//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་བཞི་པ། སྐད་འགགས་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:36:33 ཀློག་གྲངས། 6 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ཐོར་ནད་གསོ་བའི་སྐབས་ལ་ཅི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཐོར་བུའི་ནད་ལ་སྐད་འགགས་ཡི་ག་འཆུས།། སྐོམ་དད་སྐྱིགས་བུ་དབུགས་མི་བདེ་བ་དང་།། གླང་ཐབས་སྲིན་ནད་འཁྲུ་སྐྱུག་དྲི་མ་འགགས།། གཅིན་འགགས་གཅིན་སྙི་ཚད་འཁྲུ་དྲེག་ནད་དང་།། གྲུམ་བུ་ཆུ་སེར་རྩ་དཀར་པགས་པའི་ནད།། ཕྲན་བུའི་ནད་དང་རྣམ་གྲངས་བཅུ་དགུར་བཤད།། དང་པོ་སྐད་འགགས་ནད་ལ་རྒྱུ་དང་རྐྱེན།། དབྱེ་བ་རྟགས་དང་བཅོས་ཐབས་རྣམ་པ་བཞི།།རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས།། འདུ་བ་འཁྲུགས་པས་སྐད་འགགས་ནད་སྐྱེད་འགྱུར།། དབྱེ་བ་རླུང་མཁྲིས་ཁྲག་དང་བད་ཀན་དང་།། ཟད་བྱེད་ཚིལ་གྱུར་དས་ཆད་བདུན་དུ་བཤད།། དེ་རྟགས་རླུང་གྱུར་སྐད་ལ་འཕེལ་འགྲིབ་ཆེ།། གྲེ་བ་གྲ་མས་གང་སྙམ་རྩུབ་ལ་ཚ།། མཁྲིས་གྱུར་གྲེ་བ་ཚ་སྐམ་ཚིག་མི་ཐར།། ཁྲག་གྱུར་དྲག་ཤུལ་བཅུད་གནོད་གྲེ་བ་དམ།། བད་ཀན་མགུལ་པ་འགག་ལ་སྐད་དམའ་འཛེར།། ཟད་བྱེད་དུ་བས་བདུགས་དང་བྲུད་སྙམ་སེམ།། ཚིལ་གྱུར་སྐད་འགགས་ཚོ་ཆེས་ལས་ཤེས་བྱ།། དས་ཆད་གྲེ་བ་ན་ལ་སྐད་མི་ཕྱིན།།བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་ཅུ་གང་ཤིང་མངར་སྤང་རྒྱན་དཀར།། རུ་རྟ་རྒུན་འབྲུམ་ཀ་ར་སྦྱར་ལ་བཏང་།། ཨ་རུ་ཅུ་གང་ཤིང་མངར་སྤང་རྒྱན་དཀར།། སྲོ་ལོ་སུག་སྨེལ་ལི་ཤི་ཀ་ར་སྦྱར།། བསིལ་གསུམ་ཤིང་མངར་རྒུན་འབྲུམ་ཤིང་ཚ་དང་།། སྤང་རྒྱན་ཀ་ར་སྐད་འགགས་ཀུན་ལ་ཕན།། བྱེ་བྲག་རླུང་གྱུར་འབྲས་ཆན་བུ་རམ་མར།། སྦྱར་ཟོས་རྗེས་ལ་ཆུ་ཚན་བཏུང་བར་བྱ།། སྣུམ་ལྡན་དུགས་བྱ་འོ་ཐུག་མར་བཏབ་བླུད།། མཁྲིས་གྱུར་པ་ལ་རྒྱ་ཤུག་དྲི་བཟང་བཞི།། རྒྱམ་ཚར་བཅས་བསྐོལ་སྣ་ཡི་སྨན་དུ་བཏང་།། ཤིང་མངར་ཞུན་མར་འབྲས་ཐུག་བཅས་པ་བླུད།། སྤང་རྒྱན་ཤིང་མངར་བོང་དཀརགསུམ་ཐང་ཅུ་གང་ཀར་བཏབ་བཏང་།། ཁྲག་གྱུར་སྐྱུ་རུའི་ཐང་བཏང་སྐྱོར་གོང་གཏར།། བད་གྱུར་ཚ་བ་ལྔ་དང་ཡ་བཀྵ།། ཨ་རུ་ར་དང་སྦྲང་རྩི་སྦྱར་བ་བྱིན།། ནས་ཐུག་པི་པི་ལིང་དང་བཅས་པ་བཟའ།། སེལ་དཀའ་སྐྱུག་སྨན་རྣོན་པོས་སྦྱངས་རྗེས་བསྲེག། ཟས་བྱེད་ལས་བྱུང་དུ་བ་སྣ་སྨན་བཏང་།། ཤིང་ཚ་སུག་སྨེལ་དྲོད་སྨན་ཅུ་གང་དང་།། ཀ་ར་རིམ་བསྐྱེད་སྦྲང་སྦྱར་ལྡེ་གུ་བཏང་།། ཚིལ་གྱུར་ཉམ་སྨད་ཟས་སྨན་རྩུབ་བཅོས་བསྟེན།། དས་ཆད་ཤ་ཁ་ར་དང་སྦྲང་རྩི་སྦྱར།། མངར་བའི་སྨན་དང་ལྷན་ཅིག་བསྐོལ་ལ་བཏུང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐད་འགགས་གསོ་བའི་ལེའུ་སྟེ་བཞི་བཅུ་རྩ་བཞི་པའོ།། །།

X