//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:10:34 ཀློག་གྲངས། 8 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གཅོང་ཆེན་སྐྲན་ལ་རྒྱུ་རྐྱེན་དབྱེ་བ་དང་།། གནས་ས་གྱུར་ཚུལ་རྟགས་དང་བཅོས་ཐབས་དྲུག། རྒྱུ་ནི་མ་ཞུ་བད་ཀན་ཁྲག་མཁྲིས་རླུང་།། སྲིན་དང་ཆུ་སེར་སྤུ་ལས་འབྱུང་བ་ཡིན།། རྐྱེན་ནི་སྔོན་ལས་གདོན་དང་མ་ཞུ་བ།། འགྲམས་འཁྲུགས་མཚོན་དང་བུ་བཙས་རླན་གྲངས་བསྐྱེད།། དབྱེ་བ་བད་ཀན་ཟས་ལྷེན་རྡོ་ཡི་སྐྲན།། རླུང་གི་ལྷིང་སྐྲན་ཁྲག་མཁྲིས་རྩ་སྐྲན་དང་།། སྤུ་སྲིན་ཆུ་སྐྲན་རྣག་སྐྲན་བཅུ་གཅིག་གོ། གནས་ནི་གློ་སྙིང་མཆིན་དྲི་མཆིན་མཆེར་མཁལ།། མཁྲིས་པ་ཕོ་ལོང་རྒྱུ་མ་ལྒང་པ་མངལ།། སྙིགས་མ་མ་ཞུའི་ཟས་སྐྲན་ཕོ་ལོང་འབྱུང་།། ལྷེན་སྐྲན་ཕོ་བ་རྡོ་སྐྲན་ཕོ་བ་ལྒང་།། ལྷིང་སྐྲན་ཕོ་བ་ལོང་དང་མངལ་དུ་གནས།། ཁྲག་སྐྲན་ཕོ་ལོང་མཆིན་མཆེར་མངལ་དུ་འབྱུང་།། མཁྲིས་སྐྲན་སྣོད་མཁྲིས་རྒྱུ་མའི་ནང་དུ་གནས།། རྩ་སྐྲན་ཕོ་མཁལ་མཆིན་དྲི་རྒྱུ་གྲོག་མང་།། སྤུ་སྐྲན་ཕོ་ལོང་རྒྱུ་མ་ལྒང་པར་གནས།། སྲིན་སྐྲན་ཕོ་ལོང་གཉིས་ཀྱི་ནང་དུ་འབྱུང་།། ཆུ་སྐྲན་ངེས་མེད་གར་ཡང་འབྱུང་སྲིད་དེ།། གློ་སྙིང་མཆིན་པ་རྒྱུ་ལོང་བར་དུ་མང་།། རྣག་གི་སྐྲན་ལ་གར་འོང་ངེས་པ་མེད།། མདོར་བསྡུས་ཕྱི་སྐྲན་ནང་སྐྲན་བར་སྐྲན་གསུམ།། ཕྱི་སྐྲན་སྣོད་ཀྱི་ཕྱི་དང་ཤ་ལྤགས་བར།། བར་སྐྲན་སྣོད་ཀྱི་ནང་ལྡེབས་དོན་གྱི་ལོགས།། ནང་སྐྲན་དོན་སྣོད་ཀུན་གྱི་གཏིང་ན་གནས།། གྱུར་ཚུལ་ཁ་ཟས་གྱོང་ཚིལ་སྦང་མ་སོགས།། མ་ཞུ་རང་སོར་གནས་པས་བེ་སྣབས་འདྲིལ།། སྙིགས་མ་མ་ཞུ་ཟས་ཀྱི་སྐྲན་དུ་འགྱུར།། མ་ཞུའི་རྐྱེན་གྱིས་བད་ཀན་བེ་སྣབས་འཕེལ།། རླུང་གིས་བསྒྲིལ་བས་ལྷེན་སྐྲན་ཞེས་བྱར་འགྱུར།། དངས་མ་མ་ཞུ་ཕོ་བར་ཡུན་རིང་གནས།། བད་ཀན་གྲང་བས་རྒྱུ་བྱས་རླུང་གིས་བསྒོངས།། ཡང་ཡང་གཡོགས་ཤིང་སྲ་བར་སྨིན་པ་ནི།། དངས་མ་མ་ཞུ་རྡོ་སྐྲན་ཞེས་བྱར་འགྱུར།། དངས་མ་མ་ཞུ་མཆིན་པར་ཁྲག་ངན་རྒྱས།། མཆིན་པའི་གཤམ་དུ་ཁྲག་གི་ཟིལ་པ་ཆགས།། འཕེལ་ཞིང་རྒྱས་པས་མཆིན་པའི་ཁྲག་སྐྲན་འགྱུར།། དེ་འདྲ་མཆེར་པར་ཞུགས་པ་མཆེར་པའི་སྐྲན།། མཆིན་ཁྲག་ཕོ་བར་ལྷུང་བས་བད་ཀན་བསྲུལ།། ཁྲག་བཙོས་འདྲིལ་བས་སྨུག་པོའི་སྐྲན་དུ་འགྱུར།། དེ་ཉིད་ལོང་ཕུགས་འདྲིལ་བ་ལོང་སྐྲན་ཡིན།། དེ་བཞིན་རྒྱུ་མར་ལྷུང་བ་མཁྲིས་པར་འདྲེས།། སྲ་བར་འདྲིལ་བ་རྒྱུ་མའི་མཁྲིས་སྐྲན་ཡིན།། དངས་མ་མ་ཞུ་མཆིན་གནས་མཁྲིས་པར་ལྷུང་།། མཁྲིས་པའི་རྩི་ཆགས་འདྲིལ་བ་སྣོད་མཁྲིས་སྐྲན།། དངས་མ་མ་ཞུ་ངན་ཁྲག་རྒྱས་པ་དེ།། མཆིན་དྲི་གློ་མཁལ་རྒྱུ་གྲོག་ཕོ་བའི་རྩར།། འགྲིམས་པ་ས་གཅིག་འདྲིལ་བ་རྩ་ཡི་སྐྲན།། མཚོན་ལམ་མཚོན་ཁྲག་འཁྱིམས་པའང་དེ་བཞིན་ནོ།། དངས་མ་མ་ཞུ་ལྒང་པའི་རྩ་མིག་འགྲིམས།། ཆུ་ཡི་དྲོད་ཀྱིས་བཙོས་བསྒྲིལ་རྡེ་འུར་འགྱུར།། བུད་མེད་བུ་བཙས་ནད་ལྷག་མངལ་དུ་འདྲིལ།། དེ་ཉིད་བུ་བཙས་མངལ་གྱི་ཁྲག་སྐྲན་ཡིན།། ཕོ་བ་ལོང་དུ་སྲིན་བུ་དྲུ་བུར་འདྲིལ།། སྲིན་སྐྲན་ཞེས་བྱ་ཕོ་བ་ལྒང་པའི་ནང་།། སྤུ་འཐུམས་འདྲིལ་བས་སྤུ་ཡི་སྐྲན་དུ་འགྱུར།། དངས་མ་མ་ཞུ་རྩ་མིག་བྱེར་བ་ཡིས།། དོན་སྣོད་ལོགས་ལ་ཆུ་སེར་ཕུར་མར་ཆགས།། ཆུ་སྐྲན་ཞེས་བྱ་རྣག་སྐྲན་རྣག་ཐུམས་ཡིན།། ཕོ་ལོང་མངལ་དུ་སྐྲན་གང་རླུང་གིས་བསྐྱོད།། འཕྱོ་ལྡིང་འཕེལ་འབྲི་བྱེད་པ་རླུང་གི་སྐྲན།། རྐྱང་པའི་རླུང་ལས་སྐྲན་དུ་འགྱུར་བ་མེད།། མདོར་བསྡུས་སྐྲན་ཀུན་ཚ་གྲང་གཉིས་སུ་བསྡུ།། ཁྲག་དང་མཁྲིས་པས་རྒྱུ་བྱས་ཚ་བའི་སྐྲན།། བད་རླུང་གྲང་བས་རྒྱུ་བྱས་གྲང་སྐྲན་ཡིན།། དེ་ཡི་རྟགས་ལ་སྤྱི་དང་བྱེ་བྲག་གཉིས།། སྐྲན་ཀུན་སྤྱི་རྟགས་རྩ་རྒྱུད་ཞན་ཅིང་ཞར།། ཆུ་ལ་སྐྲན་ཐིགས་ཉ་མིག་འབྱུང་བ་དང་།། གང་ལ་སྐྲན་ཡོད་སྟེང་དུ་དྲེག་པ་ཆགས།། ཁ་ཟས་མི་འཇུ་གྲངས་རྐྱེན་སྒྲེག་ཅིང་སྐྱུག། ཁྱད་པར་ཤ་རིད་མར་རྗེན་སིངས་གླེག་སྐྱུག། དྲི་མ་སྲི་སྐམ་འཁྲུ་ཡང་སྲིད་པ་ཡིན།། ཤ་སྐམ་ཤེད་ཆུང་འགྲངས་དང་གྲངས་རྗེས་ན།། དྲག་ཤུལ་ནད་ལྡང་འདི་རྟགས་ཕལ་ཆེར་འབྱུང་།། བྱེ་བྲག་སྙིགས་མ་མ་ཞུ་ཟས་ཀྱི་སྐྲན།། ཕོ་བ་འཚིང་སྒྲེག་ཟོས་ཐོག་གླང་ཐབས་ལྡང་།། གང་མ་ཞུ་བའི་ཟས་དེ་མཆོག་ཏུ་གནོད།། གདོང་པ་མིག་ལྕིབས་རྐང་བོལ་གཡོ་བ་ཡིན།། ལྷེན་སྐྲན་རྫི་བའི་སྲན་ཆེ་ཅི་ཟོས་སྐྱུག། རླན་གྲངས་ཟོས་རྗེས་ན་ཞིང་ལྟོགས་ན་བདེ།། སྒྲེག་པ་མི་ཐོན་ཤེད་ཆུང་འཕེལ་འབྲི་མེད།། དངས་མའི་རྡོ་སྐྲན་དེ་འདྲ་ཤིན་ཏུ་སྲ།། མཆིན་པའི་ཁྲག་སྐྲན་འཕེལ་རྐྱེན་གཡས་ནས་ཆགས།། མིག་སེར་ཆུ་དམར་རྩ་རྒྱུད་ཕྲ་ལ་མགྱོགས།། གྲང་དྲོས་རོ་རྒྱབ་མཆིན་དྲི་སྦྲག་ཅིང་ན།། ཤ་མདོག་སྔོ་སྐམས་མཆིན་ཤ་སིངས་གླེག་སྐྱུག། སྐྲན་རྒྱས་མཁྲིས་ཡུལ་ཕྲོགས་ཏེ་མིག་ཆུ་སེར།། མཆེར་པའི་ཁྲག་སྐྲན་དེ་འདྲ་གཡོན་དུ་འབྱུང་།། སྦོ་སྒྲེག་ཟས་སྐོམ་ལེན་ཡང་ལྦུ་བ་སྐྱུག། ཚ་བ་ཤས་ཆུང་གདོང་པ་སྦོད་པོར་གཡོ།། ཕོ་ལོང་སྨུག་པོའི་ཁྲག་སྐྲན་ཚ་ཞིང་གཟེར།། མནན་ན་འཕར་ཞིང་བསིལ་དྲོད་གཉིས་ཀ་གནོད།། འགྲངས་ལྟོགས་གྲང་དང་དྲོས་པ་གང་ཡང་ན།། སྣོད་ཀྱི་མཁྲིས་སྐྲན་ཤ་མདོག་སྔོ་ལ་སྐམ།། ཟས་ལེན་གྱུར་ཀྱང་ཤེད་བྲལ་མིག་ཆུ་སེར།། སྨིན་ནས་ལུས་ཀུན་ཟ་འཕྲུག་བྱེད་པ་ཡིན།། རྒྱུ་མའི་མཁྲིས་སྐྲན་ལུས་ལྕི་མིག་ཆུ་སེར།། རྩ་གྲིམས་དང་ག་མི་བདེ་ནད་ཟུག་ཆེ།། སྐོམ་དད་ཆེ་ལ་དྲི་ཆུ་སྲི་བར་མངོན།། ལོང་གི་རླུང་སྐྲན་སྦོ་འཁྲོག་ལྦུ་བ་འཁྲུ།། མི་བརྟན་འཕོ་འགྱུར་འཕེལ་འགྲིབ་བྱེད་པ་ཡིན།། མངལ་སྐྲན་ཚིགས་པ་རྒྱུ་ཞབས་ལྡང་དུབ་གཟེར།། འགྲངས་ཚེ་ན་ཞིང་སྐབས་སུ་ཁྲག་ཆེན་འཛག། ལྒང་པའི་རྡེ་སྐྲན་ཆུ་བགག་ཟུག་གཟེར་ཆེ།། གློ་བའི་རྩ་སྐྲན་གློ་མང་འགོགས་པ་དཀའ།། སྐད་འཛེར་ཤ་ལུས་སྔོ་སྐམ་ཟོས་རྗེས་སྐྱུག། མཁལ་མའི་རྩ་སྐྲན་ཐོག་མར་ན་ཟུག་ཆུང་།། སྨིན་ནས་ལྟར་མངོན་ཤ་སྐམ་དགྱེ་དགུ་དཀའ།། ཆུ་མདོག་དམར་ལ་ལུས་ལྕི་ཆུ་འཐུངས་སྐྱུག། མཆིན་དྲིའི་རྩ་སྐྲན་ཚིགས་པ་བརྒྱད་པ་ན།། དགྱེ་དགུ་མི་བདེ་སྒྲེག་ཅིང་སྐྱུག་སྙམ་བྱེད།། མཆིན་པ་མཆིན་དྲིའི་ཤ་ཟོས་སྐྱུག་པར་འགྱུར།། རྩ་སྐྲན་ཕལ་ཆེར་རིལ་ཙམ་རྩ་ཆུ་ཚ།། སྲིན་སྐྲན་འདྲིལ་དུས་ཟུག་ཆེ་ཞི་དུས་བདེ།། སྤུ་སྐྲན་གང་དུ་བྱུང་སར་གནས་རྟགས་སྟོན།། སྙིང་གི་ཆུ་སྐྲན་བྲང་ལ་སྲིན་ཐོར་འོང་།། ཤེས་པ་རྒོད་ཅིང་སྨྱོ་ཚུལ་སྟོན་པ་འམ།། ཁྲོ་ཚིག་སེམས་རྩུབ་ཆུ་ཚན་འཚེད་སྙམ་བྱེད།། ཆུ་སྐྲན་ཕལ་ཆེར་མིག་ལྕིབས་རྐང་བོལ་གཡོ།། ངོ་བོ་སྲ་མེར་ཟུག་ཆུང་རྫི་བ་བཟོད།། རྣག་སྐྲན་རེག་ན་བརྩེ་ལ་མནན་མི་བཟོད།། རྩ་ཆུ་ཕྱི་ཡུལ་ཅུང་ཟད་ཚ་བ་སྐྱེ།། དེ་ལྟར་སྐྲན་རྣམས་ཕལ་ཆེར་ལྟོ་སྟོང་ལ།། ལངས་བུབ་གན་རྐྱལ་ཟུར་ལ་གནས་ཏེ་མྱོང་།། བར་གནས་སྲ་འདྲིལ་ལག་འོག་བཟུང་བར་ནུས།། ཕྱི་ན་གནས་པ་དངོས་སུ་གསལ་བར་སྟོན།། གཏིང་ན་གནས་ན་རྟགས་ལ་ནད་ངོས་བཟུང་།། གློ་མཆིན་མཆེར་སྐྲན་གསང་སར་གཟེར་བ་ཡིན།། མདོར་བསྡུས་ཚ་སྐྲན་རྩ་ཆུ་ཕྱི་ཡུལ་ཚ།། གནས་དེར་འཕེལ་རྐྱེན་ཚ་ཞིང་མནན་ན་འཕར།། ཁ་ཟས་དྲོད་བཅུད་མི་འཕྲོད་བསིལ་བ་འཕྲོད།། དེ་ལས་གོ་ལྡོག་གྲང་བའི་སྐྲན་དུ་བརྟག། ཟུག་ཆེ་སྐྱུག་ཅིང་ཟུངས་གསུམ་ཤོར་ན་སྤང་།། སྟོབས་ལྡན་ཟུག་མེད་ཟས་ཚུད་འཚོ་བས་བཅོས།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་ཐབས་སྨན་དཔྱད་ཟས་སྤྱོད་བཞི།། ཚ་སྐྲན་གྲང་སྐྲན་ཕྱི་ནང་བར་གསུམ་སྦྱར།། དང་པོ་ནང་ན་གནས་པའི་ཚ་སྐྲན་ལ།། ཏིག་ཏ་གསེར་གྱི་མེ་ཏོག་དུག་མོ་ཉུང་།། བསིལ་གསུམ་བྲག་ཞུན་རུ་རྟ་པི་པི་ལིང་།། ཚ་ལ་འགྲོན་ཐལ་ཨ་རུ་ར་དང་ནི།། ཅོང་ཞི་དྲག་པོར་བཏུལ་བའི་ཐལ་བ་དང་།། ལྡོང་རོས་ཧོང་ལེན་ད་ལིས་ཐལ་བ་རྣམས།། ཀ་ར་སྦྱར་བཏང་གང་ཉེའི་རྩ་ལ་གཏར།། རྩ་ལྟོ་གང་རིགས་སྦྱངས་ལ་ཆུ་ལུམས་བྱ།། བར་གནས་ཚ་སྐྲན་བཟང་དྲུག་ཨ་རུ་ར།། ཙན་དན་དཀར་དམར་ཨུཏྦལ་བོང་ང་དཀར།། ཏིག་ཏ་གསེར་གྱི་མེ་ཏོག་དུག་མོ་ཉུང་།། རུ་རྟ་ཚ་ལ་རྒྱམ་ཚ་པི་པི་ལིང་།། སྤོས་དཀར་སེང་ལྡེང་མུ་ཟི་བསེ་རུ་དང་།། རྟ་རྨིག་བཙའ་མ་གཅན་གཟན་རུས་པ་དང་།། གཡག་རྒོད་རྭ་དང་རུས་པ་སེར་ཙམ་བསྲེག། ཅོང་ཞི་རྒོད་བཏུལ་ཀ་ར་སྦྱར་ལ་བཏང་།། གཏར་སྦྱོངས་ཆུ་ལུམས་གོང་བཞིན་ཤེས་པར་བྱ།། ཕྱི་ཡི་ཚ་སྐྲན་མཁན་པ་སྤྱང་ཚེར་རྩ།། ལྕེ་ཚ་འོལ་མོ་གོ་སྙོད་བྱི་བའི་བྲུན།། སྦངས་ལུམས་བྱས་པས་ཕལ་ཆེར་རྣག་ཏུ་འགྱུར།། མ་ཁུགས་གོང་ལྟར་སྨན་དཔྱད་རྩོལ་བས་སྦྱང་།། ཚ་ཐུར་རྒྱབ་ལ་འབྲས་ལྟར་རུལ་གཅོད་སྦྱར།། ཡང་ན་བྱི་ཤང་དཀར་མོ་གོ་བྱེ་མཚལ།། ཟེ་ཚ་གླ་རྩི་སྦྲང་རྒོད་རེང་བུ་གཞུག། ཚ་བ་མི་ཚོར་ཆུ་བུར་བྱུང་ན་ཐེབས།། ཀླད་པ་བྱུགས་ལ་ཤོག་བུས་ཁ་བཀབ་བཞག། ཕོ་བར་ཟན་དྲོན་དུགས་ཀྱིས་བག་རེ་བདུག། དེ་རྣམས་ཟས་སྤྱོད་རི་དྭགས་ལུག་ཤ་གསར།། བ་མཛོའི་ཞོ་དར་མར་གསར་ལ་སོགས་པ།། བསིལ་ཡང་བསྟེན་ཞིང་རུལ་སྐྱུར་འཇུ་དཀའ་སྔོ།། གྲང་དང་དྲག་ཤུལ་མེ་ཉིས་གདུངས་པ་སྤང་།། ཟབས་སུ་ཞུགས་པའི་གྲང་སྐྲན་བཅོས་པ་ནི།། ཐང་ཤིང་དུར་བྱིད་དནྡ་ཡ་བཀྵ།། ཚ་བ་ལྔ་དང་ཚྭ་སྣ་རྣམ་པ་ལྔ།། ས་རྫི་ཀ་དང་པ་ཏྲ་འབྲས་བུ་གསུམ།། རུ་རྟ་དང་ནི་ཟི་ར་དཀར་ནག་གཉིས།། ཧོང་ལེན་ཕྱེ་མ་ཏིལ་མར་ཞག་དང་ཞོ།། མར་གྱིས་སྦྲུས་ལ་རྫ་མ་ཁ་སྦྱར་བསྲེག། དེ་ཉིད་རྒྱལ་པོ་རྒོད་མ་ཁ་དང་སྦྱར།། སེ་འབྲུ་བརྒྱད་དང་ནང་ནུབ་ལྟག་པ་སྤྲད།། དེ་ཡིས་དྲོད་སྐྱེད་དང་ག་འབྱེད་པར་བྱེད།། དེ་རྗེས་རྒྱམ་ཚ་ཚ་ལ་ལ་ལ་ཕུད།། ཚ་བ་ལྔ་དང་ཨ་རུའི་ཐལ་སྨན་སྦྱར།། བྱ་རྒོད་གོ་བོ་སྤྱང་བྲུན་ཕོ་བ་དང་།། ཟི་ར་ནག་པོ་ཁ་རུ་ཙབས་རུ་ཚ།། ཚ་བ་གསུམ་དང་སྦྱར་ལ་ལྟག་པ་སྤྲད།། ཡང་ན་ཟ་བྱེད་ཆེ་ཆུང་ཐལ་སྨན་སྦྱར།། སེ་འབྲུ་བཞི་དང་ནང་ནུབ་ལྟག་པ་སྤྲད།། དེ་ཡིས་དྲོད་སྐྱེད་དང་ག་འབྱེད་པ་དང་།། གྲང་སྐྲན་མ་ལུས་ཐལ་བར་རློག་པར་བྱེད།། ཞིག་ནས་སྙིར་མངོན་ཟུག་ཆེ་རྩ་ཆུ་ཚ།། གཅོད་བྱེད་བཤལ་གྱིས་སྦྱངས་རྗེས་མེ་ཡིས་བསྲེག། བར་གནས་གྲང་སྐྲན་སྒྲོན་ཤིང་འབྲས་བུ་གསུམ།། ཚྭ་སྣ་ཚོགས་ཚད་སེ་འབྲུ་པི་པི་ལིང་།། བཟང་པོ་གསུམ་དང་ཚ་ལ་སྤོས་དཀར་དང་།། དུར་བྱིད་སྔོ་ཡི་ཚ་གསུམ་རྒོད་གཡག་རྭ།། ཕྱེ་མ་ཆང་སྦྲུས་སླ་ངར་ནུས་ལྡན་བསྲེག། ཐལ་བ་བུ་རམ་སྦྱར་བ་ཆུ་བསྐོལ་དབུལ།། ཞིག་ནས་སྦྱོངས་བཏང་མ་ཞིག་ཐུར་མ་བརྡེག། ཐུར་རྗེས་སྐྲན་རོ་བཤལ་གྱིས་སྦྱང་བར་བྱ།། བྲང་དང་རྩིབ་ལོགས་སྐྲན་ཐག་གང་གཟེར་དང་།། སྦྲུལ་མིག་གང་ལ་བབ་པའི་ཚིགས་གསང་བསྲེག། ཕྱི་ཡི་གྲང་སྐྲན་སྣུམ་འཆོས་དུགས་བྱས་ལ།།སྙིར་གྱུར་བུམ་པ་ཚད་ལྡན་མེ་བཙའ་བྱ།། ཐེངས་འགའ་བསྟེན་པས་འཇུ་ཞིང་ཕྱི་རུ་འདྲེན།། འབུར་ན་འཇག་གིས་མཐའ་ནས་བསྡམས་ལ་བཙིར།། གཙགས་བུས་དྲས་ལ་སྐྲན་དབྱུང་རྨ་ལྟར་གསོ། དནྡ་ཡུངས་ཀར་ཟར་མ་ཏིལ་སྦྱར་བྱུག། མ་འདྲོངས་ཚ་ཐུར་རྒྱབ་ལ་འབྲས་ལྟར་བཅོས།། དེ་རྣམས་ཟས་སྤྱོད་ལུག་དང་གཡག་རྒོད་དང་།། གཅན་གཟན་གོང་སྲེག་ཁྱིམ་བྱ་བྱེ་འུའི་ཤ། འབྲས་ཆན་སྤོད་བཅས་ཟན་དྲོན་ཞུན་མར་བསྟེན།། ཆང་གི་དངས་མ་སྒ་ཆུ་བསྐོལ་བ་བཏུང་།། བཅུད་མེད་འཇུ་དཀའ་བསིལ་ཕྱོགས་ཐམས་ཅད་སྤང་།། བཅག་དང་རྩོལ་བ་སྤུ་དུགས་རྡོ་ཡིས་མཉེ།། བྱེ་བྲག་བཅོས་ཐབས་སྙིང་གི་ཆུ་སྐྲན་ལ།། བསེ་རུ་དོམ་མཁྲིས་ཛཱ་ཏི་ཟངས་ཐལ་དང་།། ཤ་རུ་དུར་ཐོད་འགྲོན་ཐལ་སྦྲང་སྦྱར་བཏང་།། དེས་མ་སྐེམས་ན་དེ་སྟེང་དངུལ་ཆུ་དང་།། སྟར་བུ་དབྱི་མོང་ལོ་མཁར་བསྣན་པ་ཡི།། རིལ་བུ་བྱས་ལ་སྙིང་ཆུ་བསྐམ་པར་བྱ།། དེས་ཀྱང་མ་སྐེམས་སྙིང་ཆུ་ཐུར་མས་གཙག། གློ་མིག་རྩ་སྐྲན་ཐོག་མར་ཆུ་ལུམས་བྱ།། དེ་ནས་སྟར་བུ་སྐྱུ་རུ་པི་པི་ལིང་།། རུ་རྟ་ཤིང་མངར་བུལ་ཏོག་སྦྲང་སྦྱར་བཏང་།། སྟར་བུ་བུལ་ཏོག་སྐྱུ་རུ་ར་དང་སྦྲང་།། རིལ་བུ་མུར་བས་གློ་སྐྲན་འཇོམས་པ་ཡིན།། མཆིན་པའི་ཁྲག་སྐྲན་རྩ་སྐྲན་སྦྱོར་བས་གདུལ།། ཡང་ན་གུར་གུམ་ཅུ་གང་ཨུཏྦལ་ཏིག་ཏ་བྲག་ཞུན་རུ་རྟ་དོམ་མཁྲིས་བ་ཤ་ཀ་ཀྱི་ལྕེ་མཚལ་དཀར་གྱི་སྦྱོར་བ་དང་སེ་འབྲུ་ལྟག་པ་སྤྲད།། ཡང་ན་སེ་རྒོད་འབྲས་བུ་བྲག་ཞུན་དང་།། ཙན་དན་གུར་གུམ་ཆང་སྦྱར་ཞག་གསུམ་མནན།། ལངས་ནས་བུ་རམ་སྦྱར་བའི་ལྡེ་གུ་བཏང་།། མཆིན་ཁྲག་རྒྱས་དང་མཆིན་སྐྲན་འཇུ་ཞིང་སྐེམ།། རུ་ཐུང་སྣོད་ཀ་མང་གཏར་ཉུང་དུ་དབྱུང་།། ཚ་བ་སྐྱེ་སྲིད་བྲག་ཞུན་གུར་གུམ་ཅུ་གང་ཨ་རུ་ཏིག་ཏ་དོམ་མཁྲིས་པི་ལིང་བདུན་པ་དང་།། ལྟག་པ་སྤྲད་དེ་ཕྱི་རྗེས་བཤལ་གྱིས་སྦྱོང་།། མཆེར་སྐྲན་དེ་འདྲའི་རྗེས་ལ་མེ་ཡིས་བསྲེག། མཁལ་ཚིལ་རྩ་སྐྲན་དང་པོ་ཆུ་ལུམས་བྱ།། ཟུག་ཆུང་སྙི་དང་བདེར་སོང་བྱིན་ལོང་གཏར།། སྐྱེད་མེད་བྱ་བྲ་ཧ་བོའི་ལུམས་བྱས་ཏེ།། རྣག་ཏུ་བཀུག་ལ་མེ་ཡིས་ཕྱི་རྗེས་བཅད།། མ་ཁུགས་ཚད་པ་སྦྱངས་ལ་ཐུར་མས་བཅོས།། མ་ཞུའི་ཟས་སྐྲན་ལྷེན་སྐྲན་རྡོ་སྐྲན་ལ།། གསར་པའི་དུས་ན་རྡོ་ཡིས་མཉེ་བར་བྱ། རྒྱམ་ཚ་ལ་ལ་ཕུད་དང་ཨ་ཟ་མོ།། པི་པི་ལིང་དང་དོང་གྲ་ཆ་རེ་བསྐྱེད།། ཨ་རུ་ཀུན་མཉམ་ཕྱེ་མ་མེ་དང་འདྲ། མ་ཞུ་བད་རླུང་གྲང་སྐྲན་འཇོམས་པར་བྱེད།། བི་ཎྜྷ་ཨ་རུ་བཅུ་འགྱུར་ཕོ་འགྲོན་བདུན།། ཅུ་གང་གུར་གུམ་ཚ་བ་རྣམ་པ་ལྔ།། ཚྭ་སྣ་ལྔ་དང་རྒྱ་ཚ་པྲི་ཡངྐུ།། ཐལ་སྨན་ཞོ་གསུམ་དྲི་ཆུས་འདམ་བཏགས་བྱ།། རིལ་བུ་བྱས་བསྟེན་རྒྱམ་ཚ་སུམ་ཐང་བཏང་།། རྡོ་ཡང་ཐལ་བར་འགྱུར་སྲིད་སྐྲན་ཅི་སྨོས།། ཚ་བསྲེགས་ཟེ་ཚ་གོ་ཐལ་སྦྱོར་བ་ཡང་།། མན་ངག་ལྡན་ན་སྐྲན་བཤིག་སྨན་མཆོག་ཡིན།། ཞིག་པའི་སྐྲན་རོ་གཅོད་བྱེད་བཤལ་བྱས་ལ།། མ་ཞིག་ཐུར་མའི་རྗེས་ལ་སླར་ཡང་སྦྱང་།། སྣོད་ཀྱི་མཁྲིས་སྐྲན་ཚེ་སྔོན་ལས་ནད་ཡིན།། འོན་ཀྱང་གསར་དུས་བྱམས་པས་འབད་དེ་གསོ།། མི་དང་ཕག་བྲུན་ནུས་ལྡན་བསྲེགས་ཐལ་བ།། ཚ་ལ་དོམ་མཁྲིས་ཀ་ར་པི་པི་ལིང་།། སེ་འབྲུ་ལྔ་དང་ནང་ནུབ་ལྟག་པ་སྤྲད།། ཆུ་སྐོལ་འཕུལ་བས་སྐྲན་དེ་འཇུ་ཞིང་སྐེམ།། གཏར་དྲངས་རྗེས་ལ་ཆུ་ལུམས་སྦྱོངས་ཀྱིས་བཅོས།། རྒྱུ་མའི་མཁྲིས་སྐྲན་ཚ་ལ་དོམ་མཁྲིས་དང་།། ཧོང་ལེན་ཀར་སྦྱར་ཞུ་མཁན་དུགས་ཀྱིས་བདུག། དེ་རྗེས་མན་ངག་བཤལ་དུར་བྱིད་ཚ་ལ་དོམ་མཁྲིས་ཧོང་ལེན་གྱིས་ཁོང་ནས་དབྱུང་།། ཡང་ན་ཏིག་ཏ་བརྒྱད་ཀྱིས་བཏུལ་རྗེས་སྦྱང་།། ཕོ་བ་ལོང་དུ་སྨུག་པོའི་ཁྲག་སྐྲན་ཆགས།། སྟར་བུ་མ་ནུ་འུ་སུ་རྒྱམ་ཚ་བཞི།། བུར་ཀར་སྦྱར་བ་ཆུ་བསྐོལ་འཕུལ་ལ་བཏང་།། ཆུ་བ་ཧ་བོ་ཚ་བཏབ་དུགས་ཀྱིས་བདུག། དོམ་མཁྲིས་ཧོང་ལེན་དུར་བྱིད་ཚ་ལས་སྦྱང་།། ཡང་ན་ཚྭ་བསྲེགས་སེ་འབྲུ་ལྔ་པ་གཉིས།། ལྟག་སྤྲད་ཞིག་ནས་དྲག་པོའི་བཤལ་གྱིས་སྦྱང་།། ཟུངས་ངན་འཇམ་རྩི་ནི་རུ་ཧ་སྤེལ་དྲང་།། རླུང་གི་ལྷིང་སྐྲན་སྒོག་སྐྱའི་སྨན་མར་དང་།། བུ་རམ་སྦྱར་བ་བཟའ་ཞིང་འཇམ་རྩི་བཏང་།། དེ་འོག་ཤིང་ཀུན་སེ་འབྲུ་ཚ་བ་ལྔ།། མ་ནུ་རྒྱམ་ཚ་ཙབས་རུ་ཁ་རུ་ཚ།། ཟི་ར་གོ་སྙོད་འུ་སུ་ལ་ལ་ཕུད།། སུག་སྨེལ་སྟར་བུ་ཤུ་དག་ཟུར་པ་དཀར།། བུལ་ཏོག་བྱེ་རུག་ཞོ་དང་མར་ལ་བཙོ།། དྲོན་མོར་བསྟེན་རྗེས་མེ་ཡིས་འཇོམས་པ་ཡིན།། སྒོག་སྐྱ་སྲང་བཞི་ཆུ་བོ་བརྒྱད་འགྱུར་བསྐོལ།། ཆུ་བསྡུས་འོ་མ་ལས་འཐུངས་རླུང་སྐྲན་འཇོམས།། རླུང་རིམས་བི་ཤ་ཙེ་སོགས་རླུང་ཀུན་སེལ།། ཤིང་ཀུན་ཤུ་དག་རུ་རྟ་ཁ་རུ་ཚ།། དོང་གྲ་ཨ་རུ་མ་ནུ་ལ་ལ་ཕུད།། དནྡ་དུར་བྱིད་ཕྱེ་མས་རླུང་སྐྲན་སྦྱོང་།། སྲིན་སྐྲན་རྒྱ་ཚ་དོང་གྲ་བྱི་ཏང་ག། ཕུར་ཐལ་བུ་རམ་རིལ་བུས་ནང་ནས་བཤིག། རྟ་སྦངས་ཕུར་མོ་སྒོག་སྐྱ་སྤུ་དུགས་བདུག། ཞིག་དཀའ་སྒོག་སྐྱའི་སྨན་མར་སྲིན་སྨན་ལྡན།། བཟའ་ཞིང་འཇམ་རྩི་བཏང་བྱ་ཞིག་ན་འཚོ།། མངལ་སྐྲན་བྱ་བྲ་བྱི་བྲུན་པ་ཡག་རྩ།། ནད་མ་སྦང་སྦྱར་བསྲོས་ལ་མང་དུ་བདུག། ཟ་བྱེད་ཐུན་གསུམ་རིལ་བུས་སྐྲན་བཤིག་ལ།། ཕྱི་ནང་ཁྲུས་གཤེར་སྦྱོར་བས་ཁྲག་རོ་གདོན།། ཁྲག་རྣག་ཤེ་རུལ་ཤ་སྐྱོ་ཐོན་ན་འཚོ།། ལྕ་བ་ཏིལ་བསྐོལ་ཁུ་བ་ཚ་བ་གསུམ།། བུ་རམ་མར་བཏབ་མངལ་སྐྲན་གསར་པ་འཇིག། ཐང་ཤིང་རྩ་བ་པི་པི་ལིང་གི་རྩ།། ཀ་རཉྫ་དང་པི་པི་ལིང་གི་ཕྱེ།། ཏིལ་བསྐོལ་ལྡེ་གུས་མངལ་སྐྲན་འཇོམས་པར་བྱེད།། ཞིག་ནས་ཁྲག་འཛག་མི་བཅད་ལུས་ཟུངས་བསྲུང་།། རྗེས་ལ་རྩ་བ་ལྔ་ཡི་སྨན་མར་སྦྱར།། ཟས་སྐོམ་སྤྱོད་ལམ་ཤིན་ཏུ་དྲོ་བས་བཅོས།། ལྒང་པའི་སྐྲན་ལ་ཟེ་ཚ་ཞོ་བཞི་དང་།། རྒྱ་ཚ་ཞོ་གཉིས་སྡིག་སྲིན་ཚ་བ་གསུམ།། ལྕམ་པ་བུ་རམ་སྦྱར་ལ་ཆང་གིས་དབུལ།། རྡེ་འུ་ཞིག་ནས་ཆུ་ལམ་འབྱུང་བར་ངེས།། མདོར་བསྡུས་རླུང་སྐྲན་སྣུམ་འཆོས་བཏང་བར་བྱ།། མཁྲིས་སྐྲན་སྦྱང་ཞིང་ཁྲག་སྐྲན་གཏར་གྱིས་དྲང་།། རྩ་སྐྲན་རྣག་ཏུ་འགུགས་ཤིང་ཆུ་ལུམས་ཤིས།། རྡོ་སྐྲན་ཐུར་མ་ལྷེན་སྐྲན་སྨན་གྱིས་བཤིག། ཆུ་སྐྲན་རྣག་སྐྲན་གསང་དུ་དབྱུང་བར་བྱ།། ནང་སྐྲན་སྨན་ལ་བར་སྐྲན་ཐུར་མས་བཤིག། ཕྱི་སྐྲན་བུམ་པར་དྲངས་ལ་དམར་འབྱིན་བྱ།། དེ་ལྟར་ཤེས་ན་འཚོ་བྱེད་མཁས་པ་ཡིན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཅོང་ཆེན་སྐྲན་ནད་བཅོས་པའི་ལེའུ་སྟེ་བདུན་པའོ།། །།      

X