//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་དྲུག་པ། རྒྱས་པའི་ཚ་བ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:44:19 ཀློག་གྲངས། 4 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཚ་བ་རྒྱས་པའི་རྒྱུ་རྐྱེན་ངོ་བོ་གང་།། ཚ་བ་རྒྱས་པའི་མིང་དུ་ཅི་ལྟར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་ལྟར་ཞུས་པའི་དོན་ལ་ལན་གསུངས་པ།། རྒྱས་ཚད་རྒྱུ་ནི་གནོད་བྱེད་མཁྲིས་པ་སྟེ།། ངོ་བོ་ཚ་ཞིང་རྣོ་ལ་དྲི་མ་མནམ།། དེ་ལ་རྒྱས་རྐྱེན་རང་བཞིན་རྒྱས་པ་དང་།། དུས་ཀྱིས་རྒྱས་དང་རྐྱེན་གྱིས་རྒྱས་པ་འོ།། རང་བཞིན་མ་མོ་མཁའ་འགྲོ་འཁྲུགས་པ་དང་།། སྟོན་དཔྱིད་ཚ་སྒོའི་ཡུལ་དུས་འཛོམ་པ་དང་།། ཤ་ཆང་ལ་སོགས་ཟས་སྐོམ་དྲོད་བཅུད་དྲག། སྤྱོད་ལམ་དྲག་ཤུལ་རྐྱེན་གྱིས་འཁྲུགས་པ་ལས།། ཚ་བ་རྣོ་དྲོའི་མེ་དྲོད་ཐང་ལ་ལྷགས།། ལུས་ཟུངས་ཁྲག་དང་དྲི་མ་རྔུལ་ལ་རྒྱས།། དུས་ནི་སྨིན་དང་ཚ་བའི་སྒང་ལ་བབས།། རྐྱེན་ནི་མ་སྨིན་ཚ་བ་ཡུལ་དུས་དང་།། རང་བཞིན་ན་སོ་གནས་དང་ནད་ཁམས་རྣམས།། མཁྲིས་པར་འདོམ་ལ་ཟས་སྤྱོད་ལོག་པ་ཡིན།། ནད་སྨིན་ཤུགས་རྫོགས་རྐྱང་པའི་ཚ་བ་དེས།། ལུས་ཟུངས་སྲེག་པར་བྱེད་ཕྱིར་རྒྱས་ཞེས་བྱ།། དཔེར་ན་ཤིང་སྐོམ་སྐམམེ་ཡི་ཕུང་པོ་འདྲ།། དབྱེ་བ་རིགས་དང་སྟོབས་དང་བབས་སྒོས་དབྱེ།། རིགས་ཀྱིས་དབྱེ་ན་རིམས་རྒྱས་འཁྲུགས་རྒྱས་གཉིས།། སྟོབས་ཀྱིས་དབྱེ་ན་སྟོབས་ཆེན་སྟོབས་ཆུང་གཉིས།། བབས་སྒོས་དབྱེ་ན་སྤྱི་དང་བྱེ་བྲག་གཉིས།། བྱེ་བྲག་སྙིང་སྲོག་གློ་མཆིན་མཆེར་མཁལ་དྲུག། ཕོ་བ་མཁྲིས་པ་བརྒྱད་ལ་རྒྱས་པ་འོ།།རྒྱས་པའི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་རྩ་ནི་སྦོམ་ལ་དྲག་པ་དང་།། འབུར་འདྲིལ་མཁྲང་གྲིམས་མྱུར་ལ་མགྱོགས་པར་འཕར།། ཆུ་མདོག་དམར་སེར་དྲི་མནམ་རླངས་པ་ཆེ།། ལུད་པ་དམར་སེར་དུད་ཁ་མང་དུ་ལུ།། དབུགས་ཐུང་གཟེར་དྲག་ཁ་སྐོམ་སོ་དྲེག་ཆགས།། ལུས་ལྕི་དང་ག་མི་བདེ་སྐོམ་དད་ཆེ།། སྙིང་ལ་བསིལ་འདོད་ལུས་ལ་རྔུལ་དྲི་མནམ།། ཁྱད་པར་རིམས་རྒྱས་མགོ་ན་ཟ་ཟི་མང་།། སྟོབས་ཆེན་སྟོབས་ཆུང་ནད་ཀྱི་སྟོབས་ལས་དཔག། བྱེ་བྲག་སྙིང་ལ་ཚ་བ་རྒྱས་པ་ནི།། མྱོས་ལྡན་དྲན་པ་མི་གསལ་གོས་ལ་སྡང་།། ལྕེ་སྐམ་གཞུང་ནག་གཉིད་དང་སྐོམ་དད་ཆེ།། དང་ག་འགག་ལ་ནུ་མའི་སྟེང་དུ་གཟེར།། སྲོག་རྩར་བབས་པས་ཕུས་འདེབས་ཤེས་པ་འཁྲུལ།། གོས་ཀྱི་རྡུལ་སེལ་མིག་དམར་གནམ་ལ་བལྟ།། གློ་ལ་རྒྱས་ན་དབུགས་ཐུང་བྲང་རྒྱབ་གཟེར།། མགོ་འཁོར་དབུགས་རྔམ་སྐད་འགག་གློ་སྙིང་རྡུང་།། མཚན་མོ་ཉལ་ཁར་གློ་མང་ཁ་གདོང་སྐྲངས།། མཆིན་པར་རྒྱས་ན་མིག་དམར་ལུད་པ་སེར།། རྩིབ་ལོགས་གཡས་ཀྱི་སྟེང་དང་མཆིན་དྲི་གཟེར།། མཆེར་རྒྱས་ཁོང་སྦོ་གཡོན་གྱི་རྩིབ་ལོགས་གཟེར།། དབུགས་རྒོད་ལྕེ་སྐྱ་མཆུ་ནག་པུས་མོ་སྐྲངས།། རྐང་ལག་སྦྲིད་ཅིང་རྐེད་པ་ཆག་སྙམ་བྱེད།། མཁལ་རྒྱས་ཆུ་སྲི་རྐང་བཤལ་མཁལ་རྐེད་གཟེར།། ཆུ་དམར་ཚ་རླངས་མགོ་འཐོམ་རྣ་བ་འོན།། ཕོ་བར་རྒྱས་ན་གླང་ཐབས་ན་ཞིང་སྐྱུག། གྲང་དྲོ་གཉིས་ཀ་ན་ལ་ལྟག་མིག་བལྟ།། མཁྲིས་པར་རྒྱས་ན་ཁ་ཁ་མིག་ཆུ་སེར།། དང་ག་འགག་ལ་མཁྲིས་པ་སྐྱུག་པར་འགྱུར།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་པའི་ཚུལ་དང་གཉེན་པོའོ།། བཅོས་ཚུལ་སྟོབས་ཆེན་དར་དྲག་ཐོག་བབས་བསད།། སྟོབས་ཆུང་ཚ་བ་འཇམ་ལ་ཞི་བས་བཅོས།། དང་པོར་རླངས་བསད་བར་དུ་ལོ་མ་བྲབ།། ཐ་མ་རྩ་བ་བཅད་པའི་ཚུལ་དུ་བཅོས།། གཉེན་པོ་སྨན་དཔྱད་ཟས་དང་སྤྱོད་ལམ་བཞི།། སྨན་གྱིས་བཅོས་པ་ཞི་དང་སྦྱོང་བ་གཉིས།། ཞི་བྱེད་སྨན་ལ་ཐང་དང་ཕྱེ་མ་སྟེ།། ཐང་ལ་དབྱེ་བའི་ཐང་དང་བསད་ཐང་གཉིས།། དབྱེ་ཐང་ཏིག་ཏ་སླེ་ཏྲེས་སྐྱུ་རུ་ར།། བ་ཤ་ཀ་ཡི་བསྐོལ་གྲངས་ནད་ཁྲག་འབྱེད།། དེ་ལྟར་དབྱེ་ཐང་མེད་པར་ཁྲག་གཏར་བས།། ཟུངས་ཁྲག་ནད་ལ་ཤོར་ཏེ་ཉེས་པ་ཆེ།། བསད་ཐང་སླེ་ཏྲེས་སྐྱུ་རུ་བ་ལེ་ཀ། དེ་གསུམ་གཞིར་བཞག་ཚ་བ་རབ་འབྲིང་གིས།། ཧོང་ལེན་ཏིག་ཏ་བ་ཤ་ཀ་སྦྱར་བ།། བསྐོལ་གྲངས་ཁུ་བ་རྒྱས་ཚད་འཇོམས་པའི་མཆོག། ཡང་ན་སླེ་ཏྲེས་བྱི་ཚེར་འབྲས་བུ་གསུམ།། ཏིག་ཏ་ཧོང་ལེན་བོང་ང་དཀར་པོ་དང་།། རྒྱ་སྐྱེགས་བ་ཤ་ཀ་དང་འབྲས་བུ་གསུམ།། མ་ནུ་པུཥྲྀར་ར་གསུམ་ཨུཏྦ་ལ།། ག་དུར་ཀུན་ལ་བསྲེས་པའི་བསྐོལ་གྲངས་ཐང་།། རླུང་མཁྲིས་ཁྲག་དང་བད་ཀན་ཚ་བ་འཇོམས།། ཕྱེ་མས་བསད་པ་ཚ་བ་སྟོབས་རྒྱས་ལ།། ག་བུར་རྒྱལ་བློན་གསུམ་གུར་གུམ་ཧོང་ལེན་བ་ཤ་ཀ་ཏིག་ཏ་བསྣན་པའིབདུན་ག་པུར་གཙོ་བརྒྱད་ལ་བསྣན་པའིདགུ་པ་སྦྱར།། ཚ་བ་འབྲིང་ལ་གི་ཝཾ་བསིལ་གསུམ་ཙན་དན་གླ་རྩི་བོང་དཀར་ཨ་རུ་ཀ་ར་ཙན་དན་བསིལ་གསུམ་ག་དུར་ཨུཏྦལ་ཏིག་ཏ་ཤིང་མངར་ཀ་རབརྒྱད།། ཚ་བ་ཐ་མ་ཅུ་གང་གུར་གུམ་སུག་སྨེལ་བྲག་ཞུན་ཏིག་ཏ་ཨ་རུ་མཚལ་པི་ལིང་ཀ་རབརྒྱད་པ་དང་།། གུར་གུམ་ཅུ་གང་བ་ལེ་ཀ་ཨུཏྦལ་བ་རུ་ར་མཚལ་ཏིག་ཏབདུན་དང་ཐང་ཆེན་ཏིག་ཏ་དུག་ཉུང་གསེར་མེ་ག་དུར་སྐྱུ་རུ་ཧོང་ལེན་བ་ཤ་ཀ་ཀ་རབདུན་པ་སྦྱར།། སྦྱང་བ་ཚ་བ་སྨིན་དང་སྣོད་དུ་ལྷུང་།། མཆིན་མཁྲིས་ལ་བབས་བཅོས་སྐྱེད་ཆུང་བ་དང་།། རྩ་ཤེད་མ་ཤོར་ལུས་ཟུངས་བཟང་བ་ལ།། ཨ་རུ་མཆུ་སྙུང་ལྕུམ་རྩ་གསེར་མེ་ཏོག། ཧོང་ལེན་བ་ཆུར་བསྐོལ་ཏེ་གྲངས་པ་བཏང་།། སྐྱུག་ན་བསྲུང་ཞིང་ཕིགས་ནས་ལྕག་གིས་བསྐུལ།། རྗེས་ལ་ཆུ་གྲོག་འབྲས་དང་ཞོ་ཡིས་བཅད།། ནད་དངོས་གདོན་བྱེད་གསོ་དཔྱད་གཙོ་བོ་ཡིན།། དཔྱད་ཀྱིས་བཅོས་པ་གཏར་རྔུལ་ཆུ་དུགས་བཞི།། སྨན་གྱིས་མ་ཆོམས་གཏར་གྱིས་དབྱུང་བ་སྟེ།། གང་རྒྱས་རྩ་དང་གང་བབས་རྩ་ལ་གཏར།། སྔོན་འགྲོ་དངོས་གཞི་ཕྱི་རྗེས་སྤྱི་དང་མཐུན།། འགྲམས་འཁྲུགས་ཁྲག་ངན་རྩ་དང་དོན་ལ་ལྷག། དེ་ཕྱིར་གསོ་དཔྱད་གཙོ་བོ་གཏར་བ་ཡིན།། ཚ་བ་བ་སྤུར་འདྲེན་བྱེད་རྔུལ་དུ་དབྱུང་།། ར་དཀར་རྭ་རྩེ་གཡས་གཞོབ་བལ་ཚི་སྦྱར།། འཇམ་བསྲོས་ལུས་པོ་ཀུན་ལ་ཁྱབ་པར་བྱུག། དེ་སྐམས་རྗེས་ལ་ག་པུར་རྒྱལ་བློན་གསུམ།། ཤ་བལ་ཁུ་བས་འཕུལ་བཏང་བ་སྤུར་འདོན།། ཡང་ན་ཨ་རུ་ཛཱ་ཏི་བྱི་ཚེར་ཐང་།། དྲོ་འཇམ་བཏང་ལ་རྔུལ་དབྱུང་བལ་ཕྱེས་ཕྱི།། དྲལ་ཐུག་དྲོ་འཇམ་བཏང་ཞིང་རླུང་ཁ་མནན།། རིམས་ནི་མཁྲིས་ཚད་རྔུལ་གནས་བ་སྤུར་ལྷག། གཏར་བ་མི་བཟང་དཔྱད་མཆོག་རྔུལ་དུ་དབྱུང་།། ཆུ་ལྕག་སྐར་ཆུས་ཉི་མ་ཁ་དྲོས་ལ།། སྤང་ལེབ་ཐོག་ཏུ་གཅེར་བུ་ཙོག་པུར་འདུག། ཕུལ་ཕྱེད་ཁོང་བཏང་ལུས་ཀུན་ཁ་ཆུས་བྲན།། མི་དངང་བ་ཡི་ཆུ་རྒྱུན་ཚུགས་ཚད་བླུག། དེ་ཡིས་ཚ་བའི་རླངས་འདོན་ཚད་འགོ་གཅོག། དུགས་ཀྱིས་བཅོས་པ་གཟེར་སྟེང་ཆུ་རྡོ་དང་།། རྨོན་ལྕགས་བྱང་མ་བསིལ་བའི་སྔོ་སྣ་འམ།། མཚན་དང་ཀྱི་ལྕེ་ཞོ་སྦྱར་གྲང་མོ་ཡིས།། ཡང་ཡང་གསོར་ཏེ་བདུགས་པས་འཕྲལ་ཟུག་གཅོག། ཟས་ཀྱིས་བཅོས་པ་འབྲས་དང་ཆག་ཚེ་དང་།། རྒྱ་ཁུར་ཁུར་ཚོད་བ་ཡི་ཞོ་དར་གསར།། གངས་ཆུ་བ་ཚ་མེད་པའི་ཆུ་བསིལ་བཏང་།། ཕོ་བ་ཞན་ན་དེ་ཡང་བསྐོལ་གྲངས་ཤིས།། ལན་ཚ་ཤ་ཆང་སྒོག་པ་ཚ་བའི་སྔོ།། གནག་ལུག་ཞོ་དར་དྲོད་བཅུད་དུག་འདྲ་སྤང་།། སྤྱོད་ལམ་བསེར་བུ་གྲིབ་མ་ཆུ་ཡི་འགྲམ།། ནིའུ་ནེའུགསིང་ས་གཙང་ཟླ་འོད་བསིལ་གནས་འདུག། ལུས་ངག་ཡིད་གསུམ་ཞི་དལ་དེས་པར་བྱ།། མེ་ཚན་ཉི་ཚན་ལུད་སྟེང་ཉིན་གཉིད་དང་།། འགྲོ་འདུག་ལྡང་ཉལ་ལུས་ངག་རྩོལ་བ་སྤང་།། དེ་ནས་རྒྱས་ཚད་བྱེ་བྲག་བཅོས་པ་ལ།། ཐང་གཏར་འགམ་ཕྱེ་གསུམ་དུ་ཤེས་པར་བྱ།། རྙིངས་ཚད་སྐྱུ་རུའི་བ་ཤ་ཀ་ཙན་དན་གུར་གུམ་སྦྱར་བཐང་བཏང་སྙིང་རྩ་གཏར།། ག་པུར་ཅུ་གང་གུར་ཀུམ་ཨུཏྦལ་ཏིག་ཏ་ཧོང་ལེན་ཨ་ག་རུ་ཀ་རབདུན་དགུ་ཙན་དན་གཉིས་ཨ་ག་རུ་ཅུ་གང་ཏིག་ཏ་ཨུཏྦལ་གླ་རྩི་པུ་ཤེལ་རྩེ་ཀ་རཙན་དན་ཏིག་ཏ་བ་ལེ་ཀ་བོང་དཀར་ཀ་ཀོ་ལ་ཨ་རུ་ནཱ་ག་གེ་སར་རུ་རྟ་ཀ་ར་སྟེབརྒྱད་པ་སྦྱར།། སྲོག་རྩར་ཤོར་ན་ཐང་གཏར་སྙིང་བཞིན་བཅོས།། ཕྱེ་མ་ཨ་གར་ནག་པོ་ཙན་དན་དཀར་དམར་ཛཱ་ཏི་ལི་ཤི་སྙིང་ཞོ་ཤ་གུར་གུམ་ནཱ་ག་གེ་སར་རུ་རྟ་ཀ་རདགུ་སྦྱོར་བྱ།། སྤྱི་བོའི་གཙུག་དང་རྐང་མཐིལ་གཏར་ལ་བསྲེག། གཞུག་ཆུང་ལྔ་བདུན་ག་པུར་སྦྱོར་བ་བྱ།།ཟུག་བྲི་དྲན་པ་གསལ་ན་ཐུབ་པའི་རྟགས།། གློ་འཁྲུགས་བ་ལེའི་སྲོ་ལོ་བ་ཤ་ཙན་དན་ཏིག་ཏའི་ཐང་བཏང་གློ་རྩ་གཏར།། ཤིང་མངར་ཅུ་གང་གུར་གུམ་ཛཱ་ཏི་ཀ་ཀོ་ལ་རྒུན་འབྲུམ་ཏིག་ཏ་ཨུཏྦལབརྒྱད་དང་ཅུ་གང་གུར་གུམ་ཛཱ་ཏི་ལི་ཤི་སུག་སྨེལ་བོང་དཀར་ཏིག་ཏ་ཀ་རབདུན་ཨ་རུ་གེ་སར་དགུར་སྦྱར།། མཆིན་ཚད་བ་ཤའི་བ་ལེ་ཀ་གུར་གུམ་ཏིག་ཏ་ཐང་བཏང་རུ་ཐུང་གཏར།། ཕྱེ་མ་གུར་གུམ་ཅུ་གང་སུག་སྨེལ་ཀ་ཀོ་ལ་བ་ལེ་ཀ་གསེར་མེ་ཏིག་ཏ་ཀ་རབདུན་དང་ཧོང་ལེན་དུག་ཉུང་དང་དགུ་པ་སྦྱར།། མཆེར་པའི་ཚ་བ་གསེར་གྱི་མེ་ཏོག་ཙན་དན་ལི་ཤིའིཐང་།། མཆེར་རྩ་གཏར་ཞིང་སུག་སྨེལ་ཀ་ཀོ་ལ་ལི་ཤི་གུར་གུམ་ཏིག་ཏ་སླེ་ཏྲེས་གསེར་མེ་ཀ་རབདུན་པ་སྦྱར།། མཁལ་ཚད་གུར་གུམ་བྲག་ཞུན་སུག་སྨེལ་གྱི་ཐང་བཏང་བྱིན་ལོང་གཏར།། ཤུག་ཚེར་སྡིག་སྲིན་སུག་སྨེལ་ཉི་དགའ་ཨ་རུ་ཏིག་ཏ་གུར་གུམ་ཀ་རབདུན་པ་ཙན་དན་གླ་རྩི་གུར་གུམ་ཏིག་ཏ་བྲག་ཞུན་བོང་དཀར་སུག་སྨེལ་ཨ་རུ་མཁལ་མ་ཞོ་ཤ་ཀ་རདགུ་པ་སྦྱར།། ཕོ་བའི་ཚ་བ་བྱི་ཚེར་ཏིག་ཏ་སྐྱུ་རུ་མ་ནུའིཐང་བཏང་ལ།། སྣོད་ཀ་གཏར་ཞིང་བྲག་ཞུན་ཨ་རུ་སུག་སྨེལ་གུར་གུམ་གླ་སྒང་དུག་ཉུང་དོམ་མཁྲིས་ཀ་རབདུན་པ་སྦྱར།། མཁྲིས་ཚད་ཏིག་ཏའི་གསེར་མེ་བ་ཤ་ཀཐང་བཏང་མཁྲིས་རྩ་གཏར།། ཕྱེ་མ་གསེར་གྱི་མེ་ཏོག་ཏིག་ཏ་དུག་ཉུང་གུར་གུམ་སྐྱེར་པ་དོམ་མཁྲིས་བ་ཤ་ཀ་ཀ་རབདུན་པ་སྦྱར།། སྤྱི་བཅོས་གོང་ལ་བློས་བརྟགས་མདེ་ཁར་གདགས།། དེ་ལྟར་བཅོས་པས་སོས་པའི་མཚན་མ་ནི།། རྩ་བྱིང་ཁར་ཐོན་ཕྲ་བ་སྦོམ་དུ་སོང་།། དྲག་པ་དལ་ལ་གྲིམས་པ་ལྷོད་པ་དང་།། སྟོངས་པ་མཁྲང་ལ་སྤུན་པ་རིང་དུ་སོང་།། ཆུ་མདོག་དངས་ལ་དྲི་ཆུང་ཀུ་ཡ་སྲབ།། ཟུག་ཆོགས་སྙིང་རྩ་སེང་ལ་ཟས་རོ་རྙེད།། དབུགས་བདེ་ཉིན་གཉིད་ཆུང་ལ་ནུབ་གཉིད་ཆེ།། བྱ་བའི་ལས་ལ་ལུས་སེམས་འཇུག་པར་འདོད།། དེ་ལྟས་བཅོས་རྗེས་ཞུ་འཁྱགས་ས་མཚམས་ནི།། དབྱར་མཐའ་དགུན་བཞིན་རྒྱས་རྗེས་སྟོངས་པ་འགྱུར།། དེ་ཕྱིར་རི་ཐང་མཚམས་ཀྱི་གསོ་ཐབས་བསྟན།། མི་རིག་གནས་དང་ནད་ཁམས་རྐྱེན་དབང་གིས།། རླུང་མཁྲིས་བད་ཀན་ཞུ་འཁྱགས་རྣམ་པ་གསུམ།། རླུང་གི་ཞུ་འཁྱགས་སྡུན་ནས་བསུ་བ་དང་།། མཁྲིས་པའི་ཞུ་འཁྱགས་འཕྲང་ལ་བསྒུག་པ་དང་།། བད་ཀན་ཞུ་འཁྱགས་ཕྱི་རྗེས་བཅད་པ་གསུམ།། རི་ཐང་མཚམས་ཀྱི་ལེ་འུར་ཤེས་པར་བྱ།། ཚ་རྗེས་མ་ལོག་ཟས་སྤྱོད་མཐའ་རུ་གདོན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱས་པའི་ཚ་བ་བཅོས་པའི་ལེའུ་སྟེ་བཅུ་དྲུག་པའོ།། །།

X