//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བརྒྱད་པ། སྐྱ་རྦབ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:11:28 ཀློག་གྲངས། 10 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། སྐྱ་རྦབ་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་ཟས་དང་སྤྱོད་ལམ་མི་འཕྲོད་པས།། མ་ཞུའི་དངས་མ་མཆིན་གནས་ཟུངས་མ་གྱུར།། ངན་ཁྲག་ཆུ་སེར་རྒྱས་པ་རླུང་གིས་གཏོར།། ལུས་ཀུན་ཁྱབ་པས་སྐྱ་རྦབ་དག་ཏུ་གཡོ།། དེ་ཉིད་གློ་མཆིན་མཆེར་པར་ཞུགས་པ་དང་།། ཆུ་སེར་རླུང་དང་ལྡན་ཕྱིར་དབྱེ་བ་ལྔ།། གློ་བ་སྐྱ་རྦབ་ཁྲག་ཤས་ཆེ་བ་སྟེ།། མཆིན་པ་མཁྲིས་ལྡན་མཆེར་པ་བད་ཀན་ལྡན།། ཆུ་སེར་སྐྱ་རྦབ་ཤ་ལྤགས་མཚམས་སུ་ཁྱབ།། རླུང་ནད་སྐྱ་རྦབ་སྙིང་དང་སྲོག་རྩར་གནས།། དེ་རྟགས་སྤྱི་དང་བྱེ་བྲག་གཉིས་སུ་གསུངས།། སྤྱི་རྟགས་དང་པོ་ཁ་གདོང་མིག་ལྕིབས་དང་།། རྐང་བོལ་ངར་གདོང་སྦོད་པོར་གཡོ་ཞིང་སྐྲངས།། འགུལ་ན་རྔམ་འདེགས་སྙིང་སྤྲུག་དང་ག་འགག། ཁ་ཟས་མི་འཇུ་ལྕེ་མཆུ་རྙིལ་བཀྲག་འཆོར།། སྟོབས་ཆུང་རྩ་བྱིང་ཆུ་སེར་ཤིན་ཏུ་ངལ།། བྱེ་བྲག་གློ་བ་སྐྱ་རྦབ་གློ་མང་ཞིང་།། ལུད་པ་ཁྲག་ཅན་ལྦུ་གསོབ་ལུ་བ་ཡིན།། མཆིན་པ་མིག་སྤྲིན་ཤ་མདངས་དྲི་ཆུ་སེར།། མཆེར་པ་ཁོང་སྦོ་ཤིག་མང་ལྕེ་མཆུ་སྐྱ།། ཆུ་སེར་ཟ་འཕྲུག་བྱེད་ཅིང་ཆུ་སོ་སྐྲངས།། རླུང་ནི་གཉིད་ཆུང་སྐྲངས་གསོབ་འཕེལ་འབྲི་ཆེ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་དང་པོ་རླུང་གིས་སྣ་ཁྲིད་ཕྱིར།། མངར་གསུམ་ཏིང་ཁྲོལ་ལུག་ཤ་ལོ་ཡིབ་དང་།། ཞུན་མར་ཆང་དང་བསྐུ་མཉེས་ཞི་བར་ནུས།། དེས་མ་ཞི་ན་སྨན་དཔྱད་ཟས་སྤྱོད་བཞི།། དེ་སྨན་སྐྱ་རྦབ་རླུང་ཤས་ཆེ་བའི་ཕྱིར།། དང་པོ་ཏིག་ཏ་བ་ཡི་རྣམ་ལྔ་ཡི།། སྨན་མར་གང་ཤིས་མས་བཏང་བཟའ་དང་བྱུག། དེ་ཡི་རྗེས་ལ་སྐྱུགས་སྨན་རྣོན་པོས་སྦྱང་།། སླར་ཡང་གོང་གི་སྣུམ་འཆོས་བྱས་རྟིང་ལ།། བཀྲུ་སྨན་དུར་བྱིད་སྒྲོན་ཤིང་ལྕགས་ཕྱེ་བ་གཅིན་སྦྱར་བས་སྦྱང་།། དེ་རྗེས་འབྲས་བུ་གསུམ་དང་ལི་ག་དུར།། བྱི་ཏང་ག་དང་ཙི་ཏྲ་ཚ་བ་གསུམ།། ཆ་མཉམ་ཀུན་དང་ལྕགས་ཕྱེ་མཉམ་བྱས་ཏེ།། སྦྲང་སྦྱར་ལྡེ་གུས་སྐྱ་རྦབ་འཇོམས་པར་བྱེད།། ཏ་ཙ་ཐང་ཤིང་སྐྱེར་ཤུན་ཚ་བ་ལྔ།། པི་པི་ལིང་གི་མཱུ་ལ་འབྲས་བུ་གསུམ།། ཀུན་གྱི་ཉིས་འགྱུར་ལྕགས་ཕྱེ་བ་གཅིན་བརྒྱད།། སོ་སོར་བསྐོལ་བསྲེས་རིལ་བུ་ཟོས་པའི་རྟིང་།། དར་བ་འཐུངས་པས་སྐྱ་རྦབ་འཇིལ་བར་ནུས།། ཏ་ཙ་བྲག་ཞུན་དངུལ་ཆུ་ལྕགས་དྲེག་དང་།། རྭ་གསུམ་ཚ་བ་གསུམ་དང་ཙི་ཏྲ་ཀ། བྱི་ཏང་ག་དང་སྦྲང་རྩིའི་ལྡེ་གུ་ཡིས།། སྐྱ་རྦབ་དབྱིག་དུག་རྗེད་བྱེད་འཇོམས་པར་བྱེད།། གླ་སྒང་གོ་སྙོད་པ་ཏྲ་ཚ་བ་ལྔ།། སྟག་ཚེར་སྐྱེར་ཤུན་ཆུ་སྐོལ་འཕུལ་བྱས་ན།། འོར་དང་སྐྱ་རྦབ་འདུས་གྱུར་ཚབས་ཆེ་སེལ།། རྗེས་ལ་དང་པོ་བཅུ་གསུམ་བཅོ་བརྒྱད་བསྲེག། དེ་ཡིས་རླུང་དང་ཆུ་སྒོ་འགེགས་པར་བྱེད།། འབྲས་ཐུག་ལུག་ཤ་མར་གསར་དར་བ་བསྟེན།། ཉ་ཕག་རུལ་སྐྱུར་ཞོ་དང་བུར་རློན་ཚྭ།། ཡོས་དང་ཤ་སྐམ་རྗེན་ཟས་འཇུ་དཀའ་དང་།། ཉིན་གཉིད་ཉལ་པོ་བཞོན་པ་རླན་གྲང་སྤང་།། བྱེ་བྲག་གློ་ནད་སྐྱ་རྦབ་ཅུ་གང་དང་།། གུར་གུམ་སུག་སྨེལ་ད་ལིས་སེ་འབྲུ་དང་།། ལྕགས་ཕྱེ་ཀ་ར་སུམ་འགྱུར་སྦྱར་ཏེ་བཏང་།། ཚ་བ་ཆེ་ན་ག་པུར་ཙན་དན་བསིལ་གསུམ་ག་དུར་ཏིག་ཏ་བ་ཤ་ཀ་ཚོས་ཨ་རུ་པི་ལིང་བཅུ་གཅིག་སྦྱར།། དེ་རྗེས་རྩེ་ཆུང་སྒང་རྩ་དྲུག་འགོ་གཏར།། དེས་མ་ཞི་ན་ཨ་རུའི་དནྡ་དུར་བྱིད་ཤིང་མངར་བོང་ང་བུལ་ཏོག་མར་དང་སྦྱར་ལ་ཁྲུས་སྨན་བཏང་།། རྗེས་ལ་གྲོ་ཡི་ཆང་བསྟེན་བཞི་ལྔ་བསྲེག། མཆིན་པ་སྐྱ་རྦབ་གུར་གུམ་གཡུ་རྙིང་དང་།། ལྕགས་ཕྱེ་ཏ་ཙ་མཁྲིས་ཆེན་ར་མར་སྦྱར།། ཡང་ན་ནིམ་པ་རྩ་མཁྲིས་བ་ཤ་ཀ། ཏིག་ཏ་སླེ་ཏྲེས་ཧོང་ལེན་འབྲས་བུ་གསུམ།། བསྐོལ་བའི་ཁུ་བ་སྦྲང་དང་སྦྱར་ལ་བཏང་།། དེ་ཡི་རྗེས་ལ་རྩེ་ཆུང་རུ་ཐུང་གཏར།། མ་ཞི་གུར་གུམ་དནྡ་དུར་བྱིད་པི་ལིང་གི་བཤལ་གྱིས་སྦྱངས་རྗེས་ལ།། བཅུ་གསུམ་དགུ་པ་མེས་མནན་དེ་འོག་ཏུ།། ལུག་རུ་ཧོང་ལེན་སྲོལ་གོང་རྩ་མཁྲིས་དང་།། ཤིང་ཚ་རྭ་ཚ་སྒ་དང་པི་པི་ལིང་།། བུ་རམ་རིལ་བུ་བྱས་བསྟེན་བབས་ཆེ་ལ།། ཆུ་སེར་འོར་སྒོ་རྣམས་སུ་ཐུར་མས་བསེང་།། མཆེར་པ་སྐྱ་རྦབ་ལྕགས་ཕྱེ་བཅུ་པ་དང་།། ད་ལིས་བདུན་པ་ལྟག་པ་སྤྲད་པས་འཇོམས།། ཁ་ཟས་དྲོད་བསྟེན་བཅུ་གཅིག་བཅུ་གཉིས་བསྲེག། ཆུ་སེར་སྐྱ་རྦབ་སྤོས་དཀར་འབྲས་བུ་གསུམ།། བྲག་ཞུན་སྦྲང་སྦྱར་ལྕགས་ཕྱེ་བཅུ་པ་དང་།། ལྟག་སྤྲད་སྦྲང་རྩི་བུ་རམ་ཏིང་ཁྲོལ་དང་།། བཤུལ་ཤ་བཏང་ཞིང་མ་ཞི་ཨ་རུ་དུར་བྱིད་ཤྲཱི་ཁཎྡྲི་ཤུ་ཟུར་པ་ཏྲ་བ་ཆུའི་བཤལ་གྱིས་སྦྱང་།། རྗེས་ལ་ཆུ་གསང་རྣམ་གསུམ་མེ་ཡིས་བསྡམ།། སྐྱ་རྦབ་རླུང་ལ་ཤིང་ཀུན་སྒ་པི་ལིང་ཁ་རུ་ཚ་ཤིང་ཚ་ཙི་ཏྲ་ཀ་ཛཱ་ཏི་སུག་སྨེལ་ཏེ་བརྒྱད་པ་བསྟེན།། སྒོག་སྐྱ་རྩ་བའི་སྨན་མར་སྣུམ་འཆོས་བྱ།། རུས་པ་སྣ་ཚོགས་ཁུ་བ་སྤོད་བྲན་བཏུང་།། ལུག་ཤ་བཤུལ་ཤ་ཆང་བསྟེན་དྲུག་བདུན་བསྲེག། སྐྱ་རྦབ་རྙིངས་པ་འོར་ནད་ཕྱི་ཆུར་འགྱུར།། འོར་ནད་རྙིངས་པ་དམུ་ཆུར་འགྱུར་བ་ཡིན།། དེ་ཕྱིར་འོར་ནད་སྐྱ་རྦབ་གང་ཡང་རུང་།། མ་ཐུབ་རྙིངས་ནས་དམུ་ཆུའི་བཅོས་ཐབས་སྦྱར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱ་རྦབ་བཅོས་པའི་ལེའུ་སྟེ་བརྒྱད་པའོ།། །།

X