//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉི་ཤུ་པ། ཚ་བ་རྙོགས་པ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:50:24 ཀློག་གྲངས། 7 

དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཚ་བ་རྙོགས་པའི་རྒྱུ་རྐྱེན་ངོ་བོ་གང་།། རྙོགས་པའི་ཚ་བ་མིང་དུ་ཅི་ཕྱིར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། ཚ་བ་རྙོགས་པའི་རྒྱུ་ནི་ཆུ་སེར་ཡིན།། རྐྱེན་ནི་རང་བཞིན་རྙོགས་དང་རྐྱེན་གྱིས་རྙོགས།། རང་བཞིན་ཆུ་སེར་ཤས་ཆེའི་ཚ་བ་རྣམས།། བཅོས་རྗེས་ནད་གཞིའི་ཐོག་ཏུ་ལྷུང་བ་ཡིན།། རྐྱེན་གྱིས་རྙོགས་པ་བཅོས་སྔས་ཁ་ཐལ་གཉིས།། བཅོས་སྔས་མ་སྨིན་ཚ་བའི་རིགས་གང་ཡང་།། སྨན་དཔྱད་ཟས་སྤྱོད་གཉེན་པོ་བསྟེན་སྔས་པས།། བད་ཀན་སྐྱེས་ཏེ་ཕོ་བའི་མེ་དྲོད་ཤོར།། རླུང་ནད་སྐྱེས་པས་ཚ་བ་རྩ་མིག་བྱེར།། རླུང་གིས་ཁྲག་གཡོས་ཆུ་སེར་སྐྱེད་པ་ཡིན།། ཁ་ཐལ་བ་ནི་བད་ཀན་རི་ཐང་མཚམས།། བསིལ་དྲགས་ཕོ་བའི་མེ་ཤི་གྲང་ཆུར་འགྱུར།། ངོ་བོ་རླུང་ཁྲག་ཆུ་སེར་འདུས་པའི་ནད།། ཆུ་མིག་རྙོགས་སམ་བྱེ་ཆབ་གཡོས་པ་བཞིན།། བཅོས་ཉེས་རྙོགས་ཕྱིར་རྙོགས་ཚད་མིང་དུ་བཏགས།། འཇུག་སྒོ་དྲུག་ཞུགས་ལུས་ཀུན་ཁྱབ་པར་བྱེད།། དེ་ལ་དབྱེ་བ་སྤྱི་དང་བྱེ་བྲག་གཉིས།། སྤྱི་ལ་ཚ་བས་རྙོགས་དང་གྲང་རྙོགས་གཉིས།། རྒྱུ་རྐྱེན་དག་གིས་ནད་སྟོབས་ཆེ་ཆུང་ཡིན།། བྱེ་བྲག་ལྤགས་ལ་གྲམ་དང་ཤ་ལ་རྒྱས།། རྩ་རུ་འགྲིམས་དང་རུས་ལ་ཞེན་པ་དང་།། དོན་ལ་བབས་དང་སྣོད་དུ་ལྷུང་བ་དྲུག། རྟགས་ལ་སྤྱི་དང་བྱེ་བྲག་རྣམ་པ་གཉིས།། སྤྱི་རྟགས་ཚ་རྙོགས་ཆུ་དམར་རྒྱ་བཤལ་འདྲ།། རྩ་རྒྱུད་ཕྲ་ལ་མགྱོགས་ཤིང་གཏིང་ན་རྒྱུག། གདོང་པ་སེར་སྦོས་ལྕེ་སྙིལ་སེན་བཀྲག་འཆོར།། འགུལ་ན་རྔམ་པ་རྒོད་ལ་གློ་སྙིང་འཕར།། ཤེད་ཆུང་རྔུལ་ཁ་སྙི་ལ་ཁ་ལྕེ་སྐམ།། གཉིད་ཆེ་གློ་མང་མིག་ལྕིབས་རྐང་བོལ་གཡོ།། ལུས་པོ་བརྩེ་ཞིང་རོ་སྟོད་གཟེར་ཕྲན་འོང་།། ནད་སྟོབས་ཆེ་ན་དོན་ལ་རྣག་ཆུ་གསོག། ཁྱད་པར་རྔུལ་བརྩེ་སྣ་ཁྲག་གཡོ་བ་ཡིན།། གྲང་རྙོགས་རྩ་རྒྱུད་ཕྲ་ཞིང་སྟོང་ལ་མགྱོགས།། ཆུ་མདོག་དམར་སེར་རྙོག་ཅིང་གདོང་པ་སྦོ།། བྲང་དང་གསུས་པ་ངར་གདོང་རྐང་བོལ་གཡོ།། ལྕེ་དང་རྙིལ་སྐྱ་ལུས་རྔུལ་རྔམ་པ་རྒོད།། ཕོ་བ་རྫིང་ལ་ཁ་ཟས་འཇུ་སྟོབས་ཆུང་།། ནད་སྟོབས་ཆེ་ན་ཚ་ཆུར་འགྱུར་བ་ཡིན།། བྱེ་བྲག་ལྤགས་གྲམ་སྐྲ་དང་བ་སྤུ་འབྱི།། ཟ་འཕྲུག་ཆུ་རྐང་མེ་དབལ་ཤུ་ཐོར་ཡོང་།། ཤ་རྒྱས་ཁོལ་བུར་ན་ཞིང་འབར་འབུར་སྐྲངས།། དམར་སྲབ་བརྟོལ་ན་རྣག་ཁྲག་ཆུ་སེར་འཛག། རྩར་འགྲིམས་རྩ་རྒྱས་ནག་པོར་གསལ་བ་དང་།། རྩ་འཁྱུག་རྩ་སྟེང་སྐྲངས་ཤིང་ཡན་ལག་སྦྲིད།། རུས་ཞེན་ཤ་སྐམ་སྔོ་ལ་ཁོལ་བུར་ན།། གདོང་སྐྲངས་ཚིགས་ཁ་གཡོ་ཞིང་སྒྱིད་པ་འཁུམས།། སོ་དང་སེན་མོའི་བཀྲག་འཆོར་སྐྱ་གློག་འགྲོ།། གློར་བབས་དབུགས་ཐུང་སྐད་འཛེར་བྲང་རྒྱབ་གཟེར།། མིག་མཆུ་བོལ་སྐྲངས་དབུགས་རྒོད་རྣག་ཁྲག་ལུ།། སྙིང་བབས་འཐིབས་མྱོས་དྲན་ཉམས་གྲང་མོ་འདོད།། མཆིན་བབས་མིག་སེར་ལུས་ལྕི་དང་ག་འགག། ལྕེ་བཀྲ་རྙིལ་དཀར་ལུས་སྤྱི་སེར་པོར་འགྲོ།། མཆེར་བབས་གཡོན་གཟེར་མཆུ་སྐྲངས་སྦྲིད་པ་མང་།། མཁལ་བབས་རྐེད་པ་ན་ཞིང་རོ་སྨད་ལྕི།། སྣོད་དུ་ལྷུང་ན་དང་ག་འགགས་པ་དང་།། འཁྲུ་སྐྱུག་དྲི་མ་འགག་གམ་འཚིང་ཞིང་འགྱུང་།། གསོ་བའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་པའི་ཚུལ་དང་གཉེན་པོ་གཉིས།། བཅོས་ཚུལ་དང་པོ་རླན་ཆེན་བྱེ་མ་སྐམ།། བར་དུ་ཆུ་བོ་རྐ་རུ་དྲང་བ་དང་།། ཐ་མ་དགྲ་བོ་གཉེན་དུ་བཟླུམས་པས་བཅོས།། གཉེན་པོ་སྨན་དཔྱད་ཟས་དང་སྤྱོད་ལམ་བཞི།། དང་པོ་ཚ་རྙོགས་ཆུ་སེར་སྐེམ་པའི་སྨན།། སྡུད་ཐང་གསུམ་གྱིས་བྱེར་བ་བསྡུས་བྱས་ནས།། ཉི་ཤུ་རྩ་ལྔ་རུས་ཐང་འཕུལ་བཏང་བས།། ཚ་བ་འདུས་ཤིང་རླུང་ཁ་སྙོམས་པར་བྱེད།། དེ་ནས་ཙན་དན་དཀར་དམར་འབྲས་བུ་གསུམ།། བྲག་ཞུན་སྤོས་དཀར་སོ་མ་ར་ཛ་དང་།། བསིལ་གསུམ་པི་པི་ལིང་དང་ཀ་ར་སྦྱར།། སེང་ལྡེང་ཁུ་བས་འཕུལ་བས་ཆུ་སེར་སྐེམ།། དེ་རྗེས་གང་རྒྱས་རྩ་ཁ་མང་དུ་དབྱེ།། འབྲས་བུ་གསུམ་གྱི་རྒྱུན་སྦྱོངས་དག་པར་སྦྱང་།། གྲང་རྙོགས་དང་པོ་སེ་འབྲུ་ལྔ་པ་འམ།། ཅུ་གང་བདེ་བྱེད་ཆུང་ངུས་ཕོ་བ་བཟུང་།། དེ་རྗེས་ཐང་གིས་བསྡུས་ལ་རྒྱུན་སྦྱོངས་བྱ།། བཟང་དྲུག་ཆུ་སེར་སྨན་གསུམ་འབྲས་བུ་གསུམ།། ཤ་རུ་དུར་ཐོད་འགྲོན་བུ་ཚྭ་གསུམ་ཐལ།། སེ་འབྲུ་ལྔ་དང་ལྟག་སྤྲོད་ཆུ་སེར་སྐེམ།། ནད་སྟོབས་ཆེ་ན་དམུ་ཆུའི་སྦྱོངས་སྐེམས་བྱ།། ཐ་མར་ཆུ་སེར་ཚད་ལྷག་ཟུངས་སུ་སྒྱུར།། དེ་ཡི་སྦྱོར་བ་སྦྲང་ཆང་རྐྱང་ཁུག་གམ།། གཟེ་མ་སྲོ་ལོ་འབྲས་བུ་གསུམ་གྱི་ཆང་།། ཆུ་སེར་རླུང་མཁྲིས་བད་ཀན་གཞི་དང་བསྟུན།། འབའ་སམ་སྨན་མར་སྦྲང་དང་སྦྱར་ལ་བསྟེན།། དེ་ཡིས་ཆུ་སེར་ཁྲག་ངན་ཟུངས་ཁྲག་ཏུ།། དངུལ་ལ་གསེར་འགྱུར་རྩི་བཞིན་སྒྱུར་བར་བྱེད།། ཟས་དང་སྤྱོད་ལམ་རྙིངས་ཚད་ཇི་བཞིན་ནོ།། བྱེ་བྲག་ཤ་ལྤགས་གཉིས་ལ་བབས་པ་ལ།། མཆིན་མཆེར་རྩ་གཏར་འབྲས་བུའི་རྒྱུན་སྦྱོངས་བྱ།། ཆུ་ལྕག་བརྡེག་ཅིང་ཉི་ཤུ་རྩ་ལྔ་སྦྱར།། བ་སྤུའི་སྐྱི་ཁྲུས་རྔུལ་འདོན་མཆོག་ཏུ་བསྔགས།། ཙན་དན་ཆུ་སེར་སྨན་གཉིས་བ་ཆུ་བྱུག། རྩར་བབས་ཕྱི་རྩ་གཏར་ལ་ནང་རྩ་སྦྱང་།། ཙན་དན་དཀར་དམར་ག་དུར་དོམ་མཁྲིས་སོ་མ་ར་ཛ་ཅུ་གང་ལི་ཤི་ཨུཏྦལ་མཚལ་ཧོང་ལེན་ཀ་རབཅུ་པས་རྩ་ཡི་ཚ་བ་སྐེམ།། རུས་ཞེན་མི་རུས་བདུད་རྩིའི་རླངས་ལུམས་བྱ།། རྒྱུན་སྦྱོངས་སྐྱི་ཁྲུས་མཁལ་རྩ་གཏར་བ་དང་།། ཤིང་སྣ་བརྒྱད་པས་རུས་པའི་ཚད་པ་སྐེམ།། གློར་བབས་ཙན་དན་གི་ཝཾ་ཨ་ག་རུ།། ཅུ་གང་གུར་གུམ་ཤིང་མངར་རྒུན་འབྲུམ་དང་།། སྲོ་ལོ་སྤང་རྒྱན་འབུ་སུ་ཀ་ར་སྦྱར།། རྣག་མང་སྟར་བུ་པཉྪས་གྱེན་དུ་དྲངས།། རྗེས་ལ་ཉི་ཤུ་རྩ་ལྔས་རྣག་ཚད་སྐེམ།། ཚ་བ་ཆོམས་ནས་དམར་གསུམ་བསིལ་གསུམ་འདམ་བུ་ཤིང་མངར་ཀ་ར་སྦྲང་མར་གསར་གྱིལྡེ་གུ་སྦྱར།། སྙིང་བབས་ཨ་ག་རུ་དང་ཙན་དན་དཀར།། ཛཱ་ཏི་ཅུ་གང་གུར་གུམ་ལི་ཤི་དང་།། ཞོ་ཤ་སྐྱུ་རུ་ར་དང་ཀ་ར་སྦྱར།། དེ་རྗེས་གཏར་ལ་ཞོ་ཤ་ཙན་དན་གཉིས་ཨ་རུ་ར་གུར་གུམ་སྤོས་དཀར་ཀ་ར་སྨན་མར་སྦྱར།། དཀར་ནག་མཚམས་དང་དྲུག་པས་ནད་རྗེས་བཅད།། མཆིན་བབས་བྲག་ཞུན་གུར་གུམ་བདུན་པ་སྦྱར།། རུ་ཐུང་སྣོད་ཀ་གཏར་ཞིང་འཇམ་ཁྲུས་བྱ།། མཆེར་བབས་གུར་གུམ་སེ་འབྲུ་ལྟག་པ་སྤྲད།། རྗེས་ལ་ཕོ་གསང་ཚིགས་པ་བཅུ་གཅིག་བསྲེག། མཁལ་བབས་གུར་གུམ་ཏིག་ཏ་སྐྱུ་རུ་འཇམ་འབྲས་གླ་རྩི་ཤུག་ཚེར་ཙན་དན་ཀ་རབདུན་དང་བྲག་ཞུན་ཏིག་ཏ་གླ་རྩི་སྤོས་དཀར་སོ་མ་ར་གུར་གུམ་ཤུག་ཚེར་སྤང་རྩི་ཀ་རབརྒྱད།། རྗེས་ལ་གཏར་ལ་རྩ་ནག་བཅུ་བཞི་བསྲེག། སྦྲང་ཆང་རྐྱང་ཁུག་བཤུལ་ཤས་མཁལ་ཟུངས་གསོ།། སྣོད་ལྷུང་བཤལ་བྱ་ཅུ་གང་བདེ་བྱེད་སྦྱར།། ཚ་བ་ཆེ་ན་གུར་གུམ་གསེར་མེ་ཏོག། དོམ་མཁྲིས་ཏིག་ཏ་བྲག་ཞུན་ཨ་རུ་ར།། གླ་སྒང་ཀ་ར་སྦྱར་བས་སྣོད་ཚད་སེལ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བ་རྙོགས་པ་བཅོས་པའི་ལེའུ་སྟེ་ཉི་ཤུ་པའོ།། །།

X