//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་སུམ་ཅུ་པ། རྣ་བའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:40:12 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། རྣ་བའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་ཟས་དང་སྤྱོད་ལམ་གདོན་སོགས་ཀྱིས།། འདུ་བ་འཁྲུགས་ཏེ་རྣ་བའི་ནད་སྐྱེད་འགྱུར།།དབྱེ་བ་རྣ་བ་ནད་དང་འོན་པ་གཉིས།། ནད་ནི་རླུང་མཁྲིས་བད་ཀན་ཁྲག་དང་བཞི།། འདུས་གྱུར་རྣག་འཛག་འབྲུམ་ཐོར་འབྱུང་བ་དྲུག། འོན་པ་སྒྲ་བཅས་འོན་དང་རྣ་སྤབས་འགགས།། སྐམ་འོན་མ་རླུང་བུ་ལ་ཤོར་བ་བཞི།།དེ་རྟགས་རྣ་ནད་རླུང་གྱུར་སྟོང་སྙམ་སེམ།། ཟུག་ཆེ་གྲངས་ན་མི་བདེ་གཞོགས་ཕྱེད་ན།། མཁྲིས་གྱུར་ཚ་བཅས་ཟུག་ཆེ་མགོ་བོ་ན།། ཆུ་སེར་མྱུར་འཛག་གང་རེག་འབྲུམ་ཐོར་རྣག། རྣ་བ་ནང་འགྲམས་ཁྲག་གྱུར་ལྕི་ཟུག་ཆེ།། བད་ཀན་ལས་གྱུར་མགོ་དང་འགྲམ་པ་ལྕི།། ཟུག་ཆུང་གཡའ་སྐྲངས་རྙིངས་ནས་རྣག་སྐམ་འཛག། འདུས་གྱུར་ཀུན་གྱི་རྟགས་ལྡན་སྒྲ་མི་ཐོས།། རྣག་མདོག་སྐ་སླ་མ་ངེས་རྒྱུན་དུ་འཛག། འོན་པ་སྒྲ་བཅས་ཆུ་བཤང་རྔ་སྒྲ་ཐོས།། རྣ་སྤབས་འགགས་ན་རྣ་བ་ཁེངས་འཐིབས་ལྕི།། སྐམ་འོན་སྟོང་སང་ནག་གམ་དམར་བའོ།། མ་རླུང་བྱིས་པ་སོ་སྐྱེ་ལས་བྱུང་ཚེ།། མ་རླུང་བུ་ལ་ཤོར་བས་རྣག་འཛག་འོན།། གསོ་ཐབས་རླུང་གྱུར་སྣུམ་ལྡན་དྲོད་དུགས་བྱ།། སྒོག་སྐྱ་བཅའ་སྒ་ཤིང་ཀུན་མར་སྦྱར་བཏང་།། ལ་ཕུག་སྐམ་པོ་ཆང་དུ་བཙོས་བྱས་ལ།། བརྡུངས་བཙིར་ཁུ་བ་རྒྱམ་ཚ་དྲོ་འཇམ་བླུག། ཡང་ན་སྒྲོན་ཤིང་སྡོང་བསྲེགས་སྣུམ་སྦྱར་རམ།། རྒྱམ་ཚ་རུ་རྟ་ར་ཐུག་ཆུ་སྦྱར་བླུག། དེ་ལ་སྐྱེད་ཆུང་འབའ་སམ་སྨན་མར་སྦྱར།། མཁྲིས་གྱུར་ཀ་ར་མར་དང་བཅས་པ་བཟའ།། དེ་འོག་བསིལ་བའི་འཁྲུས་བཏང་མངར་བས་དགང་།། རུ་རྟ་ཨ་རུའི་ཐང་བཏང་རྣ་བར་བླུག། ཁྲག་གྱུར་དེ་བཞིན་ཁྱད་པར་གང་ཉེ་གཏར།། བད་གྱུར་པི་པི་ལིང་དང་མར་བསྐོལ་བླུག། དེ་རྗེས་སྐྱུགས་བྱ་སྒོག་སྐྱ་ལ་ཕུག་དང་།། སྒེ་གཤེར་ཁུ་བ་གང་རུང་རྣ་བར་བླུག། རྣག་འཛག་རེད་སྦྱང་སྨན་བསྐུས་བལ་ཡེས་ཕྱི།། ཡང་ན་སྣུམ་འཆོས་རྗེས་ལ་རྣ་བ་སྦྱང་།། རུ་རྟ་ལ་ཕུག་བྱང་པ་རྒྱ་ཚ་དང་།། སྒེ་གཤེར་ཞིབ་བཏགས་དར་ཚགས་ལ་བཏོན་ལ།། འབྲུ་མར་སྦྱར་ཏེ་འཇམ་ཙམ་སྲོས་ལ་མནན།། ལངས་ནས་ཁྱི་བལ་ཡེ་འུས་རྣ་བར་གཏིགས།། ཁྱི་བལ་བག་ཟན་རས་གསར་ལེགས་པར་བགག། རྣ་བ་རྔབས་ཀྱིས་དྲངས་པས་ནད་ཀུན་སྦྱོང་།། རྣག་འཛག་པ་དང་རྣ་སྤབས་འགགས་པ་སེལ།། ཡང་ན་རྒྱ་ཚ་ཤུ་དག་གསེར་ཕུད་བུ།། སྒོག་སྐྱ་རུ་རྟ་ཆ་མཉམ་ཞིབ་བཏགས་ལ།། བལ་དྲིལ་སྒོག་ཆུར་བཅུག་བཙིར་ཁུ་བ་བླུག། ཞག་གསུམ་ལོན་ནས་སྦུབས་མས་དྲང་བར་བྱ།། འབྲུམ་ཐོར་ཀྱོང་བུས་བཞར་རྗེས་པི་པི་ལིང་།། རྒྱམ་ཚ་ལྡོང་རོས་ཉེ་ཤིང་ཙི་ཏྲ་ཀ། དནྡ་སྦྲང་མར་སྦྱར་བའི་རེང་བུ་གཞུག། སྒྲ་བཅས་འོན་ལ་འབྲུ་མར་བསྲོས་ལ་བླུག། དེ་འོག་ཤིང་ཀུན་ཤུ་ཏི་སྐྱེར་བར་ཤུན།། ཀྱི་ལྕེ་བོང་ང་དཀར་པོ་ཚ་བ་གསུམ།། ཡུངས་མར་བཞི་འགྱུར་ཚ་བསྐོལ་བླུག་པས་ཕན།། རྣ་སྤབས་འགགས་ན་སྒོག་སྐྱ་ལ་ཕུག་ཁུ།། འབྲུ་མར་སྦྱར་བ་རུ་རྟ་རྨ་བྱའི་མདོངས།། རྒྱམ་ཚ་བཏབ་ལ་འཇམ་བསྲོས་རྣ་བར་བླུག། ཐུར་ལ་སྦུབ་ཉལ་ནང་པར་རྔབས་རྭས་དྲང་།། ཡང་ན་གླ་རྩི་ཤིང་ཀུན་ཁ་རུ་ཚ།། རུ་རྟ་ལ་ཕུག་ཨུག་ཆོས་རྨ་བྱའི་མདོངས་།། འབྲུ་མར་སྦྱར་ལ་རྣར་བླུག་རྗེས་ལ་བྲུ།། སྐམ་འོན་ཤིང་ཀུན་རུ་རྟ་གླ་རྩི་དང་།། ཨུག་ཆོས་ཏིལ་མར་སྦྱར་བླུག་བལ་ཡེས་ཕྱི།། དམར་སང་ལ་ནི་གདོན་བཅོས་བྱ་བར་ཤིས།། འོན་པ་ཀུན་ལ་སྒོག་སྐྱ་ལ་ཕུག་ཆུ།། ར་ཐུག་ཆུ་ལ་རྒྱམ་ཚ་རྒྱ་ཚ་དང་།། རུ་རྟ་གླ་རྩི་ཤིང་ཀུན་ཨུག་ཆོས་འབྲས།། རྣར་བླུག་ཡེ་འུས་བྲུ་ཞིང་རྔབས་ཀྱིས་དྲང་།། ལ་ཕུག་བཅའ་སྒའི་ཐལ་བ་སྐྱེར་བར་ཤུན།། ཤིང་ཀུན་ཤུ་དག་ཤུ་ཏི་ཁ་རུ་ཚ།། རྒྱ་ཚ་རུ་རྟ་ཀྱི་སྙེ་ཡ་བཀྵ།། གྲོ་གའི་ཐལ་བ་གླ་སྒང་འབྲུ་མར་དང་།། ཚྭ་བསྲིངས་བཞི་འགྱུར་ལྕུམ་ཁུར་བསྐོལ་ཏེ་བླུག། གཡའ་སྐྲངས་སྒྲ་བཅས་རྣག་འཛག་འོན་པ་སེལ།། མ་རླུང་གསར་ཞུགས་རྣག་འཛག་བཅོས་དང་མཚུངས།། འབའ་སམ་མར་སྦྱར་རྙིངས་ནས་སྤང་བར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྣ་བའི་ནད་གསོ་བའི་ལེའུ་སྟེ་སུམ་ཅུ་པའོ།། །།

X