//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་གཅིག་པ། ལོང་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:58:06 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ལོང་གི་ནད་ལ་རྟགས་དང་བཅོས་ཐབས་གཉིས།། དང་པོ་ལོང་ནད་གྲང་སྦོས་གྲང་འགྱིངས་དང་།། ཚ་རྙོངས་འཇུ་སྐེམས་རླངས་པ་ཅན་དང་ལྔ།། གྲང་སྦོས་འུར་འཁྲོག་གྲངས་རྗེས་ལྟེ་ཟུར་ན།། རྐང་པ་ཆུར་བཅུག་ལྦུ་བ་སྐྱ་བོར་འཁྲུ།། རེས་འགའ་ཕྱི་ས་སྐམ་ཞིང་སྡོམ་པར་བྱེད།། ལོང་ནད་གྲང་འགྱིངས་སྦོ་ཞིང་དྲི་མ་འགྱིང་།། ལོང་ལྕི་སྐབས་སུ་སྐྱ་བོ་ཟས་མདོག་འཁྲུ།། ལོང་ནད་ཚ་རྙོངས་ཁ་སྐམ་སྐོམ་དད་ཆེ།། སྦོ་ཞིང་སྨུག་རྔུལ་བྱེད་ལ་ཕྱི་ས་འགག། ལོང་ནད་འཇུ་སྐེམས་སྦོ་འཁྲོག་ཅི་ཟོས་ན།། ཉམ་ཆུང་ཁ་སྐམ་མཁལ་རྐེད་ཆད་སྙམ་བྱེད།། རླངས་པ་ཅན་ནི་གཞུང་པ་རེངས་ཤིང་ན།། རྐེད་པ་སྒུར་པོར་སོང་ནས་འགྱུར་མི་ཤེས།།བཅོས་ཐབས་གྲང་སྦོས་ཡ་བཀྵ་ར་དང་།། ཁ་རུ་ཚ་དང་རྒྱམ་ཚ་སྟར་བུ་ཡི།། ཕྱེ་མ་ཞོ་ཁ་ཆུ་ཡིས་འཕུལ་བཏང་བས།། གཟེར་སྦོ་རླུང་གིས་ཕྱི་ས་འགགས་པ་སེལ།། འུ་སུ་སྟར་བུ་ཤིང་མངར་ཡ་བཀྵ།། ཀྱི་ལྕེ་དྲོད་སྨན་ཕྱེ་མ་ཆུ་སྐོལ་དབུལ།། སྦོ་འཁྲོག་གཟེར་དང་འཁྲུ་བ་སེལ་བར་བྱེད།། འཇམ་རྩི་སྒོག་སྐྱ་ཤིང་ཀུན་ཚ་བ་གསུམ་མར་རྙིང་གིརེང་བུ་ཞུན་མར་བཏང་བ་བསྔགས།། གྲང་འགྱིངས་ཤིང་ཀུན་ཤུ་དག་རུ་རྟ་དང་།། ཚ་ལ་ཁ་རུ་ཚ་རྣམས་གོང་མས་བསྐྱེད།། བསྡུས་ཁུས་སྦོ་འགྱིང་ལོང་གི་གྲང་བ་སེལ།། སེ་འབྲུ་ཚ་བ་གསུམ་དང་ཚྭ་སྣ་བཞི།། བུར་དཀར་སྦྱར་བས་སྦོས་པ་འཇོམས་པའི་མཆོག། ཨ་རུ་གླ་སྒང་ཤུ་དག་ཙི་ཏྲ་ཀ། པུ་ཤེལ་བ་ཆུ་བླུད་པས་རྟུག་འགགས་སེལ།། ལོང་ནད་ཚ་རྙོངས་འབྲས་བུ་གསུམ་གྱི་ཐང་།། བ་ལེ་ཀ་ཡི་ཐང་བཏང་ལོང་རྩ་གཏར།། འཇུ་སྐེམས་ད་ལིས་བདུན་སྦྱར་བཤལ་གྱིས་སྦྱང་།། རླངས་པ་ཅན་ལ་སེ་འབྲུའི་ཕྱེ་མ་སྦྱར།། བཅུ་དྲུག་པ་དང་ལོང་ཐེར་ལྟེ་འོག་བསྲེག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལོང་ནད་གསོ་བའི་ལེའུ་སྟེ་བཞི་བཅུ་རྩ་གཅིག་པའོ།། །།

X