//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་བརྒྱད་པ། མགོ་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:38:21 ཀློག་གྲངས། 9 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། ལུས་སྟོད་གསོ་བའི་སྐབས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་།། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ལུས་སྟོད་དབང་པོའི་གསོ་ཐབས་མགོ་དང་མིག། རྣ་བ་སྣ་དང་ཁ་དང་ལྦ་བ་དྲུག། དང་པོ་མགོ་ཡི་ནད་ལ་རྒྱུ་རྐྱེན་དང་།། དབྱེ་བ་རྟགས་དང་བཅོས་ཐབས་རྣམ་བཞིར་བསྟན།།རྒྱུ་རྐྱེན་དུད་པ་ཉིན་མཚན་གཉིད་ཆག་དང་།། ཆང་མངས་མང་སྨྲས་ངུ་བ་དྲགས་པ་དང་།། རླུང་འཚུབ་མ་གོམས་དྲིས་ཕོག་རྒྱུ་ལས་འབྱུང་།།དབྱེ་བ་གཙོ་བོའི་ནད་བརྒྱད་ཕལ་པ་དྲུག། དང་པོ་རླུང་མཁྲིས་ཁྲག་དང་བད་ཀན་དང་།། ལྡན་པའི་ནད་གསུམ་མགོ་ཡི་སྲིན་དང་བརྒྱད།། ཕལ་པ་མ་རླུང་རྨེན་འབྲས་གློག་པ་ཅན།། སྐྲ་བྱི་སྤྱི་ཐེར་སྐྲ་དཀར་རྣམ་པ་དྲུག།དེ་རྟགས་རླུང་གྱུར་མུ་འགྲམ་ཟུག་ཅིང་གཟེར།། དཔྲལ་བ་སྨིན་མཚམས་ལུག་པ་སྙམ་དུ་སེམ།། རྣ་བ་འུར་ཞིང་སོ་དང་འགྲམ་པ་ན།། རྩ་འཁྱུག་ལྟ་བ་མི་བཟོད་སྣ་ཆུ་མང་།། ལྡང་དུབ་ན་ཞིང་སྣུམ་དུགས་བསྡམས་ན་བདེ།། མཁྲིས་གྱུར་རིམས་འདྲ་མགོ་ལུས་མིག་རྣམས་ཚ།། དུ་བས་བདུགས་སེམ་མཚན་དུས་གྲངས་ན་བདེ།། ཁྲག་གྱུར་རྩེ་ཆུང་རྒྱངས་ལ་མུ་འགྲམ་གཟེར།། ཆང་དང་དྲག་ཤུལ་གཉིད་དང་ཉི་ཚན་གནོད།། བད་ཀན་ལས་གྱུར་མགོ་ལྕི་ཟས་མི་ཞིམ།། སྐྱུག་ཅིང་མིག་སྐྲངས་མཚན་མོའི་དུས་ན་བདེ།། བད་མཁྲིས་མགོ་ནད་མེ་ཉིས་དྲོས་ཚེ་ན།། མགོ་ལྕི་དང་ག་མི་བདེ་ཆང་ནད་ཆེ།། བད་རླུང་ལྕི་འཁྱོམ་ཟི་ལ་ཟས་མི་ཞིམ།། རླུང་མཁྲིས་གཉིས་ལྡན་དཔྲལ་མིག་མུར་འགྲམ་ན།། གྲང་དྲོ་ངེས་མེད་ཕྱེད་གོང་བཀྲེས་དུས་ལྡང་།། རྩ་རྣམས་འཕར་ཞིང་བསིལ་ཕེབས་དགོངས་དུས་བདེ།། མགོ་སྲིན་སེམས་འཁྲུལ་སྟོབས་ཆུང་མི་བཟོད་ན།། སྣབས་ཀྱི་མདོག་དམར་རྒྱ་སྲུབས་སྟེང་དུ་སྐྲངས།། ངེས་མེད་ནད་ལྡང་ཟས་སྤྱོད་ཕན་གནོད་ཆུང་།། གང་ལངས་རྩ་འཕར་སྒྲ་སྐད་དྲག་ཤུལ་ལྡང་།། དཀར་ནག་འཁར་གོང་བསྲེགས་ལ་མཆིལ་མས་བརྟག། མ་རླུང་བུ་ལ་ཤོར་བ་མགོ་བོ་སྐྲངས།། དེ་བཞིན་རྨེན་འབྲས་སྲ་བར་སྐྲངས་པ་དང་།། སྲིན་ནད་འབྲུམ་ཕྲན་གློག་པས་ཁྱབ་པ་དང་།། བད་ཀན་ཁྲག་མཁྲིས་ཆུ་སེར་སྐྲ་རྩ་སྲུལ།། ཀོ་ལེར་སྐྲ་བྱི་སྤྱི་བོ་ཐེར་པོ་དང་།། ལུས་དྲོད་མགོར་ཞུགས་སྐྲ་ཚོས་སྐྲ་དཀར་འབྱུང་།། བཅོས་ཐབས་རླུང་ལས་གྱུར་པའི་མགོ་ནད་ལ།། ཞུན་མར་རྗེས་ལ་འོ་མ་དྲོན་མོ་བླུད།། ཤ་སྣ་མང་བརྡུངས་འུ་སུས་བྲན་བཙོས་བདུག། མར་སྣ་ཚོགས་དང་ཀ་ར་སྦྱར་ལ་བྱིན།། རླུང་འཇོམས་སྨན་དང་ཞུན་མར་སྦྱར་བ་འམ།། རས་བལ་ས་བོན་ཤིང་ཚ་ཛཱ་ཏི་དང་།། གླ་སྒང་ཆུ་དྲོན་ལ་བཏབ་སྣ་སྨན་བཏང་།། རྒྱ་སྲུབས་རྣམས་སུ་ཧོར་གྱི་མེ་བཙའ་བྱ།། སྡུད་སྒོ་གསུམ་དང་འཕར་རྩ་གང་ལངས་བསྲེག། མཁྲིས་གྱུར་མར་གསར་སྣུམ་འཆོས་རྗེས་ལ་གཏར།། བསིལ་བའི་སྐྱུག་འཁྲུས་སྦྱང་ཞིང་ཆུ་ཡིས་བྲན།། ཙན་དན་ཨུཏྦལ་རྒྱ་སྤོས་རུ་རྟ་བྱུག། ཀ་ར་གུར་གུམ་མར་གསར་སྣ་སྨན་བཏང་།། ཁྲག་གྱུར་འབྲས་བུ་གསུམ་གྱི་ཐང་བཏང་ལ།། གཏར་དང་ཞལ་ཞལ་བྱ་ཞིང་ཆུ་ལྕག་བརྡེག། བད་གྱུར་མར་རྙིང་སྣུམ་རྗེས་སྐྱུག་ཏུ་གཞུག། ཚ་བ་ལྔ་དང་སྤྱང་ཚེར་བ་ཡིས་བདུག། ཙི་ཏྲ་ཀ་དང་སྒ་སྐྱ་སྲན་ཕྱེ་བྱུག།སྨྱུང་བྱས་ལ་ཕུག་སྦྲང་རྩིའི་སྣ་སྨན་བཏང་།། བད་མཁྲིས་མགོ་ནད་ཆུ་ལྕག་མཚོགས་གསང་དབྱེ།། ལོ་གྲངས་ཆུས་བྲན་བུལ་ཏོག་བཏབ་ལ་མཉེ།། སྐམས་ནས་ཞུན་མར་བྱུག་ཅིང་སེ་འབྲུ་སྦྱར།། བད་རླུང་མགོ་ནད་གཉིས་ཀ་ལྡན་པར་བཅོས།། རླུང་མཁྲིས་མགོ་ནད་རླུང་གྱུར་ལྟ་བུར་གསོ།། དེ་རྗེས་ཁྱད་པར་གཏར་ག་མང་དུ་གདབ།། སྲིན་ལ་གཏར་ཁྲག་དྲོན་མོ་སྣར་བླུག་ལ།། ཉ་རུས་ཤིང་ཀུན་བྱི་ཏང་ག་དང་གསུམ།། བ་ཆུ་སྦྱར་བའི་སྣ་སྨན་བཏང་འབྱུང་འགྱུར།། མར་དང་སྦྱར་བའི་དུ་བ་སྣ་རུ་བདུག གླ་རྩི་བཙན་དུག་ཤིང་ཀུན་མ་རུ་ཙེ།། ལང་ཐང་ཙེ་དང་རྩད་བཙོད་ཕུར་མོ་རྣམས།། ཤ་ཚིལ་སྦྱར་ལ་བསྲེགས་པའི་དུ་བས་བདུག། མ་རླུང་རླུང་བཅོས་བྱས་རྗེས་འབྲས་ལྟར་གསོ།། རྨེན་འབྲས་ནད་ལ་དེ་ཡི་གསོ་བ་སྦྱར།། གློག་པ་ཅན་ལ་ལྕགས་ཀྱི་ཞལ་ཞལ་གདབ།། བ་གཅིན་ཁྱིམ་བྱའི་བྲུན་དང་འབའ་ཆ་བསྐུ།། ཡང་ན་རྟ་སྦངས་ཁུ་བ་ཚ་བཏབ་བྱུག། སྤྱི་ཐེར་ཀོ་ལེར་སྐྲ་འབྱི་སྦྱངས་བྱས་ལ།། ཐུར་མས་བཙགས་ཏེ་ཕག་པའི་རྐང་མར་ཚིལ།། སོ་མ་ར་ཛ་སྐྱུ་རུ་ར་སྦྱར་བྱུག། སྦང་མ་ལྡོང་རོས་ནལ་ཤམ་ནག་མཚུར་བྱུག། ཡང་ན་སྦང་མ་རུ་རྟ་ཐལ་ཏྲེས་ཏིལ།། ཨུཏྦལ་འོ་མ་སྦྲང་སྦྱར་ལྡེ་གུ་བྱུག། ཡང་ན་པདྨ་གེ་སར་སྐྱུ་རུ་ར།། ཤིང་མངར་ཏིལ་ནག་སྦྲང་དང་སྦྱར་ལ་བྱུག། རྩ་བ་ལྔ་དང་ཏིལ་མར་སྣ་སྨན་བླུག། སྐྲ་དཀར་ལུག་རུའི་ཐལ་བ་ཡུངས་ཀར་བྱུག། ཤིང་མངར་སྟག་ཚེར་ཙན་དན་པི་པི་ལིང་།། ཨུཏྦལ་སྐྱུ་རུའི་ཁུ་བ་མར་བསྐོལ་བའི།། སྣ་སྨན་མགོ་བསྐུས་སྐྲ་དཀར་གླད་ནད་སེལ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མགོ་ནད་གསོ་བའི་ལེའུ་སྟེ་ཉི་ཤུ་རྩ་བརྒྱད་པའོ།། །།

X