//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ཞེ་བརྒྱད་པ། དབུགས་མི་བདེ་བ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:39:21 ཀློག་གྲངས། 9 

      དེ་ནས་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། དབུགས་མི་བདེ་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་མ་ཞུ་བད་ཀན་འཕེལ་བ་དང་།། ལུད་པ་འཕེལ་བས་དབུགས་ལམ་བཀག་ལས་འབྱུང་།།དབྱེ་བ་ཕྲན་ཚེགས་མུན་ཅན་དབུགས་ཆད་དང་།། ཆེན་པོ་གྱེན་འབྱུང་ཞེས་བྱ་རྣམ་པ་ལྔ།། དེ་རྟགས་སྙིང་ག་རྩིབ་ལོགས་རྒྱང་ངམ་གཟེར།། ལྟོ་སྦོ་དབུགས་རྒོད་ཡང་ན་གཞའ་བར་འགྱུར།། ཕྲན་ཚེགས་འགྲངས་ངོམས་འདུག་རྗེས་དྲག་ཤུལ་འབྱུང་།། མུན་ཅན་གློ་མིག་བད་ཀན་འགགས་པ་ཡིས།། ལུད་པ་མང་ལ་གྲེ་བ་ངར་ཞིང་འཛེར།། ཉལ་ན་མི་བདེ་རོ་སྟོད་གཟེར་སྙམ་བྱེད།། དབུགས་ཆད་བད་ཀན་གློ་མིག་འགགས་པ་ཡིས།། གྱེན་རྒྱུའི་མཐུ་ཉམས་དབུགས་འབྱིན་མི་བདེ་ཞིང་།། སྐད་དམའ་གཞུག་ཆད་གསང་གཏམ་སྨྲ་བ་ཡིན།། ཆེན་པོ་སྐད་འཛེར་མགུལ་སྐམ་ང་རོ་ཆེ།། བསྐྱོད་ཚེ་དབུགས་རྒོད་ལུད་པ་མང་དུ་འབྱུང་།། གྱེན་འབྱུང་བད་ཀན་དབུགས་རྒྱུའི་ལམ་བཀག་པས།། ཕྱིར་འབྱིན་བདེ་ཞིང་ནང་དུ་དབུགས་རྔུབ་དཀའ།།བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་རྒྱམ་ཚ་ཏིལ་མར་ལུས་ཀུན་བྱུག། ཚ་བ་ཤས་ཆེ་དེ་སྤང་ཆུ་དྲོན་བླུད།། བཀྲུ་སྨན་སྐྱུགས་སྨན་འཇམ་པོས་བུ་ག་སྦྱང་།། སྦྱངས་པས་མ་དག་ནད་ལྷག་ཨ་ག་རུ་གུ་གུལ་དཀར་ནག་གླ་སྒང་རྡོ་དྲེག་སྤང་སྤོས་ཤིང་ཚ་ཧ་རེ་ཎི་ཀ་བྱི་ཏང་ག་གླ་རྩི་སྤྲ་ཚིལ་དུ་བ་མེད་པའི་མེར་བསྲེགས་པའམ། ཡང་ན་སྤོས་དཀར་དང་ལྡོང་རོས། ཡང་ན་ཨ་གར་མར་སྦྱར་གྱིདུད་པས་བསལ།།རྟ་འམ་བ་གསར་ལྕི་ཁུ་སྦྲང་སྦྱར་བླུད།། ཤིང་མངར་པི་པི་ལིང་གི་རྩ་བ་དང་།། བ་ལྕི་སྦངས་ཁུར་བུ་རམ་སྦྲང་སྦྱར་བྱིན།། མར་གསར་ཞོ་སྤྲིས་རླན་གནས་ཤ་རྣམས་བཟའ།། ཉེས་པ་གང་ཆེའི་ཤས་དང་སྦྱར་རླུང་ཤས་ཆེ་ན་སྣུམ་འཆོས་བྱས། རི་བོང་གི་ཤ་ཁུ་མར་པི་ལིང་སྦྱར་བ་བླུད། སྐེ་སྟོང་དང་པོ་བསྲེག མཁྲིས་གྱུར་དུར་བྱིད་གསེར་མེ་ཧོང་ལེན་གྱིས་སྦྱང་། འབྲས་ཆན་པི་ལིང་ཅུ་གང་སྒ་མར་སྦྱར་བ་བླུད། བད་གྱུར་སྐྱུགས་བྱ་མ་ནུ་ཟུར་པ་སྐྱུ་རུ་སྦྲང་སྦྱར་བླུད། ཁྲག་གྱུར་རྩེ་ཆུང་ཐོང་རྩ་གཏརལ་བཅོས།། བྱེ་བྲག་ཕྲན་ཚེགས་ནད་ལ་བཅོས་མི་དགོས།། ཕྱི་མ་བཞི་ལ་སྟར་བུ་སྐྱུ་རུ་ར།། རུ་རྟ་ཤིང་མངར་ཞོ་སྦྱར་བད་ཀན་དྲང་།། དེ་འོག་མུན་ཅན་ཙན་དན་ཅུ་གང་དང་།། ཤིང་མངར་ཀ་ར་དྲི་ཆུ་བར་པས་དབུལ།། དབུགས་ཆད་ཅུ་གང་ཤིང་ཚ་སུག་སྨེལ་དང་།། པི་པི་ལིང་དང་ཀ་ར་སྦྲང་སྦྱར་བཏང་།། ཡང་ན་ཨ་ཀྲོང་སྦྲང་རྩི་སྦྱར་བ་བྱིན།། ཆེན་པོ་སྒོང་ཐོག་སྲོ་ལོ་དཀར་པོའི་ཐང་།། ལོ་བརྒྱད་དྲི་ཆུ་ཀ་རས་རོ་བསྒྱུར་བཏང་།། གྱེན་འབྱུང་མ་ནུ་སྦྲང་གི་ལྡེ་གུ་བྱིན།། ཀུན་ལ་སྐྱོར་གོང་རྩ་དང་ཐོང་རྩ་གཏར།། གོ་ཆེན་གོ་ཆུང་སྐེ་སྟོང་ཐུར་མས་གསེང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དབུགས་མི་བདེ་བ་གསོ་བའི་ལེའུ་སྟེ་བཞི་བཅུ་རྩ་བརྒྱད་པའོ།། །།

X