//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་སོ་བཞི་པ། སྙིང་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:52:02 ཀློག་གྲངས། 6 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། དོན་སྣོད་གསོ་བའི་སྐབས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།དོན་སྣོད་ནད་ཀྱི་གསོ་ཐབས་བསྟན་པ་ནི།། སྙིང་དང་གློ་བ་མཆིན་མཆེར་མཁལ་མ་ལྔ།། ཕོ་བ་རྒྱུ་མ་ལོང་གི་ནད་བརྒྱད་ལས།། ཐོག་མར་དོན་གྱི་རྒྱལ་པོ་སྙིང་གསོ་བ།། རྒྱུ་དང་དབྱེ་བ་རྟགས་དང་བཅོས་ཐབས་བཞི།།རྒྱུ་ནི་མྱ་ངན་སེམས་འཁྲུགས་ཡིད་མི་བདེ།། ལྟོ་ཆག་གཉིད་ཆག་ཞེ་སྡང་དྲག་པོས་སྐྱེད།། དབྱེ་བ་སྙིང་འཕྱོས་སྙིང་གཟེར་སྙིང་ཚད་དང་།། སྙིང་ཆུ་སྙིང་འཐིབས་སྙིང་གི་སྲིན་བུ་དང་།། སྙིང་ནད་ཁ་ལེ་ནག་པོ་ཞེས་བྱ་བདུན།།དེ་རྟགས་སྙིང་འཕྱོས་མགོ་ན་བརྗེད་ངས་ཆེ།། ཤེས་པ་འཕྱོ་ཞིང་དོན་མེད་སྙིང་མི་དགའ།། རེས་འགའ་མ་དྲིས་པར་ཡང་མུ་ཅོར་སྨྲ།། རེས་འགའ་དྲིས་ཀྱང་དེ་ཡི་ལན་མི་ལྡོན།། མི་སྙན་ཚིག་གིས་དངང་ཞིང་ཤུ་ཡིས་འདེབས།། དབུགས་ཐུང་གཉིད་ཆུང་སྙིང་ཉིད་སྟོང་ངམ་སེམ།། སྙིང་གཟེར་ནད་ལ་རླུང་གཟེར་ཁྲག་གཟེར་གཉིས།། མགོ་འཁོར་སྟོད་གཟེར་རྔམ་པ་ཐུང་ལ་ཆེ།། མིག་རྩ་རྒོད་ཅིང་ཁ་ལྕེ་སྐམ་ལ་རྩུབ།། ཁྲག་གཟེར་ལྕེ་སྐམ་ཕུར་པ་བཙུགས་ལྟར་གཟེར།། འབུར་ཚུགས་བལྟ་ཞིང་རྔམ་རྒོད་ཞེ་འཁུན་བྱེད།། སྙིང་ཚད་ཚ་བ་རྒྱས་དང་འཁྱིལ་བ་གཉིས།། རྒྱས་པ་མྱོས་འཐིབས་མིག་དམར་རོ་སྟོད་གཟེར།། སྙིང་མཆུ་སྣ་སྐམ་བྲང་རྒྱབ་མེ་བཏང་འདྲ།། ཚ་བ་སྙིང་ལ་འཁྱིལ་བ་ཚ་མྱག་བྱེད།། སྙིང་འཕར་གྲི་ཡིས་གཏུབས་སྙམ་ལྕེ་སྐམ་ཐུང་།། སྙིང་ལ་ཆུ་སེར་བབས་ན་སྨྲ་བ་མང་།། ཁོང་འདར་གཉིད་ཆུང་སྙིང་རྡུང་གཡལ་སྟོང་གཡོ།། གླུ་དང་དགོད་ལ་དགའ་ཞིང་ཚིག་པ་ཟ།། སྙིང་འཐིབས་བརྗེད་ངས་ཆེ་ཞིང་སེམས་ལས་ཆེ།། དང་ག་མི་བདེ་གཉིད་ཆེ་རྡོ་བརྫངས་སེམ།། སྲིན་གྱུར་མིག་མདོག་ནག་ཅིང་ལྗན་ལྗིན་འཛག། སྙིང་འཕར་མུན་འཐིབས་སོག་ལེས་འབྲད་སྙམ་སེམ།། ཁ་ལེ་ནག་པོ་རྩ་སྟོང་ཚད་པ་ཆེ།། སྨྲ་ཉུང་སྤྲོ་ཐུང་རྡེག་འདོད་འབུར་ཚུགས་བལྟ།། མགོ་བོ་ཕྱེད་ན་ན་ངོས་ཁ་ཡོར་འགྱུར།།བཅོས་ཐབས་དང་པོ་སྙིང་ལ་རླུང་ཞུགས་པས།། འབྲས་བུའི་མར་ནི་བཟའ་བྱུག་འཇམ་རྩིར་བཏང་།། ཛཱ་ཏི་ཁ་རུ་ཚ་ཡི་སྨན་མར་རམ།། རུས་ཆེན་ལོ་མར་འབྲས་བུའི་སྨན་མར་ལ།། ཤིང་ཀུན་ཛཱ་ཏི་ཁ་རུ་ཚ་དང་སྒ།། སླེ་ཏྲེས་གོ་སྙོད་བུར་རྙིང་བཏབ་ལ་བཏང་།། བཙན་དུག་ཨ་རུ་གླ་རྩི་རུ་རྟ་དང་།། ཤིང་ཀུན་ཤུ་དག་ཛཱ་ཏི་གུ་གུལ་དང་།། བུ་རམ་སྦྱར་བའི་རིལ་བུ་ཐབས་ལྡན་བསྟེན།། དྲུག་བདུན་སྙིང་སྟོད་སྙིང་ལོགས་མེ་ཐུར་བྱ།། བུད་མེད་སྨྲ་བརྗོད་མི་ཉན་ཁ་ཡེང་སྤང་།། རླུང་གཟེར་ཛཱ་ཏི་གོ་སྙོད་ཞོ་ཤའི་ཐང་།། ཕྱེ་མ་དེ་སྟེང་རུ་རྟ་ལི་ཤི་དང་།། ཀ་ཀོ་ལ་དང་ཤིང་ཀུན་བུ་རམ་སྦྱར།། སྙིང་གསང་མདུན་རྒྱབ་གང་དུ་བབས་པ་བསྲེག། ཁྲག་གཟེར་ཞོ་ཤ་སླེ་ཏྲེས་ཨ་རུའི་ཐང་།། ཕྱེ་མ་ཙན་དན་ཨ་གར་སྙིང་ཞོ་ཤ། གེ་སར་གཉིས་དང་ཛཱ་ཏི་ཀ་ར་སྦྱར།། ཨ་སོ་རྩེ་ཆུང་གཏར་ལ་དྲུག་བདུན་བསྲེག། བཅོས་འཕྱིས་སྙིང་ནང་ཁྲག་གིས་གང་སྟེ་འཆི།། སྙིང་ལ་ཚ་བ་རྒྱས་ན་སྙིང་རྩ་གཏར།། ག་བུར་བདུན་དགུ་ཉི་ཤུ་རྩ་ལྔ་སྦྱར།། ཚ་བ་འཁྱིལ་ན་ག་བུར་སྙིང་ཞོ་ཤ། ཛཱ་ཏི་ཅུ་གང་དོམ་མཁྲིས་ཀ་ར་སྦྱར།། ཐོང་རྩ་ཨ་སོ་ལྕེ་འོག་རྩ་ལ་གཏར།། སྙིང་གི་ཆུ་སེར་སེ་འབྲུའི་ཕྱེ་མ་སྦྱར།། དཀར་ནག་མཚམས་དང་སྡུད་སྒོ་བདུན་པ་བསྲེག། འབྲས་གསུམ་སེང་ལྡེང་མར་གྱིས་ཆུ་སེར་སྐེམ།། སྙིང་འཐིབས་སྐྱུགས་བྱ་ཆུ་སྐོལ་མང་དུ་བཏང་།། སེ་འབྲུ་དབྱི་མོང་ཚ་བ་གསུམ་གྱི་ཐང་།། རྒྱམ་ཚ་དྲོད་སྨན་ཁ་རུ་ཚ་ཐང་བཏང་།། ཤུ་དག་ཤིང་ཀུན་རྒྱམ་ཚ་ཁ་རུ་ཚ།། དོང་གྲ་སུག་སྨེལ་ཡ་བཀྵ་ར་དང་།། ལ་ལ་ཕུད་དང་དྲོད་སྨན་སྦྲང་སྦྱར་བཏང་།། སྙིང་སྲིན་བྱི་ཏང་ག་དང་ཤིང་ཀུན་དང་།། མ་རུ་ཙེ་དང་སྒོག་སྐྱ་ལང་ཐང་ཙེ།། ཛཱ་ཏི་ཞོ་ཤ་སྤྲུ་མའི་ཁུ་བས་དབུལ།། བྱི་ཏང་ག་དང་རུ་རྟ་བ་ཆུར་སྦྱར།། སྙིང་གི་སྲིན་ནད་ཚ་གཡའ་གཟེར་འཁྱུག་སེལ།། ཁ་ལེ་ནག་པོ་སྐྱུ་རུ་ར་ཡི་ཐང་།། རྒོད་ཀྱི་ལྟོ་སྟོང་པ་ཡི་ཚ་བ་བཏང་།། ཞོ་ཤ་གསུམ་གྱི་མར་སྦྱར་སྙིང་རྩ་བསྲེག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྙིང་ནད་གསོ་བའི་ལེའུ་སྟེ་སོ་བཞི་པའོ།། །།

X