱུང་།། དང་པོ་འཇུག་དུས་ཆུ་ཚན་ཆུ་སྐྱུར་སྐྱུག། བར་དུ་སྨིན་ནས་སེར་པོ་རྒྱ་བཤལ་སྐྱུག། ཐ་མར་རྒྱས་ནས་ཁྲག་རུལ་དུད་ཁུར་སྐྱུག། གསར་ཐོག་འབྲུ་དང་གྲོ་ཡོས་ཕྱེ་སུངས་ཟན།། མར་རྙིང་ཁྲག་ཚོད་འབྲུ་མར་ར་ཤ་དང་།། གནག་ཤ་རུལ་སུངས་ཉ་ཕག་ཤ་བེམ་དང་།། ཆང་སྐྱུར་སྒོག་སྐྱ་ཞོ་མ་ལངས་ལ་སོགས།། སྣུམ་ལྕིའི་ཟས་དང་བསིལ་དྲོད་དྲགས་པ་གནོད།། གནའ་དགོ་བ་ལང་ཤ་གསར་རྙིང་པའི་འབྲུ།། སྲན་མ་བ་ར་མཛོ་ཞོ་དར་བ་དང་།། ཉ་ཤ་ཕག་ཤ་སོལ་བ་ལ་སོགས་པ།། ཟས་སྐོམ་ཡང་རྩུབ་བསིལ་དྲོད་སྙོམས་པ་འཕྲོད།། བྱེ་བྲག་གནས་ས་ཡུལ་ལ་བརྟག་པ་དང་།། གནས་སྐབས་དུས་དང་ནད་རིགས་སྒོ་ནས་བརྟག། དང་པོ་གནས་ས་ཕོ་མཆིན་རྒྱུ་ལོང་བཞི།། ཕོ་བར་གནས་ཚེ་སྒྲེག་སྐྱུག་ཟོས་རྗེས་ན།། འཇུ་དཀའ་ཆང་རྒན་ཆང་གསར་ཤི་ཤ་གནོད།། ཧ་ཅང་དྲོད་དྲགས་རླན་གྲང་དུས་ན་ལྡང་།། མཆིན་པར་གནས་ཚེ་མཆིན་དྲི་རོ་རྒྱབ་ན།། ཚིགས་པ་བཀན་ཞིང་མཉེས་ན་ཕན་སྙམ་བྱེད།། མེ་ཉི་དྲོད་བཅུད་རུལ་སྐྱུར་དག་ལས་ལྡང་།། མཆིན་པར་རྒྱས་ན་སྲ་ཁེངས་སྐྲན་ལྟར་ན།། རྒྱུ་མར་གནས་ཚེ་ན་ཞིང་འགྱུ་བ་དང་།། འདྲིལ་ནས་ན་ཞིང་མིག་དང་ཆུ་མདོག་སེར།། ལོང་དུ་གནས་ཚེ་སྦོ་འཁྲོག་འུར་བ་དང་།། དགོངས་དང་སྐྱུར་འཐུངས་དུས་ན་ཁྱད་པར་སྦོ།། ཐུར་རླུང་དྲི་ཆེ་དྲོད་འཕྲོད་གྲང་བ་གནོད།། དུས་ཀྱི་བརྟག་པ་དང་པོ་ཚ་བའི་དུས།། རྩ་གྲིམས་ཆུ་མདོག་སྨུག་ལ་དྲི་རླངས་ཆེ།། ལྕེ་སྐམ་གྱོང་ལ་ཁ་ཁ་དང་ག་འགག། ལུས་ལྕི་གཉིད་ཆེ་གདོང་སྣུམ་མིག་སྤྲིན་དམར།། མཆིན་དྲི་རོ་རྒྱབ་གཉིས་སུ་སྦྲག་ཅིང་གཟེར།། མགོ་དང་མིག་རུས་ན་ཞིང་མཚོགས་མ་ལྕི།། མེ་དང་ཉི་མས་དྲོས་ཚེ་ཁྱད་པར་ན།། རུལ་སྐྱུར་དྲག་ཤུལ་རྗེས་ལ་ལྡང་བ་ཡིན།། དེ་ཉིད་སྨུག་པོའི་ཚ་བ་རྒྱས་ཞེས་བྱ།། འཐབ་པ་སྨུག་པོས་མཉམ་གནས་ལམ་བགགས་པས།། མཉམ་གནས་སྣོད་ཀྱི་རྩ་ནང་ཀུན་ཏུ་ཞུགས།། རླུང་ཁྲག་ཕར་འབོར་ཚུར་འབོར་འདེད་ཅིང་རྒྱུ།། དུས་མེད་རྒྱུན་དུ་ཟུག་ཆེ་གླང་ཐབས་ལྡང་།། ཉིན་མོ་ཅུང་བདེ་མཚན་མོ་རྒྱུན་དུ་ན།།

X