//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅོ་བརྒྱད་པ། གབ་པའི་ཚ་བ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:47:03 ཀློག་གྲངས། 5 

དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཚ་བ་གབ་པའི་རྒྱུ་རྐྱེན་ངོ་བོ་གང་།། གབ་པའི་ཚ་བའི་མིང་དུ་ཅི་ཕྱིར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། གབ་པའི་ཚ་བའི་རྒྱུ་ནི་གྲང་རླུང་ཡིན།། དེ་ལ་རྐྱེན་གསུམ་རང་བཞིན་གབ་པ་དང་།། གནས་ཀྱིས་གབ་དང་རྐྱེན་གྱིས་གབ་པའོ།། ཡུལ་དུས་རང་བཞིན་ན་ཚོད་ནད་ཁམས་རྣམས།། གྲང་རླུང་ཅན་ལ་ཚ་བ་ཕྲན་བུ་བྱུང་།། དང་པོ་རང་གནས་བད་རླུང་འོག་ཏུ་གབ།། དེ་ཕྱིར་རང་བཞིན་ཡེ་ནས་གབ་ཅེས་བྱ།། གནས་ཀྱིས་གབ་པ་ཕོ་མཁལ་སྙིང་དང་གསུམ།། ཚ་བ་ཞུགས་ཀྱང་གྲང་རླུང་གནས་ཡིན་པས།། ཚ་བ་གཏིང་གབ་སྤྱི་རྟགས་གྲང་རླུང་སྟོན།། རྐྱེན་གྱིས་གབ་པ་མ་སྨིན་བཅོས་སྔས་དང་།། བད་ཀན་རི་ཐང་མཚམས་སུ་བཅུད་སྔས་པས།། གྲང་བའི་འོག་ཏུ་ཚ་བ་གབ་པ་ཡིན།། གབ་པའི་ཚ་བ་སྦས་པའི་མེ་དང་འདྲ།། གྲང་རླུང་གཉིས་ཀྱིས་ཚ་བའི་མགོ་བྱིབས་པས།། བད་རླུང་འོག་ཏུ་ཚད་རྟགས་བག་ལ་ཉལ།། ཕྱི་གྲང་ནང་ན་ཚ་བས་གབ་ཅེས་བྱ།། དབྱེ་བ་སྤྱི་དང་བྱེ་བྲག་རྣམ་པ་གཉིས།། སྤྱི་ལ་ཚ་སྟོབས་ཅན་དང་གྲང་སྟོབས་ཅན།། བྱེ་བྲག་སྙིང་ལ་ཚ་བ་གབ་པ་དང་།། ཕོ་བར་གབ་དང་མཁལ་མར་གབ་པའོ།། བརྟག་ཐབས་བཞི་སྟེ་རྟགས་ལ་ནད་ངོས་བཟུང་།། རྩ་ཆུས་མཚང་འབྲུ་གཏར་གྱིས་ཕུགས་བཙལ་ཏེ།། ཟས་དང་སྨན་གྱིས་མགོ་ཕུར་བཤུ་བར་བྱ།། རྟགས་ཀྱིས་ངོས་བཟུང་སྤྱི་དང་བྱེ་བྲག་གཉིས།། སྤྱི་ལ་ཚ་སྟོབས་ཅན་དང་གྲང་སྟོབས་ཅན།། ཚ་སྟོབས་ཅན་དེ་རྩ་དཔངས་དམའ་ལ་གྲིམས།། ཆུ་མདོག་དམར་ལ་ལྡོག་དཀའ་ཤེས་པ་ལྕི།། ངོ་སྣུམ་གཉིད་ལོག་རྗེས་ལ་ཁ་ལྕེ་སྐམ།། ཁ་ཁ་དང་ག་མི་བདེ་སྐབས་སུ་རྔུལ།། ལུས་ལྕི་མིག་དམར་མགོ་ལྕི་སྣ་ཁྲག་འཛག། ནུབ་གཉིད་ཆུང་ལ་ཉིན་གཉིད་ཆེ་བ་དང་།། མེ་ཉིས་ཕོག་ན་ཁམས་ལྕི་གྱེན་ལ་ངལ།། བསིལ་དྲགས་དྲོས་དྲགས་གཉིས་ཀ་གནོད་པར་ཚོར།། གྲང་སྟོབས་ཅན་དེ་རྩ་རྒྱུད་བྱིང་ལ་བུལ།། ཆུ་སྔོ་ལྡོག་ཏུ་མི་འདོད་གདོང་པ་སྐྱ།། ལུས་གྱོང་དང་ག་མི་བདེ་སྣ་ཆུ་འཛག། ཤེས་པ་བྱིང་ལ་ཟས་སྤྱོད་དྲོ་ན་འཕྲོད།། བྱེ་བྲག་སྙིང་ལ་གབ་ན་སེན་མོ་དཀར།། སྲོད་ལ་གཉིད་ཡེར་ཉིན་མོ་གྲིབ་མ་སྙེག། བྲང་རྒྱབ་གདོང་པ་སྲིན་ཐོར་རྒྱུན་མི་ཆད།། ཆང་འཐུངས་རྗེས་ལ་དྲན་པ་མི་གསལ་འཕྱོ།། ཕོ་བར་གབ་ན་ཚ་གྲང་གཉིས་ཀ་གནོད།། ཁྱད་པར་དྲོད་དྲགས་ཕུར་པ་བཙུགས་ལྟར་ན།། གསར་ཤ་མི་འཕྲོད་ཟས་སྐོམ་དྲོ་འཇམ་ཕན།། མཁལ་མར་གབ་ན་ཟགས་ཆུ་ཁྲག་ཏུ་འབྱུང་།། ཆང་འཐུངས་འགྲོ་འདུག་རྗེས་ལ་རྐང་པ་ལྕི།། མཁལ་རྩ་གར་ཁྲིད་ས་ནས་གཟེར་རམ་ན།། དེ་ལྟར་ནད་ཀྱི་རྟགས་ལ་ཐེ་ཚོམ་ན།། རྩ་དང་ཆུ་ཡི་སྒོ་ནས་མཚང་འབྲུ་སྟེ།། རྩ་རྒྱུད་མ་ངེས་ཇི་ལྟར་འདུག་ཀྱང་རུང་།། གཏིང་ན་ཅུང་ཟད་གྲིམས་ལ་མཁྲང་བར་འོང་།། ཆུ་མདོག་མ་ངེས་ཇི་ལྟར་འདུག་གྱུར་ཀྱང་།། རླངས་པ་སངས་བུལ་ཀུ་ཡ་ལིང་གི་འོང་།། དེས་མ་རྟོགས་ན་གཏར་གྱིས་ཕུགས་འཚོལ་ཏེ།། སྙིང་ལ་གབ་ན་སྣོད་ཀ་གཏར་བས་གསལ།། ཕོ་བར་གབ་ན་རུ་ཐུང་གཏར་བས་ཤེས།། མཁལ་མར་གབ་ན་བྱིན་གཞུག་གཏར་བས་གསལ།། ལུས་སྤྱིར་གབ་ན་གསུམ་ག་གཏར་བར་བྱའོ།། རྣག་མཁྲིས་ལྕགས་གཡའ་ཆགས་ན་གབ་པར་ངེས།། ངེས་ཤེས་མ་སྐྱེས་ཟས་སྨན་མགོ་ཕུར་བཤུ།། དང་པོ་ཁ་ཟས་དྲོད་བཅུད་ཕྱོགས་གཅིག་བསྟེན།། ཐོག་མར་གྲང་བ་ཞི་བས་བདེར་མངོན་ཞིང་།། བར་དུ་ཕན་དང་གནོད་པ་གང་ཡང་མེད།། མཇུག་ཏུ་གཏིང་ཚད་སླེབ་ནས་གནོད་པར་ཚོར།། དེ་རྗེས་སྨན་གྱིས་མགོ་ཕུར་བཤུ་བ་ནི།། སྤྱི་རུ་གབ་ན་ཅུ་གང་བདེ་བྱེད་སྦྱར།། སེ་འབྲུ་བཞི་པས་བད་རླུང་མགོ་ཕུར་བཤུ།། གུར་གུམ་ཅུ་གང་ཨུཏྦལ་ཚ་བ་འཇོམས།། ཁྱད་པར་སྣ་ཁྲིད་ནང་ཡན་ཕུགས་འཚོལ་གསུམ།། རང་གནས་སྣ་ཁྲིད་བཟང་པོ་གསུམ་པོ་ལ།། ནང་ཡན་ཀུན་ལ་པི་པི་ལིང་གིས་བྱེད།། ཕུགས་འཚོལ་གཙོ་བོ་ཙན་དན་གི་ཝཾ་དང་།། གུར་གུམ་གསུམ་ལ་འཁོར་གྱིས་ཁ་སྒྱུར་བ།། སྙིང་ལ་རུ་རྟ་སྤོས་དཀར་ཨ་ག་རུ།། མཁལ་མར་བྲག་ཞུན་གླ་རྩི་ཨ་རུ་ར།། ཕོ་བར་བོང་ང་དཀར་པོ་ལི་ག་དུར།། བྲག་ཞུན་གསེར་གྱི་མེ་ཏོག་ཀ་ར་སྦྱར།། ཐུན་སྐྱུངས་ཆུ་ཚན་འཕུལ་ཏེ་བྲིད་ལ་བཏང་།། དང་པོར་བད་རླུང་ལ་ཕོག་མི་འཕྲོད་འདྲ།། བར་དུ་གྲང་བ་ཐལ་ནས་གནོད་པ་མེད།། ཐ་མ་ཚ་བར་སླེབ་ནས་ཕན་པར་ཚོར།། དེ་དག་གསུམ་འགྱུར་སྨན་གྱི་མང་ངག་ཡིན།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་པའི་ཚུལ་དང་གཉེན་པོ་གཉིས།། བཅོས་ཚུལ་དང་པོ་རྐུན་ཆེན་ཕུགས་སུ་གཞུག། བར་དུ་དུད་ཁུང་རྒྱ་སྐར་དབྱེ་བ་དང་།། ཐ་མ་མེ་ལྷག་ཆུ་ཡིས་བསད་ཚུལ་གསུམ།། གཉེན་པོ་སྨན་དཔྱད་ཟས་དང་སྤྱོད་ལམ་བཞི།། སྨན་གྱིས་བཅོས་པ་ཐང་དང་ཕྱེ་མ་གཉིས།། ཐང་སྦྱོར་འབྲས་བུ་གསུམ་དང་བ་ལེ་ཀ། ཨུཏྦལ་སླེ་ཏྲེས་ཏིག་ཏ་བོང་ང་དཀར།། ག་དུར་བ་ཤ་ཀ་ཡི་བསྡུས་གྲངས་བཏང་།། ཚ་བ་ཁོང་གསོད་ཕྱིར་འཕུལ་ཁྲག་ངན་འབྱེད།། དེ་རྗེས་ཕྱེ་མ་ག་བུར་ཨ་ག་རུ།། བསིལ་གསུམ་ཏིག་ཏ་བོང་ང་ལི་ག་དུར།། ཀ་ར་དཀར་པོའི་རྟ་ལ་བསྐྱོན་ལ་བཏང་།། གི་ཝཾ་ཙན་དན་བསིལ་གསུམ་ཨ་རུ་ར།། གླ་རྩི་བོང་ང་དཀར་པོ་ཀ་ར་སྦྱར།། གུར་གུམ་ཅུ་གང་ཏིག་ཏ་ཨ་རུ་ར།། བྲག་ཞུན་ཨུཏྦལ་མཚེ་ཚིགས་བ་ལེ་ཀ། ཀ་ར་སྦྱར་བ་ཚ་བ་རབ་འབྲིང་ཐ།། སྙིང་མཁལ་ཕོ་བ་གནས་དང་སྦྱར་ཏེ་བསྟེན།། ཡང་ན་གོང་གི་ནང་ཡན་བཞག་པ་ཡི།། སྣ་ཁྲིད་ཕུགས་འཚོལ་སྦྱར་བས་ཚ་བ་འཕུལ།། ཁ་ཟས་འབྲས་དང་བ་ལང་ཤ་གསར་དང་།། ཆག་ཚེ་མར་གསར་ཞོ་དཀྲུགས་མཁས་པས་སྦྱར།། སྤྱོད་ལམ་བསིལ་གནས་དལ་འདུག་གཉིད་མི་ལོག། དེ་ཡིས་ཚ་བ་ཁོང་ནས་ཕྱིར་འཕུལ་ཏེ།། གྲོག་ཚང་བཤིག་འདྲ་ཕྱི་ཚད་སྐྱེས་པ་ན།། དཔྱད་དུ་གང་རྒྱས་རྩ་གཏར་བཤལ་གྱིས་སྦྱང་།། རུས་བབས་བདུད་རྩི་ལྔ་ཡི་རླངས་ལུམས་བྱ།། ཤ་དང་པགས་ལ་བབ་པ་རྔུལ་དུ་དབྱུང་།། མཁལ་མ་ནང་རྩར་བབས་ན་རྩ་ནས་སྦྱང་།། དེ་དག་ཚ་བ་རང་སར་དབྱུང་བ་སྟེ།། དུ་བ་འཁྱིམས་ལ་རྒྱ་སྐར་འབྱེད་བཞིན་ནོ།། ཐ་མར་ཚད་གཞུག་མ་ཐོན་རོ་མ་ལས།། རྐྱེན་དང་ཕྲད་ན་མེ་སྟག་སྤྲ་བ་འདྲ།། དེ་ཕྱིར་གི་ཝཾ་ཙན་དན་བསིལ་གསུམ་དང་།། ཤིང་མངར་རྒུན་འབྲུམ་ཛཱ་ཏི་པི་པི་ལིང་།། སེ་འབྲུ་ཤིང་ཚ་ཀ་ར་སྦྱར་བ་ཡིས།། ཕོ་བའི་མེ་གསོ་ཚ་བའི་ལྷག་མ་འདོན།། བལ་ཚིའི་ཆུ་ལུམས་ཏིག་ཏའི་སྨན་མར་སྦྱར།། ཚད་ལྷག་མེད་པའི་རྟགས་ཐོབ་ཁ་ཟས་གློད།། དེ་རྗེས་བྱེ་བྲག་གང་བབས་གསང་ཁ་བསྡམ།། བྱེ་བྲག་སྙིང་ལ་ཚ་བ་གབ་པ་ལ།། ག་བུར་ཙན་དན་དཀར་དམར་ཨ་ག་རུ།། བསིལ་གསུམ་ཛཱ་ཏི་ཞོ་ཤ་གེ་སར་དང་།། ཨ་རུ་ར་དང་ཀ་ར་སྦྱར་ལ་བཏང་།། ཚད་སྟོབས་ཆུང་ན་ཙན་དན་དཀར་པོ་དང་།། ཨུཏྦལ་ནཱ་ག་གེ་སར་ཨ་རུ་ར།། ཛཱ་ཏི་སྐྱུ་རུ་ཀ་ར་སྦྱར་ལ་བཏང་།། རྩེ་ཆུང་སྣོད་ཀ་ལྕེ་རྩ་ཐོད་རྩ་གཏར།། ཚ་བ་ཆོམས་ནས་ནུ་དབྲག་དྲུག་བདུན་བསྲེག། ཁ་ཟས་ཕྱིས་ན་སྙིང་རླུང་འཇུག་པས་ན།། སྔ་རུ་ཟས་གློད་འབྲས་གསུམ་སྨན་མར་སྦྱར།། ཕོ་བར་གབ་ན་སེ་འབྲུ་ལྔ་པའམ།། ད་ལིས་བདུན་པས་ཕོ་བའི་གཞི་བཟུང་ལ།། གུར་གུམ་གསེར་གྱི་མེ་ཏོག་དུག་མོ་ཉུང་།། བྲག་ཞུན་དོམ་མཁྲིས་ག་དུར་བ་ལེ་ཀ། ཀ་ར་སྦྱར་བ་དགུང་གཉིས་བསྐོལ་གྲངས་དབུལ།། ཡང་ན་བདེ་བྱེད་ཆེན་པོ་དུས་བཞིར་བསྟེན།། རུ་ཐུང་སྣོད་ཀ་གཏར་ལ་ཆུ་ཆུང་རྩ་བ་བསྡུས་ལ་དུར་བྱིད་པི་ལིང་ཁ་ཚར་བཏབ་པའིཐང་ཁྲུས་བྱ།། ཁ་ཟས་ཁྲེའུ་རྗེས་ལ་ཕོ་གསང་བསྲེག། མཁལ་མར་གབ་ན་དམར་པོ་བཞི་ཐང་བཏང་།། ཕྱེ་མ་ཙན་དན་གུར་གུམ་སུག་སྨེལ་དང་།། ཏིག་ཏ་བྲག་ཞུན་ཤུག་ཚེར་ཨ་རུ་ར།། ཡང་ན་ཙན་དན་གླ་རྩི་ཨ་རུ་ར།། སུག་སྨེལ་ལི་ཤི་གུར་གུམ་ཏིག་ཏ་དང་།། འཇམ་འབྲས་ཀ་ར་སྦྱར་བཏང་བྱིན་ལོང་གཏར།། གཟེར་སར་གླ་རིལ་དྲི་ཆུར་བཙོས་པས་བདུག། རྗེས་ལ་སྦྲང་ཆང་བོང་ཤས་མཁལ་ཟུངས་གསོ།། རྩ་བ་ལྔ་སྦྱར་ཚིགས་པ་བཅུ་བཞི་བསྲེག། དེ་ལྟར་གབ་པའི་ཚ་བ་རྣམ་པ་གསུམ།། ཚ་རྗེས་དྲོད་ཀྱིས་མ་བཅོས་གྲང་བར་ལྡོག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གབ་པའི་ཚ་བ་བཅོས་པའི་ལེའུ་སྟེ་བཅོ་བརྒྱད་པའོ།། །།

X