//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་དྲུག་པ། སྐོམ་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:37:55 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། སྐོམ་པའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་གྱེན་རྒྱུའི་རླུང་དང་མཁྲིས་པ་འཁྲུགས།། བད་ཀན་སྐེམས་པས་སྐོམ་དད་སྐྱེ་བར་བྱེད།། ཆང་དང་ལན་ཚས་བད་མཁྲིས་སྐྱེས་པའམ།། ཚད་གུང་ངལ་དུབ་སྤྱད་རྗེས་སྐོམ་མང་འཐུངས།། ཁོང་ཚད་བསྡུས་པས་མཁྲིས་སྐྱེད་སྐོམ་དད་ཆེ།། དབྱེ་བ་རླུང་མཁྲིས་བད་འདུས་བཅུད་ཟད་ལྔ།།དེ་རྟགས་ཁ་ལྕེ་གྲེ་སྐམ་ཟས་མི་འདོད།། ལྕེ་མྱུལ་སྐད་འགགས་ངོམས་པ་མེད་པར་སྐོམ།། རླུང་གྱུར་མགོ་འཁོར་གཉིད་མེད་མུ་འགྲམ་གཟེར།། སྣ་དང་ལྕེ་ཡིས་དྲི་དང་རོ་མི་ཚོར།། མཁྲིས་གྱུར་ཁོང་ཚ་ཁ་ཁ་ཁ་དྲི་མནམ།། བད་ཀན་ཁ་མངལ་རློན་བྲོ་ཟས་མི་འཇུ།། འདུས་རྟགས་ཀུན་སྟོན་བཅུད་ཟད་ཟས་མིད་དཀའ།།བཅོས་ཐབས་རླུང་མཁྲིས་སེལ་བྱེད་ཕལ་ཆེར་བསྔགས།། ཕྱི་ནང་གཉིས་ནས་བཀྲུ་ཞིང་བསིལ་བར་བྱ།། ཆར་ཆུ་སྦྲང་རྩི་སྦྱར་བ་སྐོམ་དུ་བཏུང་།། ཆག་ཚེ་ཀ་ར་སྦྲང་དང་སྦྱར་ལ་བཟའ།། འོ་མ་སྐྱུར་རྩབས་སྦྲང་གི་མཁུར་བཀང་བཅང་།། ཁྱད་པར་རླུང་གྱུར་བུ་རམ་ཞོ་སྦྱར་བཏང་།། མཁྲིས་པ་ལས་གྱུར་མངར་བའི་སྨན་གྱིས་སྦྱང་།། བད་ཀན་ལས་གྱུར་ནིམ་པའི་ཆུ་ཡིས་རློན།། སྐྱེར་པ་ཀ་ར་སྦྲང་ཆུ་སྐོམ་དུ་བཏུང་།། འདུས་པའི་ནད་ལ་སྐྱུགས་རྗེས་ཆུ་ཚན་བླུད།། བཅུད་ཟས་ཤ་ཁུ་འོ་མས་གསོ་བར་བྱ།། འུ་སུ་བསྐོལ་ཁུར་ཀ་ར་སྦྲང་བཏབ་པས།། ནད་གཞི་ཅི་ལས་གྱུར་ཀྱང་སྐོམ་པ་སེལ།། ཤིན་ཏུ་སྐོམ་ན་བཏུང་འོས་མ་ཡིན་ཡང་།། ཐོག་མར་སྐོམ་བསལ་དེ་རྗེས་ནད་གཞི་བཅོས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐོམ་ནད་གསོ་བའི་ལེའུ་སྟེ་བཞི་བཅུ་རྩ་དྲུག་པའོ།། །།    

X