//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་བཅུ་དགུ་པ། ཚ་བ་རྙིངས་པ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:47:53 ཀློག་གྲངས། 7 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། རྙིངས་པའི་ཚ་བའི་རྒྱུ་རྐྱེན་ངོ་བོ་གང་།། ཚ་བ་རྙིངས་པའི་མིང་དུ་ཅི་ཕྱིར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། རྙིངས་ཚད་རྒྱུ་ནི་ལོ་ཟླ་ལོན་པ་སྟེ།། དེ་རྐྱེན་རང་བཞིན་རྙིངས་དང་རྐྱེན་གྱིས་རྙིངས།། སྦྱོར་བ་དམན་པས་རྙིངས་པ་རྣམ་པ་གསུམ།། རང་བཞིན་རྙིངས་པ་བད་ཀན་སྨུག་པོ་དུག། ལོ་དང་ཟླ་བར་ཟུངས་དང་ཡེ་ནས་འདྲེས།། རྐྱེན་གྱིས་རྙིངས་པ་ཚ་བ་ཕྲན་བུ་ལ།། ཟས་སྤྱོད་མ་བསྡམས་ཕྱོགས་མེད་བཏང་བ་ཡིས།། རྒྱུ་ཆུང་བ་ཡིས་རྒྱས་པར་མ་ནུས་ཀྱང་།། ཟས་སྤྱོད་རྐྱེན་གྱིས་ཚ་བ་ཞིར་མ་སྟེར།། མ་སྨིན་མཁྲིས་ཤས་ཆེ་ལ་བཅོས་སྔས་སམ།། སྦྱོར་བ་དམན་པ་རིམས་ཆུང་ཆམ་འཁྲུགས་སམ།། འགྲམས་ཆུང་གཉེན་པོས་མ་ནོན་ཡུན་དུ་ལས།། དེ་ལྟར་རྐྱེན་དེས་ལོ་དང་ཟླ་བ་རུ།། ནད་དེ་ཟུངས་སུ་འདྲེས་ཤིང་ཞེན་པ་ཡིས།། ལྕགས་ལ་བཙའ་མ་རས་ལ་སྣུམ་ཞེན་ནམ།། ཤིང་ལ་སྲ་རྩི་བཏང་འདྲ་གཏིང་འདོན་དཀའ།། ཡུན་རིང་ལོན་ཕྱིར་ཚ་བ་རྙིངས་ཞེས་བྱ།། རྙིངས་ཚད་དབྱེ་བ་སྤྱི་དང་བྱེ་བྲག་གཉིས།། སྤྱི་ལ་རྙིངས་ཚད་རླུང་ལྡན་རླུང་མེད་གཉིས།། རླུང་མེད་སྦྱོར་དམན་རྐྱེན་གྱིས་རྙིངས་ལས་བྱུང་།། རླུང་ལྡན་མ་སྨིན་རླུང་ཤས་ཆེ་བ་ལ།། བཅོས་པ་སྔས་པས་ནད་ལ་བྱ་ཤོར་ཏེ།། གཅིག་བཅོས་གཅིག་སྐྱེས་ཚ་བ་མ་གསོད་པས།། རླུང་ཚད་འཐབ་ཅིང་ཡུན་དུ་ལས་པའམ།། རླུང་གི་རི་ཐང་མཚམས་སུ་བཅུད་སྔས་པས།། ཚད་གཞུག་ལས་པ་རླུང་དང་བསྡོངས་ལས་བྱུང་།། བྱེ་བྲག་དབྱེ་བ་ཤར་རྒྱས་ལྤགས་ལ་གྲམ།། རྩ་རུ་རྒྱུ་ཞིང་རུས་ལ་ཞེན་པ་འོ།།རྟགས་ལ་སྤྱི་དང་བྱེ་བྲག་རྣམ་པ་གཉིས།། སྤྱི་ཡི་རྟགས་ལ་རྙིངས་ཚད་རླུང་མེད་དེ།། རྩ་རྒྱུད་ཕྲ་གྲིམས་ཆུ་དམར་རླངས་ཡུན་རིང་།། གདོང་སྣུམ་ཁ་འབྱར་རྐན་ཕུགས་སྐམ་ལ་གྱོང་།། མིག་རྩ་དམར་ལ་ཚག་ཅིང་མཆི་མ་འཛག། ཤ་མདོག་སྔོ་ལ་སྐམ་ཞིང་དྲེག་ཆུང་ཆགས།། འགུལ་ན་གློ་སྙིང་འཕར་ལ་རོ་སྟོད་ཚ།། ཡན་ལག་བཞི་དང་རོ་སྨད་ལྕི་ལ་སྦྲིད།། སྙིང་ལ་གྲང་མོ་འདོད་ཅིང་བསིལ་གྲིབ་སྙེག། ཉིན་དགུང་སྲོད་ལ་ན་ཞིང་རྔུལ་ཁ་སྙི།། གཉིད་ཆེ་དྲོད་བག་རྗེས་ལ་ལྡང་ཞིང་ན།། ཚ་བ་གཞན་པས་དང་ག་བག་ཙམ་བདེ།། རླུང་ལྡན་དེ་འདྲ་ཁྱད་པར་ལུས་ཤེད་ཆུང་།། སྐབས་སུ་ཕྲུམ་སེར་ཁྱེར་ཞིང་བ་སྤུ་བརྩེ།། དོན་མེད་རྔུལ་འོང་གཟེར་འགྲམ་རུས་ཚིགས་ན།། བྱེ་བྲག་ཤ་ལ་རྒྱས་ན་ཁོལ་བུར་སྐྲངས།། དམར་སྲ་བཙིར་ན་ན་ལ་རྣག་ཆུ་འཛག། ལྤགས་ལ་གྲམ་ན་བརྩེ་ཞིང་ཚ་བར་བྱེད།། རྩར་རྒྱུ་ནག་པོར་གསལ་ལ་རྩ་ཐོག་སྐྲངས།། རུས་ཞེན་ཁོལ་བུར་ན་ཞིང་སོ་མདངས་ཉམས།། སྔོ་སྐམས་ཚིགས་པ་གཡོ་ཞིང་སྒྱིད་པ་འཁུམས།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་པའི་ཚུལ་དང་གཉེན་པོའོ།། བཅོས་ཚུལ་དང་པོ་གྱོང་པོ་རླན་གྱིས་སྦང་།། བར་དུ་ཐལ་ཚན་ཆུ་ཡིས་བྲན་པར་བྱ།། ཐ་མར་དུག་གི་སྡོང་པོ་རྩད་ནས་གདོན།། གཉེན་པོ་སྨན་དཔྱད་ཟས་དང་སྤྱོད་ལམ་བཞི།། ཚ་རྒན་ལུས་སྤྱིར་གྲམ་ཞིང་ཞེན་པ་དེ།། བསྡུ་ཞིང་ནད་ཁྲག་ལུས་ཟུངས་དབྱེ་བའི་ཕྱིར།། འབྲས་བུ་གསུམ་དང་ཏིག་ཏ་སླེ་ཏྲེས་གཉིས།། བསྐོལ་གྲངས་ཡུན་དུ་བསྲིངས་པའི་རླན་གྱིས་སྦང་།། རྔུལ་ཆད་ལུས་ཡང་ཁམས་དངས་དང་ག་བདེ།། གཟེར་བ་ཞིའམ་འདུས་ན་གང་བབས་རྩ།། མང་དུ་རླངས་ཐོན་ཁ་དབྱེ་ཉུང་ངུ་འདོན།། དེ་རྗེས་ཏིག་ཏ་ཧོང་ལེན་འབྲས་བུ་གསུམ།། སྤང་རྩི་བསྐོལ་གྲངས་ཚ་བ་རོལ་དུ་གསོད།། ཕྱེ་མ་ག་བུར་ཉི་ཤུ་རྩ་ལྔ་པ།། འབྲས་བུ་གསུམ་མམ་སེང་ལྡེང་ཐང་གིས་དབུལ།། དེ་རྗེས་ཨ་རུ་བར་སྐྱུར་ལྕུམ་རྩ་དང་།། དུར་བྱིད་བ་ཆུར་སྦངས་ལ་སྦྲང་གིས་བསྒྱུར།། ལྟོ་སྟོང་བཏང་བས་ངེས་མེད་རྒྱུན་དུ་འཁྲུ།། ནད་དང་ལུས་ཤེད་སྦྱར་ལ་དུས་བབས་བཅད།། ཚད་ཞེན་རྩད་ནས་འབྱིན་པའི་དཔྱད་མཆོག་ཡིན།། དེ་ནས་གི་ཝཾ་ཙན་དན་བསིལ་གསུམ་དང་།། ཨུཏྦལ་སླེ་ཏྲེས་བྲག་ཞུན་ཀ་ར་སྦྱར།། རླུང་དང་ལྡན་ལ་ཏིག་ཏའི་སྨན་མར་ཤིས།། དེ་ལྟར་བཅོས་ཀྱང་ཚ་བ་སླར་འཕེལ་ན།། སྟོངས་ཚད་འབྱུང་བས་ཟས་ཀྱིས་རླུང་སྣ་གླན།། དེས་ཀྱང་མ་ཞི་ལུས་ཟུངས་ཚ་བར་ལོག། ཅིས་ཀྱང་མ་ཆོགས་ལ་ཆེན་འདའ་བར་འགྱུར།། དེས་ན་ཚ་བ་རྣམ་གསུམ་བརྟག་པ་གཅེས།། ཁ་ཟས་རི་དགས་བ་ལང་ཤ་གསར་དང་།། བ་རའི་ཞོ་དར་མར་གསར་ཆག་ཚེ་བཏང་།། ཡོས་ཆང་སྲོ་ལོས་བསིངས་པ་རིག་པས་སྦྱར།། སྤྱོད་ལམ་མེ་ཉི་ལུས་ངག་རྩོལ་བ་སྤང་།། བསིལ་སར་ཉིན་གཉིད་མི་ལོག་དལ་བར་བསྡད།། དེ་ལྟར་བཅོས་རྗེས་ཚད་ལྷག་མེད་པར་བདའ།། ཅུང་ཟད་ལུས་ཀྱང་ཉུང་མའི་རྨ་དང་འདྲ།། དེ་ཕྱིར་ཟས་སྤྱོད་ཟླ་བའི་བར་དུ་བསྡམ།། ཉི་ཤུ་རྩ་ལྔ་སྦྱར་ཞིང་ཆུ་ལྕག་བྲན།། སྣེ་དམར་སྲད་དཀར་སྟབ་སེང་འབྲས་གསུམ་གྱིསྦྱོར་བ་ནང་མ་འགའ་བཏང་ལ།། རྔུལ་དབྱུང་ཚ་བ་ཅུང་ཟད་ལུས་མི་སྲིད།། དེ་ནས་ཟས་དང་སྤྱོད་ལམ་ཆ་ཡིས་གློད།། བྱེ་བྲག་ཤ་ལྤགས་ཉི་ཤུ་རྩ་ལྔ་སྦྱར།། མཆིན་རྩས་གཙོ་བྱས་རྩ་ཁ་མང་དུ་དབྱེ།། རྔུལ་དབྱུང་ཆུ་ལྕག་རྒྱུན་སྦྱོངས་བསྔགས་པ་ཡིན།། རྩ་རུ་རྒྱུ་ན་ཙན་དན་དཀར་དམར་གཉིས་བསིལ་གསུམ་ག་དུར་དོམ་མཁྲིས་ཨུཏྦལ་སོ་མ་ར་ཛ་མཚལ་ཧོང་ལེནབཅུ་གཅིག་སྦྱར།། གང་རྒྱས་རྩ་གཏར་སྐྱེད་ཆུང་རྩ་སྦྱོངས་བྱ།། རུས་ལ་ཞེན་ན་ཤིང་སྣ་ཙན་དན་གཉིས་སེང་ལྡེང་སྐྱེར་པ་དེ་བ་དཱ་རུ་སྨྱག་ཤད་སྤྱི་ཞུར་རུ་རྟ་ཀ་རབརྒྱད་པ་སྦྱོར།། རུས་རྙིང་བདུད་རྩི་ལྔ་ཡི་རླངས་ལུམས་བྱ།། མཁལ་རྩ་གཏར་ཞིང་རྒྱུན་སྦྱོངས་ཤིས་པ་ཡིན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བ་རྙིངས་པ་བཅོས་པའི་ལེའུ་སྟེ་བཅུ་དགུ་པའོ།། །།

X