//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་པ། གཅོང་ཆེན་དམུ་ཆུ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:12:57 ཀློག་གྲངས། 9 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གཅོང་ཆེན་དམུ་ཆུའི་རྒྱུ་རྐྱེན་དབྱེ་བ་དང་།། གྱུར་ཚུལ་གནས་དང་རྟགས་དང་བཅོས་ཐབས་དང་།། ཕྱི་རྗེས་བཅད་དང་སྤྱི་དོན་བརྒྱད་ཀྱིས་བསྟན།། རྒྱུ་ནི་རླུང་མཁྲིས་བད་ཀན་ཆུ་སེར་ཁྲག། དེ་རྐྱེན་མ་ཞུ་བཤལ་རྗེས་ཟས་སྤྱོད་ལོག། ཚ་བའི་རྗེས་ལ་གཏར་དང་བསིལ་སྦྱོར་ཐལ།། ངལ་དུབ་རྗེས་ལ་ཆུ་མང་བཏུངས་པ་དང་།། རླན་སྟེང་ཉལ་བ་ལ་སོགས་མེ་དྲོད་ཉམས།། སྔོན་ལས་གདོན་རྐྱེན་དབང་གིས་དམུ་ཆུར་འགྱུར།། དབྱེ་བ་ནད་གདོན་དུག་ལས་གྱུར་པ་གསུམ།། ནད་ཆུ་བྱེར་ཟགས་འཁྱིམས་ཆུ་རྒྱུ་རྡོལ་བཞི།། བྱེར་ཆུ་ཁྲག་བྱེར་མཁྲིས་བྱེར་ཆུ་བྱེར་གསུམ།། ཟགས་ཆུ་དོན་ཟགས་སྣོད་ཟགས་སྐྲན་ཟགས་གསུམ། དོན་ཟགས་མཆིན་མཆེར་གློ་བ་ཟགས་པ་གསུམ།། སྣོད་ཟགས་ཕོ་བ་ལོང་ག་ཟགས་པ་གཉིས།། སྐྲན་ཟགས་ཁྲག་སྐྲན་རྩ་སྐྲན་ཆུ་སྐྲན་ཟགས།། དབྱེ་བ་ཆུ་རིགས་བཅོ་ལྔར་འགྱུར་བ་ཡིན།། གྱུར་ཚུལ་མ་ཞུ་ཕོ་བའི་བད་ཀན་འཕེལ།། དེ་ཡིས་དྲི་ཆུ་ཐུར་སེལ་རྒྱུ་ལམ་བཀག། རླུང་ལོག་དྲི་ཆུ་དངས་མའི་རྒྱུ་ལམ་ཤོར།། ལྤགས་འོག་སྣོད་ཀྱི་ཕྱི་རོལ་ཆུ་ཡིས་ཁེངས།། དེ་ནི་རྩ་ཁ་ལོག་པའི་འཁྱིམས་ཆུ་ཡིན།། བྱེར་ཆུ་དངས་མ་མ་ཞུ་མཆིན་ལམ་བརྒྱུད།། ཟུངས་སུ་མ་སོང་ངན་ཁྲག་ཆུ་སེར་རྒྱས།། ཤ་ལྤགས་རྩ་མིག་བྱེར་བ་ཁྲག་བྱེར་ཡིན།། མཆིན་རྒྱས་ངན་ཁྲག་མཁྲིས་པར་ཟགས་པ་ཡིས།། མཁྲིས་འཕེལ་ཁ་ལུད་ཤ་ལྤགས་ཆུ་སེར་རྒྱས།། དེ་ཉིད་དངས་མ་མཁྲིས་བྱེར་ཆུ་ཞེས་བྱ།། རླན་གྲངས་སྦྱངས་གཏར་བསིལ་སྦྱོར་ཐལ་བ་ཡིས།། ཕོ་བའི་མེ་ཤི་ཆུ་གྲང་སིངས་གླེག་དང་།། ཞོ་དར་ཇ་སོགས་འཐུངས་པ་མ་ཞུ་བར།། དངས་མའི་ལམ་ཤོར་ཟུངས་སུ་འགྲོར་མ་འདོད།། རྩ་ལ་བྱེར་བས་ཆུ་སེར་གྲང་བ་སྐྱེད།། དངས་མ་ཆུ་བྱེར་ཞེས་བྱ་གྲང་ཆུར་འགྱུར།། གོང་ལྟར་ཕོ་བའི་མེ་དྲོད་ཤོར་བ་ཡིན།། མ་ཞུ་བད་ཀན་དངས་མའི་རྩ་མིག་བཀག། དངས་མ་མ་ཞུ་ཕོ་བར་ཡུན་རིང་གནས།། ཕོ་བའི་དྲོད་ཤོར་རྫ་གསར་ཆུས་བཀང་འདྲ།། རྔུལ་ཞིང་ཟགས་པ་ཕོ་བའི་ཟགས་ཆུ་ཡིན།། གོང་གི་དངས་མ་མ་ཞུ་ལོང་དུ་ལྷུང་།། ལོང་ཁེངས་ཟགས་པ་ལོང་གི་ཟགས་ཆུ་ཡིན།། དངས་མ་མ་ཞུ་འགྲམས་ཁྲག་མཆིན་ཐོག་ལྷུང་།། མཆིན་པ་ཁྲག་གིས་ཁེངས་ཤིང་རྒྱས་པ་ཡིས།། མཆིན་པའི་དྲོད་ཤོར་རུལ་བ་མཆིན་ཟགས་ཡིན།། དེ་འདྲ་མཆེར་ལས་བྱུང་བ་མཆེར་པའི་ཆུ།། དངས་མ་མ་ཞུ་ངན་ཁྲག་གློ་སྦུབས་འགྲིམས།། གློ་སྦུབས་ཆུ་སེར་ཁེངས་ནས་འདུས་པ་དེ།། མཆིན་དྲིའི་སྟེང་དུ་ལྷུང་ནས་སྣོད་སྟེང་ཟགས།། དེ་ཉིད་གློ་བ་ཟགས་པའི་ཆུ་རུ་བཤད།། དངས་མ་མ་ཞུ་ངན་ཁྲག་རྒྱས་པ་དེ།། མཆིན་མཆེར་མཆིན་དྲི་རྒྱུ་མ་ལ་སོགས་པའི།། རྩར་ཞུགས་རྩ་མིག་ཁྲག་རླངས་རྩ་སྐྲན་འདྲིལ།། རྙིངས་ནས་ཁྲག་ཞུ་རྡོལ་ཏེ་རྩ་ཁ་བྱེ།། དེ་ཉིད་རྩ་སྐྲན་ཟགས་པའི་ཆུ་ཞེས་བྱ།། དངས་མ་མ་ཞུ་འགྲམས་ཁྲག་མཚོན་ཁྲག་གིས།། མཆིན་མཆེར་རྒྱས་ཏེ་ཁྲག་ཟིལ་སྐྲན་དུ་ཆགས།། རྙིངས་ནས་སྐྲན་ཞུ་ཁྲག་སྐྲན་ཟགས་ཆུ་ཡིན།། དངས་མ་མ་ཞུའི་ངན་ཁྲག་ཆུ་སེར་རྒྱས།། རྩར་འགྲིམས་རྩ་མིག་ཆུ་སེར་སྐྱ་རྦབ་བྱེད།། དེ་ཉིད་རྡོལ་བ་ཆུ་སྐྲན་ཟགས་ཆུ་ཡིན།། རྒྱུ་མ་འགྲམས་སམ་རྒྱུ་གཟེར་རུས་པ་ཟུག། རྒྱུ་མའི་རྩི་ཉམས་རྙིངས་ནས་རུལ་ཞིང་རྡོལ།། དྲི་ཆུ་ཕྱིར་འཛག་རྒྱུ་རྡོལ་ཆུ་ཞེས་བྱ།། གཞན་ཡང་སྤྱོད་ལམ་སྐྱོན་གྱིས་གདོན་དང་འགྲས།། སྦྱར་དུག་རྐྱེན་གྱིས་ཆུ་རུ་འགྱུར་བ་ཡོད།། འོན་ཀྱང་ནད་ཀུན་བཅོས་ཉེས་སྐྱ་རྦབ་དང་།། འོར་དུ་འགྱུར་ལ་འོར་རྙིང་དམུ་ཆུར་འགྱུར།། མདོར་བསྡུས་རླུང་དང་མཁྲིས་པ་བད་ཀན་ཆུ།། དེ་ཡང་ཚ་ཆུ་གྲང་ཆུ་གཉིས་སུ་འདུས།། ཆུ་ཡི་གནས་ས་ཕྱི་ནང་བར་དང་གསུམ།། ཕྱི་ཆུ་ཤ་མདངས་བར་ན་གནས་པ་སྟེ།། ནང་ཆུ་རྒྱུ་ལོང་སྣོད་ཀྱི་སྟེང་ན་འཕྱོ།། བར་ཆུ་པགས་འོག་ཤ་སྟེང་ཁྱབ་པར་གནས།། དེ་རྟགས་སྤྱི་དང་བྱེ་བྲག་རྣམ་པ་གཉིས།། སྤྱི་རྟགས་དང་པོ་འཇུག་དང་བར་དུ་སྨིན།། ཐ་མ་རྒྱས་དུས་འཚོ་འཆི་བརྟག་པ་འོ།། དང་པོ་འཇུག་དུས་ཤེད་ཆུང་ཕོ་བ་ལྟེམ།། དབུགས་རྒོད་སྙིང་འདེགས་ཟས་ཀྱི་འཇུ་སྟོབས་ཆུང་།། ལྕེ་མཆུ་རྙིལ་དཀར་འགྲོ་འདུག་གསུས་པ་ལྡིག། བོལ་གོང་ངར་གདོང་ཆུ་སོ་བཅུ་དྲུག་མདོ།། ཕོ་བ་བྲང་ཞོལ་ཁ་གདོང་མིག་ལྕིབས་དང་།། ཆུ་ཡི་མཁར་བརྒྱད་གཡོ་ཞིང་སྐྲངས་པ་ཡིན།། བར་དུ་ཆུ་རུ་སྨིན་ནས་གསུས་པ་ཁེངས།། བེམ་ཏོལ་རྒྱབ་ན་ཐོལ་ཐོལ་ཕྲིག་ཕྲིག་འོང་།། ཐ་མ་རྒྱས་དུས་ཚ་ཆུ་གྲང་ཆུ་གཉིས།། ཚ་ཆུ་རྩ་གྲིམས་ཆུ་མདོག་དམར་རམ་སེར།། གློ་སོར་མིག་སེར་ལྷེན་སྣ་སློག་པ་ཆགས།། གསུས་པ་ཆེ་ལ་རྩ་ཡི་དྲ་བས་ཁྱབ།། ཡན་ལག་ཕྲ་ལ་སྐམ་པས་ཡི་དགས་འདྲ།། གྲང་ཆུ་རྩ་དལ་ཆུ་སྔོ་སྐོམ་དད་ཆུང་།། ཕོ་བ་སྦོ་འཁྲོག་བྱེད་ཅིང་སྐབས་སུ་འཁྲུ།། མགོ་ལུས་ཡན་ལག་སྐྲངས་ཆེ་མནན་རྗེས་འོང་།། སྦོམ་ལ་རགས་པས་མགོན་པོ་ལྟ་བུར་བཤད།། གྲང་ཆུ་ཡུན་ལོན་ཆུ་རྒྱས་གློ་སྙིང་དང་།། མཆིན་པ་ཆུས་ནུབ་ཚོས་ཏེ་མྱུར་དུ་འཆི།། ཚ་ཆུ་རྒྱས་ཐེབས་མི་སྐྱེ་ཚེ་རིང་སྟེ།། ཕུག་ན་སྲོག་ཡིན་མྱུར་དུ་འཆི་བར་འགྱུར།། འཆི་རྟགས་དང་ག་མི་བདེ་སྐྱུག་པ་དང་།། གློ་མང་མིག་སེར་དབུགས་ཐུང་སྐོམ་དད་ཆེ།། དྲི་ཆུ་དམར་སེར་སྐ་ལ་ཉུང་བ་དང་།། ཟུངས་ཟད་ལུས་སྟོབས་ཤོར་ན་སྤང་བར་བྱ།། དབུགས་དལ་དང་ག་བདེ་ལ་སྐོམ་དད་ཆུང་།། ཟུག་མེད་ལུས་ཡང་མིག་དཀར་དྲི་ཆུ་སྔོ།། རྩ་རྒྱུད་སྙོམས་ལ་ཤེད་ཆེ་འཚོ་བར་འགྱུར།། བྱེ་བྲག་བརྟག་པ་དངས་མ་ཁྲག་བྱེར་ཆུ།། རྩ་གྲིམས་ཆུ་དམར་ལུས་ལྕི་དང་ག་འགག། རོ་སྟོད་རྩིབ་ལོགས་རྣམས་སུ་གཟེར་ཕྲན་ལྡང་།། གཏར་ན་ཁྲག་ངན་སླ་ལ་ཆུ་ལྟར་སེར།། དངས་མ་མཁྲིས་བྱེར་རྔམ་འདེགས་གློ་སྙིང་སྤྲུག། དང་ག་མི་བདེ་འགྲངས་ན་ཕོ་བ་རྫིང་།། མིག་ཆུ་སེར་ལ་འཁྲུས་ན་མཁྲིས་པ་འབྱུང་།། དངས་མ་ཆུ་བྱེར་ལྡེར་ཚོ་ལྟ་བུར་སྐྲངས།། རྩ་བྱིང་ཆུ་སྔོ་སྙིང་སྤྲུག་ཕོ་བ་རྫིང་།། དེ་གསུམ་དང་པོ་ཕྱི་ཆུ་འོར་ཡིན་ཏེ།། རྙིངས་པར་གྱུར་ན་ནང་དུ་ཆུ་རུ་སྨིན།། མཆིན་པ་དང་པོ་ཟགས་པ་གཡས་ནས་འཕེལ།། རྩ་གྲིམས་ཆུ་དམར་ཕུག་ན་རྒྱ་བཤལ་འབྱུང་།། གསུས་པ་ཆེ་ལ་རྩ་བཀྲ་ཡན་ལག་སྐམ།། མཆེར་པ་ཟགས་པ་གཡོན་ནས་འཕེལ་བ་ལ།། ཆུ་ཡི་ནང་ན་མཆེར་པ་རྡོ་ལྟར་སྲ།། ཕོ་བ་སྦོ་འཁྲོག་འཇུ་སྟོབས་ཆུང་བ་ཡིན།། གློ་བ་ཟགས་པ་གློ་མང་གློ་སྙིང་སྤྲུག། ཟོས་རྗེས་ཕོ་བ་མི་བདེ་བཀྲག་མདངས་འཆོར།། ཕོ་ལོང་ཟགས་པ་སྦོ་འཁྲོག་ཕོ་བ་རྫིང་།། དང་ག་མི་བདེ་ཤིན་ཏུ་འཇུ་སྟོབས་ཆུང་།། འགྲངས་དང་གྲངས་རྗེས་གླང་ཐབས་ལྟ་བུར་ན།། ཁྱད་པར་ཕོ་བ་ལོང་ཡུལ་ཆེ་བ་ཡིན།། སྐྲན་ཟགས་གསོག་པ་བུལ་ཞིང་ཡོད་ངོས་མང་།། རྩ་ཁ་བྱེ་ནས་གསོག་རྐྱེན་ཟུག་གཟེར་ཆེ།། འཁྱིམས་ཆུ་འོག་རླུང་ལྡོག་ལ་ཆུ་བབས་ཆུང་།། སྦོ་འཁྲོག་བྱེད་ལ་མྱུར་དུ་སྐྱེ་བ་ཡིན།། རྒྱུ་རྡོལ་རྒྱུ་སྨད་མི་བདེ་སྨད་ནས་སྐྱེ།། འདྲེ་ཆུ་ཤ་སྣ་འགུལ་ཞིང་སྙིང་མི་དགའ།། གདོང་ལ་ཆུ་བུར་འོང་ཞིང་སྣ་ཁྲག་འཛག། འཕར་རྩ་མི་གྲུང་ལྡང་དུབ་འདྲེ་ཁ་རྒོད།། ཡང་ན་ཤེས་པ་བྱིང་ལ་ཚིག་པ་ཟ།། མེ་ལོང་སྟེང་དུ་བྱིང་བྱིང་ཐུ་ལུ་འདྲ།། དུག་ལས་གྱུར་པ་དུག་གི་ནད་རྟགས་འབྱུང་།། མདོར་བསྡུས་རླུང་མཁྲིས་བད་ཀན་འདུས་པས་སྒྱུར།། རླུང་གྱུར་འཁྲོག་འུར་ཟུག་ཆེ་འཕེལ་འབྲི་བྱེད།། ཆུ་སྔོ་དྲི་མ་སྲི་ལ་དབུགས་ངན་སྡོམ།། མཁྲིས་པ་མིག་སེར་ཤ་སྔོ་ཆུ་བབས་ཆུང་།། རྩ་གྲིམས་ཆུ་མདོག་མར་ཁུ་བཙོད་ཁུ་འདྲ།། བད་ཀན་དབུགས་འདེག་སྐྲངས་ཆེ་འཇུ་སྟོབས་ཆུང་།། ལུས་ལྕི་གཉིད་ཆེ་རྩ་བྱིང་ཆུ་མདོག་སྔོ།། དེ་ལ་འདྲེ་ཆུ་འཁྱིམས་ཆུ་ཕོ་ལོང་ཟགས།། བྱེར་ཆུ་གསོར་རུང་ཕྱི་མ་ཁས་མི་བླང་།། མཁྲིས་པ་ལས་གྱུར་ཚ་ཆུ་མི་འཚོ་སྤང་།། བད་རླུང་ལས་གྱུར་གྲང་ཆུ་གསོ་བར་ནུས།། གསོ་ཐབས་དང་པོ་མངོན་ཚུལ་ཞུགས་དུས་སུ།། སེ་འབྲུ་བརྒྱད་དང་རྒོད་མ་ཁ་ཡི་ཕྱེ།། ལུག་ཤ་གསར་འཇམ་ཞུན་མར་དྲོད་བསྐྱེད་ལ།། འཇམ་བཤལ་ཆུ་སེར་སྦྱངས་པས་ཞི་བར་ནུས།། བར་དུ་ཆུ་རུ་རྒྱས་ཏེ་སྨིན་པའི་དུས།། དེ་ལ་བཅོས་ཐབས་སྤྱི་དང་བྱེ་བྲག་གཉིས།། སྤྱི་རུ་དམུ་ཆུ་བཅོས་ཐབས་རྣམ་ལྔར་བཤད།། དང་པོ་ཆུ་བོ་འོལ་ཁ་བསྒྱུར་བ་དང་།། གཉིས་པ་རྒྱ་མཚོ་གནས་སུ་བསྐམ་པ་དང་།། གསུམ་པ་རྫིང་གི་འོར་ཁུང་བརྟོལ་བ་དང་།། བཞི་པ་མཚོ་མོ་ཡུར་དུ་དྲང་བ་དང་།། ལྔ་པ་རྩ་ལ་འགག་མིག་གཞུག་པ་འོ།། ཆུ་བོའི་འོལ་ཁ་མ་བསྒྱུར་ན།། རྫིང་གི་སྐྱེ་ཆུ་གསོག་པ་འདྲ།། རྒྱ་མཚོ་གནས་སུ་མ་བསྐམས་ན།། ལུ་མ་ཅན་གྱི་ཆུ་མིག་འདྲ།། རྫིང་གི་འོར་ཁུང་མ་བརྟོལ་ན།། ཆུ་ཡིས་ལྟོང་མོ་འགེངས་པ་འདྲ།། མཚོ་མོ་ཡུར་དུ་མ་དྲངས་ན།། རྫིང་གི་འོལ་ཀ་མེད་པ་འདྲ།། རྩ་ལ་འགག་མིག་མ་བཅུག་ན།། ཞིང་པས་ཐན་གར་བཞག་པ་འདྲ།། དེ་ཕྱིར་བཅོས་ཚུལ་ལྔ་ལྡན་གཅེས།། དང་པོ་ཆུ་བོའི་འོལ་ཁ་སྒྱུར་བ་ནི།། མ་ཞུ་མེ་དྲོད་ཉམས་ལས་འབྱུང་བའི་ཕྱིར།། གྲང་བའི་ཆུ་ལ་སེ་འབྲུ་བཞི་པ་སྟེ།། ཚ་བའི་ཆུ་ལ་དེ་སྟེང་གུར་གུམ་བསྣན།། བུར་དཀར་སྦྱར་བ་ཆུ་སྐོལ་འཕུལ་ལ་བཏང་།། ཕོ་བའི་མེ་དྲོད་སྐྱེད་ཅིང་མ་ཞུ་འཇུ།། བད་ཀན་བེ་སྣབས་རྩ་སྦུབས་འགགས་པ་སེལ།། དངས་མ་མ་ཞུ་ལུས་ཟུངས་རང་སོར་འཇུག། དེ་རྗེས་ཤིང་མངར་འུ་སུ་ལྕམ་པ་དང་།། སྲུབ་གའི་འབྲས་བུ་འུག་སྒྲོའི་ཐལ་བ་རྣམས།། ཞུན་མར་སྦྱར་བཏང་སྐོམ་ལ་ཤིན་ཏུ་འཛེམ།། དངས་མ་དྲི་ཆུ་རང་ལམ་འཇུག་པར་བྱེད།། དེ་ཡིས་དང་ག་བདེ་ལ་སྐོམ་དད་ཆུང་།། དྲི་ཆུའི་བུངས་ཆེ་ཕོ་བ་བདེ་བར་འགྱུར།། དེ་ནས་རྒྱ་མཚོ་གནས་སུ་སྐེམ་པ་ལ།། སྨན་དང་དཔྱད་དང་ཟས་དང་སྤྱོད་ལམ་བཞི།། སྨན་གྱིས་སྐེམ་པ་ཐོད་སྦྱོར་ཐལ་སྦྱོར་དང་།། བི་ཎྜྷ་རུས་སྦྱོར་དངུལ་ཟངས་སྦྱོར་བ་དྲུག། ཐོད་པའི་སྦྱོར་བ་མི་དང་ཕག་པ་དང་།། རྟ་དང་འཕྱི་བ་དུར་ཐོད་གཙོ་བྱས་ལ།། ཨ་རུ་བ་རུའི་རུས་པ་ཝ་ཡི་སྙིང་།། བྱང་སེམས་དཀར་དམར་བྱང་པ་ཤིང་ཀུན་དང་།། རྒྱ་ཚ་དབྱི་མོང་སྲུབ་ཀའི་འབྲས་བུ་རྣམས།། འོ་མ་མར་དང་ཞག་ལ་འདག་པ་བྱ།། ནུས་ལྡན་བསྲེགས་ཐལ་སུག་སྨེལ་པི་པི་ལིང་།། སེ་འབྲུ་སྡིག་སྲིན་ལྕམ་པ་སྲམ་གྱི་བྲུན།། ཁ་ཚར་བཏབ་ལ་འདུ་བའི་རྟ་དང་སྦྱར།། དམུ་ཆུ་རྒྱ་མཚོ་ཙམ་ཡང་སྐེམ་པར་ནུས།། ཐལ་སྦྱོར་ཐལ་སྨན་འཇམ་པོ་སུམ་གཉིས་ལ།། བཙན་དུག་ཨ་རུ་བཅུ་གཅིག་ཕོ་འགྲོན་བདུན།། ཅུ་གང་གུར་གུམ་ཚ་བ་རྣམ་པ་ལྔ།། ཚྭ་སྣ་ཚོགས་ཚད་ཡ་བཀྵ་ར་དང་།། ས་རྫི་ཀ་དང་ཤ་རུ་དུར་ཐོད་ཐལ།། པྲི་ཡངྐུ་རྣམས་དྲི་ཆུས་འདམ་བཏགས་བྱ།། རིལ་བུ་སྲན་ཙམ་ཁྱེའུ་སུས་རིམ་པས་བསྐྱེད།། ཟླ་བ་གཅིག་གིས་རྒྱ་མཚོ་སྐེམས་པར་ནུས།། བི་ཎྜྷའི་སྦྱོར་བ་བཙན་དུག་ཆ་གཅིག་ལ།། ཨ་རུ་སུམ་གཉིས་སོ་སོར་ནུས་ལྡན་བསྲེག། འགྲོན་བུ་དུར་ཐོད་བུར་དཀར་རིལ་བུ་བྱ།། གྲང་ཆུའི་སྟེང་དུ་བསྐལ་བའི་མེ་བདུན་འདྲ།། རུས་སྦྱོར་དུང་དང་འགྲོན་བུ་དུར་རུས་དང་།། ཉ་སྲམ་ཆུ་བྱའི་རུས་པས་གཙོ་བྱས་ལ།། མུ་ཟི་ཟངས་ཐལ་ཅོང་ཞི་ཨ་རུ་ར།། རུ་རྟ་ཚ་བ་གསུམ་དང་དབྱི་མོང་དང་།། ཟེ་ཚ་ཐལ་ཚ་རྒྱ་ཚ་ཁ་རུ་ཚ།། རྒྱམ་ཚ་བྱང་ཚ་ཞིབ་བཏགས་ནུས་ལྡན་བསྲེག། དམུ་ཆུ་མ་ལུས་སྐེམས་པའི་གདམས་པ་སྟེ།། ཁྱད་པར་སྐྲན་ཟགས་ཆུ་ལ་བསྔགས་པ་ཡིན།། དངུལ་ཆུ་མུ་ཟི་སྟར་བུ་ཚ་བ་གསུམ།། ཚ་སྣ་བུ་རམ་རིལ་བུ་སྐེམས་ཀྱི་མཆོག། ཁྱད་པར་ཚ་ཆུ་སྐེམས་པའི་ཕ་ལམ་ཡིན།། ཟངས་ཐལ་སྦྱོར་བ་ཟངས་ཐལ་སུམ་གཉིས་ལ།། ལྕགས་ཐལ་སུམ་ཆ་ཤ་རུས་ཐོད་འགྲོན་ཐལ།། ཨ་རུ་རྡོ་དྲེག་ཏ་ཙ་ཚ་གྲང་གི། རྟ་ཡིས་བསྒྱུར་བས་རྒྱ་མཚོ་སྐེམས་པར་བྱེད།། ཁྱད་པར་དོན་ཟགས་ཆུ་ལ་བསྔགས་པ་ཡིན།། ཡང་ན་ཟངས་ལྕགས་དངུལ་ཐལ་ཡ་བཀྵ།། མུ་ཟི་རྒྱ་ཚ་དབྱི་མོང་ཙི་ཏྲ་ཀ། ཨ་རུ་ཚ་བ་གསུམ་དང་ཀ་ར་སྦྱར།། ཚ་གྲང་ཐུན་མོང་སྐེམས་པར་བྱེད་པ་ཡིན།། ཁ་ཟས་ལུག་ཤ་ཟན་དྲོན་གཡག་རྒོད་ཤ། ཚོ་ཁུ་སྤོད་བྲན་མར་ཟན་ཆང་འཇམ་བསྟེན།། འཇུ་དཀའ་སྔོ་ངད་ཟས་ངན་བསིལ་ཟས་སྤང་།། ཚ་ཆུ་དྲོད་བཅུད་ཧ་ཅང་དྲགས་པ་དང་།། སྤྱོད་ལམ་བསེར་བུ་རླན་གྲང་དྲག་ཤུལ་སྤང་།། དྲོ་བའི་གནས་འདུག་མི་རྔུལ་བག་ཙམ་བཅག། དཔྱད་དུ་གཡི་སྤྱང་པགས་པའི་སྤུ་དུགས་བྱ།། ཁྱི་ཡི་པགས་པ་དྲོ་ཡང་དང་ག་འགྲིབ།། ལྟེ་བ་བཞི་སྒྲོམ་ལྷེན་སྣའི་རྩེ་མོ་དང་།། སྒྲོག་རུས་གཤོང་དང་དང་པོ་བཅུ་གཉིས་བསྲེག། གང་ལ་བབས་པའི་གསང་སྒོ་མེ་ཡིས་བསྡམ།། ཚ་བའི་ཆུ་ལ་རུ་ཐུང་སྣོད་ཀ་གཏར།། གསུམ་པ་རྫིང་གི་འོར་ཁུང་བསལ་བ་ནི།། ཆུ་བཤལ་ཆུ་སྦྱོངས་འཕྲུལ་འཛག་རྣམ་པ་གསུམ།། དམུ་རྫིང་བུ་ག་འགགས་ལས་འབྱུང་བའི་ཕྱིར།། འདི་ལ་གཉེན་པོ་སྦྱོང་འདྲ་གཞན་ན་མེད།། ཆུ་བཤལ་ཨ་རུ་མཆུ་སྙུང་ཟངས་དྲེག་དང་།། དནྡ་དུར་བྱིད་དང་དོངཁ་ཤྲཱི་ཁཌྷྜྷཱ།། ཐར་ནུ་ཁྲོན་བུ་རེ་ལྕག་ལྕུམ་རྩ་དང་།། སྔོན་བུ་ཆུ་མ་རྩི་དང་པི་པི་ལིང་།། རྒྱ་ཚ་བུ་རམ་རིལ་བུ་ཆང་གིས་དབུལ།། སྔོན་འགྲོ་ཕྱི་རྗེས་ལས་ལྔ་སྤྱི་དང་མཐུན།། དེ་ཡིས་རྩ་ཁ་འབྱེད་ཅིང་ཆུ་རྣམས་སྡུད།། དེ་རྗེས་སེ་འབྲུ་ཤིང་ཚ་པི་པི་ལིང་།། སུག་སྨེལ་གུར་གུམ་གླ་རྩི་བོང་ང་དཀར།། བྲག་ཞུན་སྤོས་དཀར་འུ་སུ་ལྕམ་པ་དང་།། རྒྱ་ཚ་རྒྱམ་ཚ་སྡིག་སྲིན་གསེར་བྱེ་མ།། ཨ་རུ་བྱང་པ་བུ་རམ་རིལ་བུ་བྱ།། ཆང་གིས་འཕུལ་བས་ཆུ་རྣམས་གསང་བར་འདྲེན།། ཆུ་འདྲོངས་ཆུང་ན་ཉི་དགའ་པི་པི་ལིང་།། ཤིང་ཚ་བསྡུས་པའི་ཁུ་བ་ལྕག་ཏུ་བཏང་།། ཡང་ན་ཆུ་མ་རྩི་དང་ཨ་རུ་ར།། སེ་འབྲུ་སུག་སྨེལ་ཤིང་ཚ་པྲི་ཡངྐུ།། གླ་རྩི་བྲག་ཞུན་གུར་གུམ་བོང་ང་དཀར།། མོན་ལྕམ་རྒྱམ་ཚ་རྒྱ་ཚ་སྡིག་སྲིན་དང་།། སྦུར་མགྱོགས་འུ་སུ་བྱང་པ་ཆང་གིས་དབུལ།། ཡང་ན་སྔོན་མོ་ཆབ་འདྲེན་སྙིམ་པ་དང་།། རག་ཤ་མིག་མེད་བཅུ་རྣམས་རྩི་བཞིན་བཏགས།། དྲོད་སྨན་རིལ་མོ་ཆུ་བྲེ་གང་ལ་བསྡུ།། ཕྱེད་འདུས་རྒྱུན་དུ་སྐོམ་དུ་བཏང་བར་བྱ།། ཡང་ན་བོང་རྨིག་གཡས་གཞུར་ཞོ་གསུམ་དང་།། བུ་རམ་ཞོ་གཉིས་རྒྱ་ཚ་ཞོ་གཅིག་རྣམས།། རིལ་བུ་བྱས་བཏང་དེ་དག་ཐམས་ཅད་ཀྱིས།། གསང་བའི་ལམ་དུ་རྒྱ་མཚོ་འདྲོངས་པར་ངེས།། ཀུན་གྱིས་འདྲོངས་དཀའ་གཉེན་པོའི་ཆུ་སྦྱོངས་ནི།། རྒྱ་ཚ་སྡིག་སྲིན་སུག་སྨེལ་གུར་གུམ་མཚལ།། གླ་རྩི་ཚ་ལ་སྦོས་སྤོསདཀར་པི་པི་ལིང་།། གཟེ་མ་ལྕམ་པ་འབུ་སྐྱོགས་བྱང་པ་རྣམས།། རྩི་བཞིན་བཏགས་ལ་བུར་གར་ཕྱེད་དང་སྦྱར།། སྲད་དཀར་ཐང་གིས་སྔ་དྲོ་དགོངས་མོ་དབུལ།། ཡང་ན་རྒྱ་ཚ་དུར་བྱིད་ཨ་རུ་ར།། ཟངས་དྲེག་བྱང་པ་བུ་རམ་རིལ་བུར་དྲིལ།། ནང་མ་ལྔ་བདུན་ཆུ་སྐོལ་འཕུལ་ལ་བཏང་།། རྒྱ་མཚོ་ཙམ་ཡང་འདྲོངས་པར་ཐེ་ཚོམ་མེད།། འཕྲུལ་འཛག་རྣོན་པོ་དནྡ་དུར་བྱིད་དོང་ག་གསུམ་དང་སྦྱོང་བྱེད་སྔོན་བུ་ཁྲོན་བུ་ཐར་ནུ་གསུམ།། སེར་པོ་གསུམ་དང་སྔོ་ཡི་ཚ་བ་གསུམ།། འབྲས་བུ་གསུམ་དང་ཆུ་ལམ་འཛུད་པ་རྒྱ་ཚ་སྡིག་སྲིན་གླ་རྩི་གསུམ།། སྣ་སེལ་ཚ་བ་གསུམ་དང་འདྲེན་པར་བྱེད་པ་ཚ་ལ་ལི་ཤི་མོན་ཆ་ར་གསུམ།། མི་གདུག་པ་ཡི་སྨན་བྱང་པ་ཤིང་མངར་ལྕམ་པགསུམ་སྨན་རྟ་གསུམ།། ཞིབ་བཏགས་ཆང་འཕུལ་རྩ་ལྟོ་གཉིས་ནས་སྦྱོང་།། ལུས་ཟུངས་བཟང་ན་ཞག་རེ་སྨན་གྱིས་སྦྱང་།། ཞག་རེ་ཟས་ཀྱིས་ལུས་ཟུངས་གསོ་བར་བྱ།། ཟུངས་ངན་ཟས་ལ་ཞག་གཉིས་སྨན་ལ་གཅིག། དེ་ལྟར་སྤེལ་བའི་ཆུ་སྦྱོངས་ལྕག་གིས་བསྐུལ།། ཟས་སྨན་མ་སྤེལ་ཆུ་ལམ་ཟས་ཀྱིས་འགག། དེ་ཕྱིར་ཟས་སྨན་འཐེང་འགྲོས་ཤེས་པར་གྱིས།། བཞི་པ་མཚོ་མོ་ཡུར་དུ་དྲང་བ་ནི།། རྩ་ནས་གཙག་དང་གསང་ནས་གཙག་པ་གཉིས།། དང་པོ་ཤ་རུ་མགོ་རུས་ཡ་བཀྵ།། རྩ་བྱ་སྤེན་ཐལ་བ་ཆུས་རྩ་ལམ་སྦྱང་།། ཆུ་སེར་གདོང་རྩ་རྒྱུན་དུ་གཏར་བར་བྱ།། རྐང་པའི་སྐྲངས་ཆེ་སྦང་གར་བག་ཕྱེ་སྦྱར།། པུས་མོ་མན་ཆད་བྱུགས་ལ་དེབ་བཏང་བཅིང་།། མཐེ་བོ་བོར་བའི་སོར་མོ་གསུམ་གྱི་བར།། མཚོན་གང་བཅལ་བར་ཕུག་ལ་ཆུ་སེར་དབྱུང་།། ཆུ་ཐག་ཆོད་ནས་རྨ་དེ་སྤྲ་བས་བསྲེག། ཐམས་ཅད་བརྡུགས་ན་གསང་ནས་གཙག་པར་བྱ།། གསང་ནི་རྒྱབ་ཀྱི་རྩིབ་ཐུང་གཉིས་ཀྱི་མཆན།། མདུན་གྱི་ལྷེན་གསང་ལྟེ་བ་ཡན་ཆད་དུ།། ཆུ་མཚམས་པགས་པ་སྲབ་པའི་འབྲི་དམིགས་ཡིན།། རྐེད་པར་ཆུ་ཆིངས་སྣམ་བུས་མས་ཡར་བསྡམ།། སྐྱིལ་ཀྲུང་ཁད་མཉམ་སྟན་འདུག་ལུས་པོ་བསྲང་།། རྫེམས་དང་རྫེམས་འཛིན་རྩ་སྟེང་མ་ཡིན་པར།། སྦུབས་ཐུར་སྨྱུ་གུ་ཁ་ཡིས་སོར་གཉིས་དབུག། བྲེ་ཕྱེད་ཕུལ་དོ་ཆུ་བོངས་སྦྱར་ལ་དབྱུང་།། འདོན་པ་མངས་ན་ཆུ་ཚབ་ཟུག་གཟེར་སྐྱེ།། ཕུག་ཤུལ་དུང་དང་འགྲོན་བུ་རྩིབ་བསྲེགས་གླན།། ཕྱིང་པ་བག་འདག་སྦྱར་བ་སྣམ་བུས་བཅིང་།། ཆུ་ཁ་རླུགས་ན་ཆུས་བོར་སྲོག་དང་འབྲལ།། དེས་ན་སྔ་མའི་རྨེན་པ་མ་བརྟས་པར།། ཕྱི་མ་མི་དབུག་ཕུག་ན་གཤེད་མ་བྱེད།། དེ་ནས་ནས་རེ་རིམ་པས་ཇེ་མ་དམའདབུག། གཙག་དང་སྐེམ་པ་སྦྱོངས་སུ་སྤེལ་ལ་བཅོས།། བཙགས་པའི་ཆུ་སྤྲ་ཆུ་དང་འདྲ་ན་འཚོ།། ལྗང་གུ་སེར་པོ་འཚོ་དཀའ་དམར་སྨུག་འཆི།། ལྔ་པ་རྩ་ལ་འགག་མིག་གཞུག་པ་ནི།། དོམ་མཁྲིས་གླ་རྩི་དང་བྲག་སྤོས་གུར་གུམ་བཞི།། སྦྲང་དང་སྦྱར་བས་རྩ་ཁ་སྡོམ་པར་བྱེད།། སྐེམས་ཀྱི་སྐབས་བཤད་མེ་དམིགས་བསྲེག་པ་བསྐྱར།། ཁྱད་པར་སྟེང་འོག་བར་དང་པོ་བཅོ་བརྒྱད་བཅུ་གསུམ་གྱི་ཆུ་སྒོ་བསྡམ།། དེ་ནས་དམུ་ཆུ་བྱེ་བྲག་བཅོས་པ་ནི།། བྱེར་ཆུ་རྣམ་གསུམ་སེ་འབྲུས་ཕོ་བ་བསྲུང་།། དེ་རྗེས་ཁྲག་བྱེར་ཉི་ཤུ་རྩ་ལྔ་ཡིས།། དངས་སྙིགས་ཕྱེ་ལ་འཇམ་པའི་བཤལ་གྱིས་སྦྱང་།། རྩ་ཁ་མང་དུ་ཕྱེ་ལ་ཉུང་དུ་གདོན།། ཟས་སྐོམ་བསིལ་དྲོད་སྤེལ་ལ་སྙོམས་པར་བཅོས།། མཁྲིས་བྱེར་དནྡ་དུར་བྱིད་སྤོས་དཀརབ་ཆུའི་སྦྱོངས་བཏང་ཕོ་གསང་བསྲེག། རུས་ཐལ་སིག་ནེའི་སྦྱོར་བས་བཟང་དྲུག་ཚ་བ་གསུམ་འགྲོན་ཐོད་ཐལ་བ་བྲག་ཞུན་སོ་མ་ཀ་རརང་སར་སྐེམ།། ཟས་སྐོམ་གོང་བཞིན་དངས་མ་ཆུ་བྱེར་ལ།། མེ་ཡིས་སྟོད་སྨད་བར་གྱི་ཆུ་གསང་བསྡམ།། ཟས་སྐོམ་དྲོད་བསྟེན་རུས་ཐལ་སྦྱོར་བས་བསྐམ།། དེ་རྣམས་དང་པོ་ཕྱི་ཆུའི་དུས་སུ་བསྟེན།། མ་ཐུབ་རྙིངས་ན་སྤྱི་བཅོས་རྣམ་ལྔ་གཅེས།། མཆིན་པའི་ཟགས་ཆུ་བྲག་ཞུན་གུར་གུམ་སོ་མ་ར་ཛཱ་དོམ་མཁྲིས་ཟངས་ཐལ་འགྲོན་ཐལ་བཟང་དྲུག་གི་སྦྱོར་བས་བསྡམ།། རུ་ཐུང་རྩ་གཏར་དངུལ་ཆུའི་སྦྱོར་བས་བསྐམ།། མཆེར་ཟགས་རུ་ཐུང་གཡོན་གཏར་བྱི་ཏང་ག། ཤུ་དག་རྒྱ་ཚ་འོ་མར་བསྐོལ་བ་བླུད།། ཤི་ཀྲུ་བསྐོལ་བར་རྒྱམ་ཚ་པི་པི་ལིང་།། ཙི་ཏྲ་ཀ་བཏབ་མཆེར་ཟགས་དམུ་ཆུ་སྐེམ།། གློ་ཟགས་སེ་འབྲུ་ལྔ་པས་ཕོ་བ་བཟུང་།། ཟངས་ཐལ་སྐེམས་བསྟེན་རྗེས་ལ་དྲུག་བདུན་བསྲེག། ཕོ་ལོང་ཟགས་དང་འཁྱིམས་ཆུ་ཟས་དྲོད་དང་།། ཐལ་སྦྱོར་བི་ཎྜྷའི་སྐེམས་སྦྱོར་བསྟེན་པར་བྱ།། ཤིང་ཀུན་ཙ་བྱ་སྒོག་སྐྱ་རྩ་བ་ལྔ།། སྨན་མར་འཇམ་རྩི་བཏང་བས་སྐེམས་གྲོགས་འགྱུར།། སྐྲན་ཟགས་འབྲས་གསུམ་ཚ་བ་གསུམ་པ་དང་།། བྱི་ཏང་ག་དང་ལྕགས་ཕྱེ་ཙི་ཏྲ་ཀ། ཐལ་སྨན་སྦྲང་དང་སྦྱར་ཏེ་བཏང་བར་བྱ།། ཐལ་སྦྱོར་རུས་སྦྱོར་བཤིག་སྐེམས་དུས་གཅིག་བྱེད།། རྒྱུ་རྡོལ་མི་འཚོ་གདོན་ཆུ་རིམ་གྲོས་བཅོས།། དུག་ལས་གྱུར་ན་སྐེམས་སྦྱོར་གཉེན་པོར་བསྟུན།། རླུང་མཁྲིས་བད་ཀན་གང་ཤས་ཆེ་བའི་ཆུ།། སྨན་དཔྱད་ཟས་སྤྱོད་དེ་ཡི་གཉེན་པོར་སྦྱར།། མི་ལྡོག་རྗེས་གཅོད་སྔོ་ངད་འཇུ་དཀའི་ཟས།། འཇིག་ཟས་རྟ་ཞོན་ཉལ་པོ་འགྲོ་འདུག་དང་།། རླན་གྲངས་ཟས་སྤྱོད་མི་འཕྲོད་ལོ་དུས་བསྲུང་།། སྐེམས་ཀྱི་སྨན་རྣམས་ནང་རེ་རྒྱུན་མི་བཅད།། བོང་ཤ་རྩ་བ་ལྔ་ཡི་སྨན་མར་དང་།། ད་བྱིད་སྐྱིན་གོར་ལུས་ཟུངས་གསོ་བར་བྱ།། དེ་ཡིས་འཆི་བདག་དམུ་ཆུ་ཟློག་པར་ངེས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཅོང་ཆེན་དམུ་ཆུ་བཅོས་པའི་ལེའུ་སྟེ་བཅུ་པའོ།། །།

X