//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་གསུམ་པ། འཁྲུལ་གཞི་བསལ་བ་ཚ་གྲང་གལ་མདོ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:21:56 ཀློག་གྲངས། 4 

དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཚ་གྲང་གཉིས་སུ་མ་འདུས་ནད་མེད་ཀྱང་།། ཚ་གྲང་ནོར་བར་བཅོས་ན་གཞན་སྲོག་འདོར།། དེ་ཡི་ངོས་བཟུང་འཁྲུལ་སོ་ཅི་ལྟར་བསལ།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། ཚ་གྲང་འཁྲུལ་གཞི་གལ་འགག་རྣམ་བཞི་སྟེ།། རྟགས་དང་ངོ་བོ་གཉིས་ཀ་ཚ་བ་དང་།། རྟགས་དང་ངོ་བོ་གཉིས་ཀ་གྲང་བ་དང་།། ཕྱི་རྟགས་ཚ་ཡང་ངོ་བོ་གྲང་བ་དང་།། ངོ་བོ་ཚ་ཡང་ཕྱི་རྟགས་གྲང་བ་ཡིན།། རྒྱུ་རྐྱེན་ཡུལ་དུས་རང་བཞིན་ན་ཚོད་དང་།། གནས་ས་ཉིན་ཞག་ཟས་ཟོས་གོམས་པ་ཆུ།། འདི་བཅུའི་སྒོ་ནས་འཁྲུལ་མེད་ངོ་ཡིས་བཟུང་།། མཁྲིས་པ་སྐྱེད་པའི་སློང་རྒྱུ་དེས་བསྐྱེད་ནས།། སྐམ་ས་ཚ་གདུང་ཡུལ་དུས་སོས་ཀ་སྟོན།། དར་མ་མཁྲིས་ཤས་ཆེ་དང་བར་ན་གནས།། ཉིན་དགུང་མཚན་དགུང་ཞུ་དུས་ན་བ་དང་།། ཁ་ཟས་དྲོད་བཅུད་ཡུན་དུ་བསྲིངས་བསྟེན་པས།། ཆུ་དམར་སྐ་ལ་དྲི་དུགས་ཀུ་ཡ་མཐུག། དེ་ལ་མཁྲིས་པ་འཕེལ་བའི་རྟགས་བྱུང་ན།། རྟགས་དང་ངོ་བོ་གཉིས་ཀ་ཚ་བ་ཡིན།། དེ་ལ་བད་རླུང་འཕེལ་བའི་རྟགས་ཡོད་ན།། ཕྱི་རྟགས་གྲང་ཡང་ངོ་བོ་ཚ་བར་གནས།། བད་རླུང་སྐྱེད་པའི་སློང་རྒྱུ་བསྟེན་པ་དང་།། ངད་ཅན་བསེར་བུ་རླན་ཅན་དབྱར་དགུན་དུས།། རྒས་དང་བྱིས་པ་བད་རླུང་ཆེ་བ་དང་།། སྟོད་སྨད་གནས་ཤིང་ཉིན་ཞག་ཐོག་མཐར་ན།། ཟོས་ཐོག་ཞུ་རྗེས་དུས་ན་ལྡང་བ་དང་།། བཅུད་མེད་བསིལ་ཟས་རྒྱུན་དུ་བསྟེན་པ་ཡིས།། ཆུ་སྔོ་དྲི་རླངས་ཆུང་ལ་ཀུ་ཡ་སྲབ།། དེ་ལ་བད་རླུང་འཕེལ་བའི་རྟགས་བྱུང་ན།། རྟགས་དང་ངོ་བོ་གཉིས་ཀ་གྲང་བ་ཡིན།། དེ་ལ་མཁྲིས་པ་འཕེལ་བའི་རྟགས་ཡོད་ན།། ཕྱི་རྟགས་ཚ་ཡང་ངོ་བོ་གྲང་བར་གནས།། གལ་ཏེ་དེ་དག་ཕན་ཚུན་འདྲེས་གྱུར་ན།། ཚ་གྲང་འདྲེས་པས་ལྟར་སྣང་ནད་འབྱུང་སྟེ།། ཚ་བ་གྲང་བ་ལྟ་བུར་སྣང་བ་དང་།། གྲང་བ་ཚ་བ་ལྟར་སྣང་གང་ཡང་རུང་།། ནད་གཞི་རྟགས་དང་བཅོས་ཐབས་གོམས་པ་དང་།། བཅོས་སྐྱེད་ལྟར་སྣང་ལྔ་ཡིས་འཁྲུལ་སོ་བསལ།། དང་པོ་ནད་གཞི་མིང་གི་ལྟར་སྣང་ནི།། དངས་མ་མ་ཞུ་ཚ་བ་བད་སྨུག་དང་།། ཚ་སྐྲན་ཚ་ཆུ་ཚ་བའི་ཆུ་འགགས་དང་།། མ་ཞུ་གླང་ཐབས་བད་ཀན་དམུ་སྐྲན་དང་།། ཆུ་འགགས་ཞེས་པའི་མིང་ལ་བརྟེན་བྱས་ནས།། དྲོད་ཀྱིས་བཅོས་པས་ཚ་བས་དེ་སྲོག་འདོར།། དབྱིག་དུག་རྡོ་དུག་དུག་མིང་ལ་བརྟེན་ནས།། བསིལ་གྱིས་བཅོས་པས་གྲང་བས་སྲོག་འདོར་བྱེད།། དེ་ཕྱིར་ལྟར་སྣང་མིང་ལ་མི་བརྟེན་པར།། ཚ་གྲང་འཁྲུལ་སོ་རྟགས་ཀྱིས་བསལ་བར་བྱ།། དེ་ཡང་རྟགས་ལ་ལྟར་སྣང་འབྱུང་སྲིད་དེ།། རླུང་གིས་ཁ་དང་ལྕེ་སྐམ་གཟེར་བ་དང་།། མི་འགྱུར་བད་ཀན་སྟོད་གཟེར་ཆེན་པོ་དང་།། མཁྲིས་པ་རླུང་གིས་བུས་པའི་མགོ་ནད་དང་།། མ་ཞུས་མཁྲིས་ཡུལ་ཕྲོགས་པའི་མིག་སེར་དང་།། ཚད་གཞུག་རླུང་གིས་བུས་པའི་སྟོངས་ཚད་རྣམས།། ངོ་བོ་གྲང་ཡང་ཕྱི་རྟགས་ཚ་བར་འཁྲུལ།། རྟགས་ཀྱི་རྗེས་འབྲངས་གསོ་བ་ལོག་པར་འགྲོ།། བསིལ་གྱིས་བཅོས་པས་གྲང་བས་སྲོག་འདོར་བྱེད།། ཕོ་མཁལ་སྙིང་ལ་ཚ་བ་གབ་པ་ནི།། ཕོ་བ་ཟས་འཇུ་བྱེད་པའི་གཞི་ཡིན་པས།། དེ་ཕྱིར་གནས་དེར་ཚ་བའི་ནད་ཞུགས་ན།། འཇུ་བྱེད་མེ་དེས་ལོག་པའི་ལས་བྱེད་པས།། གཟེར་རྫིང་མི་འཇུ་སྒྲེག་སོགས་གྲང་རྟགས་འབྱུང་།། མཁལ་མ་བད་ཀན་གྲང་བའི་གཞི་ཡིན་པས།། ཚད་ནད་ཞུགས་ཀྱང་དྲོས་ན་ཕན་པ་དང་།། ཆུ་སྲི་གྲངས་ན་ནར་མངོན་གྲང་རྟགས་སྟོན།། སྙིང་ནི་རླུང་དང་བད་ཀན་གཞི་ཡིན་པས།། དེ་ཕྱིར་སེམས་འཕྱོ་བརྗེད་ངས་གཉིད་མེད་ཅིང་།། སྨྱོ་འབོག་འདར་བ་ལ་སོགས་འབྱུང་བས་ན།། ཕོ་མཁལ་སྙིང་གི་ཚ་བ་གྲང་རླུང་འདྲ།། ངོ་བོ་ཚ་ཡང་ཕྱི་རྟགས་གྲང་བར་འཁྲུལ།། གཞན་ཡང་གཉིད་ཡེར་སྐྱུག་དང་རུས་ཚིགས་ན།། གཡལ་འདར་སྨྱོ་ལབ་སྐྱིགས་བུས་བཏབ་པ་རྣམས།། ཚ་བ་ཡིན་ཡང་གྲང་བའི་རྟགས་ལྟར་སྣང་།། རྟགས་ལ་བརྟེན་ན་གསོ་བ་ལོག་པར་འགྲོ།། དྲོད་ཀྱིས་བཅོས་ན་ཚ་བས་སྲོག་འདོར་བྱེད།། དེ་ཕྱིར་ལྟར་སྣང་རྟགས་ལ་མི་བརྟེན་པར།། བཅོས་ཐབས་འཕྲོད་མི་འཕྲོད་ཀྱིས་འཁྲུལ་སོ་བསལ།། དེ་ཡང་འཕྲོད་འཕྲོད་འདྲ་ལ་མི་འཕྲོད་དང་།། མི་འཕྲོད་འདྲ་ལ་འཕྲོད་པར་བསལ་བ་ཡི།། བཅོས་སྐྱེད་ལྟར་སྣང་ཞེས་བྱ་འབྱུང་སྲིད་དེ།། ཚ་བ་གྲང་བའི་རྟགས་ལྟར་སྣང་བ་ལ།། བསིལ་སྦྱོར་འཕྲོད་ཀྱང་འཕྲལ་དུ་མི་འཕྲོད་འདྲ།། དྲོད་སྦྱོར་གནོད་ཀྱང་འཕྲལ་དུ་འཕྲོད་ལྟར་སྣང་།། གྲང་བ་ཚ་བའི་རྟགས་ཅན་དེ་ལས་ལྡོག། དེ་ཡང་སྨན་ནད་འཐབ་པས་མི་འཕྲོད་འདྲ།། ལྟར་སྣང་རྟགས་ཀྱིས་མགོ་མནན་འཕྲོད་པ་འདྲ།། ལྟར་སྣང་རྗེས་སུ་འབྲངས་ན་སྲོག་ལ་རྒོལ།། དེ་ཕྱིར་ལྟར་སྣང་བཅོས་ལ་མི་བརྟེན་པར།། གོམས་པ་ཡུན་དུ་བསྲིངས་པས་རྟོགས་པར་འགྱུར།། དེ་ཡང་ནད་པའི་རྟོག་པ་ཞེན་ཕྱོགས་ཀྱིས།། གནོད་ཀྱང་ཕན་ནམ་སྙམ་དུ་རྟོག་པ་དང་།། ཕན་ཀྱང་གནོད་སྙམ་ལྟར་སྣང་འབྱུང་སྲིད་པས།། ནད་པའི་ཡིད་རྟོག་མ་ཡིན་འཕྲོད་མི་འཕྲོད།། རྩ་ཆུ་བཅོས་སྐྱེད་དག་གིས་འཁྲུལ་སོ་བསལ།། དེ་ལའང་བཅོས་སྐྱེད་ལྟར་སྣང་བཞི་ཡོད་དེ།། ཕྱི་རྟགས་ལོག་ལ་ངོ་བོ་མ་ལོག་དང་།། ངོ་བོ་ལོག་ལ་ཕྱི་རྟགས་མ་ལོག་པ།། རྟགས་དང་ངོ་བོ་གཉིས་ཀ་མ་ལོག་དང་།། རྟགས་དང་ངོ་བོ་གཉིས་ཀ་ལོག་པ་འོ།། དང་པོ་བད་ཀན་ཅན་གྱི་ཚ་བ་ལ།། བསིལ་སྦྱོར་གཏུགས་པས་གཏིང་ཚད་མ་ཐོན་ཀྱང་།། ཕོ་བའི་མེ་ཤི་གྲང་རྟགས་སྟོན་པར་བྱེད།། གྲང་བ་རྒན་པོ་གཏིང་ནས་འཁར་བ་ལ།། མེ་བཞི་ལུས་ལ་ཡུན་དུ་བསྟེན་བྱས་པས།། དྲོད་ཀྱི་རླངས་པས་རྩ་སྦུབས་ཀུན་ཁྱབ་སྟེ།། མགོ་ན་རྩ་རྒྱུག་ཆུ་མདོག་དམར་ལ་སོགས།། ངོ་བོ་གྲང་ཡང་རྟགས་ཀུན་ཚ་བར་སྟོན།། དེ་ཡང་གྲང་བ་རྒན་པོ་ཚ་བ་འདྲ།། ཚ་བ་རྒན་པོ་གྲང་བ་འདྲ་བས་ན།། འདྲ་འདྲ་ནོར་ནས་ཚ་གྲང་ནོར་ཉེན་ཡོད།། དེ་ཕྱིར་རྟགས་ཀྱིས་ངོ་གླན་གཏིང་ནད་གདོན།། གཉིས་པ་འོག་འགྲིམས་རྐུན་བུའི་ནད་གསུམ་སྟེ།། གྲང་བའི་ནད་ལ་དྲོད་སྦྱོར་བསྟེན་དྲགས་ན།། གནས་དུས་རང་བཞིན་ཚ་བའི་རྐྱེན་ཕྲད་པས།། ཁྲག་མཁྲིས་ཚ་བ་འཕེལ་བའི་རྐྱེན་བྱས་ཏེ།། ཚ་བ་གྲང་བའི་འོག་འགྲིམས་རྐུན་བུར་སྐྱེ།། འོག་འགྲིམས་མ་ཚོར་དྲོད་སྦྱོར་བསྟེན་པ་ཡིས།། མེ་འབར་ཤིང་བསྣན་བཞིན་དུ་ལུས་ཟུངས་བསྲེག། དེ་ལ་ཆུ་བཞི་བརྩོན་བྱས་མྱུར་དུ་ཟློག། ཚ་བའི་ནད་ལ་བསིལ་སྦྱོར་བསྟེན་དྲགས་ན།།གནས་དུས་རང་བཞིན་གྲང་བའི་རྐྱེན་ཕྲད་པས།། བད་རླུང་གྲང་བ་འཕེལ་བའི་རྐྱེན་བྱས་ཏེ།། གྲང་བ་ཚ་བའི་འོག་འགྲིམས་རྐུན་བུར་སྐྱེ།། འོག་འགྲིམས་མ་ཚོར་བསིལ་སྦྱོར་བསྟེན་པ་ཡིས།། ཕོ་བའི་མེ་ཤི་སྐྲན་དང་དམུ་ཆུར་འགྱུར།། དེ་ལ་མེ་བཞི་བརྩོན་བྱས་མྱུར་དུ་ཟློག། གཞན་ཡང་ཚ་བའི་ནད་ལ་བསིལ་གཏུགས་པས།། གནས་དུས་རང་བཞིན་རླུང་གི་རྐྱེན་ཕྲད་དེ།། ཐོར་བུའི་རླུང་སྐྱེས་ཚ་བའི་ལྷག་མ་བུས།། ལུས་ལ་མེ་བཏང་འདྲ་ཞིང་ཁ་ལྕེ་སྐམ།། དབུགས་ཐུང་རྩ་རྒོད་གཟེར་འབྱུང་སྐོམ་དད་ཆེ།། དེ་ནི་རླུང་གིས་ཚ་བའི་འོག་འགྲིམས་ཡིན།། འོག་འགྲིམས་མ་ཚོར་བསིལ་སྦྱོར་བསྟེན་པ་ཡིས།། མེ་ལ་རླུང་བསྐྱོད་བཞིན་དེ་བུད་ཤིང་བསྲེག། དེ་ཕྱིར་ཟས་ཀྱིས་ངོ་གླན་ཚད་ལྷག་གདོན།། རྟགས་དང་ངོ་བོ་གཉིས་ཀ་མ་ལོག་ན།། སྦྱོར་བ་དམན་ཅིང་ལོག་པས་བསྐྱེད་ཅིང་བསྒྱུར།། གཉིས་ཀ་ལོག་ན་དེ་ལ་འཁྲུལ་སོ་མེད།། ནད་གཞིའི་ལྟར་སྣང་འཁྲུལ་སོ་རྟགས་ཀྱིས་བསལ།། རྟགས་ཀྱི་ལྟར་སྣང་འཁྲུལ་སོ་བཅོས་ཀྱིས་བསལ།། བཅོས་ཀྱི་ལྟར་སྣང་འཁྲུལ་སོ་གོམས་པས་བསལ།། གོམས་པའི་ལྟར་སྣང་འཁྲུལ་སོ་སྐྱེད་ཀྱིས་བསལ།། བཅོས་སྐྱེད་ལྟར་སྣང་འཁྲུལ་སོ་ཆུ་ཡིས་བསལ།། ཆུ་མདོག་ལྟར་སྣང་འཁྲུལ་སོ་ཀུ་ཡས་བསལ།། དེ་ལ་ནོར་བ་ནམ་ཡང་འབྱུང་མི་སྲིད།། དེ་དག་ལྟར་སྣང་ལྔ་ཕྲུགས་ཞེས་བྱ་སྟེ།། འཁྲུལ་མེད་ཚ་གྲང་གནད་ཀྱི་གལ་མདོ་ཡིན།། དེ་ལྟར་མན་ངག་ལྡན་པས་རྟོགས་འགྱུར་གྱི།། དཀྱུས་ཙམ་འཛིན་པ་རྣམས་ཀྱིས་ཤེས་མི་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འཁྲུལ་གཞི་བསལ་བ་ཚ་གྲང་གལ་མདོའི་ལེའུ་སྟེ་བཅུ་གསུམ་པའོ།། །།

X