//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅོ་ལྔ་པ། ཚ་བ་མ་སྨིན་པ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:30:12 ཀློག་གྲངས། 2 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། མ་སྨིན་ཚ་བའི་རྒྱུ་རྐྱེན་ངོ་བོ་གང་།། མ་སྨིན་ཚ་བའི་མིང་དུ་ཅི་ཕྱིར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། མ་སྨིན་ཚ་བའི་རྒྱུ་ནི་བད་རླུང་ཡིན།། དེ་ལ་རྐྱེན་གསུམ་རང་བཞིན་མ་སྨིན་དང་།། ནད་ཁམས་རྐྱེན་གྱི་སྒོ་ནས་མ་སྨིན་པའོ།། རང་བཞིན་རྒྱུ་ཡིས་མ་སྨིན་ཞེས་བྱ་བ།། དེ་རྒྱུ་བད་རླུང་བསྡོངས་པ་ཅི་ཞེ་ན།། དཔེར་ན་རླུང་མཁྲིས་བད་ཀན་ཕ་སྤུན་འདྲ།། གཅིག་ལ་རྐྱེན་བྱུང་གཉིས་ཀྱང་མི་བདེ་ལྟར།། རྐྱེན་བཞི་མཁྲིས་པ་ལ་ཕོག་དེས་བསླང་བས།། ཞར་ལ་བད་རླུང་གཉིས་ཀྱང་མི་བདེ་འཁྲུག། དེ་ཕྱིར་མ་སྨིན་ཚ་བ་འབྱུང་བ་ཡིན།། དེ་ཡང་ཁྱད་པར་རིམས་ལ་མི་འབྱུང་མེད།། ནད་ཁམས་ཡུལ་དུས་རང་བཞིན་ན་སོ་དང་།། གནས་དང་ནད་ཁམས་ཟས་སྤྱོད་རྐྱེན་དབང་གིས།། བད་རླུང་ལྡན་པས་སྨིན་པ་དཀའ་བར་འགྱུར།། རྐྱེན་ནི་མ་སྨིན་ཚ་བ་བྱུང་དུས་སུ།། ཟས་སྤྱོད་གཉེན་པོ་སྔས་པས་བྱེར་བ་ཡིན།། དེས་བསྐྱེད་མ་སྨིན་ཚ་བ་ཞེས་བྱ་བ།། ཚ་བ་བད་རླུང་བསྡོངས་ཟླར་བཅས་པ་ཡིས།། རླུང་གིས་ཚ་བ་ཟུངས་ལ་ཁྱབ་པར་གཏོར།། བད་ཀན་ཚ་བའི་མགོ་མནན་སྐྱེར་མི་སྟེར།། ཤིང་རློན་མེ་སྔོན་དུ་བ་འབྱུང་བ་ལྟར།། བསྡོངས་ཟླ་མ་ཕྱེད་ནད་ཤུགས་མ་རྫོགས་པས།། སྐྱེ་འཕྲོ་མ་ཆད་མ་སྨིན་ཞེས་སུ་བརྗོད།། འདི་དུས་ཚ་བ་ཟུངས་དང་དབྱེར་མེད་འདྲེས།། ནད་ཁྲག་ཟུངས་ཁྲག་འོ་མ་ཆུ་འདྲེས་འདྲ།། ཡུངས་ཀར་མར་བཞིན་དེ་ལུས་ཁྱབ་པར་གནས།། དབྱེ་བ་རང་ཉིད་སྨིན་དང་སྨིན་ལོང་མེད།། སྨིན་དུ་མི་འདོད་ཚ་བ་རྣམ་པ་གསུམ།། རང་ཉིད་སྨིན་ལ་སྟོབས་ཆེན་སྟོབས་ཆུང་གཉིས།། སྨིན་ལོང་མེད་ལ་གནད་དུ་བབས་པ་དང་།། སྦྱོར་བ་ལོག་པས་སྨིན་ལོང་མེད་པ་གཉིས།། ཚ་བ་སྨིན་དུ་མི་འདོད་རྐྱེན་གསུམ་སྟེ།། རླུང་དང་བད་ཀན་རྐྱེན་གྱིས་བྱེར་བ་འོ།། དེ་ལ་མ་སྨིན་གཉེན་པོ་བསྟེན་སྔས་པས།། བྱ་ཤོར་བྱེར་སྡིགས་རྙོགས་པ་བཞི་རུ་འགྱུར།། མ་སྨིན་རྟགས་ལ་སྤྱི་དང་བྱེ་བྲག་གཉིས།། ཕྱིས་འབྱུང་ཁ་དམར་སྨིན་པའི་རྟགས་དང་བཞི།། སྤྱི་རྟགས་རྩ་རྒྱུད་ཕྲ་ཞིང་གཡོ་ལ་མགྱོགས།། ཆུ་མདོག་དམར་སེར་སྐ་ལ་རྙོག་མ་ཅན།། ལྕེ་སྐྱ་སྟེང་དུ་རླུང་འབྲུམ་དམར་ཙིམ་འབྱུང་།། ལུས་དྲོད་མི་སྙོམས་སྲོད་ལ་ཤ་དྲོད་ཆེ།། གཡའ་མང་སྒྱིད་པ་སྐྱུར་ལ་བྱ་རྨྱང་བྱེད།། ཁ་ཁ་མགོ་དང་བྱིན་ཉྭ་ཚིགས་གཞི་ན།། གྲང་ཤུམ་བྱེད་ཅིང་མེ་དང་ཉི་མ་སྙེག། རྨི་ལམ་ཟ་ཟི་མང་ལ་སེམས་ལས་ཆེ།། མ་སྨིན་ཚ་བ་ཀུན་ལ་རྟགས་དེ་འབྱུང་།། བྱེ་བྲག་རང་ཉིད་སྨིན་པའི་ཚ་བ་དེ།། ནད་ཁམས་ཁྲག་མཁྲིས་ཤས་ཆེའི་མི་རྣམས་ལ།། ཚ་བ་ཁྲག་མཁྲིས་རྔུལ་གནས་བབས་པ་ཡི།། ཟས་དང་སྤྱོད་ལམ་ཚ་གྲང་མ་ལོག་པས།། ལུགས་སུ་འབྱུང་བ་རྐྱང་པའི་ཚ་བ་ཡིན།། ཞག་གསུམ་ལྔ་བདུན་དུས་ན་རང་ཉིད་སྨིན།། རྩ་ཆུ་དང་ག་མགོ་དང་ཚིགས་གཞི་ན།། གྲང་ཤུམ་དག་ལས་ནད་སྟོབས་ཆེ་ཆུང་དཔག། གནད་དུ་བབས་པས་སྨིན་ལོང་མེད་པ་ནི།། འགྲམས་འཁྲུགས་རིམས་དུག་མོད་དུ་དོན་སྣོད་བབས།། དོན་སྣོད་འདྲུལ་ཕྱིར་སྨིན་དུས་སྡོད་ལོང་མེད།། སྦྱོར་བ་ལོག་པས་སྨིན་ལོང་མེད་པ་ནི།། ཚ་བ་བད་རླུང་གཉིས་ལ་བབས་པ་ལས།། ཟས་སྤྱོད་ཤ་ཆང་ཤུགས་དྲག་འདོམ་པ་ཡིས།། སྨིན་པའི་ལོང་མེད་སྲོག་ལ་མྱུར་དུ་རྒོལ།། དེ་རྟགས་ལུས་སྟོབས་དབང་པོའི་གཟི་མདངས་འཆོར།། ན་མ་ཐོག་ནས་ཟུག་ཆེ་ཅར་ལ་ཐེབས།། ཉལ་དང་སྙེས་དང་ཙོག་པུར་འདུག་ལ་སོགས།། གང་ཡང་བདེ་མེད་སྨིན་ལོང་མེད་པ་ཡིན།། རླུང་གིས་ཚ་བ་སྨིན་དུ་མི་འདོད་རྟགས།། རྩ་འཁྲུག་ལུས་ཀུན་བརྡུངས་སྙམ་སྟོང་སྐྱུགས་བྱེད།། གཡལ་འདར་མིག་དཔངས་མཐོ་ལ་མཆི་མ་འཛག། ཚ་བ་བད་ཀན་དག་གིས་མ་སྨིན་ན།། ཁ་མངལ་མཆིལ་སྣབས་མང་ལ་ཕོ་བ་རྫིང་།། དང་ག་མི་བདེ་སྐྱུག་ཅིང་ལུས་དྲོད་ཆུང་།། ཆུ་གྲང་ཞོ་དར་གཏར་བཤལ་རྡུལ་རྔུལཐང་སོགས།། རྐྱེན་གྱིས་བྱེར་བས་ལུས་རྔུལ་ཤེད་ཉམ་ཆུང་།། གྲང་ཤུམ་རེས་ཡོད་རེས་མེད་མེ་ཉི་འདོད།། དེ་ཡང་རླུང་ཤས་ཆེ་ན་བྱ་ཤོར་ཏེ།། བཅོས་སུ་མི་འདོད་ཚ་བ་ལམ་ནས་འཁྱོག། ཆུ་དམར་རྩ་རྒྱུད་ཕྲ་གྲིམས་སྟོང་ལ་མགྱོགས།། གློ་གསོར་གཉིད་ཆུང་གཡལ་མང་རུས་ཚིགས་ན།། བྱ་ཤོར་མ་གླན་སྟོངས་ཏེ་རླུང་ལྟར་འཚུབ།། ཁྲག་མཁྲིས་ཤས་ཆེའི་ཚ་བ་བྱེར་འགྱུར་ཏེ།། རྩ་རྒྱུད་ཕྲ་མགྱོགས་ཆུ་དམར་ཚིགས་གཞི་ན།། གློ་འབུད་རྔུལ་ཁ་སྙི་ལ་པགས་པ་བརྩེ།། བྱེར་ཏེ་མ་བསྡུས་རྙིངས་ནས་རྩི་ལྟར་ཞེན།། བད་ཀན་ཤས་ཆེ་ཚ་བའི་མགོ་སྡིགས་ཏེ།། ཕོ་མཆིན་མཁལ་འཁར་འཁོརམགོ་དང་ཚིགས་གཞི་ན།། དང་ག་མི་བདེ་འཇུ་དཀའ་སྟོང་སྐྱུགས་བྱེད།། སྡིགས་པ་མ་བསེངས་གབ་ནས་མུན་ལྟར་འཐིབ།། ཆུ་སེར་ཤས་ཆེ་ཚ་བ་རྙོགས་པར་འགྱུར།། རྩ་རྒྱུད་ཕྲ་མགྱོགས་ཆུ་མདོག་དམར་ལ་སྨུག། སྙིང་སྤྲུག་མིག་ལྕིབས་རྐང་བོལ་ཅུང་ཟད་གཡོ།། གློ་ཆུང་འདེགས་ཤིང་རོ་སྟོད་གཟེར་ཕྲན་འོང་།། རྙོགས་པ་མ་བསལ་འོར་ལྷུར་ཆུ་ལྟར་འཕྱོ།། མ་སྨིན་ཚ་བ་ཕྱིས་ཀྱི་འབྱུང་ཚུལ་ནི།། ནད་སྟོབས་ཆེ་ལ་སྨིན་དཀའ་ཕལ་ཆེར་འཆི།། སྨིན་དཀའ་ནད་སྟོབས་ཆུང་ཡང་ཡུན་དུ་སྦྱོང་།། སྟོབས་ཆེ་སྨིན་སླ་འཆི་སྐྱེན་འཚོ་སྐྱེན་ནད།། སྟོབས་ཆུང་སྨིན་པ་སླ་ན་མྱུར་དུ་འཚོ།། དེ་བཞིན་ཡུལ་དུས་རང་བཞིན་ན་སོ་དང་།། ནད་ཁམས་ཁྲག་མཁྲིས་ཅན་ལ་ཟས་སྤྱོད་ལོག། ཚད་སྟོབས་ཆུང་ན་རང་ཤུགས་སྨིན་འགྱུར་ཏེ།། སྟོབས་ལྡན་ཚ་བ་རྒྱས་པ་ཕལ་ཆེར་འཆི།། དེ་བཞིན་བད་རླུང་གྲང་བའི་ནད་གཞི་ལ།། ཟས་དང་སྨན་དཔྱད་སྤྱོད་ལམ་བསིལ་བསྟེན་པས།། ཚ་བ་མ་སྨིན་ཡུན་དུ་སྦྱོང་བར་འགྱུར།། དེ་ལ་ཤ་ཆང་དྲག་ཤུལ་ཉིན་གཉིད་ཤོར།། ནད་སྟོབས་ཆུང་ན་སྨིན་པ་སླ་བ་སྟེ།། སྟོབས་ཆེ་སྨིན་ལོང་མེད་པའི་ཚ་བར་འགྱུར།། སྨིན་རྟགས་ལྕེ་སྟེང་དཀར་སེར་རླུང་འབྲུམ་མེད།། རྩ་སྟོད་རྒྱུག་ཅིང་རྩ་སྨད་དམའ་ལ་གྲིམས།། ཆུ་མདོག་དམར་སེར་ཀུ་ཡ་ལིང་གིས་འདྲིལ།། བསིལ་འདོད་ལུས་ལ་དྲི་འབྱུང་དབང་པོ་གཡུང་།། ཁྱད་པར་གྲང་ཤུམ་ཆད་ན་སྨིན་པ་སྟེ།། འབུད་བྱེད་མེ་ཤིང་ཟད་པའི་མེ་དང་འདྲ།། གསོ་བའི་དུས་ཡིན་དེ་ལས་ཐལ་མི་བྱ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་པའི་ཚུལ་དང་གཉེན་པོ་གཉིས།། བཅོས་པའི་ཚུལ་ལ་རྣམ་པ་གཉིས་ཡིན་ཏེ།། རིམས་ཀྱི་ཚ་བ་ཆང་ལྟར་སྨིན་པར་བྱ།། འགྲམས་འཁྲུགས་ཚ་བ་དགྲ་ཟིན་ལྟ་བུར་དབྱེ།། བཅོས་པའི་གཉེན་པོ་སྨན་དཔྱད་ཟས་སྤྱོད་བཞི།། སྨན་དུ་མ་ནུ་བཞི་ཐང་དྲོ་འཇམ་བསྟེན།། ཚ་བ་མི་འཕེལ་བད་རླུང་ཞི་བར་བྱེད།། ཁྲག་མཁྲིས་ཤས་ཆེ་སླེ་ཏྲེས་འབྲས་བུ་གསུམ།། བསྡུས་འཇམ་བསྟེན་པས་ཚ་བ་དངས་སྙིགས་འབྱེད།། ཡུན་དུ་སྨིན་དཀའ་བིག་པན་ཐལ་བ་དང་།། བཟང་པོ་གསུམ་དང་སླེ་ཏྲེས་པུ་ཤེལ་རྩེ།། ད་ལིས་བྱི་ཚེར་ཕྱེ་མ་རུས་ཁུས་དབུལ།། དཔྱད་དུ་ཕོ་བར་དུགས་བྱ་མཐིལ་བཞིར་བྱུག། ཟས་སྤྱོད་ཕྱེ་ཚོད་དྲལ་ཐུག་བསྐོལ་གྲངས་ཆུ།། དེ་སོགས་བཅུད་མེད་འཇུ་སླ་དྲོ་འཇམ་བསྟེན།། ནང་ནུབ་དུས་སུ་ཆུ་སྐོལ་ཚན་མོ་བཏུང་།། སྤྱོད་ལམ་གོས་དྲོ་ཉི་གྲིབ་མཚམས་སུ་བསྡད།། དྲག་ཤུལ་མེ་ཉིས་གདུངས་དང་ཉིན་གཉིད་ལོག། ཤ་ཆང་དྲོད་བཅུད་མཁྲིས་ཚད་སྐྱེད་ཕྱིར་སྤང་།། གྲིབ་འཁྱགས་ས་རླན་བསེར་བུ་གྲང་བ་དང་།། ཞོ་དར་ཆུ་གྲང་རྗེན་ཟས་འཇུ་དཀའ་རྣམས།། བད་རླུང་གྲོགས་ལ་ཕོག་པས་སྤང་བར་བྱ།། བཤལ་གཏར་རྔུལ་དབྱུང་བསིལ་ཐང་ཕྱེ་མ་རྣམས།། འདི་དུས་མི་བསྟེན་ཚ་བ་ལམ་ནས་འཁྱོག། དེ་ལྟར་སྨིན་བྱེད་སྦྱོར་བ་མི་ཤེས་པར།། ཁ་ཅིག་སྨིན་པ་སླ་ཞེས་དྲོད་སྦྱོར་བསྟེན།། ནད་ཀྱི་སྟོབས་བསྐྱེད་སྲོག་ལ་ངེས་པར་རྒོལ།། ཁ་ཅིག་མ་སྨིན་ཚ་བ་བསིལ་གྱིས་བཅོས།། ཁ་དྲག་སྐྱེལ་མའི་འགྲོན་པོ་བཅོམ་པ་འདྲ།། གཉེན་པོ་གྲོགས་ཀྱི་ཐོག་ཏུ་བབས་པ་ན།། མཁྲིས་ཚད་མི་གསོད་བད་རླུང་སྐྱེད་བྱེད་པས།། གྲོགས་འཕེལ་བས་ནི་ཚ་བ་ཉིད་འཕེལ་བྱེད།། དེ་ཕྱིར་སྨིན་བྱེད་བསིལ་དྲོད་སྙོམས་བསྟེན་ན།། ཕྱི་ནས་མི་སྐྱེ་སྔར་སྐྱེས་འབྱེད་ཅིང་སེལ།། བྱེ་བྲག་རང་ཉིད་སྨིན་པའི་ཚ་བ་ལ།། སྟོབས་ཆེ་སྨིན་བྱེད་གཉེན་པོ་ཚུལ་བཞིན་བསྟེན།། སྟོབས་ཆུང་ནད་ལ་ཚ་བ་བྱ་ལྟར་སྤུར།། འབྲས་བུ་གསུམ་དང་ཏིག་ཏ་ལི་ག་དུར།། བ་ལེ་ཀ་དང་ཨུཏྦལ་སླེ་ཏྲེས་བསྐོལ།། ཕུལ་ཕྱེད་རྩེ་འཇམ་བཏང་ལ་དྲོ་སར་བསྙལ།། སྨན་ཞུ་ལུས་རྔུལ་གྱུར་ནས་གདོང་པ་བྱིབས།། རྔུལ་ཐོན་བལ་དང་ཕྱེས་ཕྱི་རླུང་གནོན་བཏང་།། གལ་ཏེ་ཐོན་དཀའ་སྣེ་འུའི་རླངས་དུགས་བྱ།། ཁ་ཅིག་སྨན་མ་ཞུ་བར་གདོང་པ་བྱིབས།། སྨན་ནུས་མ་ཐོན་ནད་པའི་སྡུག་སྲན་ཟད།། རྔུལ་མེད་ནད་འཁྲུགས་ཉེས་པ་ཕྱིར་ལ་ཆེ།། དེ་ལྟར་རྔུལ་འདོན་ཀུན་ལ་ཤེས་པར་གྱིས།། དེ་བཞིན་ཉི་མ་གསུམ་དུ་རྔུལ་བཏོན་ལ།། དེ་རྗེས་སྐར་ཆུ་རྫེ་འུ་གང་དོ་གསུམ།། རིམ་པས་ཉི་མ་གསུམ་དུ་ལུས་ལ་བྲན།། དེ་ནས་གི་ཝཾ་བསིལ་གསུམ་ཕྱེ་མ་བསྟེན།། དེ་ཡིས་ཚ་བ་ལམ་ནས་ཟློག་པར་ངེས།། སྨིན་ལོང་མེད་པའི་ཚ་བ་བཅོས་པ་ནི།། བད་རླུང་དུས་སུ་སྨིན་བྱེད་ཐང་བསྟེན་ཞིང་།། མཁྲིས་པའི་དུས་སུ་བསིལ་གྱི་གཉེན་པོས་བསད།། སྨིན་དུས་བསྒུགས་ན་ལ་འདའ་སྲོག་འཕྲོག་འགྱུར།། དེ་བས་བྱེར་ཞིང་རྙོགས་ལ་མི་ལྟ་བར།། ནད་དང་སྨན་དཔྱད་སྲོག་ལ་ཐོབ་ཤ་བྱ།། བད་ཀན་མ་སྨིན་སེ་འབྲུ་སྐྱུ་རུ་ར།། སྒ་སྐྱ་པུ་ཤེལ་རྩེ་ཡི་བསྡུས་ཐང་བཏང་།། ཡང་ན་སེ་འབྲུ་སྐྱུ་རུ་བྱི་ཚེར་བ།། ཡང་ན་རྒྱམ་ཚ་གསུམ་པའི་བསྡུས་ཐང་བཏང་།། རླུང་གིས་མ་སྨིན་སླེ་ཏྲེས་བུར་རྙིང་ཐང་།། ཡང་ན་རུས་བཅུད་གསུམ་གྱི་བསྡུས་ཐང་བཏང་།། རྐྱེན་གྱིས་བྱེར་ན་བིག་པན་ཆང་སྦྱར་བྱིན།། གྲུ་མོ་པུས་མོ་མན་ཆད་ཆུ་ཡིས་བྲན།། ཕྱི་དེ་ནང་པར་དཔྱི་དཔུང་མན་ཆད་ལ།། དེ་ཡི་ཕྱི་དེ་ནང་པར་ལུས་ཀུན་བྲན།། དེ་ནས་འབྲས་གསུམ་ཏིག་ཏའི་བསྡུས་གྲང་བསྟེན།། བཅོས་སྔས་མ་སྨིན་ཚ་བ་བྱ་ཤོར་ན།། སྲེ་ལོང་ཐང་བཏང་མཐིལ་བཞི་རླུང་གསང་བྱུག། ཁོལ་བུར་ན་འམ་གཟེར་སར་དུགས་ཀྱིས་བདུག། མ་ནུ་བཞི་ཡི་བསྡུས་ཐང་ཚན་མོ་བསྟེན།། ཤ་གསར་མར་གསར་ཡོས་ཆང་བྱ་ཤོར་གླན།། མ་སྨིན་བྱེར་ལ་སྲེ་ལོང་རུས་ཐང་བཏང་།། དེ་ནས་འབྲས་བུ་གསུམ་གྱི་བསྡུས་གྲང་བླུད།། དེ་རྗེས་བཟང་པོ་དྲུག་གི་ཕྱེ་མ་སྦྱར།། བརྩེ་འཕྲོ་ཆད་ནས་ཨ་རུ་ལྕུམ་རྩའིའཇམ་བཤལ་བཏང་བས་འཚོ།། ཁ་ཟས་བསིལ་བཅུད་བསྟེན་པས་བྱེར་བ་སྡུད།། མ་སྨིན་མགོ་སྡིགས་སེ་འབྲུ་བཞི་པ་སྦྱར།། སྲེ་ལོང་སྒ་བསྲེགས་ཐང་བཏང་འཇམ་བཤལ་བྱ།། བཅུད་མེད་དྲོ་འཇམ་ཟས་བསྟེན་མགོ་སྡིགས་སེང་།། མ་སྨིན་རྙོགས་ལ་སླེ་ཏྲེས་པི་པི་ལིང་།། འབྲས་གསུམ་ཐང་བཏང་རུ་ཐུང་སྣོད་ཀ་གཏར།། དེ་ནས་ཙན་དན་གི་ཝཾ་གུར་གུམ་གསུམ།། ཚད་སྟོབས་སྦྱར་ཏེ་རྭ་གསུམ་བ་ཤ་ཀ། སྤོས་དཀར་སོ་མ་ར་ཛ་བྲག་ཞུན་ཕྱེ།། ཐུན་སྐྱུངས་ཡུན་བསྲིངས་སེང་ལྡེང་ཐང་གིས་དབུལ།། འབྲས་གསུམ་ལྕུམ་རྩ་སྔོན་བུ་སྤོས་དཀར་བ་ཆུའི་བཤལ་བཏང་རྗེས་ལ་ཚིགས་པ་དང་པོ་བཅུ་གསུམ་བཅོ་བརྒྱད་མེ་མཉམ་གསང་རྣམས་ལ་མེས་བཅད་རྙོགས་པ་བསལ།། དེ་ལྟར་མ་སྨིན་པ་ཡི་ཚ་བ་དེ།། ཚ་བ་ཀུན་གྱི་སྔོན་དུ་འབྱུང་བ་སྟེ།། ཁྱད་པར་རིམས་ལ་མ་སྨིན་ཤས་ཆེར་འབྱུང་།། མ་སྨིན་རྟགས་དང་གང་ལྡན་སྨིན་བྱ་གཅེས།། དུས་ཚོད་སྨིན་རྟགས་མ་ཤར་བར་དུ་བཅོས།། སྨིན་ལེགས་ཚ་བ་ཆོམས་སླ་འཚོ་བ་སྐྱེན།། བཅོས་ཉེས་གབ་རྙིངས་རྒྱས་སྟོངས་རྙོགས་འགྱུར་བ།། དེས་ན་འདི་དུས་བཅོས་ཀ་གཟབ་པར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བ་མ་སྨིན་པ་བཅོས་པའི་ལེའུ་སྟེ་བཅོ་ལྔ་པའོ།། །།

X