//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་བཞི་པ། འབྲུམ་པའི་རིམས་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:28:21 ཀློག་གྲངས། 7 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། འབྲུམ་བུའི་རིམས་ལ་རྒྱུ་རྐྱེན་མཚན་ཉིད་དང་།། དབྱེ་བ་རྟགས་དང་བཅོས་ཐབས་ཇི་ལྟར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།།འབྲུམ་པའི་རིམས་ནི་སྤྱི་དང་འདྲ་བ་ལ།། ངོ་བོ་ཚ་བ་ཆུ་སེར་ལ་བབས་ནས།། རུས་རྐང་ལྷ་བའི་གཏིང་ནས་སྐྱེ་བར་བྱེད།། ཐོར་པའམ་འབྲུམ་བུ་འོང་ཕྱིར་མིང་དུ་བརྗོད།།དབྱེ་བ་ནག་པོ་དཀར་པོ་རིགས་གཉིས་ཏེ།། ནག་པོའི་རིགས་གསུམ་སྐྲངས་པ་གླང་གཉའ་དང་།། ཁྲག་སྐམ་རྩེལ་ཏེ་ཟངས་གཟེར་སྦུ་གུ་ཅན།། དཀར་པོའི་རིགས་གསུམ་ཤ་ར་སྐྱ་ཤར་དང་།། རྨོག་མགོ་སྤྱི་ཟླུམ་སིབ་བུ་ཀོབ་ཙེའོ།། དེ་ཡི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་ཚིགས་གཞི་ན་ལ་གྲང་ཤུམ་བྱེད།། ལུས་སྤྱིར་སྙོམ་ལ་དང་ག་མི་བདེ་ཞིང་།། ཁ་ཁ་ཟ་ཟི་འོང་ལ་སྒྱིད་པ་སྐྱུར།། ཁྱད་པར་མགོ་བོ་ན་ཞིང་གློ་སྙིང་བརྡུང་།། ཤ་མདངས་དམར་ལ་མཐུག་ཅིང་ལུས་ཀུན་བརྩེ།། མཁྲིས་པ་སྐྱུག་ཅིང་རུས་རྐང་འཆག་སྙམ་སེམ།། དང་པོ་མ་སྨིན་མངོན་ཚུལ་དེ་ལྟར་འབྱུང་།། བར་དུ་འབྲུམ་པ་ཕྱིར་ཐོན་བདེ་སྙམ་བྱེད།།ཐ་མ་བྱེ་བྲག་རྟགས་ལ་དཀར་ནག་གཉིས།། ནག་པོའི་རིགས་ལ་སྐྲངས་པ་གླང་གཉའ་ནི།། ཕྱི་རུ་མི་ཐོན་ཟུག་ཆེ་ལུས་ཀུན་སྐྲངས།། ཆུ་སེར་ནག་པོ་ཉེས་ཀུན་འདུས་ལས་བསྐྱེད།། ཁྲག་སྐམ་རྩེལ་ཏེ་ཤིག་ནི་དམར་ནག་མཐུག། ཟངས་གཟེར་སྦུ་གུ་ཅན་ནི་དཀྱིལ་དུ་ཀྱོང་།། དེ་གཉིས་ཁྲག་དང་མཁྲིས་པ་ལས་གྱུར་ཡིན།། ཁྱད་པར་མགོ་ན་རྩ་ཆུ་ཕྱི་ཡུལ་ཚ།། དཀར་པོ་རྨོག་མགོ་སྤྱི་ཟླུམ་ཆེ་ལ་འཆོལ།། ཤ་ར་སྐྱ་ཤར་དཀར་ལ་མཐུག་པ་སྟེ།། སིབ་བུ་ཀོབ་ཙེ་ཙམ་ཙེམ་མཐུག་ཀོབ་འབྱུང་།། བད་རླུང་ལས་གྱུར་ནད་ཟུག་ཆམ་པ་འདྲ།། ཚད་པའི་རྟགས་ཆུང་མ་ལོག་བཅོས་མི་དགོས།། དེ་དག་བཅོས་ཐབས་སྤྱི་དང་བྱེ་བྲག་གཉིས།། སྤྱི་བཅོས་དང་པོ་མ་སྨིན་སྤུ་སྒོ་དབྱེ།། ནད་རྒྱས་ཚ་བ་ཁོང་ནས་ཕྱིར་ལ་དབུལ།། ཁོང་ཤོར་ཕྱིར་དྲང་ཐ་མ་འབྲུམ་རྗེས་གསུབ།། དང་པོ་སྒོ་དབྱེ་སླེ་ཏྲེས་འབྲས་བུ་གསུམ།། ཏིག་ཏ་བ་ཤ་ཀ་དང་ལི་ག་དུར།། བསྡུས་ཐང་དྲོན་མོ་ཕུལ་གང་ཉི་ཕྱེད་བཏང་།། སྨན་ཞུ་རྔུལ་གདོན་བལ་དང་ཕྱེ་ཡིས་ཕྱི།། སྤུ་སྒོ་ཕྱེད་པས་འབྲུམ་པ་ཕྱིར་མྱུར་སྐྱེ།། ནད་སྟོབས་ཆེ་བ་རྣམས་ལ་ཐེངས་འགའ་བསྔགས།། འདི་དུས་དཔྱད་མཆོག་རྔུལ་ལས་ལྷག་པ་མེད།། ཆག་ཚེ་ཕྱེ་ཐུག་འོ་མ་བཏབ་པ་དང་།། འོ་ཟན་དར་གསར་ཆུ་སྐོལ་ཆབ་ཚ་བསྟེན།། ཉིན་ནུབ་མ་ལུས་མི་བསེང་དྲོད་ལ་སྒོར།། གྲང་དང་བསེར་བུས་ཕོག་ན་འབྲུམ་པ་ལྡོག། བཅུད་ཤོར་འབྲུམ་པ་མི་སྐྱེ་དོན་ལ་འབབ།། གལ་ཏེ་ཤོར་ན་སྲན་ཁུ་སྲན་ཚོད་སྦྱིན།། དེ་རྗེས་ཚ་བ་འཕུལ་ལ་ཐང་ཕྱེ་གཉིས།། དང་པོ་ལུག་ཆུང་སྒང་ཐོག་ལུག་ཤོའི་ཐང་།། གཡེར་ཤིང་ཐང་གིས་འབྲུམ་པ་ཕྱིར་ལ་འཕུལ།། ཕྱེ་མས་ཚ་བ་འཕུལ་ལ་རྡོ་རྩི་གཉིས།། རྩི་སྦྱོར་ཙན་དན་གི་ཝཾ་ཨ་རུ་ར།། ཛཱ་ཏི་ཅུ་གང་གུར་གུམ་གླ་རྩི་དང་།། བསེ་རུ་ཀ་ར་སྦྱར་ལ་གངས་ཆུས་དབུལ།། རྡོ་སྦྱོར་རྒྱལ་པོ་སྡེ་བཞི་མཚལ་དཀར་དང་།། གླ་རྩི་ཚ་ལ་ཀར་སྦྱར་ཆང་གིས་དབུལ།། ཐུན་གྲངས་ཐུན་ཚད་ཚ་བ་ནད་སྟོབས་དཔག། རྩི་ཡིས་དོན་སྣོད་ཚ་བ་སེལ་བར་བྱེད།། རྡོ་ཡིས་ཆུ་སེར་སྐེམ་ཞིང་ཕྱིར་ལ་འཕུལ།། ནད་སྟོབས་ཆེ་ན་རྡོ་རྩི་ལྟག་སྤྲོད་མཆོག། འབྲུམ་བུ་མ་ཐོན་ལུས་སྐྲངས་གྲང་ཤུམ་བྱེད།། ནད་འབྲས་ཤིང་མངར་འོ་མར་བསྐོལ་བ་བྱུག། འབྲུམ་པ་སྐྱེ་འཕྲོ་ནང་དུ་ལོག་པ་འམ།། འབྲུམ་རྫོགས་སླར་ལོག་ཁོང་ནས་ཕྱིར་དྲང་བ།། འཛིམ་པ་ནས་ཙམ་ཀར་སྦྱར་ཁོང་དུ་བཏང་།། རྔུལ་དབྱུང་དེ་རྗེས་རྡོ་རྩི་གང་རུང་ལ།། དངུལ་ཆུ་བཞི་ནམ་བསྣན་ལ་ལྟག་པ་སྤྲད།། ཐུན་བསྐྱེད་དྲུག་ཡར་བཏང་བས་ཕྱིར་འཕུལ་བྱེད།། འབྲུམ་པ་རྫོགས་ནས་ཤི་བ་ཕལ་དུ་མེད།། ཐ་མར་ནད་འགོ་ཆོགས་ནས་རྗེས་བསུབ་པ།། འབྲུམ་པའི་ཤུ་བ་རྣག་ཅིང་རླན་ཆེ་ན།། ཤ་རུ་ཕུར་ཡོག་དྲེས་མའི་ཐལ་བ་དང་།། ལྕི་བ་སེར་ཀའི་ཐལ་བ་བཏབ་པས་སྐེམ།། མཐིལ་བཞིར་ཐོན་དང་སྔོན་མ་ཕལ་ཆེར་སྐམས།། གཉིད་ཆུང་གཡལ་མང་ལུས་འདར་ཤེས་པ་ཡང་།། རྩ་ཆུའི་ཚ་བ་བྲི་ནས་ཁ་ཟས་གློད།། ཞུན་མར་གསར་འཇམ་ཤ་གསར་མར་གསར་སྦྲང་།། དང་པོ་བྲིད་ལ་ཐ་མར་ལྷུག་པར་བཏང་།། ཆང་མངས་རྣགས་ཏེ་འབྲུམ་ཤུལ་ཟ་བས་ན།། ཁ་ངོམས་ཙམ་ལས་ཡོག་འཐུང་སྤང་བར་བྱ།། འདི་མན་ཁ་ཟས་བཟང་ན་བསྲོངས་པ་སྐྱེན།། གདོང་པའི་ཤུ་བ་གོགས་ནས་དྲི་ཆུས་བཀྲུ།། ར་ཕག་ཚིལ་བུ་ཚེར་སྔོན་སྦྱར་བ་བྱུག། བྱེ་བྲག་བཅོས་པའི་རིགས་དང་བབས་སྒོ་སྦྱར།། རིགས་བཅོས་སྐྲངས་པ་གླང་གཉའི་འབྲུམ་པ་ལ།། བསེ་ཀོ་གླང་གཉའི་ཀོ་བ་སེར་ཙམ་བསྲེགས།། སྲན་ཕྱེ་བསྲེས་པ་སྤྱི་སྨན་ལྟག་སྤྲད་སྐེམ།། སྐྲངས་པ་ཆེ་ན་གང་ཉེའི་རྩ་ལ་གཏར།། དུར་བྱིད་ཧོང་ལེན་སྤོས་དཀར་དུག་པུས་བའི།། རིལ་བུ་བ་ཆུས་འཕུལ་བའི་བཤལ་གྱིས་སྦྱང་།། རྩེལ་ཏེ་ཤིག་དང་ཟངས་གཟེར་འདྲ་བ་ལ།། བཟང་དྲུག་གླ་རྩི་ཕག་རིལ་ཁུ་བ་དང་།། ར་ཁྲག་སྦྱར་བའི་ལྕག་མདའ་བཏང་བའམ།། ཏིག་ཏ་དུག་ཉུང་ཧོང་ལེན་བ་ཤ་ཀ། གང་གི་རྩི་སྦྱོར་སྤྱི་ལ་བསྣན་པ་བཏང་།། ཤིན་ཏུ་ཚ་བ་ཆེ་ན་ག་བུར་བསྣན།། དཀར་པོ་སེ་འབྲུ་སྐྱུ་རུ་རྡོ་སྦྱོར་བསྣན།། ལུས་སྐྲངས་སྨན་གྱིས་མ་ཐོན་བདུན་ན་འཆི།། དམར་ཐིག་འབྲུམ་པར་མ་སོང་ལྔ་ན་འཆི།། ནག་ལེབ་རྣག་ཏུ་མ་སོང་དགུ་ན་འཆི།། སྐྱ་ཤར་ཟས་བསྡམས་དྲགས་ན་འཆི་བ་ཡིན།། འབྲུམ་རྫོགས་སླར་ལོག་ལས་ཀྱིས་འཆི་ཞེས་བྱ།། བབས་ས་གནས་དང་སྦྱར་ཏེ་བཅོས་པ་ནི།། སྙིང་ལ་བབས་ན་སྨྱོ་འདར་དངངས་ཆུང་འབྱུང་།། རྩི་སྦྱོར་སྤྱི་སྟེངས་ག་བུར་བསྣན་ལ་བཏང་།། མ་ཐུབ་སྨྱོ་ཞིང་འཚིག་ན་འཆི་བ་ཡིན།། གློར་བབས་གློ་མང་གཟེར་ཞིང་རྣག་ཏུ་འབྱུང་།། སྲོ་ལོ་ཤིང་མངར་རྩི་སྦྱོར་ལ་བསྣན་བཏང་།། མ་ཐུབ་མིད་པ་འགགས་ན་འཆི་བ་ཡིན།། མཆིན་པར་བབས་ན་མིག་དམར་མཆིན་སྟེང་གཟེར།། དོམ་མཁྲིས་བྲག་ཞུན་ཁ་ཚ་ཆེགུར་གུམ་བསྣན།། འཐིབས་ཀྱིན་ཁྲག་ཏུ་འཁྲུ་སྐྱུག་འཆི་བ་ཡིན།། རྒྱུ་མར་བབས་ན་མཁྲིས་པ་འཁྲུ་སྐྱུག་བྱེད།། བཙོད་དང་སྙ་ལོ་དུག་ཉུང་བསྣན་ལ་བཏང་།། ཁྲག་ཏུ་འཁྲུ་ན་སྣོད་རྡོལ་འཆི་བ་ཡིན།། དེ་དག་ཀུན་གྱི་འདྲེད་དུ་དངུལ་ཆུ་ཤིས།། མིག་ཏུ་བྱུང་ན་ག་བུར་གླ་རྩི་བྱུག། ཡང་ན་འོལ་མོ་སེ་དང་ནུ་ཞོ་བྱུག། དོམ་མཁྲིས་ཏི་ཚ་སྐྱེར་ཁཌྷྜྷཱ་ར་གན་དུང་།། ནུ་ཞོ་སྦྱར་བྱུགས་འཇབ་འཇིབ་སྒྲོ་ཡིས་བྱབ།། ག་པུར་གུར་གུམ་ཆུས་བཀྲུ་གྲོད་ཆུས་བདུག། གྲེ་བར་བབས་ན་ཕྱེ་ཚོད་ཚན་མོས་བདུག། ཤུ་དག་རུ་རྟ་རྒྱ་ཚའི་ཕྱེ་མ་གདབ།། ཚར་བོང་ཐང་བཏང་རྟ་སྦངས་ཁུ་བ་བཏུང་།། མ་ཐུབ་ཀྱོང་བུས་བཞར་རྗེས་སྨན་ཕྱེ་བཏབ།། ལྒང་པར་བབས་ན་རྒྱ་ཚ་རུ་རྟ་དང་།། ཉི་དགའ་གླ་རྩི་བསྡུས་ཐང་བཏང་བར་བྱ།། རྒྱ་ཚ་གླ་རྩི་ཤུ་དག་རུ་རྟ་བཞི།། ཆུས་སྦྱར་གསང་བའི་གཙེ་འུས་གཅེསལྒང་པར་བསྐྱལ།། དེ་ཡིས་གདུག་པ་འབྲུམ་པའི་ནད་འཇོམས་བྱེད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྲུམ་པའི་རིམས་བཅོས་པའི་ལེའུ་སྟེ་ཉི་ཤུ་རྩ་བཞི་པའོ།། །།

X