//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་བདུན་པ། ཆམ་རིམས་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:33:29 ཀློག་གྲངས། 7 

      དེ་ནས་དྲང་སྲོང་རིག་པའི་ཡེ་ཤེས་ལ།། དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།། ཆམ་པའི་རིམས་ལ་རྒྱུ་རྐྱེན་དབྱེ་བ་དང་།། དེ་ཡི་རྟགས་དང་བཅོས་ཐབས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།།ཆམ་པའི་རྒྱུ་ནི་རིམས་སྤྱི་འདྲ་བ་ལ།། ཁྱད་པར་མི་གཙང་ཟས་སྤྱོད་ཁ་ཟས་འདྲེས།། རྡུལ་ཚུབ་གྲིབ་ཕོག་རྐྱེན་ལས་འབྱུང་བ་ཡིན།། དབྱེ་བ་གྲེ་ཆམ་གློ་ཆམ་རིམས་ཆམ་དང་།། སྣ་ཆམ་དག་དང་རྣམ་པ་བཞི་ཡིན་ནོ།། དེ་རྟགས་དང་པོ་གྲེ་བ་རྐན་མཚུལ་ཚ།། བར་དུ་སྣ་ཆུ་འཛག་ཅིང་མཚུལ་པ་འགགས།། ཐ་མ་སྦྲིད་པ་མང་དུ་བསྟུད་ཅིང་འོང་།། གློ་ཆམ་དང་པོ་གྲེ་བ་ཚ་ཞིང་འཛེར།། བར་དུ་གློ་མང་མགོ་དང་བྲང་རྒྱབ་ན།། ཐ་མ་རྣག་ཏུ་ལུ་ཞིང་གློ་གཅོང་འགྱུར།། རིམས་ཆམ་མགོ་དང་ཚིགས་གཞི་བྱིན་ཉྭ་ན།། རོ་སྟོད་མི་བདེ་བརླ་རྐེད་བརྡུངས་སྙམ་བྱེད།། ཁ་ཁ་དང་ག་མི་བདེ་གྲང་ཤུམ་བྱེད།། སྲོད་ལ་ཤ་ཚ་རྨི་ལམ་ཟ་ཟི་མང་།། དེ་ལ་དྲག་ཤུལ་བཅུད་ཤོར་རྒྱས་གྱུར་ན།། ཆམ་པ་སྐྱུར་ཤོར་ཞེས་བྱ་ཤི་བ་མང་།། སྣ་ཆམ་སྣ་ཚ་གཡའ་ལ་སྣ་ཆུ་མང་།།བཅོས་ཐབས་གྲེ་ཆམ་ཟས་སྤྱོད་གཟབས་པས་འཚོ།། གློ་ཆམ་ཨ་རུ་ར་ཡི་ཁམ་མུར་བྱ།། སྲོ་ལོ་ཤིང་མངར་སྤང་རྒྱན་གྲང་ཐང་བཏང་།། གྲེ་བ་ཚ་འཛེར་ལི་ཤི་དྲུག་པ་སྦྱར།། མཇུག་ཏུ་ཆམ་རྒན་ལུད་པ་མ་ཆོད་ན།། ཉི་ཤུ་རྩ་ལྔས་ཚ་བའི་གཏིང་བཏོན་ལ།། བུར་དཀར་གསར་འཇམ་བསིལ་བཅུད་གློ་རླུང་གསོ།། ཆམ་རིམས་སྨྱུང་བར་འདུག་ལ་ཆུ་སྐོལ་བཏུང་།། འབྲས་བུ་གསུམ་དང་སླེ་ཏྲེས་ཏིག་ཏ་དང་།། མ་ནུ་ཧོང་ལེན་ཐང་བཏང་རྔུལ་དུ་དབྱུང་།། ཚ་བ་སྨིན་གསོད་དུས་གཅིག་བྱེད་པ་ཡིན།། དྲི་བཟང་བཞི་དང་ཞོ་སྦྱར་ཆམ་པ་སེལ།། སེ་འབྲུ་སྐྱུ་རུ་ཞོ་སྦྱར་དེ་བཞིན་ནོ།། བ་ལུ་ད་ཏྲིག་སྟར་བུ་ཚ་བ་གསུམ།། ཟི་ར་དབྱི་མོང་ཙི་ཏྲ་ཀ་ཆ་གཉིས།། དྲི་བཟང་བཞི་ལ་ཆ་ཕྱེད་ཀ་ར་སྦྱར།། ལུད་པ་ཆམ་པ་རྒྱས་དང་དབུགས་མི་བདེ།། འཇོམས་པར་བྱེད་ཅིང་སྐད་སྙན་ཡི་ག་འབྱེད།། སྣ་ཆམ་ཡོས་ཀྱི་རླངས་པས་བདུགས་ན་ཕན།། ཆུ་འཕྲུལ་ཆབ་ཚ་ཕྱེ་ཚོད་ཞོ་དར་བསྟེན།། དྲག་ཤུལ་ཉིན་གཉིད་དྲོད་བཅུད་སྤང་བར་བྱ།། འགྲམས་ནས་རིམས་སམ་འཁྲུགས་སུ་ཤོར་བ་ན།། བརྩོན་པས་རང་རང་གཞུང་བཞིན་བཅོས་པར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆམ་རིམས་བཅོས་པའི་ལེའུ་སྟེ་ཉི་ཤུ་རྩ་བདུན་པའོ།། །།

X