//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་ལྔ་པ། རྒྱུ་གཟེར་གྱི་རིམས་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:29:13 ཀློག་གྲངས། 3 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། རྒྱུ་གཟེར་རིམས་ལ་རྒྱུ་རྐྱེན་མཚན་ཉིད་དང་། དབྱེ་བ་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།།རྒྱུ་གཟེར་རྒྱུ་ནི་རིམས་ཚད་སྤྱི་དང་འདྲ།། ངོ་བོ་མཆིན་ཚད་ཐུར་དུ་བབས་པ་ལ།། གཉན་ནད་ཆུ་སེར་མཁྲིས་ཚད་བསླང་བ་ཡིས།། རྒྱུ་མ་གཟེར་ཞིང་འཁྲུ་བས་རྒྱུ་གཟེར་ཡིན།།དབྱེ་བ་སྤྱི་དང་བྱེ་བྲག་རྣམ་པ་གཉིས།། སྤྱི་ལ་དོན་འཁྲུ་བ་དང་སྣོད་འཁྲུ་བ།། སྟོབས་ཆེན་སྟོབས་ཆུང་རྣམ་པ་བཞི་རུ་འགྱུར།། བྱེ་བྲག་དབྱེ་བ་རྒྱུ་གཟེར་རྒྱུ་འཁོར་དང་།། རྒྱུ་འཁྲོལ་རྒྱུ་ལྐུགས་ཞེས་བྱ་བཞི་རུ་བཤད།།དེ་རྟགས་དང་པོ་མགོ་དང་ཚིགས་གཞི་ན།། ཕྲུམ་སེར་ཁྱེར་ཞིང་རྒྱུ་མ་ན་ལ་འཁྲུ།། འཁྲུ་བའི་བོངས་ཆུང་འཁྲུ་དུས་ཟུག་གཟེར་ཆེ།། དམར་སེར་ཟ་ཁུ་སྨུག་པོ་བེ་སྣབས་འཁྲུ།། ཁྱད་པར་དོན་འཁྲུ་ཟུག་ཆེ་འཁྲུ་བོངས་ཆུང་།། སོ་ཁྲག་གཞིབས་དང་ཤ་ཁོག་བཤལ་བ་འདྲ།། སྣོད་འཁྲུ་དམར་སེར་ཟ་ཁུ་བེ་སྣབས་འཁྲུ།། ཟུག་ཆུང་གྲངས་ཉུང་སྟོབས་ལྡན་ཚ་བ་ཆེ།། གྲངས་མང་ཟུག་ཆེ་སྟོབས་ཆུང་དེ་ལས་ལྡོག། བྱེ་བྲག་རྒྱུ་གཟེར་བོངས་ཆུང་ཡང་ཡང་འཁྲུ།། འཁྲུ་བའི་དུས་ན་ཁྱད་པར་ཟུག་གཟེར་ཆེ།། རྒྱུ་འཁོར་ཐུན་དུ་བཅད་ནས་བོངས་ཆེར་འཁྲུ།། རྒྱུ་མ་གཏུབས་སྙམ་ཟུག་ཆེ་འཁྲུས་རྗེས་བདེ།། རྒྱུ་འཁྲོལ་ཟུག་ཆུང་ལྡང་དུབ་མེད་པ་ལ།། འཁྲུ་བའི་བོངས་དང་རྩ་ཆུའི་ཚ་བ་ཆུང་།། རྒྱུ་ལྐུགས་མི་འཁྲུ་སྦོ་འགག་གཏུབས་སྙམ་བྱེད།།བཅོས་པའི་ཐབས་ལ་གསར་རྙིང་དུས་དང་སྦྱར།། གསར་པའི་བཅོས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་ཐབས་ནད་སྟོབས་ཆེ་ཆུང་གིས།། སྟོབས་ཆེན་ནད་ལ་བཅོས་ཚུལ་རྣམ་པ་བདུན།། སྣོད་ཀྱི་རྩི་སྲུང་མཁྲིས་པའི་མེ་བསད་ཅིང་།། རྒྱུ་ལོང་རུལ་སྦྱང་ནད་དངོས་གཉེན་པོས་བསད།། མཆིན་པའི་ཟགས་བསྡམ་འཁྲུ་བའི་ཁ་དོག་སྒྱུར།། ཐ་མར་ཆུ་བོའི་རྒྱུན་ལམ་བཅད་པའོ།། དང་པོ་སྣོད་ཀྱི་རྩི་སྲུང་ཆིག་ཐུབ་རི་བོང་ཀླད་པ་དོམ་མཁྲིས་ཏིལ་ནགགསུམ།། མཁྲིས་པའི་མེ་བསད་གུར་གུམ་ཅུ་གང་ཨུཏྦལ་ཏིག་ཏ་བ་ལེ་ཀ་བྲག་ཞུན་དྲུག་ལ་ཚད་སྟོབས་སྦྱར་ནས་ག་པུར་ཙན་དན་གི་ཝཾ་གིས་ཁ་བསྒྱུརབདུན་པ་གཉིས།། དུས་བཞི་ལྟག་པ་སྤྲད་ལ་བཏང་བར་བྱ།། དེ་འོག་སྦྱོང་བྱེད་ཆིག་ཐུབ་ཐར་ནུ་ཆུ་རྩ་རེ་ལྕག་དྲི་ཆུརརྣམ་པ་གསུམ།། འཁྲུ་མདོག་བློན་དམར་ན་བྱ་རྐང་སེར་ན་དུག་ཉུང་སྨུག་ན་རེ་རལ་ཟ་ཁུ་སྐྱི་འབྲུ་བེ་སྣབས་སུག་སྨེལགྱིས་ཁ་བསྒྱུར་རུལ་དྲི་སྦྱང་།། ལན་གཅིག་ལན་གཉིས་གང་དགོས་ནད་སྟོབས་སྦྱར།། སྦྱངས་རྗེས་གཉེན་པོ་ཆིག་ཐུབ་རང་ཤིའི་ཐོད་པ་ཐོག་རུས་ཆོས་སྨན་དུག་པུས་རྒུ་དྲུས་ཆུ་རྩ་གླ་རྩི་བྲག་ཞུནརྣམ་པ་གསུམ།། ཐུན་ཆུང་གྲངས་མང་བཏང་ལ་དངོས་པོ་བསད།། ཤིན་ཏུ་ཟུག་ཆེ་རྒྱུ་ཞབས་ཆུ་རྡོས་བདུག། བོང་ང་དཀར་པོ་ཀྱི་ལྕེ་དཀར་པོ་ཧོང་ལེན་གྱི་ཕྱེ་མཆུ་འཁྱགས་སྦྱངས་པའི་སྨད་འདྲེན་བཏང་།། གཞང་ཁ་ལུག་ན་ཤིང་ལེབ་ཁ་སྡོམ་བྱ།། དེ་ནས་ཚད་སྟོབས་ཅུང་ཟད་ཆག་མངོན་ནས།། མཆིན་པའི་ཟགས་སྡོམ་གུར་གུམ་ཅུ་གང་བ་ལེ་ཏིག་ཏ་ཚེ་ཚིགས་ཨ་རུ་མཚལ་དོམ་མཁྲིས་བྲག་ཞུནདགུ་པ་དང་།། འཁྲུ་མདོག་སྒྱུར་བྱེད་དམར་ན་བྱ་རྐང་ཚོས་སེར་ན་དུག་ཉུང་དོམ་མཁྲིས་བེ་སྣབས་སུག་སྨེལ་ཐོག་རུས་སྨུག་ན་རེ་རལ་ཁྲག་རྐང་ཟ་ཁུ་སྐྱི་འབྲུ་མི་མཁྲིས་ཀུན་ལ་ཀ་ར་སྦྱར་བལྟག་པ་སྤྲད་ལ་བཏང་།། ཟས་སྐོམ་ནས་སྔོན་ཅར་བརྡུངས་ཚོས་པ་ལ།། བ་རའི་འོ་མ་བག་ཙམ་བཏབ་པ་དང་།། བ་ཚ་མེད་པའི་ཆུ་གྲོག་བསྟེན་པར་བྱ།། དཀར་མངར་རུལ་སྐྱུར་དྲོད་བཅུད་མཐའ་དག་སྤང་།། དེ་ནས་ཚ་བ་ཆོགས་ན་ནད་སྟོབས་བྲི།། རྩ་དལ་ཆུ་སྔོ་དྲོད་ཆུང་ཕོ་ལོང་འཁྲོག། འཁྲུ་བའི་དྲི་དང་ཟུག་ཆུང་འཁྲུ་ཚིགས་རིང་།། འཁྲུ་བ་སྒྲ་བཅས་ཆུར་སྐྱུར་སྟེང་དུ་ལྡིང་།། དེ་དུས་གཅོད་བྱེད་སྨན་དང་གསར་བཅུད་ཟས།། རིམ་པས་སྤེལ་ཏེ་ཆུ་བོའི་རྒྱུན་ལམ་བཅད།། བཙན་ཐབས་མི་བཅད་ཆ་ཡིས་བྲིད་པ་ཡིན།། སྟོབས་ཆུང་ནད་ལ་བཅོས་ཐབས་རྣམ་པ་གསུམ།། རྒྱུ་རིམས་དང་པོ་རྩ་ཁ་བསྡམ་པ་དང་།། བར་དུ་ཚ་བ་རོལ་དུ་བསད་པ་དང་།། ཐ་མ་ཆུ་བོའི་རྒྱུན་ལམ་བཅད་པའོ།། ཀུན་གྱི་གཙོ་བོ་ཆིག་ཐུབ་དཀར་པོ་ཡིན།། དང་པོ་པར་པ་ཏ་དང་ཁྲག་རྐང་གཉིས།། གཙོ་བོ་ཆ་མཉམ་གངས་ཆུ་བསྐོལ་གྲངས་བཏང་།། བར་དུ་ཏིག་ཏ་བོང་ང་སྲོ་ལོ་དཀར།། ཧོང་ལེན་བཞི་པོ་གཙོ་བོའི་སུམ་ཆ་སྦྱར།། བསྐོལ་གྲངས་ཐང་ངམ་ཕྱེ་མ་ཆུས་སྦྱངས་བཏང་།། ཐ་མ་ཚ་བའི་སྟོབས་ཆག་བཅད་རན་དུས།། སྐྱེར་པའི་མེ་ཏོག་གཙོ་བོའི་སུམ་ཆ་སྦྱར།། བ་ཡར་འོ་མར་བཏབ་བཏང་རྒྱུན་ལམ་གཅོད།། ཡང་ན་རྒུ་དྲུས་ཆོས་སྨན་ཐོད་པ་དང་།། ཐོག་རུས་རྒྱལ་པོ་ཡིན་པས་སུམ་གཉིས་བཏང་།། གླ་རྩི་དོམ་མཁྲིས་ཨ་བྱག་བོང་ང་དཀར།། རྩི་དམར་ཆུ་རྩ་བྲག་ཞུན་སུམ་ཆ་བཏང་།། འཁྲུ་མདོག་དམར་ན་མེ་ཏོག་བྱ་རྐང་སྡེབ།། སེར་པོ་དུག་ཉུང་ཟ་ཁུ་སྐྱི་འབྲུ་སྡེབ།། རྒྱ་ཤལ་རེ་རལ་བེ་སྣབས་སུག་སྨེལ་སྡེབ།། གངས་ཆུ་སྦྱར་བས་རུལ་བསྲུང་ཚ་བ་གཅོག། འཁྲུ་བའི་ཚིགས་རིང་ཚད་ལྷག་བྲི་བ་དང་།། ཀ་ར་སྦྱར་ལ་བ་འོ་བསྐོལ་གྲངས་དབུལ།། རོ་འདོན་འཁྲུ་བ་གཅོད་ཅིང་ལུས་བརྟས་བྱེད།།བྱེ་བྲག་བཅོས་ཐབས་རྒྱུ་གཟེར་རྒྱུ་འཁོར་གཉིས།། སྤང་རྩི་ཧོང་ལེན་བོང་ང་སུམ་ཅུ་ཏིག། ཁྲག་རྐང་སྲོ་ལོ་པར་པ་ཏ་བསྡུས་ཐང་།། རྩ་ཁ་སྡོམ་དང་མི་འདྲུལ་སྲ་བར་བྱེད།། དམར་ཟལ་བ་ཡི་འོ་མ་མར་དཀར་བསྡུས།། རྒྱུ་མའི་ནང་རྩི་མི་འཛད་འདྲེད་པར་བྱེད།། ཁྱད་པར་རྒྱུ་གཟེར་རྒྱ་བཤལ་བཙོད་ཁུ་ལ།། གུར་གུམ་ཨུཏྦལ་ཀ་ར་སྲ་བྱེད་སྦྱར།། སེར་བོ་གི་ཝཾ་སྒྲོ་པུས་སྲ་བྱེད་སྦྱར།། ཁྲག་ཏུ་འཁྲུ་ན་དོམ་མཁྲིས་སྲ་བྱེད་སྦྱར།། རྒྱུ་འཁོར་ཆུ་རྩ་དུད་ཁུ་ཐལ་ཁུ་འདྲ།། ཨ་རུ་མཆུ་སྙུང་སྐྱེར་ཤུན་བ་ལེ་ཀ། གསེར་གྱི་མེ་ཏོག་སྲ་བྱེད་སྦྱར་ལ་བཏང་།། ཁྲག་ནག་ཤེ་རུལ་འཁྲུ་ན་བ་ཤ་ཀ། སླེ་ཏྲེས་སྲ་བྱེད་སྦྱར་བའི་བསྡུས་ཐང་བཏང་།། རྒྱུ་འཁྲོག་དམར་པོར་འཁྲུ་ན་གུར་གུམ་དང་།། དོམ་མཁྲིས་ཀར་སྦྱར་བོང་ངའི་ཆིག་ཐང་བཏང་།། ཆུ་སྐྱ་བེ་སྣབས་སུག་སྨེལ་ཀ་ར་སྦྱར།། རྒྱུ་ལྐུགས་ཨ་རུ་མཆུ་སྙུང་བ་ལེ་ཀ། བསྡུས་ཁུར་གསེར་གྱི་མེ་ཏོག་སུམ་ཅུ་ཏིག། ཏིག་ཏ་བོང་ང་དཀར་པོ་བཏབ་ལ་བཏང་།། ལོང་རྩ་གཉིས་གཏར་གྲོད་པའི་ཆུ་དུགས་བྱ།། དེ་ཡིས་འཁྲུར་མ་འདོད་ན་འཁྲུ་བའི་ཆིག་ཐུབ་གསུམ་གྱི་སྟེང་དུ་ཨ་བྱག་ཧོང་ལེན་དུག་པུས་དྲི་ཆུར་སྦྱར་བའིགཉན་བཤལ་བཏང་།། ཟླ་ཕྱེད་ཕར་འདས་རྒྱུ་རིམས་རྙིང་པ་རྣམས།། མཁྲིས་ཕྱེ་བདུན་ནམ་ཨིནྡྲ་བཞི་ཐང་བསྟེན།། འཁྲུ་བ་དྲི་བཅས་དུགས་ཡོད་བཤལ་གྱིས་སྦྱང་།། ཕྱེ་ཐུག་འབྲས་དང་ཆུ་གྲོག་བསྐོལ་གྲངས་རྣམས།། བོངས་ཆུང་གྲངས་མང་བཏང་ཞིང་གནོད་ཟས་བསྲུང་།། ཚ་བ་ཆོགས་ནས་བཅད་དུས་སླེབ་པའི་ཚེ།། ཅོང་ཞི་རྩི་མར་གངྒ་ཆུང་དང་གསུམ།། ཡང་ན་མེ་ཏོག་བྱ་རྐང་ཤ་ནུས་བསྡུས།། བ་ཞོ་ཀླད་པ་སྤྱིན་དང་འབྲས་ཡོས་ཕྱེ།། ཚོས་པར་བཙོས་ལ་ཙེ་གུར་བཏང་བར་བྱ།། ཡང་ན་ད་ཏྲིག་ཀ་པེད་མོན་ཆ་ར།། སྨག་དང་ཐ་རམས་འབྲས་ཐུག་བཏབ་པ་འམ།། ཡང་ན་གཙོད་ཁྲག་རྒོད་ཁྲག་སྦྱར་ལ་བཏང་།། ཡང་ན་ཐ་རམས་བྱ་རྐང་བསྡུས་ཁུ་ལ།། སྨག་དང་ད་ཏྲིག་ཀ་པེད་མོན་ཆ་ར།། ཞིབ་བཏགས་བཏབ་ལ་ཙེ་གུར་ཡང་ཡང་བཏང་།། འཁྲུ་དྲགས་སྣོད་ཀྱི་དྲོད་ཤོར་གྲང་འབྱམས་ན།། སེ་འབྲུ་ལྔ་སྦྱར་རྒྱུ་ལོང་གསང་ལ་བསྲེག། ཁ་ཟས་ལུག་དང་བ་ལང་རི་དགས་ཤ། མ་རུལ་གསར་པའི་ཚོ་ཁུ་བོངས་ཆུང་བཏང་།། གསར་འཇམ་གླ་བ་རྒྱ་སྐྱེགས་ཤིང་ཐལ་སྦྱར།། ཅོང་ཞིའི་ཕྱེས་བྲན་ཁ་སྐོམ་བག་རེ་བསྟེན།། འཁྲུ་བ་མ་ཆོད་བར་དུ་ཟས་སྤྱོད་གཟབ།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུ་གཟེར་གྱི་རིམས་བཅོས་པའི་ལེའུ་སྟེ་ཉི་ཤུ་རྩ་ལྔ་པའོ།། །།

X