//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་སོ་གཅིག་པ། སྣ་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:40:54 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།སྣ་ནད་རྒྱུ་རྐྱེན་དབྱེ་བ་བཅོས་ཐབས་གསུམ།། རྒྱུ་རྐྱེན་ཟས་དང་སྤྱོད་ལམ་གདོན་རྐྱེན་གྱིས།། འདུ་བ་འཁྲུགས་པས་སྣ་ནད་སྐྱེད་པར་བྱེད།།དབྱེ་བ་སྣ་བསུབས་འབྲུམ་ཐོར་ཤ་ལུ་དང་།། རྣག་ཁྲག་འཛག་དང་རྣམ་པ་ལྔར་བཤད་དོ།།བཅོས་ཐབས་རྣག་དང་ཆུ་སེར་སྣ་འགགས་ན།། དབུགས་འཚུབ་མཚུལ་པ་ཤུ་ལ་སྣ་བཤལ་བཏང་།། དྲོད་སྨན་སྟར་བུ་ཤིང་མངར་སྦྲང་རྩི་སྦྱར།། གདོང་སྐྲངས་སྟོད་བརྒྱངས་མཚུལ་པ་འགགག་པ་སེལ།། འབྲུམ་ཐོར་བྱུང་ན་ཏི་ཚ་མར་དཀར་བྱུག། དནྡ་དུར་བྱིད་ལྡོང་རོས་ལྕེ་མྱང་ཚ།། ཙི་ཏྲ་ཀ་དང་པི་ལིང་མར་དང་སྦྲང་།། རེང་བུ་སྦྱར་ལ་སྣ་ནང་གཞུག་པར་བྱ།། དེས་མ་སེལ་ན་རྣ་བ་ལྟ་བུར་བཅོས།། སྐམ་ཞིང་ཚ་ན་གུར་གུམ་ཞུན་མར་བླུག། སྣ་ལ་འབྲས་བྱུང་སྣ་ནད་ཤ་ལུ་ཡིན།། བྲུད་དང་གཅོད་སྨན་གཏར་ལུམས་སྐེམས་ཀྱིས་བཅོས།། ཕལ་ཆེར་འཚོ་དཀའ་སྔོན་གྱི་ལས་ནད་ཡིན།། ཚད་རོ་རྫོང་ལ་བྲོས་ཏེ་རྣག་འཛག་ན།། སྐྱུགས་རྗེས་རྒྱ་སྐྱེགས་ཤིང་ཀུན་བྱི་ཏང་ག། བུ་རམ་པི་པི་ལིང་དང་ན་ལེ་ཤམ།། ལུག་ཐུག་གཅིན་དང་སྦྱར་བའི་སྣ་སྨན་བཏང་།། ཡང་ན་ཚ་བ་གསུམ་དང་དུག་མོ་ཉུང་།། ཟི་ར་བྱི་ཏང་ག་ཡི་ཁུ་བ་བླུག། ཐོང་ཚེར་མགོ་ཤ་རུས་པ་ཀླད་པར་བཅས།། ཟི་ར་དཀར་པོ་ཤིང་ཀུན་བཏབ་ལ་བསྡུ།། སྒ་དང་པི་པི་ལིང་གཉིས་འཚོས་ཁར་གདབ།། ལྟོ་སྟོང་བསྐོལ་བཏང་འབྲས་བུའི་སྨན་མར་བྱ།། སྣ་ནས་ཁྲག་འཛག་དེ་རིགས་རྣམ་པ་གསུམ།། སེར་ལ་སླ་བ་ཀླད་པ་ལས་འབྱུང་སྟེ།། སྨིན་དབྲག་མེས་བསྡམ་རྟ་སྦངས་སྣ་སྨན་བཏང་།། སྨུག་ནག་སྣེ་བཞི་ལས་བབས་སྣེ་ས་བཅིང་།། ནུ་མ་རླིག་པ་ཟ་འོག་སྐུད་པས་བཀྱིག། དམར་ལ་དངས་པ་རྩ་ཁ་བྱེ་བ་ཡིན།། སྣ་ཡི་དབུགས་ཀྱིས་གར་སླེབ་དཔུང་འཛུམ་བསྲེག། སྣ་རུ་གསུར་བདུག་ཐང་དང་ལྡེ་གུ་བཏང་།། ཀུན་ལ་མཁན་སྐྱ་འམ་སྤྲུ་མའི་རེང་བུ་ཡི།། མགོ་ལ་གུར་གུམ་དོམ་མཁྲིས་ཟབ་འགྲོན་ཐལ།། ལྡེ་གུ་བྱུགས་ལ་ཕུགས་སུ་སླེབ་པར་བརྫང་།། སྣ་ཁྲག་ཕལ་ཆེར་ཁྲག་འཕེལ་ལས་འབྱུང་བས།། རྩེ་ཆུང་གཏར་ཏེ་འོལ་ཁ་བསྒྱུར་བར་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྣ་ནད་གསོ་བའི་ལེའུ་སྟེ་སོ་གཅིག་པའོ།། །།

X