//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་བདུན་པ། སྟོངས་པའི་ཚ་བ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:46:19 ཀློག་གྲངས། 10 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཚ་བ་སྟོངས་པའི་རྒྱུ་རྐྱེན་ངོ་བོ་གང་།། སྟོངས་པའི་མིང་དུ་ཅི་ཕྱིར་བཏགས་པ་ལགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། སྟོང་པའི་ཚ་བའི་རྒྱུ་ནི་རླུང་ཡིན་ཏེ།། སྐྱེད་བྱེད་རྐྱེན་གསུམ་རང་བཞིན་སྟོངས་པ་དང་།། རྐྱེན་གྱིས་སྟོངས་དང་གནས་ཀྱིས་སྟོངས་པའོ།། རང་བཞིན་སྟོངས་པ་རླུང་རིམས་སྟོངས་འཁྲུགས་གཉིས།། ཡུལ་དུས་རང་བཞིན་ན་སོ་ནད་ཁམས་གནས།། རླུང་རྐྱེན་འདོམ་པས་རིམས་སམ་འཁྲུགས་འབྱུང་བས།། དང་པོ་རང་གནས་ཚ་བ་རླུང་འབུད་བཅས།། རྐྱེན་གྱིས་སྟོངས་པ་རླུང་ཤས་ཆེ་བ་ཡི།། ཚ་བ་བསིལ་ཐང་ཕྱེ་མ་རྩུབ་མོ་དང་།། གཏར་བཤལ་རྔུལ་དང་ཟས་སྐོམ་ཡེན་ལ་གཏད།། ཚད་གཉའ་ཆོགས་ནས་རླུང་སྐྱེས་ཚད་གཞུག་འབུད།། གནས་ཀྱིས་སྟོངས་པ་སྲོག་རྩར་རླུང་གནས་བབས།། གནས་ཀྱི་དབང་གིས་ཚ་བ་རླུང་གིས་འབུད།། རྐྱེན་དེས་རླུང་ཚད་འཐབ་པའི་ནད་དུ་འགྱུར།། རླུང་གིས་ཚ་བ་བུས་ཀྱིན་ཚད་རྟགས་འཕེལ།། རླུང་ཉིད་གྲང་བས་ཚད་རྟགས་འགལ་ཞེ་ན།། སྟོངས་པའི་ཚ་བ་མགར་གྱིས་སོ་མལ་འདྲ།། སྦུད་པ་གྲང་ཡང་མེ་ཡི་གྲོགས་སུ་འགྱུར།། འབུད་བྱེད་མ་བཅད་ཚ་བ་ཆེས་ཆེར་འཕེལ།། དེ་ཕྱིར་སྟོངས་པའི་ཚ་བ་ཞེས་སུ་བརྗོད།། དབྱེ་བ་སྤྱི་དང་བྱེ་བྲག་རྣམ་པ་གཉིས།། སྤྱི་ལ་ཚ་བ་སྟོངས་དང་རྩ་སྟོངས་དང་།། རླུང་སྟོངས་ཞེས་བྱ་རྣམ་པ་གསུམ་དུ་བཤད།། བྱེ་བྲག་རིམས་སྟོངས་ཁྲག་སྟོངས་མཁྲིས་པ་སྟོངས།། བད་ཀན་ཆུ་སེར་གློ་སྙིང་སྟོངས་པ་དྲུག། དེ་རྟགས་དང་པོ་ཚ་བ་སྟོངས་པ་ནི།། གཉའ་ཆོགས་ཚད་གཞུག་རླུང་གིས་འབུད་པ་སྟེ།། ཆུ་མདོག་དམར་ཞིང་དངས་ལ་ལྦུ་བ་ཆེ།། རྩ་རྒྱུད་སྟོང་ལ་རྩ་སྟོད་རྒྱུག་པ་དང་།། དབུགས་ཐུང་རྔམ་པ་རྒོད་ལ་ཕྱི་ཚད་ཆེ།། མིག་སྤྲིན་དམར་ཞིང་ལྕེ་ནི་དམར་སྐམ་རྩུབ།། གཟེར་འཕོ་སྐམ་སྐོམདད་ཆེ་ལ་མིག་རྩ་གྲུང་།། སྣ་བུག་ཧར་ལ་གཉིད་ཆུང་སྐབས་སུ་དངང་།། བ་སྤུ་ལོངས་ལངསནས་རླུང་གསང་མནན་ན་ན།། སྐབས་སུ་གཏམ་ལ་ཅོ་འཁྲུལ་བག་རེ་འོང་།། འདི་ནི་ལྟར་སྣང་རླུང་གི་ཚ་བ་སྟེ།། བསིལ་གཏར་དེད་ན་གཤིན་རྗེའི་ལག་ཏུ་གཏོད།། རྟགས་ལ་ཐེ་ཚོམ་གསུར་བྱུག་རུས་ཐང་སད།། ལྕེ་རློན་རྔམ་པ་བདེ་ལ་སྐོམ་དད་ཆུང་།། གཉིད་ཆེ་དབང་པོ་གསལ་སོགས་ཚད་རྟགས་ནུབ།། མཁས་པས་དེ་ལ་སོམ་ཉི་མི་བྱའོ།། སྲོག་རྩར་ཚ་བ་བབས་པའི་རྩ་སྟོངས་རྟགས།། རྩ་ཆུ་གོང་འདྲ་མིག་དམར་གནམ་དུ་བལྟ།། ཕུས་འདེབས་ཤེས་པ་འཁྲུལ་ལ་གོས་རྡུལ་སེལ།། གཉིད་མེད་ཤེས་པ་ཡང་ཞིང་འདྲོས་ཚུལ་སྟོན།། སྐབས་སུ་འདར་ལ་དྲུང་གི་མི་ལ་འཛིན།། སོ་འཐབ་སོ་འཆའ་སྣང་པ་ལོག་པར་མཐོང་།། སྙིང་སྲོག་གནས་སུ་རླུང་ཁྲག་འཐབ་པ་སྟེ།། རྟགས་རྣམས་ཚང་ན་མི་འཚོ་སྤང་བར་བཤད།། ཚད་གཞུག་རླུང་དུ་ལོག་པའི་རླུང་སྟོངས་རྟགས།། གཡལ་མང་རླུང་གསང་ན་ཞིང་སྟོང་སྐྱུགས་བྱེད།། གཉིད་མེད་ཤེས་པ་འཕྱོ་ལ་ཞེ་ས་མཁས།། རྙོང་འདོད་མིག་དཔང་མཐོ་ལ་སྐྲ་འདབ་འདར།། གཏིང་གི་དབང་པོ་མ་འཁྲུལ་ཆལ་ཆོལ་སྨྲ།།