//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་དྲུག་པ། གག་ལྷོག་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:30:54 ཀློག་གྲངས། 12 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། གག་ལྷོག་རིམས་ལ་རྒྱུ་རྐྱེན་དབྱེ་བ་དང་།། དེ་ཡི་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།།རྒྱུ་ནི་ཁྲག་གནས་དུག་ཅན་སྲིན་བུ་བདུན།། ཟངས་ལྟར་དམར་ཞིང་ཕྲ་ལ་བལྟར་མི་མངོན།། སྐད་ཅིག་ཙམ་ལ་མགོ་རྐང་ཁྱབ་རྒྱུ་ནུས།། དེ་ལ་རྐྱེན་ནི་རླུང་མཁྲིས་བད་ཀན་འདུས།། སྐྱེད་བྱེད་ཡུལ་དུས་ཟས་སྤྱོད་གདོན་རྐྱེན་གྱིས།། སྲིན་འཁྲུགས་ལུས་ཟུངས་ཟོས་པས་གཉན་ནད་འབྱུང་།། དེ་ཕྱིར་དཀར་མངར་གནོད་ཅིང་དུག་གིས་འཇོམས།།དབྱེ་བ་བབས་ས་མིང་གིས་ཐ་དད་དེ།། མགོ་ལ་བབས་ན་ཀླད་གཟེར་ཞེས་བྱ་ཞིང་།། གྲེ་བར་གག་པ་རོ་སྟོད་གཟེར་ཐུང་སྟེ།། ཕོ་བར་གཉན་གླང་རྒྱུ་མར་རྒྱུ་གཟེར་ལ།། ལྤགས་ལ་མེ་དབལ་ཚིགས་ལ་རྨེན་བུ་སྐྱེད།། ཉྭ་ལ་ཉྭ་ལོག་ཤར་བབས་ལྷོག་པར་བཤད།། ཤ་རུས་རྩར་བེམ་འདྲུལ་ཕྱིར་འབྲས་ཞེས་བྱ།། འོན་ཀྱང་འདི་རུ་གག་ལྷོག་གཉིས་སུ་བསྡུ།། ལྷོག་པའི་དབྱེ་བ་འབྱུང་བ་ནད་གཞི་རིགས།། འབྱུང་བས་དབྱེ་ན་ས་མེ་ཆུ་རླུང་བཞི།། ནད་གཞིས་དབྱེ་ན་དཀར་ནག་ཁྲ་བོ་གསུམ།། རིགས་ཀྱིས་དབྱེ་ན་རྒོད་དང་ཡང་རྒོད་དང་།། ཡམ་བུ་ཡུ་མོ་ཞེས་བྱ་བཞི་རུ་བཤད།། གག་པ་ཕོ་མོ་བུ་དང་གཉན་གག་གོ།བརྟག་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་རུ་ངོས་བཟུང་ཕྱི་ནང་གསང་བ་གསུམ།། ཕྱི་རྟགས་སྐྲངས་དབྱིབས་འབྲུམ་པ་ཆུ་བུར་འདྲ།། ཉ་སྦྲུལ་སྡོམ་སྡིག་རྟ་བླ་སྦལ་ལྕོང་དང་།། ན་ཆུང་ནུ་མ་ལྟར་སྐྲངས་ཉམ་ང་འཇིགས།། ཁ་དོག་དམར་རམ་ནག་སྨུག་ཁྲ་བོར་སྐྲངས།། ན་ལུག་ཕྲུམ་སེར་ཁྱེར་དང་ཚིགས་གཞི་ན།། མགོ་ན་ཁ་ཁ་འཕྱོ་འདར་སྙིང་མི་དགའ།། ནང་རྟགས་རྩ་ཆུ་རེག་བྱ་རྒྱུན་སྲང་བཞི།། རྩ་ནི་ཁ་རྒྱུག་གཏིང་གྲིམས་ཁོང་ན་འདར།། ཆུ་ནག་རླངས་འཐིབས་ཀུ་ཡ་འཁྲུགས་ནས་འོང་།། རེག་བྱ་ཚོར་མེད་ཡང་ན་བཟོད་པ་ཆུང་།། ཤིན་ཏུ་ཚའམ་ཤིན་ཏུ་གྲང་བར་འགྱུར།། རྒྱུན་སྲང་སོགས་སྤྲིན་འབྱིལ་དང་བ་སྤུ་ལོག། ཨན་སྟོང་འགྲམ་འཕར་སྒལ་མཆན་དམར་ཐིག་འབྱུང་།། གསང་རྟགས་ནག་པོ་མུ་ཟི་ཤུ་དག་གླ་རྩི་གསུམ་བཏང་དངངས་འདར་ཡིན།།བྱེ་བྲག་རྟགས་ལ་ལྷོག་པ་གག་པ་གཉིས།། ལྷོག་པའི་རྟགས་ལ་ས་ལྷོག་སྐྲངས་བརྟན་སྲ།། སྐྲངས་མདོག་ཐོར་པའི་མགོ་བོ་ནག་པོར་འོང་།། མེ་ལྷོག་དམར་ཚ་མཆེད་སྐྱེན་མེས་ཚིག་འདྲ།། ཆུ་ལྷོག་འཇམ་བསིལ་ཆུ་བུར་ཆུ་སེར་འཛག། རླུང་ལྷོག་སྐྱ་གསོབ་མི་བརྟན་འཕར་ཞིབ་བྱེད།། དཀར་པོ་ཟུག་ཆུང་རྩ་ཆུ་ཕྱི་ཡུལ་གྲང་།། ནག་པོ་ཟུག་ཆེ་རྩ་ཆུ་ཕྱི་ཡུལ་ཚ།། ཁྲ་བོ་རྟགས་འདྲེས་ཟུག་གཟེར་ལྡང་དུབ་བྱེད།། རྒོད་ནི་འབྲོས་སྐྱེན་ནད་དྲག་སྐྲངས་པ་སྐྱེན།། ཡང་རྒོད་ཁོང་དུ་འཆོར་སྐྱེན་འཁོར་ལ་འཕྲོ། ཡམ་བུ་སྐྲངས་པ་འབར་འབུར་ཡམས་ཐབས་འོང་།། ཡུ་མོ་སྲ་བརྟན་ནད་ཟུག་ཆུང་བའམ།། ཡང་ན་སྙི་ལ་འདོལ་ཞིང་འགུལ་བའོ།། ལ་ལ་ལྷོག་པ་གཉིད་པོ་ཞེས་སུ་འདོགས།། གག་པ་ངོས་བཟུང་ལྕེ་སྟེང་བད་ཀན་མཐུག། ལྕེ་མཆུ་འགྲམ་དང་རྐན་ཕུགས་ཐོར་པ་ཆགས།། གྲེ་བ་སྐད་འགགས་ཟས་དང་སྐོམ་མི་ཐར།། ཁྱད་པར་ཕོ་གག་སྐར་ཆེན་ཤར་བ་འདྲ།། མོ་གག་རྒྱ་ཕོར་ཁ་སྦུབ་ལྟ་བུ་སྟེ།། བུ་གག་ཞོ་ཆལ་གཏོར་བ་འདྲ་བར་འོང་།། གཉན་གག་རལ་གྲི་སྣ་མའི་གཞུང་འདྲ་འམ།། རུས་སྦལ་རྒྱབ་དང་ཁྲོ་བོའི་མིག་དང་འདྲ།། མིག་ལ་མ་ཐོགས་ཕྱི་ཡི་རྟགས་ལ་བཟུང་།།བཅོས་པའི་ཐབས་ལ་ལྷོག་པ་གག་པ་གཉིས།། ཟས་སྤྱོད་བསད་སྦྱང་བཞི་ནི་སྤྱི་རུ་རྒྱུག། ཁྱད་པར་ལྷོག་པ་བྱུག་པ་བསྲེག་པས་བཅོས།། བྱེར་ཞུད་འཁྱམས་དང་ཆུ་སེར་ལོག་པ་མནན།། གག་པ་ཞི་བཞུ་བཅད་པ་གསུམ་གྱིས་བཅོས།། ཡར་རྫོང་མར་རྫོང་ཤོར་བབས་ལོག་གནོན་གཅེས།། དང་པོ་ཁ་ཟས་དཀར་མངར་རུལ་སྐྱུར་སྤང་།། ཕྱེ་ཚོད་དྲལ་ཐུག་ཆུ་གྲོག་བསྟེན་པར་བྱ།། སྤྱོད་ལམ་ཆགས་པ་ཉིན་གཉིད་དྲག་ཤུལ་དང་།། རྟ་ཞོན་འཁྲོ་འཚིག་ཆུ་རྒལ་མི་སྡུག་སྤང་།། བསད་ཐབས་མཐུན་པ་སྨན་གྱིས་བསད་པ་དང་།། མི་མཐུན་གཉེན་པོས་བསད་པར་བྱ་བ་དང་།། ནུས་པ་སྔགས་ཀྱིས་བསད་པ་རྣམ་པ་གསུམ།། མཐུན་པ་གླ་རྩི་བཟང་དྲུག་གུ་གུལ་ནག། ཚ་ན་ག་པུར་གི་ཝཾ་ཙནྡན་བསྣན་ལ་བཏང་།། གྲང་ན་ཤུ་དག་ཤིང་ཀུན་བསྣན་པར་བྱ།། ཡང་ན་ཨ་བྱག་སྟག་ཤ་གུ་གུལ་ནག། གླ་རྩི་ཤུ་དག་ཨ་རུ་སྦྱར་ལ་བཏང་།། མི་མཐུན་གཉེན་པོས་བསད་ཐབས་རྐྱང་སྦྱོར་དང་།། གཙོ་འཁོར་སྦྲག་དང་མང་སྦྱོར་ཆེན་མོ་གསུམ།། དང་པོ་སྔོན་འགྲོ་བསྡུ་བསད་ལོག་གནོན་བཞི།། སྔོན་འགྲོ་རྫས་རྨིགས་པའི་ཤ་ནས་ཙམ་ནས་དཀར་འབྲུ་གསུམ་སྐྱི་འབྲུ་གཅིག་རྒྱ་གཡེར་གཅིགབཞི་ཆུ་དང་སྦྱར་ལ་བཏང་། ཉེས་པའི་ཁ་གནོན་ཡོན་ཏན་བརྒྱད་དང་ལྡན།། བསྡུ་བ་བུར་དཀར་ཆང་སྦྱར་ཕུལ་གང་བཏང་།། རླུང་གནོན་བྱེར་སྡུད་གཉེན་པོས་གསོད་པ་སླ།། བསད་ལ་སྨན་དང་སྦྱར་ཚད་བཏང་ཐབས་གསུམ།། སྨན་ནི་ཕྱི་འཛིམ་ནང་འཛིམ་གསང་འཛིམ་གསུམ།། ཕྱི་འཛིམ་ར་དུག་རྩ་བ་དུས་བརྐོས་པ།། ནང་འཛིམ་མགོ་དགུ་མགོ་བདུན་ལྔ་གསུམ་ལ།། གསང་འཛིམ་འབྲས་བུ་ལོ་གཅིག་སྐྱེས་པའོ།། རྨ་མེད་ཞག་བདུན་མེ་ཡི་སྤྲིན་ལ་བདུག། སྦྱར་ཐབས་ནས་ཙམ་ཀ་ར་བརྡར་ཕྱེ་དང་།། ལོ་བརྒྱད་ཁྱེའུ་དགེ་སློང་དྲི་ཆུར་སྦྱར།། བཏང་ཐབས་མ་སོད་བར་དུ་བསྐྱར་ཞིང་བཏང་།། རྔུལ་དབྱུང་སོད་རྟགས་ལུས་པོ་སོར་མོ་རེངས།། ཟུག་ཆོགས་སྐྲངས་ཆོམས་རྔུལ་ཆུར་འབྱུང་བ་ཡིན།། ལོག་གནོན་མིང་པོ་བདུན་གྱི་སྲིང་གཅིག་མ།། རྩ་བ་མེ་ཏོག་དབྱར་དགུན་དུས་དང་བསྟུན།། ཐུན་རེ་བོད་ཚ་སྦྱར་བས་སྨན་ལོག་འཇོམས།། སོད་རྟགས་མེད་ཀྱང་གསུམ་གྱི་རེ་རེ་གཅེས།། སྦྱོར་བ་འདི་ལ་དམན་ལྷག་ལོག་གསུམ་འགྱུར།། དམན་པ་མ་སོད་གཡག་ཤོར་རྟ་ཆད་འདྲ།། སྦྱོར་བ་ལོག་པ་གཡག་མེད་རྟ་རྒྱུག་འདྲ།། དེ་བཞིན་ལྷག་པ་གཡག་སོད་བང་ལྷག་འདྲ།། དེ་ཕྱིར་འདི་ལ་མཁས་པས་གཟབ་པར་རིགས།། གཙོ་འཁོར་བཅས་ལ་གཉེན་པོ་ཡོད་མེད་གཉིས།། མེད་པ་འཛིམ་པ་ཤུ་དག་ར་ཐུག་སྦྲེ།། མི་ཡི་དཔྱི་རུས་ཐལ་བ་བཞི་སྦྱར་ཏེ།། ཐུན་ཚད་ནད་སྦྱར་དྲི་ཆུས་སྦྱངས་ལ་བཏང་།། རྔུལ་དབྱུང་སྨན་ནད་བྱུང་ན་སོད་པ་ཡིན།། མ་སོད་བསྐྱར་ཞིང་སོད་ན་ལོག་གནོན་གཅེས།། གཙོ་འཁོར་གཉེན་པོར་བཅས་ལ་བཙན་དུག་དང་།། ཨ་རུ་གླ་རྩི་མུ་ཟི་གུ་གུལ་ནག། བཟང་དྲུག་རུ་རྟ་ཤིང་ཀུན་ཤུ་དག་རྣམས།། དྲི་ཆུར་སྦྱར་བའི་རིལ་བུ་སྲན་ཙམ་བྱ།། དངུལ་ཆུ་བསྣན་ཡང་མཆོག་ཏུ་ཤིས་པ་ཡིན།། མ་སོད་བར་དུ་བཏང་ཞིང་རྔུལ་དུ་དབྱུང་།། མང་སྦྱོར་ཚེ་གཅིག་ལུས་གཉིས་བླངས་པའི་ཤས།། གཙོ་བྱས་གདུག་པ་ཅན་གྱི་ཤ་རྣམས་དང་།། གླ་རྩི་གུ་གུལ་མུ་ཟི་ལ་སོགས་པ།། རྡོ་རྩི་སྔོ་ཡི་དྲི་སྨན་སྣ་ཚོགས་དང་།། སེང་ལྡེང་ལ་སོགས་ཚེར་མ་ཅན་རྣམས་དང་།། བཙན་དུག་ལ་སོགས་དུག་སྣ་ཚོགས་ཚད་དང་།། ཚད་དུ་དུག་སྨན་ཆ་གཅིག་ཚེར་སྨན་ཆ་གཉིས་ཤ་སྨན་ཆ་གསུམ་དྲི་སྨན་ཆ་བཞིསྦྱར་ཏེ་རྩི་བཞིན་བཏགས་བྱས་ལ།། དྲི་ཆུས་སྦྲུས་པའི་རིལ་བུར་སྔགས་དབང་བསྐུར།། གཉན་ནད་མ་ལུས་ནད་རིགས་ཀུན་ལ་འགྲོ། ཁྱད་པར་གག་ལྷོག་འཇོམས་པའི་གཉེན་པོ་ཡིན།། སྔགས་ཀྱིས་བསད་པ་ལྕགས་ཀྱི་བྱ་ཁྱུང་བསྒོམ།། སྔགས་ཆུ་བླུད་ཅིང་སྐྲངས་ཀྱི་མཐའ་ནས་བརྡེག། ཨེཾ་ནག་པོ་ཀཱ་ལ་རཀྵ་རྦད་རྦད། སོད་སོད། ཕྱུངས་ཕྱུངས། སྤུ་གྲི་ཟངས་ཟངས། ལྕགས་ཀྱི་སྡེར་མོས་གནོད་བྱེད་འབྱུང་པོའི་སྙིང་ལ་ཟོ།། ནཱ་ག་བྱི་ར་ཡ་སོད། ནཱ་ག་བྱི་མ་ལིང་སོད། སྨྲ་བ་བཅད་དེ་བཟླས་པས་གཉན་རྣམས་གསོད།། ཐ་མ་རོ་དབྱུང་རྒྱལ་བློན་ཐར་ནུ་ཆུ་རྩ་ཧོང་ལེནདྲི་ཆུས་སྦྱང་།།བཤལ་ཐེབས་ལྕག་གིས་བྲབས་ལ་དག་པར་སྦྱང་།། ཡང་ན་བཟང་དྲུག་གླ་རྩི་གུ་གུལ་ནག། ཤུ་དག་མུ་ཟི་སྟག་ཤ་ཤ་ཆེན་དང་།། ལྷོག་དུག་ཐར་ནུ་ཆུ་རྩ་དུག་པུས་པ།། གསེར་གྱི་མེ་ཏོག་ཧོང་ལེན་གི་ཝཾ་རྣམས།། དྲི་ཆུ་སྦྱར་བས་གསོད་སྦྱོང་ཆིག་ཆོད་བྱེད།། དེ་ནས་ཁྱད་པར་ལྷོག་པ་བཅོས་པ་ལ།། བྱུག་པ་འཛིམ་པ་མུ་ཟི་སྟག་ཤ་བ།། གླ་རྩི་གུ་གུལ་གཉན་དུག་ལྷོག་པ་གསོད།། སོ་ཐོག་ཀྱི་ལྕེ་བྲག་སྤོས་ཆུ་རྩ་དང་།། སྤྲུ་རྩ་ཁྱི་སྤྱང་མི་བྲུན་སྐྲངས་པ་འཇོམས།། རྭ་གཞོབ་དུད་པ་བྱ་བལ་བྱ་བྲུན་ཏེ།། བྲག་ཞུན་ཤུ་དག་དྲི་ཆུ་ཀུན་གྱི་གྲོགས།། ཞིབ་ལ་སླ་བ་མ་སྐམས་ཡང་ཡང་བྱུག། སྐྲངས་ཚད་མི་བཤིག་འབྲོས་སྣ་ནོན་པ་གཅེས།། མ་ནོན་ཤོག་བུ་སྤུ་ནན་ཕྱིང་ནན་བྱ།། བྱུག་པ་ཁོང་སྨན་གཉིས་ཀྱིས་མ་སོད་ན།། མེ་ཡིས་བསྲེགས་ལ་ལུང་པའི་མདོ་སྒོ་བགག། རི་བོའི་རྩེ་ལ་མེ་རྒྱ་གདབ་པ་དང་།། སྐྲངས་ཀྱི་ཐ་མ་དམག་གིས་བསྐོར་བ་དང་།། སྟེང་དུ་གནམ་ལྕགས་དབབ་པ་བཞི་ཡིས་བཅོས།། བསྲེགས་རྗེས་ཁོང་སྨན་བྱུག་པ་བསྟུན་ལ་བསད།། ཐུབ་པའི་རྟགས་སུ་སྐྲངས་བྲི་ཟུག་གཟེར་ཆོགས།། ཡང་ན་རྣག་ཏུ་ཁུགས་ན་འཚོ་བ་ཡིན།། རྣག་ཏུ་ཁུགས་ནས་ཡན་ལག་བཞིན་དུ་བཅོས།། ནད་ལོག་བྱེར་ཞུད་འཁྱམས་དང་ཆུ་སེར་ལོག། བྱེར་ལ་རྩ་ཤ་སྐྱི་རྣག་བྱེར་བ་བཞི།། རྩ་བྱེར་མེ་བཙའ་གཏར་ག་སྦྱོངས་ཀྱིས་དགུག། ཤ་བྱེར་ཁྲ་བོ་ནག་པོའི་ཆས་ཀྱིས་དགུག། སྐྱི་བྱེར་ལྤགས་ལ་བྱེར་བ་སྐམ་རྩིས་དགུག། རྣག་བྱེར་ཁྲུས་ནན་དེབ་དང་ཆིངས་ཀྱིས་དགུག། ཞུད་པ་གདོན་བཅོས་ཞོ་སྦང་སྦྱར་བས་བསླང་།། ཡང་ན་སྦང་མ་བྱུག་པས་བྲན་ལ་བདུག། འཁྱམས་པ་དོན་འཁྱམས་རྩ་དྲག་རྔམ་པ་རྒོད།། འཕྲང་བཅད་ཁོང་དུ་བསྡུས་ལ་གཉེན་པོས་བསད།། སྣོད་འཁྱམས་དང་ག་མི་བདེ་འཁྲུ་སྐྱུག་བྱེད།། བཤལ་གྱིས་སྦྱང་བ་ལོག་གནོན་དམ་པ་ཡིན།། ཆུ་སེར་ནག་པོར་ལོག་ན་སྨྱོ་འབོག་བྱེད།། མིག་ལྡོག་སྣ་ནས་ཆུ་སེར་ཁྲག་འཛག་ན།། སྣ་བཤལ་བཏང་ཞིང་ག་བུར་རྒྱལ་བློན་སྦྱར།། དྲུག་པ་བདུན་པ་དཀར་ནག་མཚམས་སུ་བསྲེག། དེ་ལ་སྐྱེད་མེད་ལས་ཀྱིས་འཆི་བ་ཡིན།། གག་པའི་བཅོས་ཐབས་ཞི་བཞུ་བཅད་པ་ནི།། ཞི་བ་ཚ་བཙོད་འཛིམ་པ་ཕོ་ཚོས་གདབ།། བཞུ་བ་ཚ་ལ་རྒྱ་ཚ་མཚུར་གཉིས་གདབ།། བཅད་པ་རྒྱ་ཚ་རུ་རྟ་ཤུ་དག་གདབ།། དེས་མ་ཆོད་ན་ཀྱོང་བུས་བཞར་རྗེས་བསྲེག། གག་པ་གཉན་ཚད་གྲེ་བར་འགགས་པའི་ཕྱིར།། འདི་ལ་དཔྱད་མཆོག་སྦྱོངས་འདྲ་གཞན་ན་མེད།། ནད་ལོག་ཡར་རྫོང་ཀླད་ལ་ཤོར་བ་ན།། སྣ་ནས་ཆུ་སེར་འཛག་ཅིང་བླ་འཆོལ་སྨྲ།། དེ་ལ་སྣ་བཤལ་བཏང་ལ་ཆུ་སེར་སྦྱང་།། མར་རྫོང་སྙིང་ལ་ཤོར་ན་ཤེས་པ་སྨྱོ།། ལྕེ་གཞུང་ནག་ལ་ག་པུར་རྒྱལ་བློན་སྦྱར།། དེ་ལ་སྐྱེད་མེད་ཚེ་ཟད་སྤང་བར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གག་ལྷོག་བཅོས་པའི་ལེའུ་སྟེ་ཉི་ཤུ་རྩ་དྲུག་པའོ།། །།

X