//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་བཞི་པ། ཚ་བའི་རི་ཐང་མཚམས་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:23:13 ཀློག་གྲངས། 3 

དྲང་སྲོང་ཡིད་ལས་སྐྱེས་ཀྱིས་ཡང་གསོལ་པ།། སྨན་པའི་རྒྱལ་པོ་རིག་པའི་ཡེ་ཤེས་ལགས།། ཚ་བའི་ནད་རྣམས་གཉེན་པོས་ཟློག་སླ་ཡང་།། ཚ་བ་བཅོས་རྗེས་གྲང་བ་སྐྱེས་པ་ཡིས།། ཚ་གྲང་འཁྲུལ་ནས་གཞན་གྱི་སྲོག་འདོར་བས།། རི་ཐང་མཚམས་ཀྱི་ངོས་འཛིན་བཅོས་པའི་ཐབས།། འཁྲུལ་མེད་གནད་ཀྱི་མན་ངག་བསྟན་དུ་གསོལ།། རིག་པའི་ཡེ་ཤེས་དེ་ཡིས་ལན་གསུངས་པ།། རི་ཐང་མཚམས་ཀྱི་འཕྲང་ལ་རྣམ་པ་གསུམ།། རླུང་གི་ཞུ་འཁྱགས་སྡུན་ནས་བསུ་བ་དང་།། མཁྲིས་པའི་ཞུ་འཁྱགས་འཕྲང་ལ་བསྒུག་པ་དང་།། བད་ཀན་ཞུ་འཁྱགས་ཕྱི་རྗེས་བཅད་པ་འོ།། དེ་ལྟར་མི་ཤེས་སོ་མཚམས་གཅིག་ཏུ་འདོད།། རྨོངས་པའི་ལུགས་ཡིན་གཞན་སྲོག་འདོར་བས་ན།། དེ་ཕྱིར་འཕྲང་གསུམ་འདི་ལྟར་ཤེས་པར་གྱིས།། རྒས་དང་རླུང་ཆེའི་ཚ་བ་རླུང་གནས་འབབ།། མྱ་ངན་སེམས་ལས་འཕྲལ་གྱི་རླུང་རྐྱེན་འདོམ།། ག་བུར་གཏར་བཤལ་ཚ་བ་བདའ་དྲགས་སོགས།། དེ་རྣམས་རིགས་ལ་ཚད་གཉའ་ཆག་དུས་སུ།། རླུང་གིས་སྣ་བསླང་ཐོར་བུའི་རླུང་རྟགས་འོང་།། ཐོར་བུའི་རླུང་གིས་ཚད་གཞུག་བུས་པ་ཡིས།། རྩ་རྒྱུག་ཆུ་དམར་དྲོད་དང་སྐོམ་དད་ཆེ།། ལྕེ་སྐམ་རྔམ་པ་རྒོད་ལ་སོགས་པ་ཡི།། ཚ་བའི་རྟགས་སྟོན་འཁྲུལ་བའི་ས་ཅིག་ཡིན།། ལྟར་སྣང་ཚ་བའི་རྗེས་འབྲངས་དེད་པ་ན།། ཁ་ཐལ་རླུང་གིས་ཚ་བ་སྲོག་རྩར་འཕུལ།། རྩ་སྟོངས་ཞེས་བྱ་འདི་ལ་གསོ་ཐབས་དཀའ།། དེ་ཕྱིར་ཟས་ཀྱིས་སྔུན་བསུ་རླུང་སྣ་གླན།། ཧ་ཅང་བསུ་བ་སྔས་ན་ཚ་བའི་གཞུག། ཟས་ཀྱིས་བཟུང་ནས་རྙིངས་ཚད་སྐྱེད་པ་ཡོད།། རླུང་གི་ཞུ་འཁྱགས་མི་གསལ་འཁྲུལ་སོ་ཆེ།། དེ་ཕྱིར་ངོས་བཟུང་ཕྱི་ནང་གསང་གསུམ་སྟེ།། ཚད་གཞུག་རླུང་གིས་བུས་པའི་ཕྱི་རྟགས་སུ།། རྩ་རྒྱུག་གྱུར་ཀྱང་སྟོང་ལ་མནན་མི་བཟོད།། ཆུ་མདོག་དམར་ཡང་དངས་ལ་ལྦུ་བ་ཆེ།། གཟེར་བ་ཡོད་ཀྱང་མ་ངེས་གར་ཡང་འཕོ།། ལྕེ་སྟེང་སྐམ་ཡང་དམར་ལ་ཤིན་ཏུ་རྩུབ།། སྐོམ་དད་ཆེ་ཡང་མ་འཐུངས་སྲན་པར་ཚུགས།། རྔམ་འདེགས་དབུགས་རྒོད་གྱུར་ཀྱང་སྣ་བུག་ཧར།། རླུང་གསང་བརྫིས་ན་ན་སྟེ་སྲན་མི་བཟོད།། བསིལ་གཏར་བསྟེན་གྱིན་ཚད་པ་སླར་ཡང་སྐྱེ།། བུར་ཞོ་རུས་ཐང་བསྟེན་གྱིན་ཚད་རྟགས་ནུབ།། ནང་གི་བརྟག་པ་རྩ་ནི་སྟོང་ལ་མྱུར།། ཆུ་མདོག་དམར་ལ་དངས་ཤིང་ལྦུ་བ་ཆེ།། ལྕེ་སྟེང་དམར་ལ་སྐམ་ཞིང་རྩུབ་པ་སྟེ།། དེ་གསུམ་མཐུན་ན་ཁ་ཟས་གློད་པས་ཆོག། ལྕེ་སྐོམ་སྐམཕན་ཆད་རླུང་འབུད་ཡོད་པ་ཡིན།། སྐམ་ལ་རིད་ན་རླུང་ལས་ཚད་ཁ་མཐོ།། སྐམ་ལ་ནག་ན་རླུང་ཚད་ཕྱེད་མར་ཡོད།། དམར་ལ་སྐམ་རྩུབ་རླུང་ཉིད་ཟད་མ་ཡིན།། སེར་ལ་སྐམ་ཁོག་རླུང་དང་མཁྲིས་པར་ལྡན།། སྐྱ་ལ་སྐམ་ཁོག་བད་རླུང་ཚ་བ་ཡིན།། སྐྱ་གླེག་མདོག་མེད་ཚ་བ་བྱེར་ཞིང་རྙོགས།། དམར་འཇམ་རློན་ཞིང་མཉེན་ན་ནད་དང་བྲལ།། མན་ངག་ལྡན་པས་ཞུ་འཁྱགས་མཐོང་བས་གསལ།། གསང་བ་ཕུགས་འཚོལ་སྨན་གྱིས་བརྟག་པ་སྟེ།། བུ་རམ་གོ་སྙོད་སྒ་སྐྱ་བསྡུས་ཐང་ངམ།། རུས་བཅུད་གསུམ་མམ་བུར་ཞོ་གང་རུང་བ།། ཁྱོར་གང་སྲོད་ལ་བཏང་པའི་དེ་ནུབ་ཏུ།། གཉིད་ཆེ་ཟུག་ཆུང་བླ་འཆོལ་ཉུང་བ་དང་།། ནང་པར་ལྕེ་རློན་ཤེས་པ་གསལ་ན་ངེས།། རྔམ་རྒོད་འདར་འབོག་སྨྲ་འཆལ་འབྲོས་པ་ན།། འཕྲལ་དུ་མཐིལ་བཞི་ཚིགས་པ་བསྐུ་མཉེ་བྱ།། ཚིལ་བུ་བུ་རམ་ཕྱེ་གསུར་དུ་བས་བདུག། གོང་བཞིན་སྣ་ལོན་མཚམས་སུ་ཕེབས་པར་ངེས།། ངེས་པ་རྙེད་ན་བསིལ་ཤ་གསར་པ་ཡི།། ཚོ་ཁུ་མེ་མ་ཕྲད་དང་གསར་འཇམ་ཆང་།། བ་ཤ་བཙོས་ཁེངས་སྒོག་སྐྱའི་ཆབ་མིག་དང་།། བ་རའི་མར་གསར་ཀ་ར་སྦྲང་སྦྱར་རྣམས།། དགོངས་དང་ཐོ་རངས་རླུང་དུས་བསྟེན་པར་བྱ།། དེ་ལས་རྒྱས་པ་ཚད་སྟོངས་བཅོས་དང་མཐུན།། ཁ་ཟས་སྔར་གློད་བསིལ་སྨན་གཞུག་བསྲིངས་ལ།། ཟས་ཀྱིས་རླུང་མནན་བསིལ་གྱིས་ཚད་ལྷག་གདོན།། དར་མ་ནད་ཁམས་ཁྲག་མཁྲིས་ཆེ་བ་དང་།། མཁྲིས་པའི་གནས་སུ་ཚ་བ་བབས་པ་དང་།། ཤ་ཆང་གཉིད་དང་དྲག་ཤུལ་ཚད་རྐྱེན་འདོམ།། ཚ་བ་བཅོས་ཕྱིས་ཚ་བ་ཁ་ཐལ་དང་།། ཚད་པ་བད་རླུང་གྲོགས་མེད་རྐྱང་པ་རྣམས།། ཚད་པ་ཟད་ཀྱང་བད་རླུང་རྟགས་མི་འབྱུང་།། དེ་ལ་ཟས་གློད་ཡེན་ལ་གཏད་རྗེས་ཀྱི།། རྩ་སྦུབས་སྟོངས་པས་ཟས་ཚད་སྐྱེད་འགྱུར་བས།། རྩ་འདེགས་དྲོད་ཆེ་ཁ་སྐམ་ཤེས་པ་འཐིབ།། ཚད་ལྷག་ཡོད་ཟེར་འཁྲུལ་པའི་ས་ཡིན་ཏེ།། རྨོངས་པས་དེ་ལ་བསིལ་གྱིས་དེད་པ་ཡིས།། ཟུངས་ཟད་རླུང་ལས་གྱུར་པའི་ཚ་བར་ལྡོག། དེ་སྲོག་གཤིན་རྗེའི་ལག་ཏུ་གཏད་དང་མཚུངས།། ཟས་གློད་སྔས་ན་རྒྱས་པའི་ཚ་བར་ལྡོག། གང་ཡང་མི་ཤེས་རྨོངས་པ་མགོ་བོ་འཁོར།། མ་སྔས་མ་ཕྱིས་འཕྲང་ལ་བསྒུག་པ་གཅེས།། ངོས་བཟུང་རྟགས་ལ་དོན་མེད་རྔུལ་འབྱུང་ཞིང་།། དང་ག་མི་འགག་སྐོམ་དད་ཆུང་བ་དང་།། གཉིད་དུས་ཟ་ཟི་མི་འོང་རྔམ་པ་བདེ།། སྣ་རྡོག་གཉེན་ཞིང་ཆུ་མདོག་དམར་སེར་དང་།། རྩ་རྒྱུད་ཕྱི་གྲིམས་ཁོང་ལྷོད་ཐ་མལ་གྲངས།། ལྕེ་སྟེང་སེར་ལ་སྐམ་ཁོག་ཐ་མ་དམར།། ཤ་རྙིང་མར་རྙིང་བུ་རམ་ཆང་ལ་སོགས།། བསྟུད་དྲགས་པ་དང་ཧ་ཅང་ཚད་ལས་ཐལ།། ཟོས་འགྲོག་ཚ་བ་སྐྱེ་ཡང་ཟས་མི་བཅད།། དེ་ལས་ཐལ་ནས་ཟུངས་ཟད་རླུང་གྱུར་ན།། ཤ་འཆོར་མདོག་སེར་ལྕེ་ཡིས་རོ་མི་ཚོར།། རྔམ་རྒོད་བ་སྤུ་ལྡང་ཞིང་སྐོམ་དད་ཆེ།། སྐྲ་རྩ་སེང་ལ་སྐྲ་འདབ་བག་ཙམ་འདར།། མཁྲིས་པའི་ཞུ་འཁྱགས་མི་འགྱུར་ངོས་འཛིན་ཡིན།། དེ་ལ་བཅོས་ཐབས་ཚད་རྟགས་ནུབ་པ་དང་།། གྲང་རྟགས་མི་སྒུག་བུར་ཞོ་ཚོ་ཁུ་དང་།། ཆང་འཇམ་ཆུ་བསྲེས་ཆ་ཡིས་བྲིད་ལ་བཏང་།། དེ་ཡིས་ཚ་བ་མི་སྐྱེ་འཁྲུལ་མི་སྲིད།། ནད་ཟད་ཟས་ཀྱིས་ཚ་བ་སྐྱེར་མངོན་ན།། བསྲེག་པའི་ནུས་མེད་ཐལ་ཚན་དྲོད་དང་འདྲ།། གལ་ཏེ་ཚ་བ་བདའ་དྲགས་ཁ་ཐལ་ན།། ཟུངས་ཟད་རླུང་གྱུར་ཚ་བར་ལྡོག་པའི་ཕྱིར།། རུས་རྙིང་བསྡུས་ཁུར་ཤིང་ཀུན་སྤོད་སྣ་དང་།། བིག་པན་ཐལ་བ་དྲོ་འཇམ་ཁྱེའུ་སུས་བཏང་།། ཡང་ན་ཁ་རུ་ཚ་དང་ཛཱ་ཏི་དང་།། མར་རྙིང་སྦྱར་བ་སུམ་ཡར་བཏང་བར་བྱ།། དེས་མ་ཐུབ་ན་ཛཱ་ཏི་གསུམ་མམ་ལྔ།། ཁ་རུ་ཚ་ལ་ཞོ་བཞི་བུར་སྲང་གཅིག། མར་རྙིང་སྲང་བདུན་ལྡེ་གུར་བྱས་ཏེ་བཏང་།། མི་རུས་བསྡུས་ཁུར་སྒོག་སྐྱ་ཤིང་ཀུན་བྲན།། མཐིལ་བཞི་ཚིགས་པ་རླུང་གསང་བསྐུ་མཉེ་དང་།། རླུང་གསང་བཞི་བསྲོ་མར་རྙིང་འཇམ་རྩི་བྱ།། ཤ་ཆང་མར་རྙིང་བུ་རམ་དྲོད་བཅུད་བསྟེན།། བྱིས་པ་བད་ཀན་གྲང་ཤས་ཆེ་བ་དང་།། བད་ཀན་ཡུལ་དུ་ཚ་བ་བབས་པ་དང་།། མ་སྨིན་གཏར་བསིལ་ཚ་བ་བྱེར་རྐྱེན་འདོམ།། ཚད་གཞུག་མི་མངོན་གྲང་རྟགས་ཁ་ཡར་འོང་།། རྩ་དལ་ཆུ་མདོག་སྔོ་ལ་དང་ག་འགག། ལྕེ་རློན་གདོང་སྐྱ་ཁ་ཟས་འཇུ་བ་དཀའ།། བག་ལ་ཉལ་བས་གྲང་བར་འཁྲུལ་བ་ཡོད།། དེ་ལ་བརྟེན་ནས་ཟས་གློད་ཚ་བར་ལྡོག། ཧ་ཅང་ཐལ་དྲགས་དམུ་ཆུར་འགྱུར་བ་ཡོད།། དེ་མ་ཡིན་པ་འདི་ལ་ཐལ་སྐྱོན་ཆུང་།། དེ་ཕྱིར་ཚ་བ་ཟད་ངེས་ཕྱི་རྗེས་བཅད།། ངོས་བཟུང་རྩ་རྒྱུད་བྱིང་དལ་ལྷོད་པར་འཕར།། ཆུ་ཁ་སྙི་ལ་མདོག་སྔོ་ཤིན་ཏུ་དངས།། སྔར་གྱི་གོས་ཀྱིས་མི་དྲོས་སྐྲ་རྩ་སེང་།། ཁ་ཟས་འཇུ་བའི་སྟོབས་དང་སྐོམ་དད་ཆུང་།། མིག་ཕུག་བྲང་དང་གསུས་པ་རྐང་བོལ་སྐྲངས།། དེ་དུས་ཚ་བ་མེད་ངེས་རྟགས་ཡིན་པས།། གོང་དང་མི་འདྲ་ཁ་ཟས་བྲིད་མི་དགོས།། ཤ་ཆང་དྲོད་བཅུད་ལྷུག་པར་བཏང་བས་ཆོག། འཇུ་དཀའ་སྦོ་སྒྲེག་ཁ་མངལ་མཆིལ་མ་མང་།། རྒྱམ་ཚ་གསུམ་ཐང་སེ་འབྲུ་བཞི་པ་འམ།། རྒོད་མ་ཁ་ཡི་ཕྱེ་མས་མེ་དྲོད་བསྐྱེད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བའི་རི་ཐང་མཚམས་བསྟན་པའི་ལེའུ་སྟེ་བཅུ་བཞི་པའོ།། །།

X