//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་བཞི་པ། ཆུ་འགགས་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:16:16 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གཅིན་འགགས་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་ལྒང་པའི་ཁ་ཉིད་ཐུར་བལྟས་པའི། ངོས་གཉིས་ཆུ་རྒྱུའི་རྩ་ཡོད་རྒྱུ་མར་འབྲེལ།། དེ་ལ་ཟས་སྤྱོད་གདོན་གྱིས་འདུ་བ་འཁྲུགས།། ལྒང་པའི་རྩར་ཞུགས་གཅིན་ནད་སྐྱེད་པར་བྱེད།། དབྱེ་བ་གཅིན་སྲི་བ་དང་གཅིན་འགགས་གཉིས།། སྲི་བ་རླུང་མཁྲིས་བད་ཀན་འདུས་པ་བཞི།། འགགས་ལ་ཁ་འཆུས་རླུང་འཁྱིལ་ཁྲག་དང་སྤུ།། སྐྲངས་དང་ཁུ་བ་བཤང་བ་རྡེ་འགགས་བརྒྱད།། དེ་རྟགས་རླུང་གྱུར་ཡང་རྩུབ་ཟས་སྤྱོད་ཀྱིས།། ཆུ་སྔོ་ལྒང་པ་ཕོ་མཚན་ན་ལ་གཟེར།། མཁྲིས་གྱུར་དམར་སེར་ཚ་བ་ཆེ་ལ་ན།། བད་ཀན་བསིལ་ཞིང་སྐ་འབྱར་ཡུན་དུ་ཐོགས།། འདུས་པ་ཀུན་གྱི་རྟགས་དང་ལྡན་པ་ཡིན།། གཅིན་བསྡམས་ལྒང་པ་རྒྱས་ཏེ་ཁ་འཆུས་པས།། རྒྱུ་ཞབས་སྒང་ཞིང་གཅུས་སྙམ་བཙིར་ན་འབྱུང་།། ཐུར་སེལ་གྱེན་དུ་འཁྱིལ་བས་ཆུ་སོར་ཟུག། ཉུང་ཤས་བཤང་གཅི་གཏོང་བའི་དུས་སུ་འབྱུང་།། མཁལ་མ་བསམ་སེའི་རྩ་འགྲམས་ཁྲག་འཁྲུགས་པས།། ཆུ་དམར་ཁྲག་རོ་བཅས་འབྱུང་རྒྱུ་ཞབས་ན།། ཁ་ཟས་སྤུར་འདྲེས་ལྒང་པའི་རྩར་འགྲིམས་པས།། ཟུག་ཆུང་སྙི་ལ་ཆུ་འཛིམ་སྤུ་ཉག་འབྱུང་།། ལྒང་པའི་ཁ་འམ་བཤང་ལམ་བར་དུ་སྐྲངས།། སྲ་ཞིང་ན་ལ་བཤང་གཅི་ཕྱེན་དབུགས་སྡོམ།། ཚངས་སྤྱོད་པ་འམ་གཅིན་བྲོ་ཉལ་པོ་བྱས།། ཁུ་བ་གཅིན་འདྲེས་ཐལ་ཁུ་འདྲ་བ་འབྱུང་།། བཤང་བ་འགགས་པ་རྟུག་པ་གཅིན་བསྡམས་སམ།། བཤང་གཅི་འདྲེས་ན་གཅིན་ལ་བཤང་དྲི་མནམ།། རྡེ་འགགས་བད་མཁྲིས་ཁུ་ཆུ་ཁྲག་ཅན་སྤུ།། བད་ཀན་ལ་བསྟེན་ཆུ་བཙོས་རླུང་གིས་སྒྲིལ།། མངོན་ཚུལ་ཕོ་མཚན་གཞང་ཁ་བར་རྣམས་ན།། གཅིན་འགགས་སྦྲེ་མནམ་ལྒང་པར་སྦོ་བར་བྱེད།། ནད་རྒྱས་གཅིན་འབྱུང་དུས་ན་སོ་འཆའ་འདར།། འཁུན་ཞིང་ཁུ་ཚུར་བཅང་དང་མཚན་མ་ཉེད།། དེ་ཡང་འཆོལ་རྡེ་ཟུག་རྡེ་གཉིས་སུ་སྲིད།། འཆོལ་རྡེ་གཅིན་ཡང་བར་མཚམས་བཅད་ཅིང་འོང་།། རྟ་ཞོན་དྲག་ཤུལ་རྗེས་ལ་ཁྲག་ཅན་འཛག། ཟུག་རྡེ་ཁ་ལ་ཟུག་ནས་རྒྱུན་དུ་སྡོམ།། གཏིང་དུ་ཟུག་ན་ན་གཟེར་ཆུ་མི་འགག། དེ་རྣམས་བཅོས་ཐབས་རླུང་གྱུར་ཆུ་སྲི་ལ།། རྒྱ་ཚ་སྡིག་སྲིན་སུག་སྨེལ་ཁ་རུ་ཚ།། ཉི་དགའ་བུ་རམ་ཆང་དང་སྦྱར་ལ་བླུད།། བསྐུ་བྱུག་སྣུམ་དུགས་དྲོད་བཅུད་ཟས་ཀྱིས་བཅོས།། མཁྲིས་གྱུར་ཉེ་ཤིང་གཟེ་མ་པུ་ཤེལ་ཙེ།། རྒུན་འབྲུམ་དུར་བ་འབྲས་དང་བ་རུ་ར།། བསྐོལ་ཁུར་ཀ་ར་སྦྲང་རྩི་བཏབ་པ་བླུད།། གླ་རྩི་སྐྱུ་རུ་བྲག་ཞུན་ཆིག་ཐང་བཏང་།། བད་གྱུར་རྒྱ་ཚ་སུག་སྨེལ་ཚ་བ་གསུམ།། སྡིག་སྲིན་ལྕམ་པ་ཆང་དང་སྦྱར་ལ་བཏང་།། བྱ་རྒོད་རུས་པ་སུག་སྨེལ་ཚ་བ་གསུམ།། གཟེ་མ་སྦྲང་བླུད་འདུས་པ་ཀུན་གྱིས་གསོ།། ཁ་འཆུས་རྐང་པ་ནས་སྤྲུག་ལག་པས་བསྲང་།། རླུང་འཁྱིལ་དུགས་དང་བྱུག་པ་འཇམ་རྩི་བྱ།། ཁྲག་འགགས་ཆུ་ཚན་ནང་སྤྱིང་ལོང་རྩ་གཏར།། དམར་པོ་བཞི་དང་མཁྲིས་སྣ་སྦྱར་ལ་བཏང་།། སྤུ་འགགས་ལྒང་པའི་ཁ་ནས་མཉེ་ཞིང་བཞོ།། སྐྲངས་འགགས་ཆུ་ལུམས་དུགས་དང་གཏར་བ་དང་།། མས་བཏང་གོང་མས་སྐྲངས་པ་བཞུ་བར་བྱ།། ཁུ་བ་ཆགས་པ་སྤྱད་ཅིང་མཉེས་ལ་བཞོ།། བཤང་བ་འགགས་པ་ནི་རུ་ཧ་ཡིས་དྲང་།། གང་ཡང་ཐོན་དཀའ་ཆུ་ཐུར་གསང་བ་ལ།། ཕོ་ལ་མཐོ་གང་སྦོམ་ཕྲ་གྲོ་སོག་ཙམ།། མོ་ལ་སོར་བཞི་སྦོམ་ཕྲ་ནས་སོག་ཙམ།། རྒྱུས་བལྡད་ཁ་དྲིལ་གསང་དུ་བཏང་ལ་དབྱུང་།། རྡེ་འུས་འགགས་ལ་སྨན་བཤིག་དཔྱད་ཀྱིས་དབྱུང་།། རྡེ་སྨན་ཁྲུང་ཁྲུང་རྔ་མོ་བོང་རུས་དང་།། དབྱི་མོང་གཟེ་མ་སྨན་སྒ་ཆང་སྦྱར་བཏང་།། རྣོན་པོ་གསུམ་དང་ཉི་དགའ་གླ་རྩི་དང་།། སོ་བྱའི་སྒྲོ་གཞོབ་ཆུ་ངན་སྦྱར་ལ་བཏང་།། ཟེ་ཚ་རྒྱ་ཚས་སྣ་དྲངས་ཚྭ་སྣ་ཚོགས།། གསེར་གྱི་བྱེ་མ་སྡིག་སྲིན་འབྲས་སྣ་གསུམ།། ཉི་དགའ་སུག་སྨེལ་གླ་རྩི་ཚ་བ་གསུམ།། སྤོས་དཀར་འབུ་སྐྱོགས་བུར་དཀར་ཆང་སྦྱར་བཏང་།། ཡང་ན་བ་ཚ་ནག་མཚུར་སྨན་མར་ལ།། ཁ་ཚར་བཏབ་བཏང་ཟས་སྤྱོད་དྲོད་དུ་བསྟེན།། ཆུ་འགགས་ཀུན་སེལ་ཁྱད་པར་རྡེའུ་བཤིག། རྒྱ་ཚ་སུག་སྨེལ་གླ་རྩི་སྡིག་སྲིན་དང་།། བོང་རྨིག་བྱིང་བྱིང་ཐུ་ལུ་ཆང་སྦྱར་ལ།། ཨེཾ་རཾ་རཾ་ཤག་ཤག་རྩིར་རྩིར་ཚེག་ཚེག་རྦད་སྙིལ་སྲོཾ་ཧཱ།། སྨྲ་བ་བཅད་དེ་རྒྱུན་དུ་བཟླས་ལ་བྱིན།། དཔྱད་ཀྱིས་དབྱུང་བ་རྡེ་ཕྲན་ལམ་ནས་དྲལ།། སྨན་གྱིས་མ་བཤིགས་རྙིངས་ཤིང་རྒྱས་པ་ལ།། སྣུམ་བསྐུས་དུགས་བྱ་རྟ་ཤིང་ལ་བསྐྱོན་ནས།། ནད་པ་ཁ་ཟས་མ་ཟོས་ཉམ་སྨད་དེ།། པུས་མཉམ་ནས་ཀྱི་ཁྲི་ལ་པང་པས་བརྟེན།། སྒྱིད་ཁུང་བཀུག་ལ་གཡོག་བཅས་རས་ཀྱིས་བཅིང་།། ལག་གཡས་སོར་མོ་ལྟེ་འོག་གཡོན་ནས་བཙིར།། གཡོན་པའི་གུང་མོས་གཞང་ཁར་རྡེའུ་བསྒུག། ཆུ་རྩ་སྲོག་རྩ་སྲིད་རྩ་ལས་བྱོལ་བའི།། མདུན་གསང་ཟུར་གསང་རྒྱབ་གསང་གར་ཁུགས་སར།། རྡེའུ་བཙལ་ལ་གཙགས་ཀྱིས་ལེགས་དྲལ་ཏེ།། ཆ་དཔྱད་སྦྲུལ་མགོ་ལྟ་བུས་དབྱུང་བར་བྱ།། ཆུ་དྲོན་ནང་སྤྱིང་རྨ་ལ་སྦྲང་རྩི་བྱུག། བུ་རམ་སྦྲང་བྱིན་ནས་ཐུག་མར་བཅས་བླུད།། ཞག་བདུན་འདས་ནས་གཅིན་ལམ་མ་འགྱུར་ན།། རྨ་དེ་སྤྲ་བས་བསྲེག་ཅིང་ཕྱིང་པས་བདུག། རྟ་ཞོན་ཉལ་པོ་རི་ཤིང་འཛེག་པ་དང་།། ཆུ་ཡི་ལས་དང་རླན་སྟེང་ལོ་དུས་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆུ་འགགས་གསོ་བའི་ལེའུ་སྟེ་ལྔ་བཅུ་རྩ་བཞི་པའོ།། །།

X