//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཉེར་དགུ་པ། མིག་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:39:19 ཀློག་གྲངས། 7 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུང་སོ།། ཀྱེ་དྲང་སྲོང་ཆེན་པོ་ཉོན་ཅིག། མིག་གི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་ནད་ཀུན་འཁྲུག་པར་བྱེད་པ་དང་།། ཁྱད་པར་ཤ་རུལ་བཙོང་སྒོག་ཆང་སྐྱུར་སོགས།། མིག་ལ་གནོད་ཅིང་ཁྲག་མཁྲིས་སྐྱེད་པའི་ཟས།། བསྟེན་པ་རྩ་ནང་འགྲིམས་པས་མིག་ནད་སྐྱེད།། སྤྱོད་ལམ་དྲག་ཤུལ་མི་ཐེག་ཁུར་བ་དང་།། དུ་བ་བསེར་བུ་ཁ་བ་མཚོན་ལ་སོགས།། རྐྱེན་གྱིས་ཕོག་པས་མིག་ནད་སྐྱེད་པར་བྱེད།། དབྱེ་བ་མིག་ཆུའི་ནད་དང་མིག་ཚག་དང་།། ལིང་ཐོག་རབ་རིབ་འགྲིབས་དང་རྣམ་པ་ལྔ།། མིག་ཆུ་རླུང་མཁྲིས་ཁྲག་དང་བད་ཀན་དང་།། འདུས་པ་སྲིན་བུ་མིག་ནད་སྒྲ་ངན་བདུན།། ཚག་པོ་སྐམ་ཚག་གཤེར་ཚག་གདུང་གྱུར་གསུམ།། དེ་ལ་རླུང་མཁྲིས་བད་ཀན་ཁྲག་དང་བཞི།། ལིང་ཐོག་རབ་རིབ་དབྱེ་བའང་དེ་བཞིན་ནོ།། འགྲིབས་ལ་སྲོད་ལོང་ཕྱི་ནང་བར་འགྲིབས་གསུམ།། ཕྱི་འགྲིབས་ཤ་ལྷག་ཤ་མཛེར་རྩ་དྲ་དང་།། སྔོ་རིབ་ལིང་རོས་ཁེབས་དང་རྣམ་པ་ལྔ།། ནང་འགྲིབས་ཆུ་འཁྲུགས་རྩ་མདངས་ཉམས་པ་གཉིས།། བར་འགྲིབས་རླུང་མཁྲིས་བད་ཀན་འདུས་པ་བཞི།། སུམ་ཅུ་རྩ་གསུམ་མིག་ནད་དབྱེ་བར་འདོད།། དེ་རྟགས་མིག་ཆུའི་ནད་ལ་རླུང་གྱུར་པ།། མཆི་མ་འཛག་ཅིང་རྡུལ་གྱིས་གང་སྙམ་སེམ།། འཛུམ་པར་དཀའ་དང་དུས་མེད་འབྱེད་འཛུམ་བྱེད།། ཆུ་དང་བད་ཀན་ཁྲག་རྣག་གྲ་མཚམས་འཛག། མཁྲིས་གྱུར་ཚ་དམར་འདྲུལ་ཞིང་འབྲུམ་ཕྲན་ཁྱབ།། གཡའ་ཞིང་སྐྲངས་ལ་ཆུ་སེར་རྣག་བཅས་འཛག། ཁྲག་གྱུར་ཟུག་ཆེ་འབྲུམ་ཕྲན་དམར་པོས་ཁྱབ།། བད་ཀན་ལས་གྱུར་འབྲུམ་ཕྲན་དཀར་པོས་གང་།། མིག་ནད་འབྱར་ཞིང་གཡའ་ལ་ཟུག་ཆུང་བ།། འདུས་གྱུར་མིག་ཞུ་རྫི་མ་ནང་དུ་ཟུག། ཚ་སྐྲངས་མཆི་མ་འཛག་ཅིང་མིག་མཆུ་འབྱར།། སྲིན་གྱུར་རྨེན་བུ་སུབ་འདོད་གཡའ་བ་འབྱུང་།། བྱིས་པའི་མིག་ནད་སྒྲ་ངན་སོ་སྐྱེ་ཚེ།། མ་ནད་ལས་བྱུང་དམར་ཚ་འབྱར་ཞིང་སྐྲངས།། ལག་པས་མིག་དང་སྣ་ཉེད་གསོ་དཀའ་ཡིན།། མིག་ནད་སྐམ་ཚག་བད་རླུང་ལས་གྱུར་པ།། མིག་སྐམ་རྩུབ་ཅིང་ཚ་ལ་བསེར་བུ་གནོད།། གཤེར་ཚག་ཁྲག་དང་མཁྲིས་པ་ལས་གྱུར་པས།། དམར་ཚ་ཉི་མ་མི་བཟོད་མཆི་མས་ཁེངས།། གདུང་བའི་མིག་ནད་རླུང་གྱུར་ལྡང་དུབ་བྱེད།། རྡུལ་གྱིས་གང་ངམ་བུས་སྙམ་བྱེད་པ་དང་།། མགོ་འཁོར་རྣ་བ་འུར་ཞིང་མིག་དམར་སྐྲངས།། མཁྲིས་གྱུར་ཚ་སྐྲངས་དམར་འདྲུལ་སེར་པོར་མཐོང་།། མེ་མདག་གཏོར་སྙམ་མཛེར་ཐབས་ཁྱབ་པ་ཡིན།། ཁྲག་གྱུར་ཤིན་ཏུ་ན་ཞིང་རེག་མི་བཟོད།། མེ་ཉི་མི་བཟོད་མིག་དམར་དམར་པོར་མཐོང་།། བད་ཀན་གཡའ་སྐྲངས་མིག་གི་འབྲས་བུ་ཞུ།། གདུང་བ་ཕལ་ཆེར་སོ་དང་མུར་འགྲམ་དང་།། མཁུར་ཚོས་མགོ་བོ་ན་ཞིང་རིབ་ཚབས་ཆེ།། ལིང་ཐོག་མིག་འབྲས་དཀར་ནག་སྟེང་དག་ཏུ།། རླུང་གྱུར་སྔོ་སྲབ་མཁྲིས་པ་ཐིག་ལེ་སེར།། ཁྲག་གྱུར་མཚོན་གྱིས་གཙེས་འབྱུང་དམར་པོར་འོང་།། བད་ཀན་ལས་བྱུང་མཐུག་ཅིང་སྐྱ་བས་གཡོགས།། ཀུན་ལ་ཟུག་ཆེ་རྩུབ་ཅིང་མཆི་མ་འབྱུང་།། མཐོང་བྱེད་སྟེང་བྱུང་ཟངས་གཟེར་འདྲ་གསོ་དཀའ།། རབ་རིབ་ནད་དེ་མིག་ཆུའི་ནང་དུ་འཇུག། དེ་ཡང་རིམ་པ་བཞིན་དུ་འཇུག་འགྱུར་ཏེ།། དང་པོར་ཞུགས་ཚེ་རེས་གསལ་རེས་མི་གསལ།། གཉིས་པར་ཞུགས་ཚེ་ཐག་རིང་ཆུང་མི་མཐོང་།། ཉེ་ཞིང་གཟིར་བལྟས་ལེགས་མཐོང་གོ་ལོག་སྣང་།། སྟེང་འོག་གཡས་གཡོན་ཉེ་རིང་ལོགས་མི་གསལ།། འདི་དུས་རབ་རིབ་ཅེས་བྱ་གསོ་བ་སྒྲིམས།། རླུང་གྱུར་དུ་བ་རབ་རིབ་སྐྲ་ཤད་དང་།། སྦྲང་བུ་འོད་མཐོང་གཟུགས་ཀུན་གཡོ་བར་སྣང་།། མཁྲིས་གྱུར་གློག་དང་མེ་སྒྲོན་རྨ་བྱའི་སྒྲོ།། ཁྲག་གྱུར་དམར་ལ་བད་ཀན་མུན་འཐིབས་འགྱུར།། གསུམ་པར་ཞུགས་ཚེ་སྟེང་མཐོང་འོག་མི་མཐོང་།། རས་ཀྱིས་མིག་བཀབ་ལྟར་མཐོང་ནད་མདོག་སྣང་།། སྔོན་པོ་ཞེས་བྱའི་རིམ་པ་བཞིར་ཕྱིན་ནས།། རྒྱལ་མོ་ཁེབས་ཏེ་ལོང་བར་འགྱུར་བ་ཡིན།། འགྲིབས་པ་སྲོད་ལོང་ནག་པོ་ལང་ལིང་ཁེབས།། ཤ་ལྷག་སྐྱ་བོ་ཟུག་ཆུང་དལ་བུས་སྐྱེ།། ཤ་འཛེར་ར་རིལ་ལྟ་བུར་དམར་ལ་འབུར།། དེ་རྒྱས་མདོག་ནག་རྒྱ་ཆེ་མཐུག་པ་ཡིན།། རྩ་ཡི་དྲ་བས་མཐུག་ཁྱབ་དེ་ཉིད་དོ།། སྔོ་རིབ་སྒོང་སྤྲིས་ལྟ་བུས་ཁྱབ་པ་སྟེ།། ལིང་རོ་སྲབ་དང་མཐུག་པས་སྒྲིབས་པ་གཉིས།། མཐུག་པོ་སྦོ་མ་ཚ་རྡོག་མིག་གཉིས་སྤང་།། ཆུ་འཁྲུགས་མཚོ་གཉིས་འདྲེས་ཏེ་སྣག་ཚ་འདྲ།། རྒྱལ་མོའི་རྩ་མདངས་ཉམས་པས་ནག་སང་འོང་།། རླུང་འགྲིབས་ཉི་མ་མཁྲིས་འགྲིབས་འུག་མིག་དང་།། བད་ཀན་ཟླ་བ་འདུས་པ་འཇའ་ཚོན་འདྲ།། རྟགས་ལས་ནད་ངོས་མ་འདྲེས་སོ་སོར་བཟུང་།།གསོ་བའི་ཐབས་ལ་སྤྱི་དང་བྱེ་བྲག་གཉིས།། སྤྱི་རུ་སྨན་དཔྱད་ཟས་སྤྱོད་བཞི་ཡིས་བཅོས།། སྨན་དུ་གསལ་བྱེད་ལྡེ་གུ་འབྲས་གསུམ་མར།། ཨ་བ་བཅོ་ལྔ་ལ་སོགས་ཁོང་དུ་བཏང་།། དཔྱད་དུ་སྣུམ་འཆོས་ཁྲུས་སྐྱུགས་གཏར་ག་བྱ།། ལྡོང་རོས་རྒྱ་མཚོའི་ལྦུ་བ་སྤང་སྤོས་དུང་།། གླ་རྩི་ཨུཏྦལ་སུག་སྨེལ་སྐྱེར་ཁཎྡྲི།། ཙན་དན་གུར་གུམ་རྒྱམ་ཚ་ཚ་བ་གསུམ།། ཀ་ར་སྦྲང་སྦྱར་བྱུགས་ན་མིག་གི་ནད།། རབ་རིབ་ཤ་འཛེར་ཚག་འགྲིབས་ནད་ཀུན་སེལ།། ཟས་སྤྱོད་ཚ་སྐྱུར་རུལ་སུངས་བཙོང་སྒོག་ཟྭ།། སྣེ་ཚོད་ལོ་བཤུར་མར་ནག་བུར་སྨུག་དང་།། དུ་བ་བསེར་བུ་ཁ་བ་ཆགས་པ་སྤྱོད།། དྲག་ཤུལ་སྐད་ཆེས་འདོན་པ་ལ་སོགས་སྤང་།། ཁྱད་པར་མིག་ཆུ་རླུང་གྱུར་གུར་གུམ་དང་།། མར་རྙིང་ཆུར་བསྐོལ་སྣ་སྨན་མིག་བརྟ་བྱ།། སྐྱེར་པའི་ཁཎྡྲི་ནུ་ཞོ་སྦྲང་སྦྱར་བྱུག། མཁྲིས་གྱུར་འབྲུམ་པ་བཞར་རྗེས་ཆུ་དྲོན་བཀྲུ།། ག་པུར་དོམ་མཁྲིས་ཡུང་བ་ཨ་རུ་ར།། ནུ་ཞོ་སྦྲང་རྩི་སྦྱར་ལ་བྱུག་པར་བྱ།། ཁྲག་གྱུར་འབྲུམ་པ་བཞར་ཞིང་གང་ཉེ་གཏར།། བཙོད་དང་སྐྱེར་པ་རྒྱ་སྐྱེགས་རྒུན་འབྲུམ་དང་།། ཨུཏྦལ་བསྐོལ་གྲངས་ཀ་ར་མིག་ཏུ་བླུག། བད་གྱུར་འབྲུམ་པ་བཞར་ལ་ནག་མཚུར་དང་།། པི་པི་ལིང་དང་རྒྱ་ཚ་ལྡོང་རོས་དང་།། སྟང་ཟིལ་སྦྲང་དང་སྦྱར་ལ་མིག་ཏུ་བླུག། མདུང་རྩེ་ཙན་དན་དཀར་བོ་ཤིང་མངར་བཙོད།། ཞུ་མཁན་ཆུ་ལ་སྦྱངས་པ་མིག་ལ་འབྱུག། མིག་ནད་ཅི་ལས་གྱུར་ཀྱང་འཕྲལ་ཟུག་གཅོག། འདུས་པའི་མིག་ཆུ་རྫི་མ་ཕྱིས་བྱས་ལ།། སྐྱེར་པའི་ཁཎྡྲི་ལྡོང་རོས་ཟངས་ཕྱེ་དང་།། ནག་མཚུར་བྱི་རུག་ཟངས་ནང་སྦངས་ཁུ་བླུག། བྱི་རུག་ནག་མཚུར་ཟངས་ནང་བཞག་པ་བྱུག། སྲིན་གྱུར་བ་ལྕིའམ་རྟ་སྦངས་དུགས་བྱས་ནས།། ཐོར་པ་བརྟོལ་ལ་ནག་མཚུར་རྒྱ་ཚ་དང་།། འབྲས་བུ་གསུམ་དང་སྦྲང་རྩི་སྦྱར་བ་བྱུག། མིག་ནད་སྒྲ་ངན་མ་ནུའི་སྐྱུག་ཁྲུས་བྱ།། སེང་ཕྲོམ་ནིམ་པ་ཧོང་ལེན་སེར་པོ་གཉིས།། ཟངས་ཕྱེ་ནུ་ཞོ་སྦྱར་བ་མིག་ལ་བྱུག། ཆུ་སེར་རྣག་ཁྲག་གྲ་མཚམས་ནས་འཛག་ན།། ཨ་རུ་བུལ་ཏོག་སྦྲང་རྩི་དྲི་ཆུས་བཀྲུ།། དེ་རྗེས་ག་པུར་དོམ་མཁྲིས་སྐྱེར་ཁཌྷྜྷཱ་བྱུག། སྐམ་ཚག་ཏི་ཚ་སེར་པོ་ཅུ་གང་དང་།། མར་གསར་ཀ་ར་མེ་ལོང་གཡའ་བླངས་བྱུག། ཡང་ན་མི་སྐྲ་མར་སྦྱར་ནུས་ལྡན་བསྲེགས།། ཐལ་བ་མར་གསར་མེ་ལོང་གཡའ་སྦྱར་རམ།། རག་དུད་མར་གསར་མེ་ལོང་གཡའ་སྦྱར་བྱུག། གཤེར་ཚག་དཔྲལ་རྩ་མིག་རྩ་སྣ་རྩེ་གཏར།། སྐྱེར་པའི་ཁཎྡྲི་ར་འོ་སྦྱར་བ་བྱུག། མིག་ཚག་ཀུན་ལ་སག་རྩི་ཚ་བ་གསུམ།། ཡུང་བ་དུང་དང་ཏི་ཚ་སེར་པོ་དང་།། མར་གསར་མེ་ལོང་གཡའ་དང་སྦྱར་ལ་བྱུག།མཆིན་པ་ཚོན་པོ་ཆུར་སྦངས་ཆུ་སེར་བཏོན།། ཞིབ་བརྡུངས་མར་བཙོས་ཚ་གསུམ་སྦྲང་རྩི་བཏབ།། མཆིན་པའི་རླངས་པས་མིག་ཚག་སེལ་བར་བྱེད།།  གདུང་བའི་མིག་ནད་རླུང་གྱུར་འབྲས་གསུམ་མར།། སྨིན་མའི་སྟེང་དང་ལྟག་པའི་སྤུ་འཁྱིལ་དང་།། རྐང་པའི་རྟིང་པའི་དྲེག་མཚམས་མེ་བཙའ་གདབ།། ཁྲག་མཁྲིས་ལས་གྱུར་ཁོང་སྦྱང་གཏར་ག་བྱ།། ཤིང་མངར་སྐྱེར་པ་ཀཎྡྲི་ཀ་རི་ཡི།། ཁཎྡྲི་ར་གན་དུད་པ་ན་ལེ་ཤམ།། སྦྱར་བསྐུས་དམར་ཚག་གཟེར་ཞིང་འདྲུལ་བ་སེལ།། གསལ་བྱེད་དགུ་པའི་ལྡེ་གུ་བཏང་བར་བྱ།། བད་ཀན་སྐྱུགས་བྱས་ནིམ་པ་འབྲས་བུ་གསུམ།། སེང་ཕྲོམ་བ་ཤ་ཀ་ཁུ་དྲོ་འཇམ་བླུག། མར་རྙིང་ཚ་བ་གསུམ་དང་སྦྱར་བ་བཟའ།། ལིང་ཐོག་ཁྲག་མཁྲིས་མཚོན་གྱིས་གཙེས་པ་ལ།། འཁྲུས་སྨན་གཏར་ག་སྐྱེར་ཁན་དོམ་མཁྲིས་བྱུག། རླུང་གྱུར་ཞུན་མར་བཟའ་བདུག་སྒོག་ཆབ་བཏང་།། བད་ཀན་ལས་གྱུར་ཉ་ཕག་ཤ་ཡིས་བཤིག། ཀུན་ལ་ཨ་རུ་བུལ་ཏོག་དྲི་ཆུས་བཀྲུ།། ཡང་ན་རྡོ་མཁྲིས་དོམ་མཁྲིས་ཀ་ར་བཏབ།། མཚེ་སྦྱིན་བཙན་དུག་ཞིམ་ཐིག་རྒྱ་ཚས་བླང་།། ལིང་ཐོག་རྙིངས་ནས་ཤུ་དག་འབྲས་བུ་གསུམ།། རུ་རྟ་ཀ་རའི་ཕྱེ་མ་བཏབ་པས་སེལ།། སྦང་མ་འགྲོན་བུ་ལྡོང་རོས་བཙག་ཡུག་རྣམས།། རྒྱ་མཚོའི་ལྦུ་བ་མགོ་རུས་སྟང་ཟིལ་དུང་།། ཁྱིམ་བྱའི་སྒོ་ང་སྦྱར་བསྐུས་ལིང་ཐོག་གཅོད།། ཅུ་གང་གུར་གུམ་ག་བུར་གླ་རྩི་དང་།། ལིག་བུ་མིག་བཏགས་ཀ་ར་སྦྱར་བ་བྱུག། སྦང་ལུམས་བྱས་རྗེས་སྦོས་སུ་ཚོར་བ་དང་།། ལ་ཆའི་དུད་པས་བདུགས་རྗེས་ལྕགས་ཀྱུས་བཤུ།། རབ་རིབ་ཀུན་ལ་ཤིང་མངར་ར་མཉེ་གཉིས།། ཀཎྡྲི་ཀ་རི་ཨུཏྦལ་ཨ་རུ་ར།། པི་པི་ལིང་དང་ཀ་ར་རྒུན་འབྲུམ་དང་།། ར་འོ་བ་མར་འབྲས་གསུམ་བ་ཤ་ཀ། བསྡུས་ཁུས་རབ་རིབ་སེལ་བར་བྱེད་པ་ཡིན།། འབྲས་གསུམ་ཤིང་མངར་སྦྲང་རྩིའི་ལྡེ་གུ་སྦྱར།། ཉལ་ཁར་བཟའ་ཞིང་ཟླ་གཅིག་ཕན་ཟས་བསྟེན།། སྐྱུ་རུའི་ཁུ་བ་འཐུངས་ན་རབ་རིབ་སེལ།། ཏ་ཙ་ཤིང་མངར་ལྕགས་ཕྱེ་ཀ་ར་སྦྲང་།། མར་རྙིང་འབྲས་བུ་སྦྱར་བས་རབ་རིབ་སེལ།། ཨ་རུ་སྦྲང་རྩི་རྒྱུན་དུ་ཟས་གོང་བསྟེན།། ཅོང་ཞི་བསིལ་གསུམ་ཨུཏྦལ་འབྲས་བུ་གསུམ།། གོ་སྙོད་ཤིང་མངར་བྲག་ཞུན་སྦྲུལ་གྱི་ཤ། ལྕགས་ཕྱེ་ཨ་བ་རྣམ་གཉིས་ཀ་ར་སྦྱར།། ཡུན་དུ་བསྟེན་ན་མིག་གི་བཅུད་ལེན་འགྱུར།། སྤང་མ་གསེར་རྡོ་ཤིང་མངར་ན་ལེ་ཤམ།། འོ་མར་སྦངས་ལ་དུ་བ་མ་ཤོར་བསྲེག། ལྡེ་གུ་བྱུགས་པས་རབ་རིབ་སེལ་བར་བྱེད།། སྤངས་མ་ཤིང་མངར་བར་སྐྱུར་ན་ལེ་ཤམ།། ཆུར་བཏགས་རིལ་བུ་དར་བསྐུས་རབ་རིབ་སེལ།། ཨུཏྦལ་སྐྱེར་པའི་ཁཎྡྲི་ཚ་བ་གསུམ།། རུ་རྟ་ཨ་རུ་ར་ཡིས་རབ་རིབ་འཕྱག། སྦྲུལ་གྱི་རོ་གཅིག་སྡིག་པའི་རོ་བཞི་རྣམས།། ཉི་ཤུ་རྩ་གཅིག་འོ་མར་བསྲུལ་པའི་མར།། ཁྱིམ་བྱ་གསོས་པའི་བྲུན་གྱི་ལྡེ་གུ་བྱུག། མཁའ་ལྡིང་བྱ་རྒོད་ལྟ་བུའི་མིག་འཐོབ་འགྱུར།། ཨ་རུ་ར་དང་དོམ་མཁྲིས་རྒྱ་སྐྱེགས་དང་།། གླ་རྩི་བུལ་ཏོག་ཆུ་གཙང་འཁར་སྣོད་སྦྱངས།། མིག་ཏུ་གཏིགས་པས་སྤྲིས་གཡོགས་རབ་རིབ་སེལ།། ལིང་རོ་རྩ་དྲ་ལ་སོགས་འགྲིབས་ཀུན་གཅོད།། ག་པུར་གླ་རྩི་རྒྱ་ཚ་སྒོ་ང་ལ།། ཨེཾ་ན་ག་ཤ་རི་རྦད། ག་ཏོ་ཤ་རི་རྦད། ཐུག་ནན་ཤ་རི་རྦད་སྲོཾ་ཧཱ། སྨྲ་བ་བཅད་དེ་སྒོང་སྤྲིས་ཞུ་བར་བཟླས།། འདེབས་དུས་ཉི་ཤུ་རྩ་རེ་ཁོང་དུ་བཏང་།། སྨན་བྱུགས་སྔགས་གདབ་འགྲིབ་བྱེད་མ་ལུས་སེལ།། ཉ་ཕག་སྒོ་ང་གོ་སྙོད་རྒྱུན་དུ་བསྟེན།། རྐང་བཀྲུ་འབྲི་མར་ཕག་ཚིལ་གོ་སྙོད་བྱུག། རྐང་རྗེན་མི་བྱ་གནོད་པའི་ཟས་སྤྱོད་བསྲུང་།། སྲོད་ལོང་ན་ལེ་ཤམ་དང་ཞོ་སྦྱར་བྱུག། བ་ལྕི་མཆེར་པའི་ནང་དུ་པི་པི་ལིང་།། བཅུག་བསྲེགས་གྲིབ་སྐམས་སྦྲང་སྦྱར་ལྡེ་གུ་བྱུག། ར་མཆིན་དམར་པོ་ཟོས་ན་སྲོད་ལོང་སེལ།། ཤ་མཛེར་གསར་དུས་ཁྲག་མཁྲིས་ལྟ་བུར་བཅོས།། རྙིངས་ནས་ཁབ་རྩེས་ཕུག་ལ་མཐེབ་མོས་མཉེ།། ཤ་ལྷག་རྩ་དྲ་ཤ་མཛེར་རྒྱས་པ་ན།། དང་པོ་ཁྲུས་གཏར་སྨན་གྱིས་བཅོས་བྱས་ལ།། དུགས་བྱས་མཐེབ་མོས་མཉེས་ལ་གཙགས་བུས་བཤུ།། ཆུ་ལྕག་བྱས་ཏེ་སྦྲང་མར་བྱུགས་ལ་བཅིང་།། དེ་རྗེས་ཨ་རུའི་ལྡེ་གུ་ནུས་ལྡན་བསྲེགས།། བར་སྐྱུར་ཁུ་བར་སྦྱར་ལ་གྲིབ་སྐམས་བྱ།། རྒྱ་ཚ་ཉིས་འགྱུར་སྦྱར་བའི་ཕྱེ་མ་བཏབ།། དཔྱད་བྱས་བཤུལ་གྱི་ནད་ལྷག་མ་ལུས་གཅོད།། རབ་རིབ་ལིང་རོ་ལྡེ་གུ་ནུས་ལྡན་བསྲེག། སྔོ་རིབ་ལིང་རོ་སྲབ་མོ་ཆུ་འབྱེད་བྱ།། པ་ཡག་འབྲས་བུ་ལུག་རུ་ཞིམ་ཐིག་ལེ།། འགྲོན་ཐལ་ཉ་མཁྲིས་སེག་རྩི་འཛིབ་བུ་ཀ། ཁྱི་ཀླད་སྦྲང་སྨྱོན་སྦྱར་བ་བླུག་རྗེས་འཕྱག། ཕྱི་འགྲིབས་མ་ལུས་སེལ་བར་བྱེད་པ་ཡིན།། ནང་འགྲིབས་ཟས་སྤྱོད་ཁོང་སྨན་དག་ལ་འབད།། བར་འགྲིབས་དཔྱད་མཆོག་ཐུར་མས་དབྱེ་བར་བྱ།། དེ་ལ་སྔོན་འགྲོ་དངོས་གཞི་ཕྱི་རྗེས་གསུམ།། སྔོན་འགྲོ་ནད་དུས་རིམ་གྲོ་དཔྱད་དང་བཞི།། ནད་གཞིའི་སྔོན་འགྲོ་དབྱེར་རུང་མི་རུང་བརྟག། དབྱེར་མི་རུང་བ་ལུད་པ་ཆམ་པས་བཏབ།། མ་ཞུ་འཁྲུ་སྐྱུག་མགོ་གཟེར་ཡོད་པ་དང་།། ལུས་ལ་དགྲ་དར་སྤར་ཁ་ལི་ལ་བབས།། འདུས་པའི་མིག་ཚིལ་ཞུ་བ་དབྱེར་མི་རུང་།། ཕྱི་འགྲིབས་ནང་འགྲིབས་ཐུར་མས་དབྱེར་མི་ཕྱེད།། མ་སྨིན་དུས་སུ་བསལ་ཡང་སླར་འགེབས་སྤང་།། མེ་ཟླ་ཉི་མ་ཤར་ནུབ་མི་མཐོང་ན།། དུས་འདས་རྒྱལ་མོའི་མཐུ་ཉམས་དབྱེར་མི་རུང་།། དབྱེར་རུང་དེ་ཟློག་ཆུ་ནང་ཞག་ཐིགས་འདྲ།། ཟླ་བ་ཉ་ལྟར་གང་བ་དབྱེ་བར་བྱ།། དུས་ཀྱི་སྔོན་འགྲོ་རླུང་འགྲིབས་ལོ་གསུམ་སྨིན།། བད་ཀན་ལོ་གཅིག་འདུས་པ་ཕྱེད་དང་གཉིས།། མཁྲིས་པ་ཟླ་བ་དྲུག་གིས་སྨིན་པའི་དུས།། མ་སྨིན་གནོད་པའི་ཟས་ཀྱིས་སྨིན་པར་བྱ།། རིམ་གྲོ་སྔོན་འགྲོ་ཆབ་གཏོར་བརྒྱ་རྩ་དང་།། གྲྭ་ལྔ་འདོན་ཞིང་ལྷ་མཆོད་གནོད་པ་བསལ།། དཔྱད་ཀྱི་སྔོན་འགྲོ་ནད་བཤིག་བསལ་སླའི་ཕྱིར།། ལོ་ངར་ཞུ་མཁན་ཆང་བཙོས་རླངས་དུགས་བྱ།། དངོས་གཞི་ཆོ་ག་གསང་ས་བརྡེག་ཐབས་དང་།། བསལ་ཐབས་སོལ་ཚད་བརྟན་བྱ་ལེགས་ཉེས་རྟགས།། སྤྱི་དོན་རྣམ་པ་བརྒྱད་དུ་ཤེས་པར་བྱ།། དང་པོ་ཐུར་མའི་ཚད་དང་བཅའ་གཞི་གཉིས།། ཐུར་མའི་རྒྱུ་ནི་གསེར་ཟངས་ར་གན་གསུམ།། བྲ་བོ་འབྲི་ལྕེ་ཁ་དང་གཟོང་ཁ་འདྲ།། སྲིད་སོར་དྲུག་པ་རྩེ་མོ་རྒྱལ་མོ་གང་།། ཞེང་དུ་དེའི་ཕྱེད་མགྲིན་པ་གྲ་མགྲིན་ཙམ།། སྲིད་དུ་བར་མཚོན་དོ་དབུས་རི་མོ་དོད།། ཐུར་རྐེད་གྲུ་བཞི་སྦོམ་ལ་ཐུར་ཞབས་ཕྲ།། ཆག་ཚད་ལྡན་པས་སྐྱོན་སྤོང་ཡོན་ཏན་འབྱུང་།། ལུས་ཀྱི་བཅའ་གཞི་གཟའ་སྐར་ཚེས་བཟང་ལ།། སྤྲིན་མེད་ཉི་མ་ལྡེ་སར་འདུ་ལོང་བསྡམས།། སྔ་དྲོ་ཤར་བལྟས་ལོ་མཐུན་གཡོག་གིས་བརྟེན།། སྣམ་བུ་གཙང་མས་ལག་པ་རྐེད་པ་དྲིལ།། སྨན་པ་མདུན་ངོས་ནས་ཀྱི་ཁྲི་སྟེང་འདུག། གཡོག་གིས་རྡོ་གཉིས་མི་འབྱེད་ངོས་སུ་བརྡུང་།། དེ་ཡི་སྒྲ་ལ་ནད་པ་མིག་བལྟར་གཞུག། གསང་ས་ལྷ་མི་བདུད་ཀྱི་བུ་ག་གསུམ།། ཚད་དང་ལྡན་པའི་དར་ཡེས་གསང་མཚོན་ཏེ།། གྱེས་ན་ནད་མི་སུམས་ལ་བསྡུས་ན་འབྱར།། མཐོས་ན་མི་ནོན་དམས་ན་མི་སུམས་པས།། བདུད་ལས་ཕྱིར་བསྐྱེད་བཙན་ལས་གདོང་བྱོལ་བའི།། ཐུར་རྩེ་གང་གི་དབུས་སུ་བརྡེག་པར་བྱ།། བརྡེག་ཐབས་གཡོན་པས་མིག་མི་འགུལ་བར་བཟུང་།། གཡས་ཀྱིས་ཐུར་ཞབས་གསང་དེ་བསྟན་བྱས་ལ།། ཐུར་མ་བཟློག་སྟེ་མཐེབ་མཛུབ་གུང་མོས་བཟུང་།། མ་ཞུམ་བརྟན་པས་གསང་དུ་ལེགས་བཙུགས་ལ།། ཐུར་མ་བྱ་མི་འདའ་བའི་མན་ངག་གིས།། མིག་གི་དཀྱིལ་དུ་བསྡིགས་ལ་ནེམས་ཀྱིས་དབུལ།། ལེགས་ཕུགས་པུས་ཞེས་བྱ་བའི་སྒྲ་བྱུང་ནས།། འཚི་མེད་བལ་གྱིས་མིག་ལ་ཆུ་ལྕག་བྱ།། བསལ་ཐབས་རང་ལ་གདུང་ཚུགས་བལྟར་བཅུག་ལ།། ཐུར་མ་བསྙལ་ཏེ་རྒྱལ་མོའི་སྟེང་དུ་བཏང་།། རྒྱལ་མོ་སྐྱ་རིབ་ཐུར་རྩེ་མཉམ་པར་འདོད།། ཕན་ལྟར་དྲིལ་དང་བཙོང་ལྟར་བཤུ་བ་དང་།། འོ་ལྟར་དབོ་དང་སྤུ་ལྟར་གཟིངས་པ་ཡིས།། སྒྲིབ་བྱེད་བསལ་ལ་ཐུར་མའི་འོག་ཏུ་སྦ།། འཐོར་ན་བསྡུ་ཞིང་བྲོས་ན་དགུག་པ་དང་།། ཤོར་ན་གླན་ཞིང་དམས་ན་ཁུ་ཡིས་གདབ།། སོལ་ཚད་ཉི་མ་གཟའ་ལས་ཐར་བ་བཞིན།། ཕྲ་རགས་གཟུགས་རྣམས་འཕྲལ་དུ་གསལ་བ་ཡིན།། འོ་ལྟར་བོ་ན་དེ་དུས་མི་གསལ་ཡང་།། ནད་ཆུ་དངས་ནས་ག་ལེ་ཕྱི་ནས་གསལ།། དེ་འོག་མི་ལྡོག་བརྟན་པར་བྱ་བའི་ཕྱིར།། སྐད་འདོན་གློ་ལུ་དབུགས་བསྡམ་གམ་འགའ་བཅག། ལོག་ན་བསལ་ཞིང་མ་ལོག་བརྟན་པ་དང་།། ཆུ་བལ་གླན་ལ་དེ་སྟེང་རས་མས་བཅིང་།། མལ་དུ་བསྙལ་ལ་ཐུར་མ་དྲིལ་ཏེ་གདོན།། སྔས་མཐོར་བྱས་ལ་མིག་དེ་འོག་ངོས་བསྟན།། ལེགས་པའི་རྟགས་ལ་འདོད་པ་རྣམ་གསུམ་ཡོད།། ནགས་ལ་ཁ་བ་བབས་འདྲ་འདོད་པ་ཡིན།། གངས་ལ་ཉི་མ་ཤར་འདྲ་འདོད་པ་ཡིན།། དཔྱད་རྗེས་ཟུག་མེད་བདེ་ན་འདོད་པ་ཡིན།། ཉེས་པའི་རྟགས་ལ་མི་འདོད་རྣམ་པ་གསུམ།། ཕུག་དུས་ཁྲག་གིས་གང་ན་དེ་མི་འདོད།། སེལ་དུས་རྙོག་ནག་ལངས་ན་དེ་མི་འདོད།། དཔྱད་རྗེས་ཟུག་གཟེར་ལངས་ན་དེ་མི་འདོད།། ཕྱིར་རྗེས་ཟས་སྤྱོད་བསླབ་དང་ལོག་པ་མནན།། ཁ་ཟས་མར་དཀར་འོ་ཟན་འཚོས་པར་བཙོས།། སྐྱོ་འདུར་བལྡད་མི་དགོས་པ་ལྟོ་སྲུང་བསྟེན།། སྐོམ་ན་ཆུ་གྲོག་བག་ཙམ་བཏུང་བར་བྱ།། སྦྲིད་པ་གློ་ལུ་སྣབས་ཕྱི་མཆིལ་མ་འདོར།། ལྡང་ཉལ་ལ་སོགས་དྲག་ཤུལ་ཀུན་ལ་གཟབ།། མིག་གི་མན་ངག་ཆུ་ཡིན་ནན་ཏན་བསྐྱེད།། ཞག་གསུམ་ལོན་ནས་བཅིངས་པ་བཀྲོལ་ལ་བལྟ།། ཞག་བདུན་ལོན་ནས་ཁ་ཟས་ཆ་ཡིས་གློད།། རླུང་ཤས་ཆེ་ན་དེ་བས་བག་སྔར་གློད།། གནོད་པའི་ཟས་སྤྱོད་དུག་འདྲ་རྒྱུན་དུ་གཟབ།། ལོག་གནོན་འགྲམས་དང་འགྲིབས་པ་ཞར་བ་གསུམ།། དང་པོ་ཤ་རུས་རྩ་དང་གདན་འགྲམས་བཞི།། ཤ་འགྲམས་ལྟག་པར་ཟུག་དང་མིག་མི་ཐེག། ལུས་རྔུལ་མགོ་ལྕི་རབ་རིབ་མཆི་མ་མང་།། ལྟག་པར་གྱོ་དུགས་སྐྲ་མཚམས་མུར་གོང་བསྲེག། རུས་འགྲམས་མིག་འབྲས་ཡན་ལག་ཚིགས་གཞི་དང་།། དཔྲལ་བ་མིག་རུས་ན་ན་མཚོགས་མའི་སྟེང་།། ཚ་བ་གསུམ་མམ་འབྲུ་མར་དུགས་ཀྱིས་བདུག། རྩ་འགྲམས་མིག་དམར་མི་ཐེག་མགོ་ཕྱེད་ན།། སྐེ་མཇིང་མི་བདེ་ལུས་སྦྲིད་ཆུ་ནན་བསྐྱེད།། དཔྲལ་རྩ་མིག་རྩ་སྣ་རྩེ་ལ་སོགས་གཏར།། གདོན་འགྲམས་ཚིག་པ་ཟ་ལ་ལུས་པོ་འདར།། རྔུལ་འབྱུང་གྲང་ཤུམ་བྱེད་ན་བསྐྲད་ལས་བྱ།། གཞན་ཡང་ཉེས་པ་གང་འབྲེལ་སྦྱོར་བས་གསོ།། སྤྱོད་ལམ་རྐྱེན་གྱིས་ནད་ལོག་འགྲིབས་པ་ལ།། སྦྲུལ་ཤ་ཨ་བ་གུར་གུམ་གོ་སྙོད་དང་།། ཀ་ར་མར་གསར་ལུག་མཆིན་བརྒྱངས་པ་བཏང་།། བསིལ་གསུམ་ག་དུར་སྐྱེར་པའི་ཁཎྡྲི་དང་།། ནུ་ཞོ་ར་འོ་སྦྱར་བ་མིག་ཏུ་བླུག། གསལ་བྱེད་བདུན་དགུའི་ལྡེ་གུ་སྦྱར་ལ་བཏང་།། སྐྱེད་མེད་ཟླ་བ་ཕྱེད་ནས་ཐུར་ལོག་བསྐྱར།། ཞར་བའི་ལོག་གནོན་ཟུག་གཟེར་བཅག་པ་གཅེས།། ག་པུར་དོམ་མཁྲིས་སྐྱེར་པ་མིག་ཏུ་བླུག། གང་ཉེའི་རྩ་གཏར་ཆུ་ལྕག་དྲག་ཏུ་བྱ།། དོམ་མཁྲིས་ལ་སོགས་མཁྲིས་པའི་ལྕག་མདའ་བཏང་།། བསིལ་གསུམ་འབྲས་གསུམ་ལྕགས་ཕྱེ་སྦྲང་སྦྱར་བཟའ།། ཟས་སྤྱོད་བསིལ་བསྟེན་དྲོད་བཅུད་སྤང་བར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མིག་ནད་བཅོས་པའི་ལེའུ་སྟེ་ཉི་ཤུ་རྩ་དགུ་པའོ།། །།

X