//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་གཉིས་པ། ཕོ་མཚན་གྱི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:34:06 ཀློག་གྲངས། 9 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། གསང་ནད་གསོ་བའི་སྐབས་ལ་ཅི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གསང་བའི་ནད་ལ་ཕོ་མཚན་མོ་མཚན་གཉིས།། ཕོ་མཚན་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་ནི་ཆགས་པ་སྤྱད་དྲགས་གྲ་མས་རེག། བཤང་གཅི་ཁུ་བའི་ཤུགས་བཀག་བཙིར་ལས་འབྱུང་།།དབྱེ་བ་སོས་ཟིན་འབྲུམ་པ་མདུད་འདྲ་དང་།། སྦུབས་འབྱར་གྲ་མ་ཅན་དང་རྣམ་པ་ལྔ།། སོས་ཟིན་རླུང་མཁྲིས་ཁྲག་དང་བད་ཀན་འདུས།། ཕོ་མཚན་ནད་རིགས་རྣམ་པ་དགུ་རུ་བཤད།། དེ་རྟགས་སོས་ཟིན་རླུང་ལས་གྱུར་པ་ནི།། རྟག་ཏུ་འགྲེང་དང་པགས་པ་འགས་པར་བྱེད།། མཁྲིས་གྱུར་དམར་པོར་སྐྲངས་ལ་ཚ་བ་སྐྱེ།། ཁྲག་གྱུར་འབྲུམ་པ་ནག་པོ་ཁྲག་བཅས་འཛག། བད་ཀན་གཡའ་ཞིང་སྐྲངས་ལ་ལྕི་བ་ཡིན།། འདུས་གྱུར་རླིག་སྐྲངས་རྣག་དཀའ་ཀུན་རྟགས་ལྡན།། འབྲུམ་པ་ཅན་ནི་འབྲུམ་པ་མང་པོས་ཁྱབ།། མདུད་འདྲ་པགས་པ་ཕྱིར་ལོག་སྐྲངས་ཤུ་འབྱུང་།། སྦུབས་འབྱར་ཁ་ཟུམ་གཅིན་འབྱུང་འཆུ་ཞིང་འགག། གྲ་མ་ཅན་ནི་གྲ་མས་གང་སེམ་ན།།གསོ་ཐབས་སོས་ཟིན་གསར་དུས་གཏར་ག་གདབ།། ནི་རུ་ཧས་དྲང་བསིལ་བའི་བྱུག་པ་བྱ།། སྨིན་ནས་བརྟོལ་ལ་མར་སྦྲང་ཏིལ་བསྐོལ་བྱུག། སྦང་མ་སེང་ཕྲོམ་ལྡོང་རོས་བཙག་ཡུག་རྣམ།། བ་བླ་ནག་མཚུར་སུག་སྨེལ་སྐྱེར་ཁཎྡྲི།། རྒྱ་ཚ་རྒྱམ་ཚ་ཧ་རེ་ཎི་ཀའི་ཕྱེ།། སྦྲང་སྦྱར་བྱུགས་པས་སོས་ཟིན་རྨ་འཚོ་བྱེད།། རྫ་གསར་འབྲས་གསུམ་བསྲེགས་ཐལ་མར་སྦྱར་བྱུག། རླུང་གྱུར་སེང་ཕྲོམ་མར་དང་སྦྱར་ལ་བྱུག། མཁྲིས་གྱུར་ག་པུར་ཙན་དན་ལྡི་གུ་བྱུག། ཁྲག་གྱུར་རུ་རྟ་བ་ཤ་ཀ་ཡིས་བྱུག། བད་ཀན་ལས་གྱུར་སྐྱུ་རུ་སྦྲང་རྩི་བྱུག། འདུས་པ་ཡིན་ན་རྨ་སྤྱིའི་གསོ་བ་སྦྱར།། འབྲུམ་པ་བཞར་ལ་སོས་ཟིན་ལྟ་བུར་བཅོས།། མདུད་འདྲ་སྣུམ་བྱུག་མཉེ་ཞིང་སྣུམ་པས་བདུག། སྦུབས་འབྱར་སྦུ་གུས་བརྒྱང་ཞིང་དྲལ་ལ་གསོ།། གྲ་མ་ནས་ཕྱེ་གོ་སྙོད་མར་བཙོས་དཀྲི།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕོ་མཚན་གྱི་ནད་གསོ་བའི་ལེའུ་སྟེ་བཞི་བཅུ་རྩ་གཉིས་པའོ།། །།

X