//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་བདུན་པ། སྐྱིགས་བུའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:38:35 ཀློག་གྲངས། 6 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། སྐྱིགས་བུའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་ཟས་སྤྱོད་གདོན་གྱིས་རླུང་འཁྲུགས་པས།། གྱེན་རྒྱུའི་བུ་ག་འགགས་ཏེ་སྐྱིགས་བུ་འབྱུང་།།དབྱེ་བ་ཟས་བྱུང་ཕྲན་ཚེགས་ཟུང་འབྱུང་དང་།། ཆེན་པོ་ཟབ་མོ་ཞེས་བྱ་རྣམ་ལྔར་བཤད།། དེ་རྟགས་ཟས་བྱུང་རིངས་སྟབས་ཟོས་རྗེས་འབྱུང་།། ཕྲན་ཚེགས་ཟས་ཟོས་རྗེས་འབྱུང་མོད་ལ་ཆད།། ཟུང་འབྱུང་ཚིགས་རིང་ཞུ་དུས་གཉིས་བསྟུད་འབྱུང་།། ཆེན་པོ་ཤུགས་དྲག་མིག་ཧར་ཚིག་མི་ཐོན།། ཟབ་མོ་ལྟེ་བའི་འོག་ནས་བསྟུད་འབྱུང་བསང་།། ཉམ་ཆུང་ཟུངས་ཟད་གློ་རྡོལ་རྒས་པ་ལ།། སྐྱིགས་བུ་ཆེན་པོ་ཤུགས་དྲག་བྱུང་བ་སྤང་།།བཅོས་ཐབས་དང་པོ་འབྲུ་མར་བསྐུ་མཉེ་བྱ།། ཚབས་ཆེ་བ་ལ་སྐྱུགས་ཁྲུས་འཇམ་པོས་སྦྱང་།། དབུགས་མི་བདེར་བཤད་དུ་བ་བརྔུབ་པར་བྱ།། ནུ་ཞོ་ཙན་དན་སྦྲང་རྩི་སྦྱར་བ་འམ།། སྦྲང་རྩི་ནས་ཟན་བྲུན་སྦྱར་སྣ་སྨན་བཏང་།། བྲ་བོ་བྱི་བྲུན་བརྔོས་པའི་སྟེང་དུ་ཉལ།། གྲངས་རྗེས་མར་བྱུགས་ལག་པའི་སྙིང་རྩ་མནན།། གཅིག་བགྲང་དབུགས་ཐུབ་བསྡམས་པས་རླུང་འཁྱིམས་སེལ།། མ་ཚོར་འཇིགས་སྐྲག་དངངས་པའི་ཆོ་ག་བྱ།། ཆད་དཀའ་སྤྱི་གཙུག་མཚོགས་སྒོ་སྐེ་སྟོང་དང་།། ཚིགས་པ་བརྒྱད་པ་ནང་ལོང་འཕར་རྩ་བསྲེག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱིགས་བུའི་ནད་གསོ་བའི་ལེའུ་སྟེ་བཞི་བཅུ་རྩ་བདུན་པའོ།། །།

X