//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ལྔ་བཅུ་པ། སྲིན་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 15:40:59 ཀློག་གྲངས། 4 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། སྲིན་བུའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས།། འདུ་བ་འཁྲུགས་པས་སྲིན་ནད་སློང་བར་བྱེད།། དབྱེ་བ་ཕྱིར་གནས་ཤིག་དང་སྲོ་མ་སྟེ།། ནང་གནས་བད་ཀན་རླུང་མཁྲིས་ཁྲག་དང་བཞི།། བད་ཀན་ཕོ་བ་རླུང་སྲིན་ལོང་ན་གནས།། མཁྲིས་སྲིན་སོ་མིག་པགས་གཞང་མཚན་མར་གནས།། ཁྲག་སྲིན་རྐང་མེད་ཟླུམ་ལ་དམར་བ་སྟེ།། ཁྲག་ལ་གནས་ཤིང་རྩ་ནང་ཀུན་ཏུ་རྒྱུག། གཉན་ནད་ཀུན་གྱི་རྒྱུ་དང་མཛེ་ནད་བྱེད།། ཀླད་སྲིན་ཡ་མ་དཀར་ནག་དེ་ལས་བྱུང་།། དེ་རྟགས་དཀར་དང་མངར་བག་གྲང་རྐྱེན་ལྡང་།། ལྟོ་ཆེ་ལྡང་དུབ་བྱེད་ལ་ཚིག་པ་ཟ།། འཁྲུགས་པའི་གནས་ཀྱིས་སྲིན་བུའི་ནད་རིགས་དབྱེ།། ཡ་མ་དཀར་ནག་ཚ་གྲང་ནད་སྟོབས་དཔག། གློག་ལྟར་འཁྱུག་ཅིང་ཀོ་ལེར་གཟེར་བ་ཡིན།།བཅོས་ཐབས་ཤིག་སྲོ་ལོ་བཙན་བྱ་རྒོད་སྤོས།། ར་དུག་མར་ནག་སྦྱར་བ་མགོ་ལ་བྱུག། ཤ་བའི་ཚིལ་དང་སྦྱར་བ་ལུས་ལ་བྱུག། ཡང་ན་དངུལ་ཆུ་མར་སྦྱར་གོས་ལ་བྱུག། བྱི་ཏང་ལྡོང་རོས་རྒོད་སྤོས་མར་ནག་ལ།། དྷུ་རུ་ད་ངྦ་ཛྷེ་ལ་པ་སྲོཾ་ཧཱ།། བརྒྱ་རྩ་བརྒྱད་བཟླས་སྲོག་ཆགས་སྐྱེ་རྒྱུན་གཅོད།། བད་ཀན་སྲིན་བུ་འོ་མ་ལ་བསྡུས་ལ།། བྱི་ཏང་ག་དང་མ་རུ་ཙེ་དང་བཙོད།། འབྲུམ་དང་སེ་འབྲུ་མ་ནུ་སྐྱུ་རུ་ར།། སྒེ་གཤེར་སྦྲང་དང་སྦྱར་བའི་ཕྱེ་མ་བཏང་།། རླུང་སྲིན་བུ་རམ་ལ་བསྡུས་ཤིང་ཀུན་བཙོང་།། སོ་མ་ར་ཛ་རུ་རྟ་བ་རུ་ར།། ཤུ་དག་བྱི་ཏང་ག་དང་བུ་རམ་སྦྱར།། ཚ་བ་གསུམ་དང་ཤིང་ཀུན་སྒོག་སྐྱ་དང་།། འོ་མ་སྦྱར་བའི་འཇམ་རྩི་བཏང་བར་བྱ།། མིག་སྲིན་སོ་སྲིན་རང་རང་གསོ་བར་བྱ།། ལྤགས་སྲིན་བྱི་ཏང་ག་དང་ཙི་ཏྲ་ཀ། སྒོག་སྐྱ་གཡེར་མ་དྭ་བ་བྱི་རུག་པ།། སྤྲུ་མ་ཕུར་མོ་ཟོ་མར་བྱུགས་ལ་མཉེ།། གཞང་སྲིན་གླ་རྩི་སྒོག་སྐྱ་ལང་ཐང་ཙེ།། ཚ་བ་གསུམ་དང་ཟོ་མར་རེང་བུ་གཞུག། སྒོག་པ་རྒྱམ་ཚ་གླ་རྩི་བྱི་ཏང་ག། མུ་ཟི་མར་སྦྱར་བཅུག་ལ་ཕྱིང་པས་བསྲོ།། མཚན་མའི་སྲིན་ལ་ཆགས་པ་སྤྱད་པས་སེལ།། ཡ་མ་དཀར་པོ་སྐྲ་བྲེགས་འཁྱུག་སར་དབུག། ར་ཡི་སློ་ཁྲག་ཚིལ་པགས་དྲོན་མོས་གཡོགས།། ར་ཡི་སྙིང་དང་མཆིན་མཆེར་ཟས་སུ་བཟའ།། ཞག་གསུམ་རུ་རྟ་ར་ཚིལ་འོ་མ་བྱུག། རྩ་སྒོ་མེས་མནན་སྲིན་སྨན་དུ་བས་བདུག། འཁྱུག་ཚབས་ཆེ་ན་རྩ་དེ་གཏར་ལ་བསྲེག། ཡ་མ་ནག་པོ་སྦྱོངས་བཏང་གཏར་ག་བྱ།། ར་ཡི་སློ་ཁྲག་སྣག་རམས་ཁྱི་ལུད་སྤྱིན།། སྦྱར་བས་བྱུགས་ལ་གཙུག་དང་མཚོགས་མའི་སྟེང་།། ཐོངས་བཞག་མངར་གསུམ་བྱུགས་ཏེ་གྲོད་པས་གཏུམ།། དགུ་ནས་གཤགས་ལ་རྔབས་དྲང་སྦང་འཇིབ་བྱ།། དུགས་བདུག་ཤ་བའི་སློ་ཁྲག་ཚིལ་ལུམས་བྱ།། གློག་ལྟར་འཁྱུག་ལ་ལོང་གསང་མདུན་རྒྱབ་བསྲེག། གཟེར་སྟེང་དྲས་ལ་མེ་བཙས་འཚོས་པར་མནན།། ཀུན་ལ་བྱི་ཏང་ག་དང་མ་རུ་ཙེ།། གླ་རྩི་ཤིང་ཀུན་སྒོག་སྐྱ་གཡེར་མ་དང་།། ཐང་ཕྲོམ་ཕུར་ཐལ་ལང་ཏང་ཙེ་དང་འབྲུམ།། དྲེས་འབྲུ་སྤྲུ་མ་དཀར་པོ་ཆིག་ཐུབ་རྣམས།། མངར་གསུམ་འོ་མར་སྦྱར་བ་ཁོང་དུ་བཏང་།། ཤ་བའི་ཚིལ་དང་སྦྱར་བ་སྣ་རུ་བདུག། ཟོ་མར་རེང་བུ་བྱས་ལ་མས་ཡར་བཏང་།། དྭ་བའི་ཁཎྡྲི་སྦྱར་ལ་ལྤགས་ལ་བྱུག། བྱ་ཁྱུང་རིལ་བུ་ཡུན་བསྟེན་སྲིན་ཀུན་འཇོམས།། བྱི་རུག་བྱི་ཏང་ག་དང་ཞིམ་ཐིག་ལེ།། སྐེ་ཚེ་ལྕ་བ་སྣེའུ་འབམ་པོ་དང་།། ཤ་སྣ་བསྐོལ་ཁུར་སོ་ཆ་པི་པི་ལིང་།། ས་རྫི་ཀ་བཏབ་ཏིལ་མར་མས་ཡར་བཏང་།། ཁུ་བར་དུར་བྱིད་སྦྱར་བའི་སྲིན་བཤལ་བྱ།། དཀར་མངར་རྒྱ་སྣེ་སྣུམ་པའི་ཟས་རྣམས་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྲིན་ནད་བཅོས་པའི་ལེའུ་སྟེ་ལྔ་བཅུ་པའོ།། །།

X