//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་ལྔ་པ། ཡི་ག་འཆུས་པ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:37:07 ཀློག་གྲངས། 6 

     དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཡི་ག་འཆུས་པའི་ནད་ལ་རྒྱུ་རྐྱེན་དང་།། དབྱེ་བ་རྟགས་དང་བཅོས་ཐབས་རྣམ་པ་བཞི།།རྒྱུ་རྐྱེན་ཟས་སྤྱོད་གདོན་གྱིས་འདུ་བ་འཁྲུགས།། ལྕེ་སྙིང་ལ་ཞེན་ཡི་ག་འཆུས་པར་འགྱུར།། དབྱེ་བ་རླུང་མཁྲིས་བད་ཀན་འདུས་པ་བཞི།། དེ་རྟགས་རླུང་གྱུར་རོ་བསྐ་མཁྲིས་པ་ཁ།། བད་ཀན་རོ་མངར་འདུས་པ་རོ་དང་བྲལ།། གསོ་ཐབས་ཡིད་ལ་འཐད་པའི་ཟས་གང་ཡང་།། གང་ལ་ཕན་པའི་སྨན་དང་སྦྱར་ལ་སྦྱིན།། ཕྱི་ནང་ཁྲུས་སྦྱང་འབྲས་བུ་འོ་མར་སྦྱར།། དཀར་བའི་ཟས་བསྟེན་བསྐ་བའི་ཆུས་ཁ་བཀྲུ།། ཡིད་ལ་འཐད་པའི་དུ་བ་སྣ་རུ་རྔུབ།། བ་ལུ་ཕོ་བ་རིས་སྒ་པི་པི་ལིང་།། རིམ་བསྐྱེད་ཤིང་ཚ་སུག་སྨེལ་ཀ་ར་སྦྱར།། ཕོ་བའི་དྲོད་སྐྱེད་ཡི་ག་འབྱེད་པར་བྱེད།། ལ་ལ་ཕུད་དང་ད་ཏྲིག་སྟར་བུ་སྒ།། སེ་འབྲུ་རྒྱ་ཤུག་ཀ་ར་འུ་སུ་དང་།། ཤིང་ཚ་ཁ་རུ་ཚ་དང་པི་པི་ལིང་།། གོ་སྙོད་ན་ལེ་ཤམ་སྦྱར་ཡི་ག་འབྱེད།། སུག་སྨེལ་ཤིང་ཚ་ནཱ་ག་པུཥྞཱི་དང་།། ཚ་བ་གསུམ་གྱི་ཕྱེ་མས་ཡིག་འཆུས་སེལ།། ཚ་བ་ཤས་ཆེ་ཅུ་གང་བདེ་བྱེད་ཤིས།། བྱེ་བྲག་ཤུ་དག་ཀ་ར་ནིམ་པའི་ཆུས།། སྐྱུགས་རྗེས་ཆང་དངས་སྐར་ཆུ་སྦྲང་ཆང་བསླུད།། འདུས་པའི་ནད་ལ་ཀུན་གྱིས་རློན་བྱས་ལ།། ཤུ་དག་ནིམ་པ་བུ་རམ་ཆུ་སྦྱར་བླུད།། ཅེས་གསུངས་སོ།།  བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཡི་ག་འཆུས་པ་གསོ་བའི་ལེའུ་སྟེ་བཞི་བཅུ་རྩ་ལྔ་པའོ།། །།

X