//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དགུ་པ། འོར་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:12:04 ཀློག་གྲངས། 4 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། འོར་ནད་གསོ་བ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་ཟས་དུས་རྐྱེན་གྱིས་བསྐྱེད་པ་གསུམ།། དང་པོ་ཁ་ཟས་མ་ཞུ་དངས་སྙིགས་འདྲེས།། མཆིན་གནས་ཟུངས་སུ་མ་གྱུར་ཁྲག་ངན་རྒྱས།། དེ་ཉིད་ཤ་ལྤགས་བྱེར་བས་ཆུ་སེར་སྐྱེད།། ཆུ་སེར་འོར་དུ་ལྷུང་སྟེ་གཡོ་བར་འགྱུར།། དུས་བསྐྱེད་སྐྱ་རྦབ་རྙིངས་ལས་འབྱུང་བ་ཡིན།། རྐྱེན་བསྐྱེད་ནད་ཀུན་བཅོས་ཉེས་འཁྲུགས་ལས་འབྱུང་།། དབྱེ་བ་རླུང་མཁྲིས་ཁྲག་དང་བད་ཀན་དང་།། བསྣད་དང་དུག་ལས་བྱུང་བ་དྲུག་ཏུ་བཤད།། རྟགས་ལ་སྤྱི་དང་བྱེ་བྲག་རྣམ་པ་གཉིས།། སྤྱི་རྟགས་རྩ་རྣམས་ཐམས་ཅད་ཚ་ཞིང་འཁྱུག། ལུས་དང་ཡན་ལག་སྙོམ་ལ་ངལ་བ་སྟེ།།དྲོད་ཆུང་ཁ་ཟས་མི་འཇུ་དང་ག་འགག། དེ་རྗེས་ལུས་ཀུན་གཡོ་ཞིང་སྐྲངས་པ་སྟེ།། ཁྱད་པར་གདོང་བོལ་བྲང་གསུས་ཆུ་སོ་སྐྲངས།། ཤ་དང་པགས་པའི་བར་རྣམས་ཆུ་སེར་ཁེངས།། འོག་ཏུ་གང་བཅུག་ཡོན་པོར་སྐྲངས་པ་ཡིན།། བྱེ་བྲག་རྟགས་ལ་རླུང་འོར་ལུས་འདར་བརྩེ།། སྐྲངས་རྩུབ་གསོབ་ལ་ཉིན་ཆེ་མཚན་མོ་ཆུང་།། མཁྲིས་འོར་མིག་ཆུ་ལྤགས་སེར་དྲོས་ན་སྐྱེ།། ཁྲག་འོར་རྩ་རྣམས་གཟེར་འཁྱུག་མིག་ཆུ་དམར།། བད་ཀན་ལུས་གྲང་གྲངས་ན་མི་བདེ་ལ།། སྐྲངས་པ་ཉིན་ཆེ་མཚན་མོ་ཆུང་བ་ཡིན།། བསྣད་འོར་མཚོན་ལམ་ལ་བརྟེན་ཚ་ལ་དམར།། དུག་རེག་ཁོང་སོང་དུག་རྟགས་ལྡན་པས་ཤེས།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་གསར་དུས་སྨྱུང་བྱ་འཇུ་སླ་བསྟནབསྟེན།། བོང་ང་ཐང་ཤིང་དུག་ཉུང་བྱི་ཏང་ག། ཕོ་བ་རིས་བསྐོལ་ཁུ་བས་འོར་ནད་སེལ།། སེ་འབྲུ་ལྔ་པས་ཕོ་བའི་མེ་དྲོད་བསྲུང་།། འབྲས་བུ་གསུམ་ཐང་ཧོང་ལེན་ཚ་བ་གསུམ།། དུར་བྱིད་བ་ཆུ་ལྕགས་སྣོད་བསྐོལ་ཁུ་ལ།། སྤོས་དཀར་སྦྲང་རྩི་སྦྱར་བའི་ཁྲུས་ཀྱིས་སྦྱང་།། སྤོས་དཀར་བྲག་ཞུན་འབྲས་གསུམ་ཐང་གིས་བསྡུས།། སླེ་ཏྲེས་ཐང་ཤིང་སྤོས་དཀར་ཨ་རུ་ར།། བ་སྤྲུ་བ་ཆུར་སྦྱར་བླུད་འོར་ཀུན་འཇོམས།། ཁྱད་པར་རླུང་ལ་བ་ཡི་རྣམ་ལྔའི་མར།། བཟའ་དང་བྱུག་དང་འཇམ་རྩིར་བཏང་བ་དང་།། ཁ་རུ་ཚ་དང་ཞུན་མར་སྒ་སྦྱར་བྱུག། མཁྲིས་འོར་སྦྱངས་རྗེས་བཟང་དྲུག་འགྲོན་ཐོད་ཐལ།། ཚ་བ་གསུམ་ཐལ་བྲག་ཞུན་སོ་མ་ར།། ཀ་ར་སྦྱར་བས་མཁྲིས་འོར་སྐེམ་པར་བྱེད།། ཁྲག་འོར་སྦྱངས་རྗེས་ཉི་ཤུ་རྩ་ལྔ་ལ།། ཆུ་སེར་སྨན་བསྒྱུར་སེང་ལྡེང་ཁུ་བས་དབུལ།། རྩ་ཁ་ཕྱེ་ཙམ་མང་དུ་གཏར་བར་བྱ།། བད་ཀན་གྲང་འོར་སྦྱངས་རྗེས་ཐལ་སྨན་བསྐམ།། བསྣད་པའི་འོར་ལ་ཁྲག་དབྱུང་བསིལ་བས་བྱུག། དུག་བསྐྱེད་པ་ལ་དུག་གི་གསོ་བ་སྦྱར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འོར་ནད་གསོ་བའི་ལེའུ་སྟེ་དགུ་པའོ།། །།

X