//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་ལྔ་པ། གཅིན་སྙི་བའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:16:59 ཀློག་གྲངས། 21 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གཅིན་སྙིའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།།རྒྱུ་རྐྱེན་ལན་ཚ་མངར་བསིལ་ལྕི་བའི་ཟས།། རླན་ཅན་མལ་འདུག་བད་ཀན་ཚིལ་འཕེལ་བ།། ལྒང་པར་ཟགས་པས་ཟ་ཁུ་སྐྱེད་པར་བྱེད།།དབྱེ་བ་བད་མཁྲིས་རླུང་དང་རྣམ་པ་གསུམ།། བད་ཀན་ཟ་ཁུ་ཆུ་ཆང་བུར་ཤིང་དང་།། གར་པོ་འབྲས་ཕྱེ་ཁུ་ཆུ་བྱེ་མ་དང་།། བསིལ་དང་བགས་འབྱུང་ཁ་ཆུ་བཅུ་རུ་བཤད།། མཁྲིས་པའི་ཟ་ཁུ་ནས་ཚིག་སྣག་ཚ་དང་།། སྔོན་པོ་སྐྱེར་ཁུ་བཙོད་ཁུ་ཁྲག་འདྲ་དྲུག། རླུང་གྱུར་རྐང་ཞག་གླང་ཆེན་སྦྲང་འདྲ་བཞི།། ཟ་ཁུ་ཉི་ཤུ་གཅིན་སྙིའི་ནད་རིགས་ཡིན།། དེ་རྟགས་མངོན་ཚུལ་མལ་སྟན་གཉིད་ལ་རྩི།། རྔུལ་མང་དྲི་མནམ་སྐྲ་དང་སེན་མོ་རིང་།། ཁ་མངར་གྲེ་བ་རྐན་སྐམས་བསིལ་ལ་རྩི།། མཐིལ་བཞི་ཚ་ཞིང་གཅིན་མདོག་རྙོག་ཅན་འབྱུང་།། གཅིན་གྱི་ཤུལ་ལ་སྦྲང་མའི་ཚོགས་ཀུན་འདུ།། མངོན་ཚུལ་མི་གསལ་མདོག་ལ་ངེས་མ་ཡིན།། བད་གྱུར་ཁ་ཟས་མི་འཇུ་དང་ག་འགགས།། གཉིད་ཆེ་ལུད་པ་མང་ཞིང་སྐྱུག་པར་བྱེད།། མཁྲིས་གྱུར་ཕོ་མཚན་ལྒང་པར་ཟུག་ཅིང་ན།། ཁ་སྐམ་ལུས་ཚ་འཁྲུ་ཞིང་རིམས་ཀྱིས་འདེབས།། རླུང་གྱུར་སྙིང་འཕར་གཉིད་ཆུང་དབུགས་མི་བདེ།། འདར་གཟེར་ཟས་ལ་རྔམ་ཞིང་ལུད་པ་མང་།། ཀུན་ཀྱང་ཡལ་བར་བོར་ན་ཐོར་པ་བཅུ།། ཁམ་ཕོར་རུས་སྦལ་སྒུར་པོ་དྲ་བ་ཅན།། མེ་དབལ་སྲན་ཆུང་ཡུངས་ཀར་བ་ད་ར།། ལྦུ་བཅས་ཁོང་འབྲས་ཞེས་བྱ་གནད་སྟེང་འབྱུང་།། བཅོས་ཐབས་ཟ་ཁུ་བད་ཚིལ་གཙོ་བོར་བཅོས།། འབྲུ་རྙིང་སྐམ་སའི་ཤ་ལ་སོགས་པ་ཡི།། ཡང་ཞིང་རྩུབ་པའི་ཟས་སྐོམ་སྤྱོད་ལམ་བསྟེན།། བ་གཅིན་ལྕི་བ་ལས་བྱུང་ཁ་ཟས་བཟའ།། ངལ་དུབ་མང་དུ་སྤྱད་ཅིང་གཉིད་མི་ལོག། ཡང་ཞིང་རྩུབ་པའི་སྨན་གྱིས་དྲིལ་ཕྱིས་བྱ།། ཡུང་སྐྱེར་སྐྱུ་རུ་གཟེ་མའི་བསྡུས་ཐང་བཏང་།། འབྲས་གསུམ་ཆང་སྦངས་སྐམས་ཕྱེ་སྦྲང་སྦྱར་བཟའ།། བད་ཀན་ལས་གྱུར་ཟ་ཁུ་སྐྱུགས་བྱས་ལ།། སེང་ཕྲོམ་གླ་སྒང་ཨ་རུ་ར་ཐང་དང་།། པ་ཏྲ་བྱི་ཚེར་བྱི་ཏང་ག་ཡི་ཐང་།། སེང་ལྡེང་སྐྱེར་པ་བྱི་ཏང་ག་ཡི་ཐང་།། གང་རུང་སྦྲང་རྩི་སྦྱར་ལ་བཏང་བར་བྱ།། མཁྲིས་པའི་ཟ་ཁུ་སྦྱོངས་རྗེས་ཤ་ཁུས་བརྡ།། སྐྱེར་པ་སྐྱུ་རུ་སྦྲང་དང་སྦྱར་བ་འམ།། སླེ་ཏྲེས་སྐྱུ་རུ་སྦྲང་དང་སྦྱར་ལ་བཏང་།། དུག་མོ་ཉུང་དང་སྐྱེར་པ་ཙི་ཏྲ་ཀ། འབྲས་བུ་གསུམ་གྱི་བསྐོལ་ཁུ་བསླུད་པར་བྱ།། རླུང་གྱུར་འབྲས་བུ་གསུམ་དང་སྒྲོན་ཤིང་དང་།། སྐྱེར་པ་གླ་སྒང་མར་དང་སྦྱར་ལ་བཏང་།། ཟུངས་དང་འདྲེས་ཕྱིར་ཤིན་ཏུ་གསོ་དཀའ་ཡིན།། བླ་གཉན་ཐོར་པ་གཅིན་བསླུད་རྨ་ལྟར་གསོ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཅིན་སྙི་བའི་ནད་གསོ་བའི་ལེའུ་སྟེ་ལྔ་བཅུ་རྩ་ལྔ་པའོ།། །།

X