//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་སོ་བརྒྱད་པ། མཁལ་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:54:59 ཀློག་གྲངས། 13 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། མཁལ་མའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་ནི་བརྡབས་དང་མི་ཐེག་ཁུར་དང་བཏེག། རླན་ལ་འདུག་དང་ཆུ་ཡི་ལས་བྱས་འབྱུང་།། དབྱེ་བ་མཁལ་རླུང་མཁལ་གཅོང་འོར་ལྷུང་དང་།། མཁལ་ཚད་ཆུ་ཤོར་འགྲམས་གྲུམ་ད་རྒན་བརྒྱད།།དེ་རྟགས་མཁལ་རླུང་རྐེད་པ་འཕྱོངས་ནས་ན།། ནད་དམིགས་མི་རྙེད་རྣ་བ་འོན་པར་འགྱུར།། མཁལ་གཅོང་སྨད་གྲང་རྐེད་པ་འཁོར་བར་ན།། རྐང་པ་བཤལ་ལ་དཔྱི་དང་རྐེད་པར་ཟུག། ཆུ་སྲི་བཅུད་རླུགས་བཤུལ་ཤ་ཁྲིད་ནས་ན།། འོར་ལྷུང་མཁལ་རྐེད་ན་ཞིང་ཟ་འཕྲུག་བྱེད།། འགྲོ་འདུག་བྱས་ཚེ་པུས་མོའམ་བོལ་གོང་སྐྲངས།། མཁལ་ཚད་ཆང་འཐུངས་འགྲོ་འདུག་བྱས་ཚེ་ན།། ཆུ་ཁ་ཚ་ཞིང་ཤ་རུས་བར་ན་འཁྱུག།མཁལ་མ་ཆུ་ཤོར་མཁལ་རྩ་འགྲམས་པའམ།། མཆིན་ཁྲག་བཅས་པས་ཟགས་ཆུ་ཁྲག་ཏུ་འབྱུང་།། མཁལ་འགྲམས་བྱེར་རྒྱས་ལྷུང་བ་རྣམ་པ་གསུམ།། སྟོད་དུ་བྱེར་ན་ལྟག་ཆུའི་འགྲམ་གཉིས་ན།། སྐེ་སྒྱུར་མི་ཤེས་སྒུར་པོར་འགྲོ་བ་ཡིན།། བར་དུ་རྒྱས་ན་མཁལ་རྐེད་འཁོར་ཞིང་ན།། དཔྱི་སྟེང་འབྲེལ་མཚམས་རྩ་ནག་སྦོ་ཞིང་གཟེར།། གློ་དང་སྦྲིད་པ་བྱུང་ཚེ་བཟོད་ཐབས་མེད།། ཚིགས་པ་ཁ་བྱེ་རྐེད་པ་ཀྱོག་པོར་འགྲོ།། སྨད་དུ་ལྷུང་ན་རྐང་པ་བཤལ་ཞིང་སྦྲིད།། བརླ་སུལ་བྱིན་སུལ་པུས་མོའི་ཚིགས་མཚམས་ན།། མཁལ་གྲུམ་རྐེད་པ་མན་ཆད་ཐམས་ཅད་ན།། གློ་དང་སྦྲིད་པ་བྱུང་ཚེ་དཔྱི་མིག་ཟུག། སྒལ་པ་རེངས་ཤིང་མཇིང་པ་སྒྱུར་མི་ཤེས།། ནམ་སྟོད་ན་ཞིང་ནམ་སྨད་བདེ་བར་ཚོར།། ཆང་དང་དྲོད་བཅུད་ཟོས་རྗེས་ཚ་བ་སྐྱེ།། ད་རྒན་ཚིགས་པ་ཕྱིར་དོན་སྒུར་པོར་འགྲོ།།བཅོས་ཐབས་དང་པོ་མཁའ་རླུང་གཟེ་མའི་ཆང་།། རྩ་བ་ལྔ་ཡི་སྨན་མར་འཇམ་རྩི་བཏང་།། རེང་བུ་བྱ་ཞིང་བཅུ་བཞི་རྩ་ནག་བསྲེག། མཁལ་གཅོང་ཐོང་ཚེར་མཁལ་མ་མར་བཙོས་བཏང་།། གཟེ་མ་ལྕ་བ་ར་མཉེ་ཟན་ཆང་ལ།། ཆང་བསིངས་བསྣུར་ཏེ་བུ་རམ་སྒ་དང་མར།། བཏབ་སྟེ་ཚོས་པར་བཙོས་ལ་དྲོ་འཇམ་བཏང་།། རྩ་བ་ལྔའམ་ར་གསུམ་ཤ་སྣ་གཉིས།། སྒ་དང་བྲེ་གའི་མར་ལ་པི་པི་ལིང་།། ཅོང་ཞི་སུག་སྨེལ་སླེ་ཏྲེས་ཁ་ཚར་གདབ།།བུ་རམ་སྦྲང་དང་སྦྱར་ལ་བཏང་བར་བྱ།། འབའ་སམ་མར་ལ་ད་བྱིད་སྨུག་པོ་དང་།། རྩངས་པ་མཆིལ་པ་ཕུག་རོན་ལང་ཐང་ཙེ།། ཅོང་ཞི་ཚ་བ་གསུམ་དང་འབྲས་སྣ་གསུམ།། ཞོ་ཤ་གསུམ་དང་ཛཱ་ཏི་སྡིག་སྲིན་དང་།། སུག་སྨེལ་བྲེ་ག་བུ་རམ་སྦྱར་ལ་བཏང་།། ཁྱད་པར་གཅིན་སྙི་ས་བོན་འཛག་པ་གཅོད།། སུག་སྨེལ་ཚ་བ་ལྔ་དང་ཚྭ་སྣ་ལྔ།། སྡིག་སྲིན་ལྕམ་པ་འབྲས་གསུམ་བུར་སྦྱར་བཏང་།། དུགས་དང་མེ་བཙའ་དྲོད་དང་བཅུད་ཀྱིས་བཅོས།། འོར་ལྷུང་འབམ་པོ་སེང་ལྡེང་སྨན་མར་ལ།། ཚྭ་སྣ་ཚོགས་ཚད་སྦྲང་དང་སྦྱར་ལ་བཏང་།། བོང་བུ་འཕྱི་བ་རྟ་རྐྱང་ཤ་སྣ་བསྟེན།། ཟ་འཕྲུག་གཡེར་མ་ཤུ་དག་ཡུང་བ་དང་།། མར་རྙིང་ཕག་ཚིལ་བྱུགས་ལ་ཉི་མས་བསྲེག། པུས་མོ་བོལ་གོང་སྐྲངས་ཚེ་ཆུ་ཚན་བྱ།། མཁལ་ཚད་ནད་ལ་མཁལ་མ་ཞོ་ཤ་དང་།། གུར་ཀུམ་སྐྱེར་ཤུན་སྡིག་པ་ཀ་ར་སྦྱར།། བྱིན་གཞུག་ལོང་རྩ་གཉིས་ལ་གཏར་བར་བྱ།། མཁལ་མའི་ཟགས་ཆུ་ཁྲག་ཏུ་བྱུང་སྲིད་ན།། མཁལ་རྩ་འགྲམས་སམ་མཆིན་ཁྲག་བབས་པ་ཡིན།། བསིལ་གསུམ་བྲག་ཞུན་དོམ་མཁྲིས་བ་ཤ་ཀ། ཤིང་ཚ་བ་ལུ་ཀ་ར་སྦྱར་ལ་བཏང་།། རུ་ཐུང་ལོང་རྩ་གཏར་ཞིང་ཆུ་ལྕག་བྱ།། ཆུ་ཤོར་སྐྱུ་རུ་ར་ཡིས་ཁྲག་ཕྱེ་གཏར།། དམར་པོ་བཞི་ཐང་ཙན་དན་གུར་གུམ་གླ་རྩི་བྲག་ཞུན་ཏིག་ཏ་མཁལ་མ་ཞོ་ཤ་བཙོད་ཚོས་ཞུ་མཁན་ཨ་རུ་ཤུག་ཚེརབཅུ་གཅིག་སྦྱར།། གི་ཝཾ་གླ་རྩི་གསེར་གྱི་བྱེ་མ་དང་།། བསིལ་གསུམ་སྡིག་སྲིན་ལྕམ་པ་འབྲས་སྣ་གསུམ།། བྲེ་ག་ཀ་ར་སྦྱར་བའི་ཕྱེ་མ་བཏང་།། སྟོད་དུ་བྱེར་ན་ལུམས་བྱ་ལྟག་རྩ་གཏར།། བར་དུ་རྒྱས་ན་མཆོག་ཏུ་རྩ་སྦྱོང་ཤིས།། སྨད་དུ་ལྷུང་ན་གཏར་དང་ཆུ་ལུམས་བྱ།། ཀུན་ལ་ཚ་བ་ཆོགས་ན་སྨན་མར་སྦྱར།། གང་དུ་ཟུག་པའི་སྟེང་དུ་མེ་བཙའ་གདབ།། མཁལ་གྲུམ་སྔོན་བུཨ་རུ་རྒུན་འབྲུམ་ཟངས་རྩིའི་བཤལ་བཏང་ཆུ་ལུམས་བྱ།། རྩ་ནས་སྦྱངས་ནས་སེང་ལྡེང་ཁཎྡྲི་དམར་པོ་བཞི་ཆུ་སེར་སྨན་གསུམ་བོང་ཁྲག་སྦྲང་བསྒར་བའིཕྱེ་མ་སྦྱར།། བསིལ་གསུམ་ཞོ་ཤ་གསུམ་དང་འབྲས་སྣ་གསུམ།། ཆུ་སེར་སྨན་གསུམ་གསེར་གྱི་བྱེ་མ་དང་།། སྡིག་སྲིན་བྲེ་ག་སྦྲང་གི་ལྡེ་གུ་དང་།། བདུད་རྩི་མེ་ཏོག་འབྲུ་སྣའི་རླངས་ལུམས་བྱ།། བྱིན་གཞུག་ལོང་རྩ་ཁྲག་དང་སྦྱར་ལ་གཏར།། ཚ་བ་ཆོགས་ནས་སྦྲང་ཆང་ཡོངས་རྫོགས་སྦྱར།། སེང་ལྡེང་སྨན་མར་སྦྲང་དང་སྦྱར་ལ་བཏང་།། ཆུ་སེར་འོར་སྒོ་ཀུན་ཏུ་མེ་བཙའ་བསྲེག། ད་རྒན་ནད་ལ་བདུད་རྩི་ལྔ་ཡིས་བདུག། རྩ་སྦྱོངས་བྱས་ལ་འབའ་སམ་སྨན་མར་སྦྱར།། སུག་སྨེལ་ཤིང་ཚ་ཟི་ར་པི་པི་ལིང་།། རུ་རྟ་བྲེ་ག་བུ་རམ་རིལ་བུ་བཏང་།། ཚིགས་པའི་སྟེང་འོག་མེ་ཐུར་གོར་དབུས་བརྡེག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཁལ་ནད་གསོ་བའི་ལེའུ་སྟེ་སོ་བརྒྱད་པའོ།། །།

X