//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་གཅིག་པ། འགྲམས་ཀྱི་ཚ་བ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 10:51:45 ཀློག་གྲངས། 9 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། འགྲམས་ཀྱི་ཚ་བའི་རྒྱུ་རྐྱེན་ངོ་བོ་གང་།། འགྲམས་ཀྱི་ཚ་བའི་མིང་དུ་ཅིའི་ཕྱིར་བཏགས།། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། འགྲམས་ཚད་རྒྱུ་ནི་ནད་དང་ལུས་ཟུངས་ལ།། དེ་རྐྱེན་ལུས་ཀྱི་བྱ་བ་དྲག་ཤུལ་གྱིས།། བང་མཆོངས་རྩལ་དང་ཕ་བོང་འདེགས་པ་དང་།། མི་ཐེག་ཁུར་དང་གཞུ་སྲན་བཀང་བ་དང་།། ས་སྲན་བརྐོས་དང་གཡང་ལྷུང་རྟ་ཡིས་བརྡབས།། ཐིབས་འོག་ཚུད་དང་རྡོ་དབྱུག་བརྡུངས་པ་ཡིས།། ལུས་ཟུངས་འགྲམས་པས་ཁྲག་འཁྲུགས་མཁྲིས་ཚད་བསླང་།། དེ་ཕྱིར་འགྲམས་ཀྱི་ཚ་བ་ཞེས་སུ་བརྗོད།། དབྱེ་བ་ནང་གི་དོན་སྣོད་འགྲམས་པ་དང་།། ཕྱི་ཡི་ཡུལ་བཞི་འགྲམས་པ་རྣམ་པ་གཉིས།། དང་པོ་དོན་ལྔ་སྣོད་དྲུག་འགྲམས་པ་དང་།། ཡུལ་ནི་ཤ་རུས་རྩ་དང་ཆུ་རྒྱུས་བཞི།། འགྲམས་པའི་རྟགས་ལ་སྤྱི་དང་བྱེ་བྲག་གཉིས།། སྤྱིར་རྟགས་གང་འགྲམས་ན་ཞིང་གཟེར་ཟུག་ལྡང་།། རྩ་ནི་ཕྲ་ལ་གྲིམས་ཏེ་ཆུ་དམར་དུགས།། གདོང་སྣུམ་རྔམ་འདེགས་ལུས་ཀྱི་བྱ་བ་དཀའ།། བྱེ་བྲག་སྙིང་འགྲམས་ཁ་ལྐུགས་འགུལ་ན་འབོག། དྲན་པ་མི་གསལ་གཉིད་ལོག་སད་ཚེ་དངང་།། ནུ་མཆན་སོགས་དབྲག་གཟེར་ལ་མིག་རྩ་ཧར།། སྲོག་རྩར་འགྲམས་ན་མིག་ཧར་ཕུ་ཡིས་འདེབས།། དྲན་པ་མི་གསལ་ཟུག་ཆེ་ས་ལ་འབྲད།། གློ་འགྲམས་རོ་རྒྱབ་ལྕི་ཞིང་ཉལ་མི་ཤེས།། སྣ་འབུད་དབུགས་མི་བདེ་ལ་གྲེ་བ་ཤུ།། གློ་ལུ་མི་ཤེས་ཐལ་གོང་མནན་སྙམ་བྱེད།། བྲང་དང་རྒྱབ་ཏུ་གཟེར་ལ་དགྱེ་དགུ་དཀའ།། ལུད་པ་འགོགས་དཀའ་ཁྲག་དང་རྣག་ཏུ་ལུ།། མཆིན་འགྲམས་རྩིབ་སྒང་མཆིན་སྣར་གཟེར་ཞིང་ན།། ལུད་པ་ཁྲག་ཏུ་ལུ་ཞིང་སྣ་ཁྲག་འཛག། གློ་སྙིང་མི་བདེ་སྟོད་རྒྱངས་དབུགས་ཀྱིས་འདེག། མིག་སྤྲིན་དམར་ལ་མི་གསལ་ཕོ་བ་སྒང་།། མཆིན་དྲིར་འགྲམས་ན་ཤ་སྔོ་རོ་སྟོད་རྒྱངས།། གློ་སོར་འགུལ་ན་སྙིང་རྡུང་འགྲོ་མི་ནུས།། ལུས་པོ་གྱོང་ལ་ཉུང་བསྲེགས་གཅུས་པ་འདྲ།། མིག་དམར་མཆིན་དྲི་འཁོར་ལ་རྩེ་ཆུང་རྒྱངས།། མཆེར་འགྲམས་ཕོ་སྟོད་སྦོ་ཞིང་གཡོན་ངོས་གཟེར།། གདོང་པ་དྲོ་བོ་སྦོ་འཁྲོག་སྐབས་སུ་འཁྲུ།། གཡོན་ངོས་རྩིབ་སྒང་རྩིབ་སྣར་གཟེར་ཞིང་འཕྲིག། མཁལ་འགྲམས་ཚང་ར་མི་ཐེག་དགྱེ་དགུ་དཀའ།། མཁལ་ཁུང་སྣེ་ས་དཔྱི་མིག་བརླ་སྒང་ཟུག། འབྲས་བུ་སྐྲངས་ཤིང་དྲི་ཆུ་ཁྲག་ཏུ་འཛག། ཕོ་བར་འགྲམས་ན་སྒྲེག་པ་དྲག་པོ་འོང་།། ཕོ་སྟོད་སྦོ་འཁྲུག་ཟས་སྐོམ་ཅི་ཟོས་སྐྱུག། གླང་ཐབས་ཕོ་བ་བསྒངས་ནས་ཉལ་མི་ཤེས།། ལོང་འགྲམས་ལོང་ཕུགས་གཟེར་སྒང་སྦོ་འཁྲོག་མང་།། གློ་འདེག་རོ་སྟོད་གང་ཞིང་གྲང་སྙམ་བྱེད།། དབུགས་ངན་རྗེས་ལ་ཕྱི་ས་མི་ཐུབ་འཆོར།། རྒྱུ་མར་འགྲམས་ན་ཚ་འབྲབ་འཁྲིལ་སྙམ་བྱེད།། སྣེ་སར་ལྷུང་སྙམ་ཆུ་སྡོམ་རྒྱུ་གླང་ལྡང་།། མཁྲིས་འགྲམས་མིག་སེར་ཤ་སྔོ་མགོ་བོ་ལྕི།། མཆིན་པ་སྐྲངས་སྙམ་མཁལ་མ་མཆིན་དྲི་ན།། རོ་སྟོད་གང་སྙམ་ཆུ་དམར་གླང་ཐབས་འོང་།། ལྒང་པར་འགྲམས་ན་རྒྱུ་ཞབས་མཁལ་ཁུང་ན།། ཆུ་ཁ་སྙི་ཞིང་སྣེ་ས་ཚ་འབྲབ་བྱེད།། བསམ་སེར་འགྲམས་ན་དཔྱི་མིག་བརླ་སུལ་ན།། སྟ་ཤ་ཆད་སྙམ་བྱེད་ཅིང་ལང་མི་ཤེས།། རྐང་པ་བཤལ་སྦྲིད་ཚང་ར་འབྲེལ་མཚམས་ན།། སྐབས་སུ་དྲི་ཆུ་སྡོམ་པ་སྙམ་དུ་བྱེད།། ཕྱི་ཡི་ཤ་འགྲམས་ཉྭ་དང་ཤ་གཞན་གཉིས།། ཉྭ་འགྲམས་ཉྭ་སྣ་སྐྲངས་ཤིང་བྱ་བ་ཉམས།། ཤ་གཞན་རྡུངས་སྙམ་བྱེད་ཅིང་ན་དམར་སྐྲངས།། རུས་ལ་ཚིགས་རྐང་མགོ་སྲུབས་རྩིབ་མ་བཞི།། ཚིགས་འགྲམས་འགུལ་དཀའ་ཟུག་ཆེ་གོང་འོག་སྐྲངས།། རྐང་འགྲམས་འགུལ་དཀའ་གཏིང་ནས་ལྷང་ལྷང་བྱེད།། སྲུབས་འགྲམས་དྲན་པ་མི་གསལ་སྐྱུག་ཅིང་འཁྱོམ།། རྩིབ་མར་འགྲམས་ན་ཟུག་ཆེ་མནན་མི་བཟོད།། རྩ་ལ་མགོ་དང་བྱང་ཁོག་ཡན་ལག་གསུམ།། མགོ་ཡི་རྩ་འགྲམས་རྩ་རྒྱུད་ཁྲིད་ཅིང་ན།། རྩ་སྟེང་སྐྲངས་ཤིང་རྩ་འབྲུམ་འབྱུང་བ་ཡིན།། བྱང་ཁོག་རྩ་འགྲམས་གློ་ལུ་གང་འགྲམས་གཟེར།། ཚ་བ་སྐྱེ་ཞིང་སྐྲངས་རྗེས་རྣག་ཏུ་འགྱུར།། ཡན་ལག་རྩ་འགྲམས་རྩ་ཡི་རྒྱུད་ཀུན་སྐྲངས།། དམར་ཞིང་ཚ་འཁྱུག་བརྐྱང་བསྐུམ་བྱ་བ་དཀའ།། ཆུ་རྒྱུས་འགྲམས་པ་དགྱེ་དགུ་མི་ཤེས་སྐྲངས།། ཆུ་བ་རྒྱབ་ཡིན་རྒྱུས་པ་མདུན་ན་གནས།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་ཐབས་སྨན་དཔྱད་ཟས་སྤྱོད་བཞི།། དང་པོ་ཐང་སྦྱོར་ཧོང་ལེན་བ་ཤ་ཀ། སྤང་རྩི་ཀྱི་ལྕེ་རྣམ་པར་བཙོད་དང་དྲུག། ཚ་བའི་སྟོབས་སྦྱར་གཉིས་བཞི་དྲུག་བསྡེབས་ལ།། བསྡུས་གྲངས་ཁུ་བས་འགྲམས་ཚད་འཇོམས་པར་བྱེད།། ཡང་ན་སྐྱེར་པ་མཚེ་ལྡུམ་སེང་ལྡེང་བཙོད།། བསྡུས་གྲང་འགྲམས་ཚད་ཀུན་ལ་བདུད་རྩི་འདྲ།། ཕྱེ་མ་ཚ་བ་རབ་འབྲིང་བྱེ་བྲག་གིས།། ག་པུར་ཙན་དན་གུར་གུམ་གཙོ་བོ་ལ།། དོམ་མཁྲིས་ག་དུར་རྣམ་པར་ཨ་རུ་ར།། ཨ་བྱག་སྟབ་སེང་ཀ་ར་དྲུག་འགྱུར་སྦྱར།། རྗེས་ལ་འབྲས་བུ་གསུམ་དང་དམར་པོ་གསུམ།། སེང་ལྡེང་རྩ་བ་ལྔ་ལ་སོགས་པ་ཡི།། གང་འཕྲོད་སྨན་མར་སྦྱར་བས་ཕྱི་རྗེས་བཅད།། དཔྱད་དུ་གཏར་བཤལ་དུགས་ལུམས་མས་བཏང་དང་།། ཆུ་ལྕག་ཕྱི་ནང་འགྲམས་ལ་མཁས་པས་སྦྱར།། ཁ་ཟས་སྤྱོད་ལམ་བསིལ་ཞིང་དལ་བར་བྱ།། རྟས་བརྡབས་གཡང་དུ་ལྷུང་དང་ཐིབས་འོག་ཚུད།། བྱང་ཁོག་འགྲམས་ནས་ཚ་བ་རྒྱས་པ་ལ།། ག་བུར་བདུན་དང་དགུ་པ་སྦྱར་བར་བྱ།། རྔུལ་དབྱུང་གང་རྒྱས་རྩ་གཏར་བཤལ་གྱིས་སྦྱང་།། བྱེ་བྲག་བཅོས་པ་སྙིང་འགྲམས་གཙོ་བོ་བཞི།། ཨ་གར་དགུ་དང་ཛཱ་ཏི་ཅུར་ནིས་སྦྱར།། སྙིང་རྩ་ཀུན་གཏར་དབེན་གནས་མི་བསྐུལ་བསྙལ།། བསིལ་བསྟེན་ཆང་སྤང་རྗེས་ལ་དྲུག་བདུན་བསྲེག། སྲོག་རྩ་འགྲམས་པའི་བཅོས་ཐབས་སྙིང་དང་འདྲ།། ཁྱད་པར་སྤྱི་གཙུག་རྐང་མཐིལ་གཏར་ལ་བསྲེག། གློ་འགྲམས་ག་དུར་གསུམ་པའི་ཐང་བཏང་ལ།། ག་པུར་གསུམ་དགུ་ཅུ་གང་ལྔ་པ་སྦྱར།། ཚ་བའི་ཤུགས་སྦྱར་གཏར་གྱིས་ཟུག་གཟེར་བཅག། རྣག་ཏུ་ལུ་ན་སྲིན་བྱའི་ཀླད་པ་བཏང་།། བ་རའི་འོ་མ་དྲོན་མོ་ལྟོ་སྟོང་བླུད།། ཚ་བ་བྲི་ནས་སྲོ་ལོའི་བསིངས་ཆང་དང་།། ཅུ་གང་ལྡེ་གུ་སྦྱར་ལ་ཚད་རོ་བཅག། རྗེས་ལ་བཞི་ལྔ་བྲང་སྐས་ཆེ་ཆུང་བསྲེག། མཆིན་འགྲམས་ཐོག་མར་ག་པུར་དགུ་པ་སྦྱར།། རྗེས་ལ་གུར་གུམ་གཡུ་རྙིང་ཏིང་སག་ཀྱུར།། ར་མར་སྦྱར་བསྐོལ་རླངས་ཡལ་ཁོང་དུ་བཏང་།། རྩེ་ཆུང་རུ་ཐུང་མཁྲིས་རྩ་རིམ་པས་གཏར།། དེ་རྗེས་དགུ་པ་མཆིན་པའི་ཟུར་གསང་བསྲེག། མཆིན་དྲི་དེ་བཞིན་རྗེས་ལ་རྩ་ལྟོས་སྦྱངས།། རྩིབ་བཞིའི་སྟེང་དང་བརྒྱད་པ་ཁ་གསུམ་བསྲེག། འབྲས་བུའི་སྨན་མར་སྦྲང་རྩི་བུར་ལྡན་བསྟེན།། མཆེར་འགྲམས་བཟང་དྲུག་ཤིང་ཚ་མོན་ཆ་ར།། ག་དུར་དོང་ག་པི་པི་ལིང་དང་ནི།། ཀ་ར་སུམ་འགྱུར་ཆུ་སྐོལ་འཕུལ་ལ་བཏང་།། སྲིན་ལག་རྒྱབ་རྩ་རྟ་མཐུར་གཉིས་ལ་གཏར།། དེ་ནས་རྒྱམ་ཚ་ཚ་ལ་ལྕེ་མྱང་ཚ།། ཀ་ར་མར་སྦྱར་ཕོ་མཆེར་གསང་ལ་བསྲེག། མཁལ་འགྲམས་དང་པོ་ཙན་དན་གུར་གུམ་སུག་སྨེལ་གླ་རྩི་འཇམ་འབྲས་རུ་རྟ་ཨ་རུབདུན་པ་སྦྱར།། བར་དུ་ཞོ་ཤའི་ཕྱེ་མ་བྱིན་ལོང་གཏར།། ཐ་མ་ཤུག་སྐྱེར་པ་སྤ་འབྲུ་གཟེ་མ་ལྕམ་པ་བ་སྤུ་བ་རའི་མར་ལ་སྡིག་སྲིན་གུར་གུམ་བུ་རམཔའི་མར་སྦྱར་དུགས་ལུམས་བྱ།། རྗེས་ལ་ཟས་སྐོམ་དྲོད་བསྟེན་མཁལ་གསང་བསྲེག། ཕོ་བར་འགྲམས་ན་སྤྱང་ཚེར་ཆིག་སྐྱུགས་བྱ།། མཆེར་འགྲམས་འོལ་སེ་སོ་ཆ་འོ་སྦྱར་བཏང་།། རྒྱམ་ཚ་ཚ་ལ་ལ་ཕུག་ས་བོན་དང་།། ཅོང་ཞི་ཚ་གསུམ་སྦྲང་ལ་རིལ་བུ་སྦྱར།། རུ་ཐུང་སྣོད་ཀ་གུང་སྲིན་བར་རྩ་གཏར།། རྗེས་ལ་ཕོ་གསང་མདུན་རྒྱབ་རིམ་པས་བསྲོ།། ལོང་འགྲམས་ཤིང་ཀུན་ཁ་རུ་ཚ་དང་ནི།། པི་པི་ལིང་གི་བསྐོལ་གྲངས་ཐང་དུ་བཏང་།། ཡང་ན་ལ་ཕུག་ས་བོན་ཁ་རུ་ཚ།། ཤིང་ཚ་བུ་རམ་ཆང་ངམ་ཕྱེ་མ་ཤིང་ཀུན་ཅུར་ནིསསྦྱར།། ལོང་རྩ་གཏར་ཞིང་གུར་གུམ་ཨ་རུ་དབྱི་མོང་བསྡུས་ཁུར་དུར་བྱིད་བཏབ་པའིབཤལ་གྱིས་སྦྱང་།། སྐབས་སུ་འདྲེན་བྱ་རྗེས་ལ་ལོང་གསང་བསྲེག། རྒྱུ་མར་འགྲམས་ན་གུར་གུམ་པི་ལིང་དུར་བྱིད་མར་བུ་རམ་སྦྱར་བའིབཤལ་གྱིས་སྦྱང་།། ལོང་རྩ་རྒྱུ་མའི་རྩ་གཏར་ལྕུམ་རྩ་ལྕེ་མྱང་ཚ་མར་གྱིརེང་བུ་བྱ།།ཚ་དུགས་བྱ་ཞིང་རྗེས་ལ་བཅུ་བདུན་བསྲོ།། མཁྲིས་འགྲམས་ཏིག་ཏའི་ཐང་བཏང་ག་དུར་བཟང་དྲུག་གསེར་མེ་མི་དོམ་སྦྲུལ་གྱིམཁྲིས་ཕྱེ་སྦྱར།། མཁྲིས་རྩ་ཀུན་གཏར་པ་ཏོ་ལ་ཡིས་སྦྱང་།། རྗེས་ལ་ཚིགས་པ་བཅུ་པ་བསྲེག་པར་བྱ།། ལྒང་པར་འགྲམས་ན་མཁལ་མའི་བཅོས་དང་འདྲ།། སྐབས་སུ་ཆུ་སྨན་བསྟེན་ཞིང་བཅོ་བརྒྱད་བསྲེག། དཀུར་འགྲམས་མཁལ་མའི་བཅོས་འདྲ་བྱིན་ཀྱོག་གཏར།།བཀྲུ་འཇམ་བཏང་ཞིང་བཅུ་གསུམ་དཔྱི་སྟེང་བསྲེག། དེ་ནས་ཕྱི་ཡུལ་འགྲམས་པ་བཅོས་པ་ནི།། ཉྭ་འགྲམས་ཉྭ་སྣ་ཨ་ས་འབའ་ཆས་བདུག། གང་ཉེའི་རྩ་གཏར་རྣག་ཤོར་སྤྱི་དང་འདྲ།། ཤ་འགྲམས་ལུམས་གཏར་དེ་བཞིན་དེབ་ཏུ་བཙལ།། ཚིགས་འགྲམས་དྲོད་བཅས་སྐྲངས་དམར་ཆུ་ལྕག་བརྡེག། མཚན་མོ་བྱེ་རློན་བ་ལྕིའི་ལུམས་སུ་གཞུག། སྐབས་སུ་ཕྱིང་བ་ཆུར་བཅུག་ཚིགས་ཁ་བསྡམ།། གང་རྒྱས་རྩ་གཏར་རྗེས་ལ་ཕྱིང་དེབ་བཏང་།། དྲོད་མེད་ན་ཚ་ཆུང་ཞིང་སྐྲངས་པ་གསོབ།། ཕྱིང་པ་སྣུམ་ལྡན་གླན་ལ་ཆུ་རྡོས་བདུག། ཨ་ས་འབའ་དུགས་རྗེས་ལ་དེབ་ཏུ་བཙལ།། དང་པོ་དལ་ལ་ཕྱི་དུས་བཅགས་པ་ཕན།། རྐང་འགྲམས་སྐྱ་སྦྱོར་བྱས་ལ་ཕྱིང་དེབ་བཅིང་།། སྲུབས་འགྲམས་རྒྱ་ཆིངས་ཚན་རྡོ་མེ་བཙའ་དང་།། རྩིབ་མ་སྒྲོག་རུས་ཆག་འགྲམས་སྣུམ་ནན་བྱ།། ཆག་ཚབས་ཆེ་ན་བསྲེགས་རྗེས་ཆས་སུ་གཞུག། མགོ་བོའི་རྩ་འགྲམས་སྤང་རྩི་བ་ཤ་ཀ། སྟབ་སེང་སྐྱུ་རུའི་ཐང་རྗེས་གར་འགྲམས་གཏར།། འབྲུ་སྣ་བདུད་རྩི་ལྔ་ཡིས་རྒྱ་ཆེར་བདུག། སྡུད་སྒོ་རྩ་སྒོ་གར་འཁྱུག་མེ་ཡིས་མནན།། བྱང་ཁོག་རྩ་འགྲམས་ག་དུར་བ་ཤ་ཀ། ཏིག་ཏ་སྐྱུ་རུའི་ཐང་རྗེས་གོང་བཞིན་གཏར།།གང་གཟེར་དུགས་དང་བདུད་རྩིའི་རླངས་ལུམས་བྱ།། ཡན་ལག་རྩ་འགྲམས་དུགས་དང་མེ་ཡིས་མནན།། སྟབ་སེང་སྐྱུ་རུ་ཧོང་ལེན་བ་ཤ་ཀ། ཀྱི་ལྕེ་དཀར་པོའི་ཐང་བཏང་གང་ཉེ་གཏར།། མདོར་བསྡུས་ཁྲག་རྩ་གཏར་ལ་འཕར་རྩ་བསྲེག། ཧོང་ལེན་ཏིག་ཏ་ཀྱི་ལྕེ་ཞོ་སྦྱར་མནན།། ཆུ་རྒྱུས་འགྲམས་ན་སུག་པ་ཉེ་ཤིང་པ།། མཁན་པ་བུལ་ཏོག་ཕབས་སྦྱར་ཆུ་འཇམ་བསྲོ།། བཟོད་ཚད་ཆུར་སྦང་བདུད་རྩིའི་རླངས་ལུམས་བྱ།། ཆང་དང་ལོ་མར་བསྐུ་མཉེ་མེ་ཉིས་བསྲོ།། གླ་སྒང་ཐལ་བ་དོམ་མཁྲིས་རྡོ་རྒྱུས་དང་།། མཐིང་ཤུན་བག་ཕྱེ་སྦང་གར་རྒྱུས་པའི་ཤ། ཚྭ་ཁུ་སྦྱར་བྱུགས་ཕྱིང་དེབ་བཏང་ལ་བཅོས།། མདོག་དམར་སྐྲངས་དང་དྲོད་ཆེ་གང་ཉེ་གཏར།། སྦོས་ན་ཆུ་སྒོ་དབྱེ་ཞིང་རྔབས་རྭས་དྲང་།། ཙོག་གེ་མི་བཞག་དལ་བུས་བརྐྱང་བསྐུམ་བསླབ།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འགྲམས་ཀྱི་ཚ་བ་བཅོས་པའི་ལེའུ་སྟེ་ཉི་ཤུ་གཅིག་པའོ།། །།

X